XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX XXXXXXXXXXXX
襯有時間又試吓記錄多少少。好多家長覺得要入好啲啲嘅傳統英式寄宿學校就係要十八般武藝樣樣皆精,仲要科科火箭。其實呢啲係强加「港式」思維俾啲學校,如果係真嘅,我咁教仔嘅安排聽乞米都得喇。你諗下,唔補習,唔俾週末學嘢興趣班,晚晚要九點零瞓,邊得嚟時間特訓呢?清楚遊戲規則就知咁嘅諗法係謬誤。
我嘅時間安排咁奇特,咁究竟我安排啲咩課外嘢俾我啲小朋友呢?
學外文(法文)
雖則我係揀local school俾小朋友學好中文,但係我都好清楚遊戲規則。其實傳統英式寄宿公學套全人教學模式幾百年落嚟都差不多,當然有與時並進,不過MFL(Modern Foreign Languages)就一定係其中一樣必修科(最少去到GCSE level)。雖然好多學校都有好多選擇(法、德、西、意、俄甚至中文),但係熟悉英國學校都知法文嘅重要性異常哋高,有啲學校甚至係必修法文加另一科MFL。我嘅選擇就係小朋友初小開始學法文,一個禮拜一堂。無須太多太密集,只要唔好太遲開始,又持之以恆,小朋友就可以做到入Y9無縫銜接法文課程。事實上我仔可以做到top set排第一,比屋企講法語嘅法藉比利時藉同學法文成績更好,都係因為有「食過夜粥」(不過我重申只不過一個禮拜一堂,非常輕鬆)。
揀法文仲有一個好重要嘅原因,因為top嘅傳統英式寄宿學校好多都將拉丁文列為必修科。正因為法文係由拉丁文變化而來,所以熟悉法文文法對學拉丁文非常有幫助,事半功倍。
一般香港學生數理科目銜接都應該問題不大,但係其他科(歷史地理MFL就有機會比較吃力)。如果MFL有準備,咁就大把時間輕鬆應付其他科目同活動。
學音樂
我認同音樂可以陶冶性情,所以我覺得學音樂係有需要嘅。但係我又唔認同利用音樂為入學武器,10歲8歲就谷到考演奏級。加上我自己嘅學鋼琴經歷極不愉快,雖則係考獲8級琴,但係我發誓唔會再掂個琴,亦真係無再彈過。我唔想小朋友重蹈覆轍,所以我唔俾佢哋考級,淨係彈啲鍾意開心嘅嘢。想當然,喺香港叫佢哋練琴好似拉牛上樹,琴技亦不值一提。
呢樣真係要讚英國學校嘅全人教育熏陶。我仔去咗一個term,唔單止又choir又acapella,返嚟香港仲主動練琴彈新嘢。問佢做咩咁神心,佢話學校個個同學都好認真玩音樂,老師教得好有趣,有時週末得閒冇嘢做啲同學又僂埋一齊夾下嘢,佢忽然覺得好玩。我梗係唔出聲照單全收啦,玩音樂就係應該發自內心嘅。
學游水/玩運動
游水係求生技能,冇可能唔識,冇乜特別好講。我一早知啲仔女唔係運動員材料,無須任何特訓,識游水唔會浸親就夠喇。
我都可以算運動人(又未至於運動員咁啦),但我啲仔女完全一丁點我嘅運動興趣都遺傳唔到。雖則未到運動白痴或者白面書生,但係一定唔係咩校隊主力材料。但係我係過來人,知道隊制運動係融入寄宿學校嘅最好武器。咁所以我就安排週末點都出去走走運動吓,亦鼓勵我嘅小朋友參與任何學校嘅運動訓練。雖然大部份時間都係坐冷板凳,不過起碼一齊訓練,等佢哋習慣參與。事實上,亦如我所料,小朋友去到咩運動都報一餐,識唔識都盡力而為,所以雖然球技可能稍遜,同學都樂意邀佢一齊玩,融入絕對唔係問題。
玩朗誦
呢樣就純粹俾佢哋習慣喺一大班陌生人前講嘢。其實我仔女基本上都係native,無須training。我亦志不在獎所以從來唔會上坊間嗰啲朗誦班,頂多係臨比賽叫佢喺我面前講兩三次。
我仔本身係out-going嘅人,所以呢啲對佢嚟講係食生菜咁易。我女原本係撬都唔開口嘅人,玩咗一陣習慣晒,跟住要佢介紹我都應付自如。去到interview,我當然覺得無往而不利喇。
講下講下又講咗好多,下次再續。