5歲小朋友在學校行為問題

kittyuk

小朋友男仔5歲。因為由細到大都比較好動，坐唔定，所以我決定俾佢讀國際學校，仲要唔敢揀比較嚴既國際學校。我先生同我爸爸都認為男仔好動坐唔定，比較百厭係正常，所以我一路都無理。加上從n班到k2讀過唔同學校都冇收過學校投訴，只係係屋企比較好動，叫極都聽唔到咁。
直至算上k3, 開學2.5個月，開始收到老師投訴。一開始係比較嚴重，例如課堂上大聲唱歌，點叫都唔停。同同學搶玩具，用玩具積木扔同學。我當然好緊張，同學校傾，但學校counsellor 比較忙，未必經常答到我。最後經學校介紹左個behavioural therapist 俾我地，同我傾，教左一啲方法。加埋我日日夜夜都差唔多洗腦咁叫佢要係學乖。咁第5波疫情前，佢係學校都好乖。但無幾耐又停課。停課期間係屋企脾氣都臭嫁。上網課唔專心，但5歲我要求唔太多了。到疫情好番啲，佢一路有出去上下興趣班。我自從收學校投訴後，我好緊張佢行為問題，上興趣班都成日問住啲老師佢點。大部分都話佢冇乜野。係有一兩堂話佢好high. 有小小騷擾到同學。但都攪得惦。而停課開始，我地有搵behavioural therapist上黎上下堂，咁佢控制情緒方面係有進步。

第五波後，番左一個星期後，又日日都收到老師話佢，但老師又唔係話佢曳足全日，係話佢日日都一時時，有乖有曳。上星期六我終於同小朋友見左心理學家。其實開頭都係諗住心理學家見下佢、睇下會唔會知道個問題出左係邊。見完後，心理學家話佢有好明顯既adhd特徵，加輕微asd特徵。其實一收到學校投訴，我地已經問老師小朋友似唔似adhd，老師話唔似。到見完心理學家後，我再問，老師仍然認為唔係。但其實第五波開學後，我聽番老師同小朋友講過發生既野，都唔係一啲嚴重問題。多數都係唔聽指令。譬如果堂普通話，係有iPad遊戲玩，老師叫佢要停因為要落堂，佢無視左老師。音樂堂有樂器係佢面前，叫佢等埋老師講完先開始玩樂器，佢忍唔到。上呼吸堂，佢特登大聲呼吸等等。

我當初俾小朋友讀國際就係知我小朋友比較百厭，知佢讀唔到傳統學校，但無諗到讀國際都差唔多日日收投訴，我真係好大壓力，又好影響親子關係。因為明明唔係好大件事，但就成日因為學校發生既事，番屋企又鬧又講。見完心理學家，佢教我地要多讚，我地有做、佢係屋企都乖左好多。但學校既我又控制唔到。我仲可以點做？

fasola

見你寫你兩夫妻認為男仔好動坐唔定比較百厭, 就知你小朋友實係ADHD+少少ASD.

因為好多父母以為男仔係咁, 就無管過. 我時時係playroom都見好多男仔一望就知係雙A, 但父母似無留意, 任佢地自己玩, 以為放電就得.

我小朋友都自細坐唔定, 上playgroup, 全組得佢一個要玩自己玩具, 唔跟大隊. 老師講故事, 個個留心聽. 得佢左望右望. 返N, 人地教學科, 佢係都要自己畫畫.
我有一年時間, 大概係N 到K1. 自費做左好多訓練. 花左好多氣力教佢要跟規則. 宜家上堂都仲心散架, 但起碼坐得定, 上堂聽老師指令. 好知道要跟規則. 佢見同學仔唔跟, 反而識投訴.

你地送佢去國際學校, 反而令佢喪失學習規則秩序嘅時機

kittyuk

回覆 fasola 的帖子

係呀！果陣真係唔識。成日以為男仔咁樣係好正常。請問你當時同小朋友去邊度做訓練？ 我地見完心理學家，佢又冇話叫我地做咩訓練。佢俾晚建議都係多讚賞、少話。做唔好既行為要有後果。另外就係叫我地同佢上多啲社交小組，可以上下童軍之類。依家好苦惱。其實咁多年都冇老師投訴。係5歲多啲開始。

fasola

kittyuk 發表於 22-5-15 19:57
回覆 fasola 的帖子

係呀！果陣真係唔識。成日以為男仔咁樣係好正常。請問你當時同小朋友去邊度做訓練？  ...

乜都有上啲, 佢本身講中文慢, 所以有去自費言語治療. 咁細當然係玩玩具, 除左跟治療師講說話, 亦要跟規則秩序至有得玩.
讀間幼稚園本身有兼收學生, 所以班老師有啲經驗, N 班就叫我地去評估, 另外再係外面自費上綜合訓練. 啲綜合訓練初初我覺得幾無聊, 因為啲野好淺, 佢認知本身ok. 但上上下就發覺佢聽命令同秩序好左, 因為訓練係單對單, 佢聽外人說話一定好過自己父母. 我地漸漸都執返緊啲, 有啲原則.


不過你小朋友快六歲嘅話, 綜合訓練唔知會唔會超齡.

上社交小組都適合. 如果有輕微ASD, 唔係太識體諒或者代入其他人想法.

kittyuk

回覆 fasola 的帖子

明白！多謝你回覆😊