教育王國
標題: 為阿女抱不平 [打印本頁]
作者: may673999 時間: 12-10-22 23:36 標題: 為阿女抱不平
阿女今年是中一新生和今日是第一日參加學校的運動會，點知就發生不公平的事！學校通告話要穿整齊冬季運動服，但中一新生如未購買，可穿整齊夏季運動服（但學校係未換季）。阿女去到運動場入口，師兄師姐已經叫佢地企埋一邊，之後有個老師走過來問，點解唔著長褲？阿女話媽咪未買。老師問買書個日點解唔買？我個班1b個個都著長褲，點解你地唔係？之後轉身走佐仲叫佢地罰企半小時。佢地係無遮擋環境下企佐半個鐘曬到塊面紅晒，阿女仲要唔舒服！
點解學校講一套做一套？
俗語有云：「人比人；比死人！」點解老師就可以用自己班同其他班對比，攪到d小朋友都有對敵之心！
學校又無規定買書日一定要買埋冬夏季校服，老師咁講真係可笑！
買書買校服唔通係小朋友比錢，老師咁同佢地講，更可笑！
學校成日叫人唔好戴有色眼鏡睇學校同埋學生，但自己的老師就用有色眼鏡睇佢地，你叫家長有咩辦法唔張佢地標籤化，唉！可悲！
當然佢間學校係band 3啦，我都唔知佢點樣讀6年。問佢轉校好唔好，佢又話唔好！我都唔知點算？
作者: cellon 時間: 12-10-22 23:43
may673999 發表於 12-10-22 23:36 
阿女今年是中一新生和今日是第一日參加學校的運動會，點知就發生不公平的事！學校通告話要穿整齊冬季運動服 ...
作者: cow 時間: 12-10-23 00:15
本帖最後由 cow 於 12-10-23 00:29 編輯
//若學校通告寫明中一新生可穿整齊夏季運動服，可以寫信向學校反映。
同意.
//但學校係未換季, 要穿整齊冬季運動服
以香港今時今日的氣溫, 根本就不應限制學生一定要換季.
特別是在運動會, 冬季應可穿夏季服. 在加上學校都未換季, 要的學生穿冬季服, 想熱死人咩.
作者: may673999 時間: 12-10-23 00:26
佢星期三是運動會最後一日，本人打算同阿女一齊去運動會，搵老師反映和理論！請大家比d意見！
作者: cow 時間: 12-10-23 00:30
請問學校通告有無寫明中一新生可穿整齊夏季運動服？
作者: may673999 時間: 12-10-23 00:31
我估學校係諗：你地跌第佐都無咁傷，咪可以唔需要有任何責任啩
作者: nickfather 時間: 12-10-23 00:35
阿女仲要在這讀下去,不要攪得太彊,
但都要同學校反映番,及給點意見!!
作者: ohnono 時間: 12-10-23 00:40
真係估唔到單是穿冬季校服定夏季校服都會有問題。
小朋友在小學時，若當天有體育堂，可穿體育服回校。但上了中學，若當天有體育堂，同學不可以穿體育服回校，而體育服需帶回校待體育堂時才換上體育服。
樓主這個情形好奇怪，奇怪在夏季體育服。學校於仍是大熱天的今日，容許同學穿冬季體育服往運動場，應該這類運動服是上身可能是衛衣一件，下穿長的運動褲。而同時，有比賽的同學可於比賽前換上各自的戰衣，我估都應該係短衫短褲的夏季運動服。
好了，沒有預備冬季運動服的同學，都不打緊，只要穿回夏季校服，不是夏季運動服的短衫短褲，是平常返學上堂的那一套，到場後待比賽前才換上你的夏季運動服出賽。這樣較合理。
中學不似得少學，很少中學容許同學穿著短褲(除了QC)出入學校或學校舉辦的活動、運動日。樓主可向學校瞭解詳細情形才為阿女抱不平都未遲。
作者: ohnono 時間: 12-10-23 00:40
本帖最後由 ohnono 於 12-10-23 00:42 編輯
重覆
---delete-----
作者: may673999 時間: 12-10-23 00:41
通告講明中一生係可以穿夏季運動服
作者: 701003 時間: 12-10-23 01:08 標題: 回覆：為阿女抱不平
大多數中學運動服都係長褲
短褲係pe堂時換上
買夏季運動服時一併買得到長、短褲同埋社衫、外套
你無買？
作者: talent2000 時間: 12-10-23 03:20
提示: 作者被禁止或刪除 內容自動屏蔽
作者: yovin 時間: 12-10-23 05:06
agree with talent 2000!
並告之真實:在成長的過程中，以至長大成人 , 這些不公平和不合理的事情時有發生。
面對如何處理逆境 , 是一問學問 , 要處理得好就必須博覧群書 , 取他人之經驗。
要減少不公平和不合理發生在自己身上 , 只有高學問或特別技能 , 但只能減少而不會完全设有。
給家長建議 : 還是不要在事件上插手 , 應一同前去找找書罷!
作者: longlokma 時間: 12-10-23 07:23 標題: 回覆：yovin 的帖子
好明白樓主的感受，自己孩子受罰必然十分心痛。若果事情是發生在小學，我也會贊成樓主向學校查詢清楚，不過不需要帶同孩子一起去，以免情況尷尬；但若事情是發生在中學，我個人認爲家長便儘量不要插手了，因為中學生應該要學習面對和處理逆境和各種問題，即使受不公平對待也是一種人生訓練。另外，請問你孩子當時有否向該老師提及通告內容呢？如有而該老師仍無理堅持，就當是讓孩子訓練EQ；如孩子根本沒有告訴老師通告內容，就教孩子在有需要的時候須主動爲自己解釋。
純粹個人意見，如不同意，請別介懷。
作者: CrabPincers 時間: 12-10-23 09:31 標題: 回覆：為阿女抱不平
未開學，已經有家長提醒，學校運動會是要著長運動褲同風褸，所以雖然未冬季，都要買定，去到買校服店，店員都提醒，要買長褲
作者: Yanamami 時間: 12-10-23 09:58
本帖最後由 Yanamami 於 12-10-23 10:07 編輯
我女中學, 當日有PE/ 運動會可直接著PE服, 但校長表明唔可以著短褲係街度走來走去, 所以就算夏天都一定要著長PE褲.
作者: khmama 時間: 12-10-23 10:04 標題: 回覆：may673999 的帖子
老師帶咗咩有色眼鏡睇你囡囡？成件事我覺得係校方內部溝通不足，以致有啲老師唔知可以著短褲，如果得幾個學生著短褲都幾突出。去到中學家長要做聆聽者，與其興沖沖去理論，何不趁機同囡囡去討論一番？
作者: 88muimui 時間: 12-10-23 10:38
我覺得係小事一椿, 無謂插手啦!
作者: 杰杰媽媽 時間: 12-10-23 12:05
本帖最後由 杰杰媽媽 於 12-10-23 12:05 編輯
我覺得間間學校都一定有一些老師處事特別不同, 只要理解清楚成件事就可以了。大人&小朋友都再了解/8下學校平時日子著校服既"習慣"，間間學校都一定有D特別，咁就唔會做成小朋友出現比較特殊既情況。
今次問題只係一開學大家溝通可能出現問題所造成。
PS: 多數學校就算比著PE衫出入學校,都一定要短衫+長褲OR +運動外套(唔可以著冷衫) ，所以一早要咩都買晒,冇分冬天定夏天, 我自己以前讀書都已經係咁
作者: vincher 時間: 12-10-23 12:09
回復 ohnono 的帖子
agree...始終上了中学，大型户外活動，唔会俾学生穿短褲，其實都是怕走光!不過，新生家長鬼知最好買埋長運動服!怕几个月，又長高嘛!因此，向校方反映，也合理!但，注意措辞、語氣!
作者: ZZdaphne 時間: 12-10-23 18:06
vincher 發表於 12-10-23 12:09
回復 ohnono 的帖子
agree...始終上了中学，大型户外活動，唔会俾学生穿短褲，其實都是怕走光!不過，新生 ...
同意, 唔好有"為阿女抱不平''的想法,
反而應該以''叫阿女要多了解多問, 你和學校多些溝通''為解決問題的最佳方法..
作者: like_travel 時間: 12-10-23 19:50
本帖最後由 like_travel 於 12-10-23 19:51 編輯
Quote : 告之真實:在成長的過程中，以至長大成人 , 這些不公平和不合理的事情時有發生。努力讚好些成績 F2 轉校.
真係金句 !
不單只 "不公平的事時有發生" , 即使係大人在職場都係無日無之地重覆地發生 ! 相信你我都賞唔小次不公平既事啦 !
樓主請開解女兒, 老師都係唔想你地走光, 或者佢唔明你地點解未買冬季校朋服(姐) !
趁機叫女兒加油, 讀好D書, 考好D 出年去一間更好既學校 ! 並告之將來出來做事, 一樣係會發生不公平既事, 人微言輕, 知識就是力量, 趁機鼓勵下佢 !
作者: cow 時間: 12-10-23 21:31
yovin 發表於 12-10-23 05:06 
agree with talent 2000!
並告之真實:在成長的過程中，以至長大成人 , 這些不公平和不合理的事情時有發生。
面對如何處理逆境 , 是一問學問 , 要處理得好就必須博覧群書 , 取他人之經驗。
要減少不公平和不合理發生在自己身上 , 只有高學問或特別技能 , 但只能減少而不會完全设有。
給家長建議 : 還是不要在事件上插手 , 應一同前去找找書罷!agree with talent 2000!
並告之真實:在成長的過程中，以至長大成人 , 這些不公平和不合理的事情時有發生 ...
這件事可能不是太嚴重, 但會影響女兒對"不合理事情發生在自己身上時", 會如何處理.
如果係我, 我會寫一封信給班主任, 副本送給校長, 說明通告講明中一生係可以穿夏季運動服, 為何女兒穿整齊夏季運動服會被罰, 是否自己誤解通告內容, 還是有別的原因. (當然事前要跟女兒商量).
作者: may673999 時間: 12-10-24 02:11
我唔希望阿女因為今次事件想歪了：「我點做都會被罰，久而久之，是但啦！咩都係你地d大人講晒啦！」跟著每件事都負面想法，咁就大鑊。明早一齊去運動會，不論結果如何，在此感謝大家給予的意見！
作者: talent2000 時間: 12-10-24 03:01
提示: 作者被禁止或刪除 內容自動屏蔽
作者: LML 時間: 12-10-24 03:39 標題: 回覆：may673999 的帖子
正面的想，這個是一個好的學習機會。
看清楚通告的內容，分析有理和無理的地方，怎樣解決問題。
如果處理得好，這以是一堂寶貴的課程。
返學除了學習智識，做人處事的學習也很重要。
作者: cow 時間: 12-10-24 09:19
may673999 發表於 12-10-24 02:11
我唔希望阿女因為今次事件想歪了：「我點做都會被罰，久而久之，是但啦！咩都係你地d大人講晒啦！」跟著每 ...
Melody(假名)與莊會會長發生齟齬。有人在Facebook把她的背心短褲近照，貼上卡通公仔Melody遮掩真人頭，再改圖放在facebook，圖中還加一句「好波」。Melody覺得很羞辱，向學院投訴。但學校一直拖，聲稱設立調查委員會，仲安排大教授處理，但佢哋表現得好束手無策，我決定出外求助。」
「我要求佢寫道歉信，但佢俾封道歉通知我，重申自己無錯，我唔罷休，要求佢再寫，而且要放上Facebook，但佢出古惑，開了個新嘅Facebook戶口將封信擺上去，無任何人睇到，學校竟然收貨，仲勸我要放低仇恨，向前行！」接手Melody個案的婦進決定上報至校長，事件擾攘了十個月，終獲正視，校方認定有性騷擾成份，要求會長正式寫道歉信及放上Facebook (今日am730)
作者: ha8mo 時間: 12-10-24 10:23
提示: 作者被禁止或刪除 內容自動屏蔽
作者: grace_xian 時間: 12-10-24 10:36
老實講我都好矛盾, 有時仔(小五)係學校都有些嘢係家長角度睇唔公平同埋唔合理的, 不過我都是忍, 因為小四前一定會和老師聯絡, 現在因為大嗰仔我覺得佢要學識自己處理, 所以忍住不干涉佢的事
有時忍唔住就只在家長與教師通訊上寫明, 等老師處理。
你囡囡中一, 第一次踏入中學, 我諗都係要主動關心,主動和老師溝通多一些好, 件事講完就過去, 無謂令自己同嗰囡唔開心。 同埋唔應該同嗰囡話轉校, 小小事就話轉其實係行唔通的,因為去到第二間學校未必能夠保證無同類事情發生,以我所知,中學真的是很嚴格,有好多嘢都要自己識執生。咩當係自己上咗堂課, 以後小心就好
作者: csy_ma 時間: 12-10-24 12:11
本帖最後由 csy_ma 於 12-10-24 12:16 編輯
我舉一個例吧？
舊年，我囡學校新生因為頭一天穿短褲上學，被記名，到學期終因該次無辜違規而拿不到多數學生都有的優點
。事緣我囡學校是容許穿體育服回校的，但不能穿短褲，這在中學，可以說是慣例，但剛升中的小學生多半不清楚。
到今年，班主任老師特地在未開學的家長會中，以上例提醒家長，囑小朋友勿穿短褲回校。但隨即有家長提出，我們訂校服時，根本未有運動長褲這選項。班主任老師亦立刻作出協調，謂既然校服未有訂，那會與校方跟進，讓中一小朋友可以穿短褲回校。
至此，事情算是解決了，但是，去年因首天錯穿短褲而＂損失＂了一個優點的同學，卻成了事情改進的犧牲品了。假如您是那位同學的家長，會怎樣處理呢？
就我囡以前小學的經驗，校方管理層和前線老師之間，有時候確實未必是溝通得很足，因為老師很多時候有先入為主的觀念，不是收發通知的班主任老師，亦未必仔細研讀通告。在這時候，家長確實有需要請學校厘清標準，但是否要到投訴那個層次？則見仁見智吧。
一開始就跟學校分立對面的，對於學生本身並無好處。
我囡幼稚園時試過因校車的處理不當（開學不久的一個滂沱大雨中午，在非約定位置把她推出去，幸好那站有位好心的小學家長翻她手冊，致電予正在心急如焚等三歲大女兒下課的我們
。結果，剛好放假的老公致電到校車公司追究責任，要他們答應退回當月車費，並保證相類事件不會再次發生）。校長翌日跟接囡上學的我再次當面道歉，我覺得事情既已解決了（我把校車公司退回給我們的支票留了兩年，在囡囡K3畢業時退回，那三年間囡囡得到校車保姆的很好照顧），就跟她聊其他的。結果更了解學校，也讓學校更了解我囡，那就是好的開始。
假如道理在己方，其實不用聲嘶力竭的？小學我碰過有位家長，投訴她女兒班主任處事不當，事情鬧大了，校方管理層介入並處理了；但該位被投訴老師可能心生不憤，到高年級監考該涉事學生考試時，竟誣指學生"出貓"（只是出言，沒有懲罰，但也影響該生考試心情）……家長也自然為此事投訴，但是最終受害的，是誰呢？所以同意Grace_xian所講，溝通是要的，但要注意立場和心情，那主要是溝通不足的問題，而非誰對誰錯，讓家校由開始就有更良好的互動。
作者: ohnono 時間: 12-10-24 12:40
小學第一個六年在跌跌碰碰中又渡過了。來到第二個六年，在中學生活中，可以好享受、好精彩，放學可以跟同學打波，一起做功課，不一定是活在怨和恨底下。係小朋友享受公平前，我地可以令小朋友去學習公平，阿B女一星期可以有五百元零用，但我只會給三百，小朋有會唔開心，點解人地有五百，我得三百。唔通佢又四圍唱話父母唔好。有時小朋友做錯事，我會罰，但偏偏他的同學的父母好少理佢，所以唔知，亦唔罰。他會覺得我地父母好唔公平。為甚麼我地可以做到對外要公平，對內卻可以不斷制造唔公平。
原來公平會付出代價，窮我們一生之力，都係想追求公平，你住半山，點解我要住山腳。有人一出世已註定不公平，點解要我生於一個貧窮之家、點解要我冇手冇腳、點解我咁多病痛，唔可以像其他小朋友一樣去踢波、游水！你去爭取唔一定可以改變命運，只可說是爭取過，不公平仍然存在，隨著年處愈大，你遇到的不公平只會多，不會減，因為連僅有的資源你都搶輸給年輕的小伙子。相反不公平唔一定係負面，當你知道你憑著幸運加努力，可以獲得比對手多的時候，你不但不會怨，反而會向你的對手偷笑，又會不停制造更多的不公平！
我好理解樓主的想法「我點做都會罰！」。小朋友活在向別人交代的陰影下，佢只會諗點樣唔駛比人罰，唔係好像其他小朋友只會諗我點樣可以比人讚！父母對小朋友的關心本來係好，但發展至在家內裝上閉路電視以求監察小朋友的起居，有沒有做功課，我肯定在鏡頭背後，你會大嚇一驚！
我記得有家長曾為學校要罰連坐而大怒，要跟老師、校長理論，甚至轉校。連坐公平嗎？在小朋友成長過程中，我寧願讓他學習，到有一天，他犯錯了，他知道會連累其他同學，他會對不起其他同學。
有家長講得對，不要懷著抱不平的心態去對待這件事，誓要你死我忙的對抗性態度只會加深互不信任。君子有所為有所不為，先瞭解事情，跟老師和孩子多作溝通先。孩子需要我地的鼓勵，就算點做都錯，又有甚麼大不了，只要父母認同小朋友就已經足夠！
作者: may673999 時間: 12-10-25 03:11
結果：今日她沒有被罰，可能有家長係到關係。跟著找班主任話我想幫小朋友了解第一日運動日被罰的事。開場白緊係話：「反問阿女自己是否穿著標準的校服先，如果唔係，被老師罰係應該的；如果係，最多幫你了解一下咩事。（老師好似好認同點晒頭）」跟著回應係學校溝通不足，仲識得講話通知上寫明中一先可以，而老師話佢到下午才了解發生咩事！仲話我可以寫信去學校反映。我見老師咁回應，又想阿女之後的中學生涯好過d；又要留有餘地比老師同學校，我就此作罷。
離開時專登企係入口留意有無同學因為整齊夏季服但無家長在旁的中一生被罰，剛巧見到一個男同學，個子細小，應該係中一，見佢被師姐上前問佐一句就比佢入去，這足已証明是溝通問題。
等阿女放學後解釋比佢聽，同埋叫佢以後有問題要自己嘗試解決，因為你已經是中學生，不能凡事由父母幫手解決，她接受了！
在此感謝各位給我的意見，令我盡量取其平衡，阿女又好過d又可比番幾分薄面老師，無言感激！
| 歡迎光臨 教育王國 (/) |
Powered by Discuz! X1.5 |