15個月自我刺激行為多左 好擔心又瞓唔著 有媽媽明白嗎

Mysonangel

有同路媽媽明白我的擔憂嗎？

本身bb整體發展比健康院指引遲少少

6個月轉身

8個月先坐

9-10個月爬

12個月企

14.5個月離手行

剛返健康院睇發展話暫時合格

踏入第15個月
開始出現古怪野
剛排緊協康但最快要18個月評估

諗住再搵其他私營機構評估

但15個月太細姑娘話仲有發展空間

我見佢自我刺激行為多左
真係會好擔心

咁細個就出現晒呢啲特徵
好怕佢會係嚴重自閉
當佢出現呢啲行為時
要馬上阻止分散佢注意力
定15個月俾佢自由發展？

好擔心呀

15個月

識聽指令

做bye bye. Give me five. 拍手. 請請. 錫面

識「俾」「放」「擺」「拋」「擲」

識玩叠圈圈
入形狀
手抓板

玩peekaboo 時特別開心

會模仿我伸脷
電眼
拎碗扮飲湯
扮講電話（放耳邊但唔會講野）

有眼神接觸
識認婆婆
公公
爸爸
媽媽

我問佢我係邊個
佢識答「媽媽」/ mummum

問佢電視機/房/廚房/廁所係邊佢會行過去

有時用食指指但多數用成隻手去指

第一眼會怕生保

但睇定左就會同其他人玩
可以俾人抱

鍾意玩捉迷藏

鍾意聽我唱佢識既兒歌
會好開心

記圖唔錯
教佢一兩日會認到同認得返晒

暫時識發音有

「A」「街街」「
雞雞
」「呀」「 e」「花」「ba」
但有時會冇意義咁講

之前識成日講「mum 」呢兩日又冇再講

冇意義地擰頭點頭多左

開心fing手

有時坐坐下背脊撞落椅背

一緊張或開心就會手郁郁

眼睛追求視覺刺激
出街睇人行路腳郁佢會興奮

睇識郁既野會好貼眼咁睇

鍾意睇車轆轉
波波轉
洗衣機轉

轉碗同兜

近期鍾意啜返手指
（食指同拇指）

鍾意望我吸塵

因為見到吸塵機個轆轉會好開心

有時會被燈/光吸引

搭lift會望抽氣扇

未識用食指指遠野
想要野時用晒五隻手指指

想分享見聞都係用晒5隻手指指

只會用食指按壓玩具
指近野如五官
指書圖像

有時會無啦啦拍一兩下手

有時會無啦啦拍一兩下前額頭

經常抓右耳
抓頭髮

（之前右耳仔生過濕疹唔知關唔關事）

對聲超敏感

聽到少少聲都用焦慮眼神話我知佢聲到啲聲
我同佢講正常架唔駛驚
佢先會繼續玩

但再聽到又會再焦慮咁嗚嗚聲望住我

LifeisBlue

Mysonangel 發表於 21-8-5 16:38
有同路媽媽明白我的擔憂嗎？
本身bb整體發展比健康院指引遲少少6個月轉身8個月先坐9-10個月爬12個月企14.5 ...

識同人玩，有眼神接觸，又識模仿，自閉機會唔大。

Mysonangel

回覆 LifeisBlue 的帖子

多謝你回覆
因為佢仲未識用食指去表達佢想要既野通常想要或落車見到東西時 係伸晒成隻手去表達
對聲敏感又做出自我刺激行為
我都唔知係感統出錯定點 又中左啲自閉特徵

我試過用被俾佢瞓係上面
我同爸爸一人拎一邊當打千秋咁 佢又好享受唔驚


另外補充一點佢慣性用左手
左手既人患自閉風險又再高啲
所以真係好擔心 仲有3個月先評估
每次見到佢啲古怪動作 個心忍住淚水
佢瞓左我忍唔住偷偷地喊

LifeisBlue

Mysonangel 發表於 21-8-5 23:58
回覆 LifeisBlue 的帖子

多謝你回覆

我不是專家，快d揾個心理學者斷診，唔洗心掛掛。有關喜歡/厭惡某些感覺刺激，其實不少正常細路都有d。而且有感覺統合問題唔代表一定係自閉。尤其玩感统遊戲，什麼用被搖秋千穿拉架布，好多細路都like.
反而過來人我睇重社交和語言兩方面，我仔由细到大，去公園都係自己玩。幾個A仔坐埋不會交談，好静。所以你去公園時可以留意下。

Mysonangel

回覆 LifeisBlue 的帖子

多謝你的建議我仔仔試過去公園 當佢發現了公園有過三關會轉時 個心就淨係想玩果樣
佢自從識離手行後 每次外出都要求抱 行幾步就停咗企住唔郁 好驚青咁 要用方法引佢行先行到一小段路
公園反而佢肯自己行 不過去到公園暫時佢都唔識同人玩 個心淨係想去轉過三關
我好似冇見過佢主動撩人玩
係人地撩佢同佢玩下peekaboo 佢先會同人玩
玩熟左佢成日想拎玩具俾你要你拎住 你俾返佢 佢又會再拎俾你
唔知呢個行為算唔算重覆行為 定叫做互動一種
至於講嘢方面 我每日都教佢同埋將物件放近我個嘴 等佢睇到我口型發音
暫時都唔算太成功佢只會笑下就行開
希望佢呢三個月語言上有點突破
做媽媽的 終於明白唔駛佢做人中龍 但求佢健健康康 開心就夠

剛打電話去仁安 養和 佢地都要兩歲以上先做評估
所以等協康希望一夠歲半就可以做

LifeisBlue

Mysonangel 發表於 21-8-6 13:14
回覆 LifeisBlue 的帖子

多謝你的建議我仔仔試過去公園 當佢發現了公園有過三關會轉時 個心就淨係想玩果樣 ...

咁樣係有d奇怪，通常見到其他细路會主動走埋一堆。亦有可能特別感覺需要，好想玩/避開某些事。又未夠大做評估，唯有做爸母忍耐下，反正都等，不如開心d出去玩下，大人細路都放鬆下。
分享下我仔細细個時d感统麻煩事，佢對聲音敏感，好怕大型貨車的聲響，所以過馬路要拖到實，否則有時會驚到衝出馬路，不過經過多年自我"適應"，依家都怕但不致於慌不擇路。所以唔好太擔心，船到橋到自然直。

Mysonangel

回覆 LifeisBlue 的帖子

多謝你經常回覆有時候 仔仔係別人眼中 佢係一個活潑可愛健康的小朋友
我先生覺得佢依家大細 我又唔係醫生
叫我唔好估估下然後就話有自閉特徵
但作為媽媽 佢每次做既古怪行為我都看在眼裡
所以感覺唔妥就會搵資料睇下記錄佢依家既行為等
有時在這裡說說話 反而覺得會更舒服
謝謝你

LifeisBlue

Mysonangel 發表於 21-8-8 00:59
回覆 LifeisBlue 的帖子

多謝你經常回覆有時候 仔仔係別人眼中 佢係一個活潑可愛健康的小朋友

哈哈，客氣，我只是閑人一個。個個父母總盡心盡力幫仔女，當然明白為著仔女牽腸掛肚，不知流了多少眼淚，傾盡錢財訓練。但多年後回望自己细路和其他同學，其實結果不是你能控制，但過程可以，積極面對還是憂心渡日，大人要好好留意。

babachau

作為父母真係好心痛

kissapplegirl

我大仔18個月前各方面發展同其他小朋友一樣，能講1x個單字，不過我留意到佢12m識手指指，但通常係我問佢指，唔係佢覺得有趣或佢想要一樣野而手指指，而且手指指頻率唔高，另一樣明顯既徵狀同朋友親戚食飯見面，呀仔唔會同人地玩得好開心好興奮，正常小朋友幾怕羞經過十幾廿分鐘熱身後應該同人打成一遍，仲有，佢細個時要好大力吱佢先會笑出聲，但普遍小朋友同人玩兩玩已經可以哈哈笑，我細仔岩岩12m，我留意到同哥哥既最大分別就係以上幾點，當然我唔知細仔會唔會都係...

我細仔而家識跟下我口水尾講單字，識主動講小小單字，10個月左右識手指指佢睇到得意既野，成日一邊指住一邊高叫，直到我帶佢去睇或拎比佢，佢係街見到我教過佢既野，例如狗、花、波波，佢會指住

你小朋友fing手，坐櫈撞櫈背，睇轉轉既野其實好多bb都會，而且A仔佢地感統問題會轉換，你唔洗咁擔心住，你先捉住bb隻手，伸出佢食指，同佢睇圖書及出街時，遂樣野指住教

dragonkiller2

睇完你講果d又唔覺佢有自閉，最多都係叫發展遲緩，而且後期都追得返

我覺得你可以比佢自由發展，等到18個月評估

媽媽唔駛咁擔心，放鬆d先

Mysonangel

回覆 kissapplegirl 的帖子

多謝你留言呀，因為我唔係成日上呢度，所以遲左回覆。我都想分享返我做左啲乜… 因為好多機構評估都要歲半先為準確，由於果時太過擔心，就約左去AP做咨詢。
咨詢師當日睇左我仔平時日常既片，果時啲片係仔仔差唔多16個月時拍的。佢話仔仔呢刻會主動俾波波人，有眼神接觸，叫名會應人，肯俾人抱同埋肯同陌生人玩peekaboo, 會做指令，暫時唔似有自傾。佢話未識用食指分享見聞就要留意下，同埋興奮手fing fing話正常兩歲左右會慢慢冇。所以叫我睇定啲，因為16-18個月發展得好快，如果再冇進步就要返去評估。

仔仔依家剛好17個月了，由16個月去到17個月，發展突然變得迅速，可能亦因為我當時太擔心，直情假設佢係自閉兒來教佢，決心帶佢日日落街，咩都去睇下玩下，亦報左playgroup俾佢接觸多啲小朋友，玩小遊戲。在16.5 個月時，突然經常用食指指野，分享佢見到既景物，想要野時佢都會用食指指表達，用手指指野叫我讀俾佢知。因為最初擔心佢唔識表達，我就上網學點樣令佢用手勢表達，可能咁，佢開始明白用嘴巴講野同手勢都好重要。加上每日同佢唱歌做動作跳舞，終於能夠模仿我唱head shoulders keen toes時會指住自己身體的部分，分到眼耳口鼻。

但視覺感統上仍然要再觀察，因為佢成日望住人地對腳行路會好興奮，因為腳會郁..
呢個行為問題希望佢大大下會改善到。雖然進步了不少，但養兒長憂99呢句野真係一啲都唔誇張，做左媽媽後的心聲。做媽媽的真的要加油。

Mysonangel

回覆 dragonkiller2 的帖子

多謝你的留言。依家同佢參加playgroup. 睇多啲唔同既野，玩下messy play同上baby gym. 希望感統上會有足夠刺激，發展好啲，到歲半時再睇下進展如何。

kissapplegirl

Mysonangel 發表於 21-9-29 23:23
回覆 kissapplegirl 的帖子

多謝你留言呀，因為我唔係成日上呢度，所以遲左回覆。我都想分享返我做左啲乜 ...

咁聽落小朋友而家各方面都發展ok，就快18個月，語言方面有無自發講到10個單字？唔係大人講完小朋友跟講，但可以係你指住問佢咩泥嫁，佢答到
最緊要你同佢咩都講一餐，好似旁白咁形容下佢做緊咩，你做緊咩，當佢玩緊玩具 ，你可以加入一齊玩再用好短既句子描述你地做緊咩，咁樣BB會慢慢吸收到
例如BB玩緊車仔，你可以話“推～車車” “呢個係車車” “媽媽～推～車車”

Mysonangel

回覆 kissapplegirl 的帖子

剛踏入17個月，自發講得好少單字，食肉時會講雞（明明食緊豬佢都會講係雞），奶，媽，腳，食野時好味講「正」，我講去，佢會接住講街街，我俾左野佢時間中會講該「不過未發到唔字」。唔會自發講既字：要叫佢或問佢係咩佢先會講 bird，bread，公公，車
未發到波，婆音
依家佢成日手指指要我講佢指既物件，例如佢指燈，我講完燈佢就跟口水尾講燈。
由16個月開始，我就每做一個動作都有用詞語拆開咁教，例如我開奶時，倒水落奶樽會成個步驟講，倒（倒緊水）水落奶樽，「畢」「奶粉」，「搖」樽，「轉轉轉」。佢著褲時叫佢舉高腳 我會示範舉高同佢講舉高 再話佢知係腳 成個動作叫舉高腳。
阿仔發展本身都俾同齡遲啲，可能學講野都冇咁叻，但我會盡力教等佢吸收多啲的。好多謝你回覆同意見呀，感激🙏🏻 希望佢歲半時可以講多啲 將吸收到既表達出嚟 健健康康就好。

dragonkiller2

回覆 Mysonangel 的帖子

盡量要佢講野，例如佢想要咩果陣，要佢講先比，例如奶同埋講野唔好咁快，你可以引導佢跟你講野，例如不斷重複單字

我個女果陣學單字好快，但到學詞語就好慢，有可能係佢地口肌唔夠，你可以慢慢咁將d野食整返硬d，唔好整咁碎

bb一個月可以成長好多，超乎你想像

Mysonangel

回覆 dragonkiller2 的帖子

多謝你的留言時間過得好快 就嚟夠歲半要返健康院做評估了
踏入17個月後 像言語爆發期 講多咗野 當然有時係引導佢講多啲
暫時都只有單字 奶奶 包 車 馬 波 哥 婆 媽 爸 雞 街街 謝 係呀 好呀 blue bird 該(唔該）
最近當佢用食指分享見聞時 就會叫媽/爸 會示意你睇佢指既野
但唔知算唔算固執行為 佢係會叫到你望或者應佢為止
同埋當佢想你讀俾佢聽佢指緊果樣野係乜 佢就會不停叫你（媽媽媽媽媽..）直至我回應佢
否則佢會再大嗌 再唔理佢就會炆憎
佢想餵人食野時（爸爸/婆婆）就一定要對方接受 人地唔理佢就大叫
要你食為止… 我都分唔清楚究竟係自閉兒會出現的固執行為 還是提前trouble two 的固執
我都會用正向教育來引導佢 希望教到佢唔好太執著
再一次謝謝你留言

au1111

越早搞越好，找人評估一下為重