差不多完成小六派位的你，有咩勸勉給後來的人？

Froggy_joe

出post想總結下自己的經驗，祝願大家將來派位順利，入讀到心儀中學
1. 想考名校，好多學校會睇埋小四成績，呈一、呈二更加係關鍵
2. 唔好被校內成績所迷惑，就算你小朋友考全級頭十，都要留意下以往屆別的派位情況，否則到時對派位的期望會有所落差
3. 我一向唔主張以考試做主導，令小朋友有過大壓力，呈分好多時甩轆，最理想係從小培養佢閱讀和學習的興趣，上到高小，自然水到渠成
4. 課外活動對報學校沒有很大優勢，順着小朋友的喜好，讓佢哋發揮，從中培養自信，佢哋面試自然有優勢
5. 雖然跟同級同學係競爭對手，但我兩個小朋友都有一班好好的同學互相扶持，互相之間會一齊交流讀書心得，佢哋會向啲表現出色的同學討教、一齊溫習，又或者互相貼下出咩題目，呢個氣氛令到小朋友開心咁面對壓力

我兩個小朋友，一個思考型好靜，一個好動型活潑，都係順住佢哋的性格去幫佢哋，零補習

大的小朋友成績中上，唔鍾意溫書，課外活動偏少，只係順住佢的興趣報下少少比賽，無乜特別大奬，但每次的活動佢都有好深刻的反思，睇好多書，去面試表現卻令人驚喜，老師問的問題，佢都答得好有深度，每次in完老師都會大讚，最後佢報的Band1直資收，不過放棄去參加抽奬，第一志願入Band1地區名校

細的小朋友成績亮麗，課外活動極多，時間方面，佢有能力應付的都會俾佢玩，咩範疇都有，每樣都攞到唔少有認受性的奬項，最後自行地區名校收咗

論成績及課外活動，大的小朋友其實比細的無咁突出，但表現卻和細的一樣，所以大家唔使俾傳統的睇法太過定型，例如一定要一大堆奬項，俾小朋友做喜歡的事，就係最好的幫助
我無特別要谷小朋友的成績，特別係大個位，表現唔算突出，我常常鼓勵佢哋，盡咗力，自己係咩banding就按照呢個level揀間校風比較好的學校就可以，所以兩位小朋友的呈分路係走得輕鬆、愉快

唔好抱住非要入某間學校不可的心態，盡力後就要順其自然，否則小朋友和你都會有很大的壓力

好記得有一位小朋友的同學，佢係高材生，絕對係b1a全港名校的材料，派位入咗間b1c，佢媽喊到抽晒筋，我哋慰問小朋友你ok嗎？小朋友好冷靜咁答：「我從來都好OK，入到呢間都唔錯，係我阿媽唔OK啫。」（之後呢位同學年年都係該校考全級第一）

小六派位只係人生一個階段，並不代表全部，反而你和小朋友的親子關係，卻係一生
唔好因小失大，因考試而斷送珍貴的親子關係
大家加油！

kirstyau

Froggy_joe 發表於 21-6-13 11:05
出post想總結下自己的經驗，祝願大家將來派位順利，入讀到心儀中學
1. 想考名校，好多學校會睇埋小四成績， ...

過來人分享升中
1）英文說話冇可能一時三刻就朗朗上口，由細已經要浸。升中面試 英文說話非常重要。
2）音樂呈分佔2，樂器雖然話人學我學，但去到呈分算幫到手，最少考樂理作曲聆聽唔會差得去邊。
3）視藝呈分佔3，早點打聽上年呈分考咩，小五可以開始重點學下。好似 其中一次呈分作品是素描，有出去學過 同老師教兩教就畫幅作品出嚟呈分，分別已經好大。
⭐視藝3+音樂2=5，加埋差不多=常6。隨時人地弱/有D家長諗住唔洗理，你小朋友用心跟下已經拉前（呈分名次）
4）如心儀直資，P4開始好考靚成績表。
5）數學呈分比重同中英睇齊佔9，中英要考幾份卷先加總9。數一份定生死。不容有失。
6）P4 開始聽定升中講座，因為通常係11-12月D星期六，一來好多中學會撞日子，二來11月中撞學校考呈二（小六第一次試），如果小六先聽，好影響小朋友溫習呈分試。
7）就算唔打算讀直資，最好報定1，2間同level+低自己少少level 直資熱身好重要，因為自行得2個機會，好少同學一黎就進入狀態。直資面試通常比自行深同內容多D，熱身後自行考時會覺得容易好多（聽阿女講返）。
8） 獎項活動服務嗰d ，早啲預備，搵張中學申請表格望下就知，學校分幾大類填， 淨係得成績吉曬其他部分都唔好睇。
9） 好認同冇一間非讀不可，尤其強行抽入間比自己程度高好多，到最後 高中選科 蝕底係自己。 好多中學選科次序根據總名次， 就算某科強，但總名次後，都有機會選唔唔到。
10）選校時睇埋選科制度，套餐式/放題式，有冇咩科冇開………

諗到就寫，所以寫得有D亂，別見怪！

Maggieb1122

謝謝兩位jm用心的分享，我自己最驚揀錯學校給女兒，因女兒都無乜偏好任何一間中學

rsx

心儀某中學就要早一兩年上佢網站睇下佢哋申請表需要d乜或著重d乜，作好準備！

mcl203

rsx 發表於 21-6-13 12:53
心儀某中學就要早一兩年上佢網站睇下佢哋申請表需要d乜或著重d乜，作好準備！
...

若果係針對性部署，小四/五先嚟行動，有點遲～～～

rsx

mcl203 發表於 21-6-13 13:00
若果係針對性部署，小四/五先嚟行動，有點遲～～～

係，小三開始準備，如果心儀中學有直屬聯繫，插班都係其中一個好方法！

tkhhung

選間適合的幼稚園 小學及中學 給小孩 已經係最好禮物

Froggy_joe

Maggieb1122 發表於 21-6-13 11:49
謝謝兩位jm用心的分享，我自己最驚揀錯學校給女兒，因女兒都無乜偏好任何一間中學
...

盡早帶佢去睇下啲學校，真係要分兩年先睇得晒，五年級就帶佢哋去睇
我自己都係，阿仔五年級已經睇中間band1，考試都以呢間學校為目標，有動力好多

Froggy_joe

mcl203 發表於 21-6-13 13:00
若果係針對性部署，小四/五先嚟行動，有點遲～～～

考全港名校的確係遲
所以我自己都無勉強自己

Froggy_joe

kirstyau 發表於 21-6-13 11:25
本帖最後由 kirstyau 於 21-6-13 13:37 編輯

過來人分享升中

好認同第一點，英文真係要浸，如果target全港級數的名校，真係要自信流利英文，本身閱讀面要廣，先有機成功

xubin2008

回覆 Froggy_joe 的帖子

好好建議！

kiwi2007

........

b3410

第一，機會留俾有準備的人

第二，量力而行

PingWu_FB

多謝分享

家有小五生

四年級上學期睇咗本區兩間中學

五年級只喺網上睇咗三間

小朋友完全無法從中了解學校情況

希望年底仲有機會參觀幾間學校

xubin2008

回覆 kirstyau 的帖子

你哋呢啲真心好野來，唔好話自己寫D亂，對我嚟講真係好重要，多謝你哋啊！

cafeva

隨緣。沒有非讀不可的學校。

Froggy_joe

PingWu_FB 發表於 21-6-13 20:56
多謝分享

家有小五生

希望疫情穩定下來時，可以有機會參觀多些學校
另一個了解學校的機會，係學校的面試安排

有啲學校係in的過程好尊重學生，有啲會in到一肚氣，會感受到呢間學校的氣場係咪適合自己小朋友

conniecheung

kirstyau 發表於 21-6-13 11:25
本帖最後由 kirstyau 於 21-6-13 18:10 編輯

過來人分享升中

twobirds

Froggy_joe 發表於 21-6-13 11:05
出post想總結下自己的經驗，祝願大家將來派位順利，入讀到心儀中學
1. 想考名校，好多學校會睇埋小四成績， ...

小朋友成績不太穩定，只能等呈分一，二考咗再作打算。依家努力考好每一個試。