教育王國

標題: 報直私小學有咩策略？ [打印本頁]

作者: febbiewan 時間: 昨天 16:37 標題: 報直私小學有咩策略？

想請教一下過來人你哋通常會報幾多間直私小學？你哋係會淨係報啱小朋友性格嘅小學/傳統同活動式都會報？請問有冇人可以分享一下經驗？

作者: HYAT 時間: 昨天 18:00

當年報咗4間, 係根據小朋友嘅喜好而決定,
佢鍾意英文, 所以揀咗啲以英文為主要教學嘅學校,
再睇下小朋友受唔受谷, 鍾意咩教學環境,
學校係咪龍校, 升中數據, 升中學校嘅BANDING呀咁,
最後揀咗4間, 諗住唔得就讀返津校,
結果係2間1ST IN後無下文, 1間WAITING後無下文, 得1間正取,
如果主要係TARGET直私, 可以報多幾間提高命中率嘅,
不過我覺得又唔好濫竽充數, 報太多去INTERVIEW大人細路都辛苦..

作者: RainyRice 時間: 昨天 21:12 標題: 回覆樓主：

本帖最後由 RainyRice 於 26-6-1 21:35 編輯

淨5間［報10間，去8間；中途有offer & 知道家庭偏好後，有3間都冇去2/3面，因為寧願大抽獎。］報幾多間都要睇你住那區有沒有心儀津小，及抽/叩入的機率；甚至你有乜嘢backup plan （IS/出國）。
小朋友性格應該傳統/新派都可以。反而注重學校文化風氣、校長老師校工、宗教、面試時對學校的感受多些。
其他位考慮的因素：教學模式（唔介意傳統，但唔想谷谷）、全人教學、升中、學制、升學支援、男/女（冇所謂）、地點（唔適合嘅唔會報，睇吓自己可唔可以搬屋）…..基本上唔符合要求嘅都冇報。

個人認為揀4-5間心儀、1-2間相對容易入的，有啲朋友極力推薦都會報咗先再研究學校適唔適合，再諗定大抽獎策略。預備定有一兩間可能會撞時間或者小朋友唔舒服而放棄唔去。其實去4間面試，每間幾轉，已經好夠好攰。

反正有啲學校，包括其中一間3C的報名日期比較遲，有啲仲有第二輪報名，如果到時面試未如理想又唔想抽獎，可以再考慮報名。

歡迎光臨教育王國 (/)