教育王國

標題: 九龍聖芳濟面試 [打印本頁]

作者: jackysophia 時間: 13-3-13 23:42 標題: 九龍聖芳濟面試

今天收到九龍聖芳濟面試信，3月23日中午1:30。不知會考甚麼，請問有冇過來人可分享一下，吾該。另請問是否全部申請者都有得面試?

作者: hklaw1013 時間: 13-3-14 08:47

回復 jackysophia 的帖子

恭喜！共喜！佢申請表上說明，只見110(約)，最好成績個100個加後10個有聯系(宗教信仰)。我仔仔就被佢絕了，不過唔緊要，我地預左！Good luck.

作者: Mokch 時間: 13-3-14 12:42

我仔上年考: 朗讀中英各一篇, 根據文章內容答問題, 另有英文閒談.

作者: jackysophia 時間: 13-3-14 20:18

回復 Mokch 的帖子

請問你仔仔是否在聖芳濟讀中一呢?可否說說這校的情況?老師/功課/測驗考試等。謝謝

作者: Mokch 時間: 13-3-15 10:22

我仔入唔到, 不過, 我覺得有D黑暗囉......我差不多最後走, 見副校長同個家長好熟咁, 兩個互講話希望下年見到你/你仔喇, 跟住個副校問佢仔叫咩名, 攞部手機出來篤篤篤, 我唔知成見事有無咩關連, 但每次諗起個仔入唔到, 我就諗起呢樣嘢, 有D耿耿於懷!

作者: chrischeung 時間: 13-3-15 22:51

回復 Mokch 的帖子

呢樣野度度都有,大家都系BAND ONE當然收過有關系家啦.由幼稚園,小學至中學都系咁..我識個家長因為識人系一間名小學教,可以系直收小一.

作者: jackysophia 時間: 13-3-18 00:23

回復 Mokch 的帖子

你仔仔已有得面試，證明他的成績也算吾錯，可能第一輪收吾到，你在大抽獎時是否也選聖芳濟做第一志願?如果係，收的機會也很大，這是小學老師說的.你仔仔最後也考入心儀學校嗎?謝謝

作者: vincentchiu888 時間: 13-3-18 00:45

回復 Mokch 的帖子

精英份子從來都是搶手貨，我有朋友細仔入咗九華，番學第一天都比DXX校長親自打電話來搶人，你見到果個唔係校友父親，就一定係有特異功能，捉倒重唔抱緊D咩！

作者: Mokch 時間: 13-3-18 15:18

我仔大抽獎都有選做第一志願, 但入唔到, 班主任話佢個隨機號碼應該好差! 之前升中主任話佢有八成機會入到, 除非佢個NO.好差..............我地老師都咁有把握, 考到嘅直資都唔去.......點合鬼知失望到死................後來去咗沙田區叩門, 但過程好辛苦! 我同老公都話唔會再同亞囡博

作者: crazycat 時間: 13-3-18 15:42

回復 Mokch 的帖子

請問妳兒子是band 1 生嗎? 第一志願都抽不中, 真的有點兒擔心.

作者: Mokch 時間: 13-3-18 16:01

老師話ONE尾TWO頭, 好MARGINAL, 但有得IN, 我相信係ONE囉, BTW, 佢班主任同我講我仔好唔好彩, 幾個差過佢嘅都入咗.........

作者: jackysophia 時間: 13-3-18 17:47

據知舊年聖芳濟收到9成幾band 1學生，Mokch你仔仔真係吾好彩!見你呢個case,我都好驚，雖然我仔都係band 1學生，但一到攪珠，世事難料!唉，難為了父母!!你也是油尖旺小學嗎？

作者: vincentchiu888 時間: 13-3-18 20:57

前年中咗招，冇宣傳，結果band 2生比率高咗，嚇到學校高層死，去年開始聖芳濟收生積極咗，重本大搞聯校匯演，重put哂上網，到處宣傳，小學校訪，邀請名校友演講，催谷校際比賽成績，校內又破天荒分精英班，重點培訓，呢D唔係佢地一向低調的做法。據聞今年中一班有幾個超級名校收咗都冇去讀，其中一個重係St Paul Co-Ed （不是聖保羅書院）一早收咗，我隔離屋個仔今年讀佢中一講嘅，都唔係幾信，希望有人求證一下，佢重話前兩天聖芳濟派人去了聯校奧數比賽輸咗比拔萃，平咗九華，激死咁話。我仔讀小五，已經留意咗佢好耐，如果証實佢係一間正增值學校，都想明年自行報佢。

作者: Mokch 時間: 13-3-18 22:23

我仔讀新油天。依家我同老公一諗起叩門就怕怕，好似d癲佬癲婆咁，聽到有學校有位就飛的士去！我地都有去叩返聖方濟，但上年有好多人留班，得一個叩門位，我地差不多第卅個填list，見到我地之前到嘅學生係介紹人個行填嘅咩咩校長，咩咩神父咁我地都知無望。仲有interview當日，副校都有同我講，叫我填佢地做第一志願，其實佢地都收咗好多band2生咁！

作者: jackysophia 時間: 13-3-19 07:19

回復 vincentchiu888 的帖子

我淨係知我仔間學校有學生成績好都寧選聖xx,都吾選九x!因九x太自由，加上去年DSE成績聖xx好似比九x還要好

作者: vincentchiu888 時間: 13-3-19 11:34

想入九華同入聖芳濟的都是同一類學生，是但一間都冇所謂。band 1頭都另有打算。其實九華同聖芳濟都面對同一危機，就是新貴學校的崛起，加上派位政策，已經把眾多名校的菱角砍去。至於華仁，去年為止都是我的首選，但最近負面新聞不斷，再比對近年學術和體育表現，令我無法不重新部署，我仔屬band1 中，體育有獎項。放九華第一，抽不到就淪不到聖芳濟，後悔莫及，如放聖芳濟第一，就算入不到都認命。不過正正是九華的自由風氣吸引我，我不認為這是不好，名校大都這樣。我隔離屋讀聖芳濟個仔都話堂堂瞓覺冇王管，功課少活動多，讀得好開心添。

作者: Mokch 時間: 13-3-19 12:41

我仔鍾意聖方濟係因為有佢鍾意嘅運動, 而我地就正正因為佢夠傳統, 唔太自由而選佢, 我仔唔係自動自覺個類, 諗住呢類學校先啱佢......點都好, 預祝大家都入到心儀嘅中學, 小朋友都讀得開開心心

作者: jackysophia 時間: 13-3-19 22:00

回復 vincentchiu888 的帖子

你仔仔也是油尖旺學生？基本上band 1學校都是靠學生及家長多過老師教，本以為英華有機會，誰知又失敗了，現只有寄望聖記及九華。我仔在校際運動比賽都有獎，希望幫到佢入九華，聖記不太著重運動，今個星期都是抱著試試的心態，随緣吧！

作者: vincentchiu888 時間: 13-3-20 11:21

回復 Mokch 的帖子

所謂 Band 1 或 Band 2 生都是以小六學術成績分類，你勿氣餒，如果你仔有體育成就，Form 2 可以再去敲門，我朋友前年考不入九華入了沙田band 2校，攞住沙田區校際游泳比賽冠軍再去敲九華，校長親自接見即收。

作者: Mokch 時間: 13-3-20 12:52

Thanks Vincent, 佢玩嘅運動較冷門，唔係咁易，而且我地唔係一定要佢讀名校，最緊要校風好，依家佢Ｄ同學都好樸素同平實，我仔讀得輕鬆又開心，我地都好放心，唔會諗轉校住ＬＵ，謝謝你！

作者: jackysophia 時間: 13-3-20 19:26

回復 vincentchiu888 的帖子

請問你朋友轉校九華讀得開心嗎？

作者: terencemak 時間: 13-3-23 12:25

   小兒現已中五了，越讀越開心，但越是高年班，quiz and test 就越多，有心理準備功課壓力越重。
      回想當年面試日，家長坐滿小食部大堂，等待囝囝面試表現，期間碰上英文科主任，跟她閒聊幾句，順便了解校內情況，當時剛巧小兒面試完畢走到我身旁，該主任即時捉住小兒傾談，氣氛非常好。
      臨走前當年袁校長在門口歡送，並刻意提醒家長在選校方面，必須以本校作為第一自願，否則機會極微。我相信校長的動機是盡收眼前所有 band one 生，而最近幾年聽講祗面試頭100交申請信學生，不失為好措施，所謂「非誠勿擾」，最後祝各家長好運，此校是值得投資六年光景的地方！

作者: jackysophia 時間: 13-3-23 16:37

回復 terencemak 的帖子

您好！terencemak,你指的中學是九華還是聖芳濟？因上一帖是問九華的情況

作者: terencemak 時間: 13-3-23 16:54

九龍聖芳濟書院

作者: jackysophia 時間: 13-3-23 18:45

terencemak謝謝分享！今天小兒有幸到聖芳濟面試，感覺也不錯。校舍雖小，但副校予人親切之感，去年有一半學生能入讀本地大學學位課程，成績有目共睹。希望小兒明年也能入讀。

作者: vincentchiu888 時間: 13-3-23 18:58

回復 jackysophia 的帖子

Sorry 今日先見到朋友個九華仔所以而家先覆到你。佢話開心到不得了，同小六好唔同完全冇壓力。佢重話游水叻，學校好重視佢。但係佢父親話佢日日同D同學玩到7，8點都唔番屋企，遲下要問問老師有D擔心咁講。其實呢D情況我都問過聖芳濟同學仔，情況都差唔多，萬聖節還是聖誕節前夕？重同同學玩通宵添，不過是在學校有師兄睇住。其他學校好似唔係咁。

作者: terencemak 時間: 13-3-23 19:18

不用客氣，小弟最近忙少上此網，但家住 SFX 附近，眼見學校油上深綠色，再指細看才知今天是面試日，抽空上來吹水，不如再舉一例子與有心人分享，去年小兒中四學期尾有兩科選修科 fail，收到家長信要補考，信內聲明不参加補考者或表現不理想者須辦退學，嚇得平日不太認真的小兒，差不多整個暑假躲在温習室讀書。我指出是平日苦口婆心叫他温書，都充耳不聞，但這制度可省回我不少力氣，但聽小兒講，每年有一大堆人補考，學校不會放過(放棄)他們。

作者: jackysophia 時間: 13-3-23 20:02

男校大多是這樣的，自由風，自由講，學生平日大多愛打波，愛游水，愛玩耍，但只要他們羣在一起的都是有能力，有目標的年輕人，相信他們的前景也是樂觀的。我也不希望小兒只顧讀書，我希望他能全面發展。今天回家後又收到華仁的面試信，現抱著平常心面對，兩間也是小兒的選擇，随緣吧！謝謝大家的分享！

作者: jackysophia 時間: 13-3-23 20:05

回復 vincentchiu888 的帖子

謝謝你啊！那麽你朋友兒子在九華的成績如何？能跟上嗎？

作者: miffy 時間: 13-3-24 11:55 標題: 引用：我仔讀新油天。依家我同老公一諗起叩門就怕

提示: 作者被禁止或刪除內容自動屏蔽

歡迎光臨教育王國 (/)