如何增加小朋友在學校的信心和主動性？

蚊子爸爸

囡囡5歲，讀緊國際學校，係屋企會自己諗d遊戲叫我地同佢玩，又好主動講嘢，但係學校就好怕醜細膽，上堂有唔少活動要表達自己想法或者同其他小朋友交換意見，佢都唔會主動講，被老師指定答先會講，但都係講幾句，唔會elaborate。

不過老師覺得無大問題，佢覺得囡囡知道晒要做咩嘢，只係唔夠信心，係多人面前更容易緊張，所以表現被動，俾多d時間佢適應就得。

請教各位家長，我地除左俾時間同鼓勵佢之外，有無一d班或者課外活動可以幫到佢？都希望佢融入學校好d，參與度高d。有朋友話有d面試班教presentation可以增強自信，但係我地又唔係要面試，應該唔適合？小司儀班又有無用？會唔會又係面試orientated? 定係都無所謂？

謝謝意見!

mandy_ng207

蚊子爸爸 發表於 23-3-7 21:45
囡囡5歲，讀緊國際學校，係屋企會自己諗d遊戲叫我地同佢玩，又好主動講嘢，但係學校就好怕醜細膽，上堂有唔 ...

你囡囡是在ESF嗎？我感覺ESF老師很好，不會逼學生，比好多空間佢哋按自己步伐成長。
我覺得你只需留意囡囡是否未有信心講英文（照計考得入year 1都唔會），如果排除英文問題，只係因為性格慢熱，咁你只需按老師建議耐心等下就得。
我仔都係慢熱型，佢去任何新地方都唔會出聲，最少半年先開口講第一句，但佢一開口就會不停講！佢細時我都有帶佢去話劇班鼓勵佢大膽啲，但我發覺幫助不大，都係順其自然最好。
難得國際學校會有咁嘅空間比小朋友，我仔去考傳統學校嘅時候因為慢熱，全部interview都唔收佢㗎～

melobi12

我細個時同我女都同你小朋友一模一樣。我自己到大個出嚟做嘢，迫住要同好多陌生人講嘢，先慢慢發現原來同陌生人講嘢都唔係咁可怕，所以我係有特別關注我女呢方面嘅發展。

要記住緊張同勇敢係可以並存，最緊要係學識應付令你緊張嘅嘢嘅skills。可以用消防員做例子解釋俾小朋友聽：消防員都怕火㗎，但佢地會學習救火嘅方法，成日練習點救火，咁到真係火警時，消防員雖然內心會緊張，但都可以好勇敢咁去救火。daddy mommy 明白你有時同陌生人講嘢會緊張，所以我地會陪你練習勇敢講嘢。

我女今年6歲，過去幾年 （2間學校）每次parent teacher conference 我只有一個問題，就係「佢喺學校有冇講嘢？」因為呢個問題係影響3樣野：
1. 佢有冇正常社交（有朋友？）
2. 學習上遇到問題敢唔敢問老師（唔一定要上堂時舉手問㗎，可以係free time時出去問老師都得）
3. 萬一受傷 / 同小朋友有爭執，敢唔敢揾老師幫手？

每年我聽到嘅答案都會發現佢又有少少進步，咁我都放心了，畢竟呢個世界唔會所有人都係extrovert。但亦唔可以放任佢唔理「等佢大啲會好啲」，因為唔係個個人都會喺過程中得到適當嘅練習機會，繼而變成「好啲」。既然父母有心幫小朋友，當然要推佢一把。

點練習同陌生人講嘢呢？exposure 係好緊要，你可以上網睇下 “brave talking ladder” 。簡單講就係訂個目標要小朋友面對佢緊張嘅嘢，再一步一步加深個難度，反覆練習直到達成目標。呢個係要融入日常生活不停做練習。
例如疫情前小朋友去Disneyland 係可以周圍問啲職員哥哥姐姐攞貼紙，我女以前試過喺同一日入面，由最初匿埋喺我哋後面完全唔敢出聲，到經歷10幾20次同一個練習之後，敢揀一啲特別善良樣嘅職員，細細聲問「可唔可以要貼紙？」中間我地係有用 brave talking o既手法幫忙引導。呢啲都係好好練習大膽嘅方法，拎到貼紙佢自己都受到好大鼓舞，又有實體回報（貼紙）。呢個例子係將同一個小目標 (攞貼紙) o係同一日不斷重覆。而有時其他目標 (e.g. 去餐廳order 食物) 可能會漫長啲，要break 開好多個step，去好多次餐廳先會成功。不過冇問題o既，最重要係令佢明白只要多練習，就可以做到「緊張同勇敢並存」，然後慢慢有啲簡單嘅task 佢唔會再當係一回事，可以好自然做到。

其次可以同小朋友商量參加某啲要表現自己嘅課外活動。如果小朋友係好緊張嗰種，你可以揀一啲唔使出聲嘅活動開始先，例如跳舞，爭取一班人一齊上台表演嘅機會。小司儀呢啲一嚟就要自己成為眾人焦點嘅嘢，唔係個個小朋友做到，特別講緊本身都緊張底嘅小朋友，有可能適得其反。面試班更加無別要，都唔對題。按小朋友能力同意願選擇。

另外揀課外活動嘅老師都好重要，如果個老師本身都唔明你「有咩好緊張？」係咁話你「講嘢唔夠大聲，講得唔清晰」，呢啲好打擊自信，我唔會揀。對住有anxiety嘅小朋友，最好嘅老師（包括家長）係會有同理心明白小朋友緊張，唔會高壓迫佢，但又唔會順晒佢意保護佢、俾佢唔出聲，而係會逐啲逐啲challenge 佢、逐啲逐啲迫佢踏出comfort zone。高壓政策對有anxiety 嘅人嚟講係唔work （其他性格可能work，我唔識，我只係研究左對付anxiety 嘅方法）。

之前我擔心個女有selective mutism (類似一種social anxiety)，所以我了解左好多呢方面嘅嘢，我認為好多俾sm 嘅訓練都好適合我女，exposure therapy / brave talking 係其中最大課題，你有興趣都可以search 埋sm 睇下多啲方法。

另外單獨約班上朋友play date 都有用，最好係你屋企，一嚟你小朋友自己地頭，二嚟對方小朋友會一心一意同你小朋友玩同對話，咁你小朋友都會焗住要同佢對話。如果太多小朋友一齊出現，你女女又會跌返入唔出聲嘅角色。如果有需要，家長都要手引導，再慢慢 fade out。當你女同呢個A朋友熟到可以隨心講嘢o既地步，好大機會佢返到學校同呢個A朋友一齊做group work 時都可以自由表逹到更多意見。然後你又可以用同一方法約下B朋友，C 朋友，希望小朋友之後返到學校多啲令佢安心講嘢O既朋友，咁even 有其他冇咁熟小朋友在場，佢都可以講到多啲。

melobi12

回覆 mandy_ng207 的帖子

贊成呀，IS 俾到好多空間同機會我地啲緊張型小朋友 練習同增強自信!

蚊子爸爸

mandy_ng207 發表於 23-3-8 08:56
你囡囡是在ESF嗎？我感覺ESF老師很好，不會逼學生，比好多空間佢哋按自己步伐成長。
我覺得你只需留意囡囡 ...

囡囡之前都試過話劇班，不過因為太細個，都係跟音樂做下動作，囡囡又唔係特別鍾意，所以淨係玩左一期，唔知大個左會唔會唔同d

我地都好appreciate老師唔會俾小朋友壓力，不過自己覺得有點無奈同可惜，所以睇下有咩辦法，謝謝你

蚊子爸爸

melobi12 發表於 23-3-8 10:23
我細個時同我女都同你小朋友一模一樣。我自己到大個出嚟做嘢，迫住要同好多陌生人講嘢，先慢慢發現原來同陌 ...

衷心感謝你的意見！

關於playdate真係好有共鳴，最初我地聽講playdate有用，就搵左3個同學仔上黎屋企玩，點知最後係嗰3女仔一起玩囡囡嘅玩具，佢自己就喺另一邊，無乜出聲，叫佢一齊玩佢就擰頭，好似唔識同人講野咁，融入唔到。之後媽咪再試單獨約一個同學，個同學又會主動initiate conversation，真係好好多。真係唔知原來playdate都有學問

等我地試下同佢分享消防員例子同埋研究下exposure

課外活動方面，佢地咁細個，可以表演嘅係咪都係得跳舞同話劇？

再一次多謝你的心得分享

964000

melobi12 發表於 23-3-8 10:23
我細個時同我女都同你小朋友一模一樣。我自己到大個出嚟做嘢，迫住要同好多陌生人講嘢，先慢慢發現原來同陌 ...

嘩我地好啱key呀，你講的好多都係我所經歷的，我以前都係咁約ABC朋友但我冇你咁organise, 我打完先見到你所post的。

以下回樓主：

你小朋友是細B嗎/插班嗎？如是都有影響。不過5歲仍然好細，你懂得多稱讚已經很好了，好多傳統的教法都係打擊或強逼小朋友為主，結果弄巧反拙。由細入IS我覺得已幫了第一步，當然家長仍要努力。

我小朋友小時候都係咁，本身性格問題，雖然係咁，其實趁細個還可以改善下的（Early childhood neuroplasticity) .

我反而覺得話劇唔係太有幫助，通常內歛的小朋友都唔會太enjoy drama 和朗誦呢啲活動，（如果enjoy其實是好的）。
我冇參加小司儀呢，我驚到時會被逼講野，又少少造作令佢更大壓力，之後更怕當衆說話。

反而找一些小朋友自己本身喜歡的活動（喜歡是最關鍵），例如唱歌跳舞，持續地有機會小組或單獨表演下，讓佢從良好經驗中去訓練面對羣衆和「開聲」，長遠可能更有幫助（但choir冇乜幫助）。
最後這些小朋友如果可以找到自己的強項，就可以幫助在建立班中自信。唔一定要特異功能。

poonseelai

分享下個人經驗, 性格真係天生㗎, 樓主可試下各位家長分享的活動, 但要有心理準備未必會有大改變。屬 introvert 的孩子在IS模式一樣可好好享受學習過程, 不足之處係如果他們多些發言老師會早D發現他們做得好或無咁好的地方。多年來不少老師同我講孩子交功課或做presentation 會令佢地驚訝, 原來孩子有些睇法, 如果可早些和同學分享會更好。孩子早幾年出國讀大學我好擔心佢是否應付到, 幾年來佢有D改變, 可能人大了, 成熟了, 不過仍係唔多出聲。

964000

poonseelai 發表於 23-3-9 19:12
分享下個人經驗, 性格真係天生㗎, 樓主可試下各位家長分享的活動, 但要有心理準備未必會有大改變。屬 intro ...

對，性格係天生，佢地唔會變咗另一個人，唔會內向變外向，不過如果早D克服「心理障礙」，唔洗咁影響發揮，起碼有需要講野時都冇咁驚，上堂投入感會大D。
就好似stage flight咁，愈細係愈容易刻服，但到青春期先攪就更怕瘀更不肯嘗試了。
到人大長大成熟了，好多都可以克服，但可能之前已經錯過一些機會了。

poonseelai

964000 發表於 23-3-10 06:26
對，性格係天生，佢地唔會變咗另一個人，唔會內向變外向，不過如果早D克服「心理障礙」，唔洗咁影響發揮， ...

父母當然可以盡早盡力去試，我意思係試了無大改變係正常的，性格使然

Cusausa

多謝樓主開這個題目，好有共鳴，直情好似講緊我小朋友咁，哈哈！

我希望我地暫時做啱既第一步係比佢地響IS既環境學習。大家加油 :)

melobi12

964000 發表於 23-3-10 06:26
對，性格係天生，佢地唔會變咗另一個人，唔會內向變外向，不過如果早D克服「心理障礙」，唔洗咁影響發揮， ...

High five

啱呀，introvert 唔會變extrovert，但「唔鍾意講」同「唔敢講」係兩回事。小朋友有anxiety 而「唔敢講」，就要靠家長、老師幫幫手，教佢適當面對anxiety嘅方法，令佢地「有能力」去講。

人大左好多嘢已定型，「唔敢講」呢個concept喺腦入面根深蒂固，好難有咩break through。

而人大左會克服到困難，其實就係因為中間做左好多練習，所以揾到克服anxiety 嘅方法。但唔係人人都咁好彩靠自身經歷開竅克服，細個有大人guide 住練大膽係最好。如果唔係真係會錯過好多機會。

melobi12

回覆 蚊子爸爸 的帖子

話說我女仲玩過跆拳道同網球，直到跆拳道叫佢地每下踢腳/出手都要大嗌一聲，佢就唔肯再學了。網球都係，教練話發球時大嗌會個力發得好啲 (類似係咁)，佢又唔肯再學了 真係諗唔到呢啲活動都要克服anxiety 先玩到。

另外你可以睇下學校有咩ECA。我女試過參加學校drama ECA，雖然冇同班同學一齊上堂，但因為學校環境佢熟悉 (佢係第二年返學時第一個學期上drama ECA)，所以佢都話上drama 開心。一個term 完結之後，家長去左睇佢地一個好短o既show，我見我女o係大圍一齊講對白時佢都會出聲 (雖然緊張樣)，而佢一千零一句獨白佢都用蚊滋聲完成左。我覺得都係一次好寶貴而且幾成功o既經歷嚟ga 喇。我初初係驚佢會連台都唔敢上。如果唔係o係學校呢個熟悉o既地方上堂，佢應該會再緊張啲。

我冇刻意要佢上朗誦班，但暑假時上過一個中文班，老師本身教開朗誦，於是佢又會要啲小朋友每堂各自朗誦一小段，估唔到我女又肯做同埋做到。

佢又試過3歲時上畫班，教開o個個後生女老師請假，同學仔又請假，臨時變左平時教開高年級、嚴肅啲o既男老師單獨同佢上堂。我諗佢當時內心都嚇死 我仲專登o係門口企左15分鐘，肯定佢冇喊我先離開。佢放學時我都大讚佢勇敢，因為佢上堂時係有鼓起勇氣答老師問題 (你想畫咩? 用咩色好? o個啲)

所以我覺得咩興趣班都有機會practice 講嘢，總之多啲掉佢出comfort zone 外，咩都做下就可以。大前提係要揾啲佢想做o既嘢去做。

蚊子爸爸

多謝各位家長嘅經驗分享，真係好有用

原來都有其他小朋友遇到相同問題，做家長有時真係鄧佢地唔抵，明明有想法、識得講，但係唔敢講，間接其實都影響佢地返學開唔開心。共勉之！

964000

melobi12 發表於 23-3-10 12:00
回覆 蚊子爸爸 的帖子

話說我女仲玩過跆拳道同網球，直到跆拳道叫佢地每下踢腳/出手都要大嗌一聲，佢就唔 ...

你女真係好似我女
其實佢哋個問題唔係anxiety, 係高敏型highly sensitive, 好容易「稔多咗」，佢哋感官亦特別敏銳所以少少野好大反應（好嘈好尷尬），結果變咗好易anxiety。