教育王國

標題: 1成中學生曾想自殺 Band 1校高危 [打印本頁]

作者: elbar    時間: 18-4-4 13:41     標題: 1成中學生曾想自殺 Band 1校高危

有社工指,中學生的情緒問題由外顯變內隱,比以前更難以察覺。(iStock)


近年學生自殺個案上升令人關注。有團體向全港駐中學社工作問卷調查,發現經社工處理的2.9萬個案中,有8%即約2300宗個案的中學生曾想過自殺,有20%即近6,000宗個案的學生有精神健康問題,而來自第一組別(band 1)的學校學生,因承受學業壓力,出現自殺念頭、或有精神健康問題的學生比例,都比其他2組別學生高。


社聯聯同學校社會工作服務網絡去年7月至10月邀請全港駐中學社工填寫問卷,共收回419份問卷,覆蓋全港9成中學,共跟進29,726個案。結果發現,有2成共5,945宗個案屬「精神健康個案」,而有8%共2,321個案為「自殺問題個案」。


調查亦發現,「精神健康個案」中,來自第一組別學校的佔40%,較第二組別的34.9%和第三組別的25.1%為高;而「自殺問題個案」方面,來自第一組別學校有37%,也比第二組別的35%和第三組別的28%為高。社聯業務總監黃健偉表示,第一組別學校對學生學業要求較高,競爭氛圍激烈,故承受更大壓力。


有中二女生集體自殘


學校社會工作服務網絡副主席方詠恩指,曾有一群共5至6名中二女生集體「鎅手」,其中有人將「鎅手」照片放上網,同學看見後告知老師,老師與該群女生逐一見面,發現當中一半覺得「好玩」,另一半則感不開心以此宣洩。方指,以往學生情緒問題都偏向「外顯」,如在學校發脾氣,但現今都偏向「內隱」,故需更多人手與學生溝通,了解其內心世界。


但調查發現,社工全年平均要用19小時去跟進每宗個案,但以現時人手計算,每個案平均只有14.2小時服務時數,社工在處理自殺問題個案時,更平均需33小時,比平均14.2小時多出1.7倍。學校社會工作服務網絡副主席盧松標指,自殺個案複雜,不少社工以私人時間處理,工作量大。


社聯業務總監黃健偉






作者: elbar    時間: 18-4-4 13:44

做好期望管理 減Band 1生壓力(星島社論)

  一項成功訪問了全港九成官津中學駐校社工的問卷調查顯示,收取第一組別學生的學校(即俗稱Band 1中學)的學生精神健康問題個案,比其他學校為高。調查建議增加社工人手和縮短精神科門診輪候期。同樣重要的是,教職員和家長都需適度調整學生壓力,並且設法促進學生正面思維,甚至化部分壓力為動力。

  社會服務聯會在去年暑期進行全港首次這類調查,成功訪問了四百多所接受政府「一校一社工」資助的中學駐校社工。他們在上一學年處理了近三萬宗個案,當中近六千宗屬於精神健康個案,二千三百多宗為自殺問題個案,此中八成與精神健康個案重疊。

  社聯認為這數據只是冰山一角,實際上還有很多精神健康出現問題的學生,沒有求助和沒有被發現。

  要求高競爭烈 精神困擾

  這個調查,首次以數據證實了學校前線社工早已觀察到的現象,就是學校收生組別愈高,其學生精神健康問題比例就愈大。六千宗精神健康問題個案中,來自第一組別學校的就佔了四成,這組別學校的學生並且佔自殺問題個案的三成七。

  過去不少成績和品行俱不俗的學生自殺或企圖自殺,其中一個解釋,是一些覺得自己成績已「無藥可救」的學生,反而在讀書方面沒有甚麼心理包袱,而第一組別學校收取的學生,本來成績比較好,學校、家長和自己都有較高的期望和要求,校內「高手林立」又形成更激烈的競爭環境,壓力比較大。

  不少學生列學業為最大的壓力源頭,有些人為此感到精神困擾,睡眠也不好,反過來又影響到學習,形成惡性循環。青少年處於心理、生理、社交和智力發展的明顯改變時期,壓力形成發展失衡,如果加上家庭、社交或戀愛問題,產生的情緒和精神問題更加複雜。

  調查列出現時學校社工處理一宗個案的平均時間,指出嚴重不足,希望可以由現時每校平均一點二個社工進展至「一校兩社工」,又指出現時非自殺問題個案的「穩定新症」公立精神科服務輪候時間由三個多月至兩年多不等,希望對學生有充分的即時支援。

  求突破過程 要練就平衡

  在協助學生方面,教師可以擔任重要角色,他們與學生接觸的時間多,容易得到學生信任,應該接受一定程度的輔導訓練,包括識別有精神健康問題的學生,以及處理簡單個案的技巧,至於複雜個案則交由社工跟進。

  預防勝於治療,當局正推行全港性質的心理健康推廣「好心情」三年計畫,提出與人分享、正面思維、享受生活的三套攻略,學校可以圍繞這主題開設學生甚至家長工作坊。

  家長望子成龍是正常心態,學生對自己有要求,設法超越和突破自己,也是好事,不過,面對挑戰的過程,也是逐步了解摸索自己能力程度的過程,壓力往往來自對不勝其任的憂慮,紓解壓力,就要放開心懷,做好期望管理,透過摸索過程中的成敗得失,尋求適合自己個人能力的平衡定位。



作者: 李大人    時間: 18-4-4 13:49

提示: 作者被禁止或刪除 內容自動屏蔽
作者: NeoMom    時間: 18-4-4 18:01

我覺得只係有D團體借呢個主題來為自己爭取利益, 老實講, 我唔覺得增加一個社工可以對學生壓力及自殺有咩幫助, 好多所謂註校社工只做輕can野, 遇到大鑊野只顧自己點脫身使日後如爆大鑊都唔洗上身

作者: tutik    時間: 18-4-4 18:22

NeoMom 發表於 18-4-4 18:01
我覺得只係有D團體借呢個主題來為自己爭取利益, 老實講, 我唔覺得增加一個社工可以對學生壓力及自殺有咩幫 ...

正確,經歷話我知社工跟本幫不上忙。如小朋友因學業、社交、老師關係緊張時,社工只會單邊跟小朋友輔導,可能跟老師在校內地位懸殊,老師跟本唔會理會班社工,曾有社工坦然跟我說,若問題出在某一、兩位老師上,她亦幫不上忙。

作者: Yanamami    時間: 18-4-4 18:37

註校社工是花瓶
作者: littlelamma    時間: 18-4-8 08:44

這些家長真的要關心,謝謝分享
作者: b3410    時間: 18-4-8 09:08

tutik 發表於 18-4-4 18:22
正確,經歷話我知社工跟本幫不上忙。如小朋友因學業、社交、老師關係緊張時,社工只會單邊跟小朋友輔導, ...
有經驗,有心做的社工應該好幫到手。不過,學校的經費有限,未必請到。
老師的問題,校長都未必解決到。
囡囡小學時,朋友因為學業問題唔開心,有一段時間,小息時一直陪她去搵社工,玩小遊戲等等,開心好多。


作者: Charlotte_mom    時間: 18-4-8 11:37     標題: 回覆樓主

中學生唔係小學雞,社工或老師都好難埋手(有時自己父母都唔知自己個仔唸咩啦)
又薦社工報串,又驚同學知,又驚見家長,於是話無事!社工咪close file囉唔通背後靜靜留意咩

作者: Yanamami    時間: 18-4-8 12:16

Charlotte_mom 發表於 18-4-8 11:37
中學生唔係小學雞,社工或老師都好難埋手(有時自己父母都唔知自己個仔唸咩啦)
又薦社工報串,又驚同學知 ...
交心需要信任,需要时间~中学生好难同个三唔識七既社工交心。初中時阿女学校有講座,都係叫同学有心事有难处要同信得过既家人、朋友、老師或社工講。我觉得身边接近既人关係親密,多留意心理生理变化,比多星期只出现係学校两日既社工有效。
作者: 王家爸爸    時間: 18-4-8 12:25

李大人 發表於 18-4-4 13:49
EK家長只重成績,只會話呢批學生,唔適合讀Band1
又唔一定係家長只重成績。只係B1C、邊緣學校想保持英中地位,無辦法唔谷。教育制度既問題。
作者: 王家爸爸    時間: 18-4-8 12:30

NeoMom 發表於 18-4-4 18:01
我覺得只係有D團體借呢個主題來為自己爭取利益, 老實講, 我唔覺得增加一個社工可以對學生壓力及自殺有咩幫 ...
呢個係部分原因,但係唔係主要原因。某啲團體,借題爭取資源令問題惡化。其實增加老師比例比增加社工更有效。


作者: 洋蔥頭媽咪    時間: 18-4-8 12:40

本帖最後由 洋蔥頭媽咪 於 18-4-8 12:43 編輯

中學階段我覺得好老師比起社工重要得多,所以我自己為兒子選校時都有考慮,由其班主任十分重要,作為家長亦要多與子女溝通,對孩子關心/支援絕對不能少。
作者: Arabellahk    時間: 18-4-8 12:56

elbar 發表於 18-4-4 13:41
有社工指,中學生的情緒問題由外顯變內隱,比以前更難以察覺。(iStock)
近年學生自殺個案上升令人關注。 ...
這個標題很有問題,有誇大成份。

作者: Soundervolt    時間: 18-4-8 13:31     標題: 回覆樓主:

本帖最後由 Soundervolt 於 18-4-8 16:24 編輯

子女從小跟父母建立良好溝通關係最重要,去到社工只可以處理補救問題。


作者: HM168    時間: 18-4-8 14:19

Arabellahk 發表於 18-4-8 12:56
這個標題很有問題,有誇大成份。

沒有跨大,朋友係医院兒科見很多這類case

作者: kkhon    時間: 18-4-8 14:47

讀書啫⋯⋯吾使搵命搏喎,真正要輔導的是家長
作者: 王家爸爸    時間: 18-4-8 16:10

Arabellahk 發表於 18-4-8 12:56
這個標題很有問題,有誇大成份。
報紙佬係要嘩眾取寵先有人睇。
作者: daisy17772    時間: 18-4-8 16:27

NeoMom 發表於 18-4-4 18:01
我覺得只係有D團體借呢個主題來為自己爭取利益, 老實講, 我唔覺得增加一個社工可以對學生壓力及自殺有咩幫 ...

值得留意的不是標題問題,是社工提出的資料顯示,反映band 1 學生有更大壓力,不好處理能引致的問題。

有人拿出數據話呢D說法錯嗎?  你可以話並不是增加社工就能解決,但 數據所顯示出的 情況 的確值得關注。

作者: Yanamami    時間: 18-4-8 16:30

本帖最後由 Yanamami 於 18-4-8 16:33 編輯
Arabellahk 發表於 18-4-8 12:56
這個標題很有問題,有誇大成份。

未必係誇大,更未必关教育制度事……標題指band1校学生,唔仔細想会以偏概全。我感觉係錯配,本身能力不足但又碌入比自己可应付既band1中学,或者小学靠補习靠谷到band1成績入,又或者言文底弱,跟唔上自然压力大,再俾屋企逼下……真正band1生,应付自如,怎会压力大到要死?除非佢自己本身性格便然,事事要求完美,自己逼自己去頂峰……
作者: daisy17772    時間: 18-4-8 16:42     標題: 回覆樓主:

本帖最後由 daisy17772 於 18-4-8 16:49 編輯

本帖最後由 daisy17772 於 18-4-8 16:48 編輯

有好多家長認為社工沒有作用, 但係我看到嘅就不一樣。但我認為視乎家長如何同仔女溝通,和作出指導。 例子有D家長, 唔知係咪唔會鼓勵 仔女搵社工, 或者畀佢哋覺得咁樣做係inferior。我自己做鼓勵仔女主動搵社工 ,唔需要害怕 老師,又或者 覺得同社工講適合過同父母講,就去揾社工傾。父母demonstrate 點樣既態度好重要。 學校就算有再好嘅校社工 ,學生無被鼓勵的情況下, 有等於冇啦。

我女的學校社工對於班女都有 疏導作用。有D真係當佢係傾談對象,有時一D問題可能揾人傾下就心理上好好多。佢地同學見另外同學心裏不舒服,都叫或陪佢去揾社工。一念之差,有嗰人係學校幫下眼睇下,都好D。

作者: Soundervolt    時間: 18-4-8 16:42

Yanamami 發表於 18-4-8 16:30
未必係誇大,更未必关教育制度事……標題指band1校学生,唔仔細想会以偏概全。我感觉係錯配,本身能力不足 ...

本帖最後由 Soundervolt 於 18-4-8 16:50 編輯


從小開始陪太子讀書嘅家庭最易出事,呢類家長對子女成績比較緊張,期望比較大,但又唔願放手,來自父母嘅壓力自然唔會少。


作者: daisy17772    時間: 18-4-8 16:52

Yanamami 發表於 18-4-8 16:30
未必係誇大,更未必关教育制度事……標題指band1校学生,唔仔細想会以偏概全。我感觉係錯配,本身能力不足 ...

根據過往資料, 就算係band1生 ,升咗上中大讀神科,一樣自殺。

作者: daisy17772    時間: 18-4-8 17:09     標題: 回覆樓主:

本帖最後由 daisy17772 於 18-4-8 17:10 編輯

我見過有中學生有輕生之念,話係學校被老師要求做D佢認為不合理的事情,但好明顯佢唔揾家長傾,又唔揾社工,更不敢跟老師反映,這正就是推自已埋 牆角的情況。呢D情況多出現於高中生,因面子唔揾社工,老師又成日話佢地要學自已解決,唔好成日揾父母出面,令D學生一個人面對,危機就出現。

我聽過有D家長同個女講,學校有什麼事自已解決,你同我講,我都唔會揾老師傾。仔女聽到你咁講,遇到問題又點會話你知。就係無溝通law.中學階段佢哋係法律上 係兒童或者少年。 其實大人有冇諗過佢哋自己喺工作上, 唔通所有嘢都係自己解決,冇搵老闆出面?

學生求學期間遇到問題 ,不外乎 學業成績 ,除此之外 在學校,老師 又何嘗 沒有帶畀佢哋壓力,在家庭也可能有壓力。

作者: 1998Ruby1998    時間: 18-4-8 17:36

回覆 daisy17772 的帖子

10 個中學生有 8 個都唔鍾意社工。原因係社工會出賣資料,我自己都經歷過,以為社工信得過,點知轉個頭就同我班主任講,班主任就同返我父母講。咁即係我返到屋企又會畀人鬧,問題依然存在,只係個波不斷拋來拋去,最後都係要靠自己解決/捱過。呢個惡性循環先係令到我地唔鍾意社工,通常都唔係關乎面子問題(已經冇曬面冇自尊,仲有咩面子問題?)。
作者: Charlotte_mom    時間: 18-4-8 18:28

Yanamami 發表於 18-4-8 12:16
交心需要信任,需要时间~中学生好难同个三唔識七既社工交心。初中時阿女学校有講座,都係叫同学有心事有难 ...

我地長駐tim,又幫到幾多?
要社工跟進嘅個案,好多時係需要老師/家長介入,但十幾歲最忌就係呢d,好難打開心窗
老土講,傾兩傾就抒發到的話,就唔會咁多人攪到要睇精神科啦

作者: Charlotte_mom    時間: 18-4-8 18:36     標題: 回覆樓主

我仔sen,考試可安排特別室同加長時間
今年開學簽form,學校問需唔需要支援呀,同唔同意同班主任交換資料呀,我都有問我仔點睇,我仔長期case慣左就話ok,佢ok我至填ok,始終佢已大個仔我要尊重佢決定
但佢特別同我講,唔要考試去特別室,唔要加時,佢唔想人地覺得佢有特別待遇
長期客仔都有抗拒嘅時候,何況唔係長期客仔呢?

真係要靠老師同家長細心把關,有咩唔妥要好好地同仔女傾下

咁又當然,如果學生本身同老師/家長之間已經無信任,咁就真係求助無門了(老師家長唔轉介,社工鬼識d學生咩)

作者: Yanamami    時間: 18-4-8 19:47

我大女间中学好关愛学生~DSE班主任同老師好留意学生情緒,上堂可边食零食飲野,老師又請全世界食雪糕,家長日又问女係屋企情况,更要每个家長靜靜雞寫張A4卡俾女,鼓勵佢,等班主任遲d可以俾番女睇……所以虽然考公开試係有压力,但大家心理都好平衡。
作者: daisy17772    時間: 18-4-8 20:04

Charlotte_mom 發表於 18-4-8 18:28
我地長駐tim,又幫到幾多?
要社工跟進嘅個案,好多時係需要老師/家長介入,但十幾歲最忌就係呢d,好難打 ...

是的,有頗多情況其實需要家長介入。我見成功處理的個案都是這樣。所以是有成功的例子,但要視乎家長的態度,合作與否,教育背景都有影響。。

至於你所說, 如果舒發下都幫到,就唔會咁多人要睇精神科, 這個我就極不同意。 倒返轉諗 ,可能其實有一啲細case ,就係學生已經搵途徑抒發咗,同學、老師、社工又好, 所以 呢D情況 已經被制止了。

係 心理輔導角度去睇, 第一時間要解決嘅並不是問題本身,而係當事人的情緒。 起臨床心理學, 教育心理學, 有一樣嘢就係學 疏導情緒, 係處理危機時好critical. 絕不能夠睇少抒發情緒。 情緒絕對影響判斷力、 事情嘅 準確性。

作者: 王家爸爸    時間: 18-4-8 20:05

Charlotte_mom 發表於 18-4-8 18:28
我地長駐tim,又幫到幾多?
要社工跟進嘅個案,好多時係需要老師/家長介入,但十幾歲最忌就係呢d,好難打 ...
社工跟進得唔好,傾得唔好,反而有反效果,而且會令小朋友尷尬(俾其他同學知道自己有問題)。而老師既不經意介入,效果會更好,因為當傾偈,又唔明顯,其他同學唔會發覺。


作者: miriam    時間: 18-4-8 20:15

1998Ruby1998 發表於 18-4-8 17:36
回覆 daisy17772 的帖子

10 個中學生有 8 個都唔鍾意社工。原因係社工會出賣資料,我自己都經歷過,以為社 ...
唔好講社工, 輔導主任都係一樣, 講完隨時將件事發大黎搞, 或者唔理, 真係多謝晒囉!

作者: daisy17772    時間: 18-4-8 20:20

miriam 發表於 18-4-8 20:15
唔好講社工, 輔導主任都係一樣, 講完隨時將件事發大黎搞, 或者唔理, 真係多謝晒囉!
...

其實輔導主任唔一定專業。

作者: miriam    時間: 18-4-8 20:25

朋友細佬經歷, 佢細佬應該係資優, 但班主任玩針對, 見家長時班主任同副校玩單打再針對, 搞到佢細佬怕左返學, 驚到嗌自殺同企跳, 學校出埋教育心理學家都搞唔掂.

校長怕搞出人命, 唔知同班主任加副校點傾喇, 對佢細佬 180 度轉變咋.
作者: Charlotte_mom    時間: 18-4-8 20:35

王家爸爸 發表於 18-4-8 20:05
社工跟進得唔好,傾得唔好,反而有反效果,而且會令小朋友尷尬(俾其他同學知道自己有問題)。而老師既不經 ...

聽過個好平常嘅case
老師不公平對待,學生唔開心,情緒有困擾搵社工傾,講好唔同老師講,第二日學生發現老師(就係大細超果個)已經知悉對話,真係勁老土又勁尷尬
個學生直頭覺得自己俾人出賣左,仲down多兩錢,當然極力宣傳叫人唔好搵社工傾心事,死硬!
一傳十十傳百,社工信譽歸零

作者: Charlotte_mom    時間: 18-4-8 20:38

daisy17772 發表於 18-4-8 20:04
是的,有頗多情況其實需要家長介入。我見成功處理的個案都是這樣。所以是有成功的例子,但要視乎家長的態 ...

我寫得衰。我唔應該話傾計抒發無用,只係想表達要解決事情需要多方面、從根源配合,唔係大家肯傾兩句就解決到

作者: daisy17772    時間: 18-4-8 20:46

1998Ruby1998 發表於 18-4-8 17:36
回覆 daisy17772 的帖子

10 個中學生有 8 個都唔鍾意社工。原因係社工會出賣資料,我自己都經歷過,以為社 ...

對於你親身經歷過感到被" 出賣", 深表同情。 人與人之間的關係, 信任就係根本。

無辦法,輔導的工作係人做同人有關的事情,人處理事情的質素所以會有參差。

社工做facilitation 時,有沒有取得當時人信任,與家長、學校溝通時,夠唔夠仔細,眉精眼企,懂得做有效溝通,"不只是溝通",都對處理事情有影響。取得信任不代表要完全迎合對方要求,專業都有底線。

一件事的處理手法看來被定性為 "出賣",能否透過有效溝通而理解為, 避免不可挽回的結局出現,與父母教育背景、心態,和社工的經驗,都有關係。

作者: ANChan59    時間: 18-4-8 21:53

HM168 發表於 18-4-8 14:19
沒有跨大,朋友係医院兒科見很多這類case

中学生去儿科?

作者: ANChan59    時間: 18-4-8 21:59     標題: 回覆樓主

我只见 Band 1 Band 2 只差两个%,为何只是 Band 1 有问题,我认为如果三份二中学生有自殺问题,是严重社会问题,不单单是学业问题。

家长们不要被传媒標题黨误導,以为只是 Band 1 ,所以一厢情愿以为是学业问题。

我亦不会完全相信社工这类调查,目的是为社工增加资源,增加影响力。

作者: HM168    時間: 18-4-8 22:07

ANChan59 發表於 18-4-8 21:53
中学生去儿科?

係under 19歲都是兒科

作者: Charlotte_mom    時間: 18-4-8 22:13

ANChan59 發表於 18-4-8 21:59
我只见 Band 1 Band 2 只差两个%,为何只是 Band 1 有问题,我认为如果三份二中学生有自殺问题,是严重社会 ...

突然醒起
有次聽個talk,講者係博士級人馬。
佢話有排發現阿仔唔開心,同阿仔傾心事,阿仔話,阿爸係博士,阿媽係碩士,如果我咩都無,咁點算呀
原來現今父母叻,對仔女本身已經係一種壓力

呢個theory在我老闆個女身上再被証實,又係阿爸博士,阿媽碩士,今次加個高材生阿哥。個妹覺得自己好弱,不停迫自己(真係情緒病急call家長果種)
爸媽有本事,俾嘅資源正常地會較好,學生唔係傻嘅點會唔知,父母對仔女就算無兜口兜面話有咩期望,稍為識唸嘅學生都會希望唔好辜負父母期望。在學生有挫折時好易將呢d「精神負擔」一次過蒸晒出黎
可能不少band one生都係咁,所以情緒困擾在b1生身上發生較多亦不無道理

作者: Yanamami    時間: 18-4-8 22:16

Charlotte_mom 發表於 18-4-8 22:13
突然醒起
有次聽個talk,講者係博士級人馬。
佢話有排發現阿仔唔開心,同阿仔傾心事,阿仔話,阿爸係博士 ...
真係睇人!又唔见陳sir屋企係禁?成屋博士~
作者: ANChan59    時間: 18-4-8 22:25

Charlotte_mom 發表於 18-4-8 22:13
突然醒起
有次聽個talk,講者係博士級人馬。
佢話有排發現阿仔唔開心,同阿仔傾心事,阿仔話,阿爸係博士 ...

照你所形容,我儿子肯定是高危一族!

都要“听其言,观其行”,小朋友要些时间才明白父母是否真心不介意!

就算父母在资源上提供合适的环境,不一定是抱不切实际的期望,可能只是尽自己能力,提供好的机会给他们。

作者: Charlotte_mom    時間: 18-4-8 22:39

ANChan59 發表於 18-4-8 22:25
照你所形容,我儿子肯定是高危一族!

都要“听其言,观其行”,小朋友要些时间才明白父母是否真心不介意 ...

唔係父母太大期望呀,怕學生仔有時唸埋一邊啫
我家小姐都一時時,前排考mock嚇鬼死我,情緒起伏勁大試過讀到半夜喊到豬頭咁話自己無用
而家DSE殺到埋身,都係騰,但反而無考mock時咁顛

我而家未訓都係做書僮+丫環咋

作者: Soundervolt    時間: 18-4-8 22:39

ANChan59 發表於 18-4-8 21:59
我只见 Band 1 Band 2 只差两个%,为何只是 Band 1 有问题,我认为如果三份二中学生有自殺问题,是严重社会 ...

有註校社工當然好過冇,但我亦唔認為每間學校請多一兩個社工可以解決到個問題,呢類業界自己做嘅調查唔多唔少都有既定agenda。

作者: daisy17772    時間: 18-4-8 23:54

Charlotte_mom 發表於 18-4-8 20:38
我寫得衰。我唔應該話傾計抒發無用,只係想表達要解決事情需要多方面、從根源配合,唔係大家肯傾兩句就解 ...

本帖最後由 daisy17772 於 18-4-8 23:56 編輯

你在職人仕,要照顧sen 既仔仔,真係少D心力都唔得。係家、校、社中,最重要的始終是家長與仔女的信任和關係。社工始終係外人,其質素不是在控制範圍內,所以家長自己做好溝通和把關最為關鍵。你同仔仔都有良好互信和溝通基礎,已係最有力的上方寶劍!

作者: Yanamami    時間: 18-4-8 23:54

Charlotte_mom 發表於 18-4-8 22:39
唔係父母太大期望呀,怕學生仔有時唸埋一邊啫
我家小姐都一時時,前排考mock嚇鬼死我,情緒起伏勁 ...
我家大小姐將压力發洩係我身上,盡情黑面、时刻投訴,成间屋最惡係佢,佢先唔会揾自己出氣……我忍……
作者: Soundervolt    時間: 18-4-8 23:58

Yanamami 發表於 18-4-8 23:54
我家大小姐將压力發洩係我身上,盡情黑面、时刻投訴,成间屋最惡係佢,佢先唔会揾自己出氣……我忍…… ...

咁您使唔使搵社工開解下您自己呀?

作者: Yanamami    時間: 18-4-9 00:04

本帖最後由 Yanamami 於 18-4-9 00:07 編輯
Soundervolt 發表於 18-4-8 23:58
咁您使唔使搵社工開解下您自己呀?
事過境遷 ,我又-條好漢~
作者: akys    時間: 18-4-9 01:01

其實有啲學校社工/EP真係唔夠,加啲總好過冇。佢哋根本唔夠時間跟咁多Cases,好多隱性問題生根本備受忽略。

而家好多獨子獨女家庭,冇得互相參考,諗野容易偏埋一邊。

作者: b3410    時間: 18-4-9 07:51

daisy17772 發表於 18-4-8 20:04
是的,有頗多情況其實需要家長介入。我見成功處理的個案都是這樣。所以是有成功的例子,但要視乎家長的態 ...
對,很多問題剛剛出現時,容易解決,可能需要的至少傾訴。當問題已經積攢到好大,無論邊個出手,都難處理。

所以一個專業,有有心,有經驗的社工,是幫到學生的。


作者: peggy    時間: 18-4-9 07:58

Charlotte_mom 發表於 18-4-8 22:39
唔係父母太大期望呀,怕學生仔有時唸埋一邊啫
我家小姐都一時時,前排考mock嚇鬼死我,情緒起伏勁 ...
早前我仔的情緒都起伏得好大,考mock前經常發脾氣亂掟野,有時又喊,全家都怕左佢。佢有讀障,所以好多壓力被自已,經社工同心理學家開導後,這排好左好多。現開始考DSE後,情緒反而穩定番
作者: Band5    時間: 18-4-9 09:14     標題: 回覆樓主:

好奇一問,學校冇分banding,社聯如何分來自第一二三組別學校?419間中學第一組別又佔多少?會唔會有200+自認B1?

中學生(S1-S6)點都唔只十萬個掛?2321個自殺問題個案嘅中學生又點會變到有1成嘅中學生曾想自殺?

作者: Charlotte_mom    時間: 18-4-9 09:39

peggy 發表於 18-4-9 07:58
早前我仔的情緒都起伏得好大,考mock前經常發脾氣亂掟野,有時又喊,全家都怕左佢。佢有讀障,所以好多壓力 ...

仔仔加油!努力過左呢關,再唸下條路點行。好在而家選擇多,一定有適合自己嘅

作者: ar_mak    時間: 18-4-9 09:59

提示: 作者被禁止或刪除 內容自動屏蔽
作者: ar_mak    時間: 18-4-9 10:04

提示: 作者被禁止或刪除 內容自動屏蔽
作者: Soundervolt    時間: 18-4-9 10:20

本帖最後由 Soundervolt 於 18-4-9 10:29 編輯
ar_mak 發表於 18-4-9 10:04
神校家長,請尊重一點,社工唔係做陪酒!

神級家長,乜家長覺得精神被受困擾唔係可以搵社工幫忙,而係去搵陪酒咩?可能您精神被受困擾時需要搵陪酒先至可以開解?睇嚟係閣下唔係好尊重社工呢個專業喎。

作者: little_yolky    時間: 18-4-9 10:27

Yanamami 發表於 18-4-9 00:04
事過境遷 ,我又-條好漢~
你仲有第二個喎。
作者: retriever    時間: 18-4-9 10:39

ar_mak 發表於 18-4-9 09:59
一個係唔夠,係要兩個。
有網友話社工是廢,基於呢個原罪,一個廢,就冇理由加多個廢。社工出生,係讀書考 ...


老實講, 我都有懷疑社工既作用...


以前劇集北斗星果D 外展社工形象好吸引, 實際接觸到社工, 發覺最重要作用係, 申請大部份公共社福服務要社工IN THE LOOP...

而另一方面接觸, 社工係好想開FILE...

始終都係一份公共機構既工作, 在制度, 程序, 指標內運作...


我都想知社工直接有咩作用.



作者: Yanamami    時間: 18-4-9 10:46

little_yolky 發表於 18-4-9 10:27
你仲有第二個喎。
大果个陰湿,乜都擺係心,又不擅表達,好煩~細果个炮仗頸,反而易handle.
作者: Soundervolt    時間: 18-4-9 10:56

retriever 發表於 18-4-9 10:39
老實講, 我都有懷疑社工既作用...

本帖最後由 Soundervolt 於 18-4-9 16:50 編輯

部份駐校社工本身係屬於校外嘅社福機構而唔係直屬於學校或政府派駐,就以阿仔學校為例,駐校社工屬於香港明愛,若果求助個案過多或太複雜時會有其他明愛社工及資源介入幫忙,所以問題未必關駐校社工人手問題。社工服務喺學校係有佢嘅價值,但效果好唔好就好睇社工嘅處事手法。


作者: HM168    時間: 18-4-9 11:06

Soundervolt 發表於 18-4-9 10:56
部份註校社工本身係屬於校外嘅社福機構而唔係直屬於學校或政府派註,就以阿仔學校為例,註校社工屬於香港 ...

貴校小、中學都有不同程度的小朋友要見社工,朋友都講不想自己小朋友入讀。

作者: Charlotte_mom    時間: 18-4-9 11:10

Soundervolt 發表於 18-4-9 10:56
本帖最後由 Soundervolt 於 18-4-9 11:09 編輯

部份註校社工本身係屬於校外嘅社福機構而唔係直屬於學校 ...

以我仔女果間為例
社工係年租,即每年(唔知個約幾耐)以招標形式「標」一個社福機構,由機構聘用同提供駐校社工,唔係學校直接員工
合作開嘅,每年都盡量提供返同一個社工,方便跟進

作者: retriever    時間: 18-4-9 11:17

本帖最後由 retriever 於 18-4-9 11:17 編輯
Soundervolt 發表於 18-4-8 16:42
本帖最後由 Soundervolt 於 18-4-8 16:50 編輯

同意...

但睇咁多帖. 似乎女既家長真係難D 放手...

因為女乖D 聽話D, 你跟你谷佢又有反應, 又有成績, 跟慣左放手唔易.

作者: retriever    時間: 18-4-9 11:19

Yanamami 發表於 18-4-4 18:37
註校社工是花瓶

最近報導話有教師團體爭取增加多一位 "輔導老師"

聽落似係增加編制多D...

作者: ar_mak    時間: 18-4-9 11:26

提示: 作者被禁止或刪除 內容自動屏蔽
作者: ar_mak    時間: 18-4-9 11:29

提示: 作者被禁止或刪除 內容自動屏蔽
作者: ar_mak    時間: 18-4-9 11:35

提示: 作者被禁止或刪除 內容自動屏蔽
作者: little_yolky    時間: 18-4-9 11:43

Yanamami 發表於 18-4-9 10:46
大果个陰湿,乜都擺係心,又不擅表達,好煩~細果个炮仗頸,反而易handle.
哎吔, 我兩個都係咁呀。阿大唔多識得處理壓力, 又乜嘢都放响心度, 所以C6話唔好俾間咁深既中學佢, 費事佢諗埋一邊。原本都有諗上智, 但恐怕佢會跟唔上。

BTW, 我識個芭蕾舞同學仔個家姐都係讀上智, 佢話近呢兩年校長話想多收英文+數學好既女仔, 咁即係阿大唔駛玩了。

作者: retriever    時間: 18-4-9 11:48

ar_mak 發表於 18-4-9 11:26
有日係商場廁所見到個清潔阿姐比客鬧:請你番黎個廁所仲係咁污穢~!(但其實個阿姐已經係不停清潔,問題係 ...



好定唔好, 幫唔幫到手係咪睇獲得追求既結果?


嗯, 有公公婆婆話果個醫生好好, 因為俾好多藥, 哈哈...


當然唔講呢D 標準啦...




有一定工作經歷既人, 在接觸過後會感覺對方"專唔專業"的... 當然感覺唔夠專業,背後可以有很多原因...




我唔係做社工, 但工作經歷話我知, 將自己既職份包含在制度之內, 係飯碗尤關既事.


所以大量填表並不是壊事... 但大量做報告, 審計等係值得商榷.




唔少家長以為, 在校社工係應多做 counseling 有用D,  但實際係社工係大部份社會福利服務既准入點...


兩方面工作係咪可以分開?


作者: Soundervolt    時間: 18-4-9 11:55

HM168 發表於 18-4-9 11:06
貴校小、中學都有不同程度的小朋友要見社工,朋友都講不想自己小朋友入讀。
...

本帖最後由 Soundervolt 於 18-4-9 11:58 編輯

我當小學PTA時未察覺特別嚴重。阿仔讀一間冇得楝學生嘅津校,任何類型背景,包括SEN學生都有,有問題要求社工協助實屬正常。學校當然對學生有要求,但又未至於係「壓力煲」,以我所見問題發自家庭或學生性格本身居多,尤其男仔會比較多行為上嘅問題,郁手郁腳去解決問題多過跳樓去解決自己.....如果未能清楚了解一間學校,只係聽到個校名都怕怕就真係唔好考慮呢尐學校。


作者: Soundervolt    時間: 18-4-9 12:07

Charlotte_mom 發表於 18-4-9 11:10
以我仔女果間為例
社工係年租,即每年(唔知個約幾耐)以招標形式「標」一個社福機構,由機構聘用同提供駐 ...

本帖最後由 Soundervolt 於 18-4-9 12:09 編輯

阿仔學校情況相若,PTA每年會同學校及香港明愛檢討成效而決定續約與否。中學部社工已駐校廿幾年,如果冇乜效果亦唔會生存咁耐。


作者: Yanamami    時間: 18-4-9 12:19

little_yolky 發表於 18-4-9 11:43
哎吔, 我兩個都係咁呀。阿大唔多識得處理壓力, 又乜嘢都放响心度, 所以C6話唔好俾間咁深既中學佢, 費事佢諗 ...
上智自行不嬲鈡意收英文好嘅~而又重视理科,所以收数好既亦正常。如果你有睇我楼上回覆(忘了幾楼)就知上智非常关愛学生,我唔係度重複了。
作者: little_yolky    時間: 18-4-9 12:23

Yanamami 發表於 18-4-9 12:19
上智自行不嬲鈡意收英文好嘅~而又重视理科,所以收数好既亦正常。如果你有睇我楼上回覆(忘了幾楼)就知上智 ...
我都有問果位家長, 佢讚不絕口, 佢細女今年9月升中, HY收咗, 細女話想叩門入埋上智, 佢話由得阿女自己揀。
果位家長話:學校又好, 校服又靚。可惜阿大數學係死穴。

作者: Yanamami    時間: 18-4-9 12:31

little_yolky 發表於 18-4-9 12:23
我都有問果位家長, 佢讚不絕口, 佢細女今年9月升中, HY收咗, 細女話想叩門入埋上智, 佢話由得阿女自己揀。
...
哗~禁HY又再勁-級,唔揀又好似好嘥喎……話时話,我大女小学既数只係僅僅过85果种A.升中都要keep住補数,DSE都有5唔太难睇吖~咪禁快睇死阿女……你心仪PC咪一样数差無运行?
作者: edith208    時間: 18-4-9 12:44

Yanamami 發表於 18-4-4 18:37
註校社工是花瓶
幫不到的就是花瓶
在觀塘聯合醫院內的兒童精神科病童都有學校社工和家長商量好才轉介

當然學校社工可以做的是有限的, 但也不是外人, 特別是不需服務的人去評價

作者: edith208    時間: 18-4-9 12:50

ANChan59 發表於 18-4-8 21:53
中学生去儿科?
17歲或以下都是兒科 / 青少年科
作者: ar_mak    時間: 18-4-9 12:51

提示: 作者被禁止或刪除 內容自動屏蔽
作者: Yanamami    時間: 18-4-9 12:54

本帖最後由 Yanamami 於 18-4-9 12:56 編輯
edith208 發表於 18-4-9 12:44
幫不到的就是花瓶
在觀塘聯合醫院內的兒童精神科病童都有學校社工和家長商量好才轉介

Sorry. 當我多口搭訕好了,唔好理我……不过EK上那麼多vs帖,答咀的家長九成也未必是該两校用家,或者都係唔好俾意見好了~
作者: ANChan59    時間: 18-4-9 12:58

edith208 發表於 18-4-9 12:50
17歲或以下都是兒科 / 青少年科
青少年科 - makes more sense.

17 or 19 ?

作者: edith208    時間: 18-4-9 13:29

ANChan59 發表於 18-4-9 12:58
青少年科 - makes more sense.

17 or 19 ?
18歲或以上是成年人,
17歲或以下兒童及青少年科

作者: peggy    時間: 18-4-9 13:49

本帖最後由 peggy 於 18-4-9 13:49 編輯
Charlotte_mom 發表於 18-4-9 09:39
仔仔加油!努力過左呢關,再唸下條路點行。好在而家選擇多,一定有適合自己嘅
...

thks,大家加油! 如dse考得差,佢選擇去台灣升大學,已經有學校收左

作者: ANChan59    時間: 18-4-9 13:53

edith208 發表於 18-4-9 13:29
18歲或以上是成年人,
17歲或以下兒童及青少年科
Your criteria make more sense to me.

I asked this question because #38's answer is 19.

作者: HM168    時間: 18-4-9 14:16

ANChan59 發表於 18-4-9 13:53
Your criteria make more sense to me.

I asked this question because #38's answer is 19.
可能不同醫院不同
作者: little_yolky    時間: 18-4-9 14:18

Yanamami 發表於 18-4-9 12:31
哗~禁HY又再勁-級,唔揀又好似好嘥喎……話时話,我大女小学既数只係僅僅过85果种A.升中都要keep住補数,D ...
但PC文科都好勁丫嘛。仲有, 點解PC唔整簡介會架!阿大因為無接觸過PC, 佢唔鐘意!理由居然係PC數學太叻, 佢數學唔叻!但佢鐘意果間數理都係好好喎, 我反問佢, 佢即刻唔出聲。如果PC有簡介會, 佢接觸過D老師同哥哥姐姐, 一定會好鐘意既。阿媽幫佢揀個最好既, 佢就係唔鐘意。


作者: ANChan59    時間: 18-4-9 14:33

HM168 發表於 18-4-9 14:16
可能不同醫院不同

I guess HA has official guidelines for all clusters.

Official adult age is 18 in HK, 17 sounds more reasonable.

作者: Yanamami    時間: 18-4-9 16:31

little_yolky 發表於 18-4-9 14:18
但PC文科都好勁丫嘛。仲有, 點解PC唔整簡介會架!阿大因為無接觸過PC, 佢唔鐘意!理由居然係PC數學太叻, 佢 ...
無打算广收外來生,無乜必要勞師動眾开简介会吧~
作者: ANChan59    時間: 18-4-9 16:34

Yanamami 發表於 18-4-9 16:31
無打算广收外來生,無乜必要勞師動眾开简介会吧~

Good answer.

作者: Charlotte_mom    時間: 18-4-9 18:33

peggy 發表於 18-4-9 13:49
thks,大家加油! 如dse考得差,佢選擇去台灣升大學,已經有學校收左

遲d問你取經

作者: happy105    時間: 18-4-9 19:27

daisy17772 發表於 18-4-8 17:09
我見過有中學生有輕生之念,話係學校被老師要求做D佢認為不合理的事情,但好明顯佢唔揾家長傾,又唔揾社工 ...

好同意!就算家長真係干預唔到老師,都可以做個聆聽者,情緒係要宣洩下,不過好多家長或者專家成日話家長出手就係怪獸就係直升機,其實所謂插手係睇你點做,客觀分析比多個意見亦可增加兩代對事物既睇法!我成日都同我女講公司啲激氣野,佢都一樣幫唔到我解決問題,但佢就知我工作上有咩事發生!

作者: peggy    時間: 18-4-9 20:12

Charlotte_mom 發表於 18-4-9 18:33
遲d問你取經


作者: 山海兒女    時間: 18-4-9 21:25

回覆 ANChan59 的帖子

唔知係唔係間間醫院,科科也會有所不同。只知,有小兒外科case,因個病是由出生已開始睇小兒外科,所以到廿幾歲要入院再做手術,也是入小兒外科病房的。

作者: 1998Ruby1998    時間: 18-4-9 21:41

回覆 山海兒女 的帖子

係吖,唔一定 18/19 歲就調去成人科,之前見過兒童內科有個大三讀 Poly 嘅女仔覆診。
作者: HM168    時間: 18-4-9 22:02

山海兒女 發表於 18-4-9 21:25
回覆 ANChan59 的帖子

唔知係唔係間間醫院,科科也會有所不同。只知,有小兒外科case,因個病是由出生已開 ...

係呀!

作者: ANChan59    時間: 18-4-9 22:54

山海兒女 發表於 18-4-9 21:25
回覆 ANChan59 的帖子

唔知係唔係間間醫院,科科也會有所不同。只知,有小兒外科case,因個病是由出生已開 ...
Understand, not your fault, just amazed.


All HA hospitals are accredited, I wonder the definition of speciality and age group should be well defined and consistent among clusters.






歡迎光臨 教育王國 (/) Powered by Discuz! X1.5