想聽下大家意見值唔值得因為班主任行為操守為小朋友轉校

manionb

女女今年三年班 喺區內四小龍學校就讀
唔好彩今年遇到個班主任同女夾唔到 經常留難女女
甚至用生理需要留難 上導修課抄手冊時 2次舉手話想去廁所都唔比佢去
跟據老師既講法 第一次舉手係因為未等老師叫名已經講咗出嚟所以唔比
女同我講過左一陣 女因為太急又舉第二次手 今次等到老師叫左佢名先答：我急想去廁所
但老師依然唔比佢去 仲無視左佢

事後我地向校長反映左件事 之後開始受到班主任針對
女平時比較活躍又容易分心 早會祈禱時分心周圍望 班主任責備左幾句女無出聲
班主任仲要補多句：今次駛唔駛又去同校長講？

近排停左面授課又開始番zoom 見到情況仲差左 早2日開左新一課書班主任問女問題
女：我唔識答
即比佢話：宜家咪教緊你囉....下刪一大堆説話
女平時成績幾好 宜家開始抗拒上佢堂 好似驚左班主任

呢間學校成績同派位唔差只係無乜愛心 而女係比較活躍唔係傳統老師鍾意類型
平時講野心直口快可能得罪左班主任 演變到宜家景況
有無過來人家長可以分享下比d意見 值唔值得因為班主任而轉校？

giver

兩睇。驟眼睇，老師的言行未算太差，多數人會建議：趁機教導女兒，順便鞏固她的 AQ 抗逆能力。可是，父母也可以趁機反思：女兒只是與個別老師不咬弦？ 還是兩年多以來，一直抗拒這個校園？

請問可否先探討幾點？
1.   有關事發經過丶前因後果，有嘗試與在場的老師丶同學了解？（同一情景，每個人的描述都不盡相同。）
2.   什麼情況之下向校長反映？ 之前，已跟這位班主任討論過卻不果？
3.   之前兩年的校園經驗如何？「冇乜愛心」一直是該校的文化傳統？可以再描述多一些？
4.   除了這位班主任之外，女兒與其他老師相處融洽嗎？ 校內有些好朋友嗎？喜愛上學嗎？

manionb

giver 發表於 20-12-12 01:21
兩睇。驟眼睇，老師的言行未算太差，多數人會建議：趁機教導女兒，順便鞏固她的 AQ 抗逆能力。可是，父母也 ...

感謝你回覆
1）當時只有班主任一個老師在場 而其他同學未能問到
有向校方了解過事件 班主任回應指女第二次舉手後沒有理采老師 將責任歸咎小朋友
而家長不在現場 唯有以常理推斷 小朋友第一次想去廁所遭拒絕 因為覺得急而需要舉第二次手
按常理不會不回應老師 不想理采老師又何必舉手

2）事發後向校長反映的 因感覺老師不太願意跟家長溝通 班主任對女有不滿亦只在手冊蓋不守紀律印以便記缺點
家長每次見到手冊向老師了解事情才知道發生什麼事 再向女了解説法亦有出入 有向班主任表達希望可以告知女在校情況
唯班主任每次都推説忘記致電家長

3）一二年級都好鍾意返學 鍾意同同學玩 一年級時在學校發生過2次意外
一次係走廊遭上層衝落嚟男仔撞到爆咀 半小時後仍有流血去睇醫生 醫生說傷口頗深建議縫針 唯副校長覺得只是好少事 對方男仔撞到人都有機會受傷
反而副校長在意的是女生髪型 多次聯絡我都是説女沒有賓辮（學校傳統規矩要求賓辮 但見好多女生都是馬尾）
女平時由爸爸送返學而爸爸不懂賓辮所以只扎了馬尾

另一次係女喺學校跌倒 當時老師致電我只是說女有點頭暈沒有其他不適 只讓女伏在課室桌上休息 連休息都不願開放 到我接女放學時見到女有嘔吐 立即送院檢查 醫生要求留院觀察2天及需要做腦掃描

4）女同其他老師相處融洽 上星期回校交收功課遇到中文老師稱讚女上堂幾乖 停課前數學老師亦推薦女出去參加奧數比賽 音樂老師亦揀左女做學校司琴只係班主任向我表明女係全班最頑劣 要與校長商量女既操行評級

manionb

IloveJJ 發表於 20-12-12 11:39
我會乘機教個女如何面對不合理既上司？如何逆境求存？如何扭轉印象。

不過，首要係家長自谷心理準備，是 ...

你提議既都係一個方法 不過宜家女因為怕左班主任而抗拒上英文堂 英文係主科所以比較擔心
二年級由何老師教英文時女好鍾意英文的

Jane1983

同你女傾吓，睇吓佢想唔想轉，轉亦需要時間，亦唔係一定轉到心儀的。問吓當事人想法。

如果中文、數學和音樂老師都欣賞你女表現，佢應該唔係好頑劣的小朋友。如果係年年換班主任的話，捱一捱鍛鍊吓亦唔係好難。但一切睇當事人感受和抗逆能力，你覺得佢頂唔順就唔好勉強。

Jane1983

老師有春風化雨，亦有敗類。我讀書的時候，亦親眼見過一個成績唔係差，個人唔係壞，只係唔識死駁老師嘴的同學，比老師整死 - - 個女仔轉去另一間band 1中學，個老師竟然同新學校講衰個女仔，搞到個女仔係新校受盡委屈，無法立足。

sheepmeimei

好老師同好老闆一樣唔係咁易遇到，轉到新學校亦可能遇到同樣情況，教小朋友做好自己，唔好太在意別人眼光，對佢將來都有幫助。

英文方面，可否找個溫柔嘅補習姐姐令佢冇咁抗拒英文科？

b3410

manionb 發表於 20-12-12 12:24
感謝你回覆
1）當時只有班主任一個老師在場 而其他同學未能問到
有向校方了解過事件 班主任回應指女第二 ...

如果只是你初初提到的一位老師，我可能會再觀察下，再教小朋友自己如何學識處理。不過見到你再舉多幾條例子，感覺無論事情起因經過如何，其實雙方已經有些摩擦，你心中也對學校有些意見。
既然已經有轉學的諗法，不如隨自己的心，開始物色更適合的學校。

不過也要顧及小朋友的諗法，如果佢自己其實唔介意，喜歡學校，唔肯轉，無謂勉強。如果佢也想走，就更加要轉。

還有就是對小朋友解釋的時候儘量小心處理，唔係話學校老師唔好，而係有一間更加適合的學校。千萬不要令佢覺得係自己唔乖，唔夠好，而要轉學，心理上會有陰影。

小朋友成績好，又比較活躍，其實應該都有更加適合的學校。

hkmm888

其實女兒有冇講吾開心，似乎只係個別老師有問題，可以提出調班?

上youtube學下點綁鬢辮，我覺得爸爸吾識吾係藉口，吾識點解幾年都吾學。

HappyCheerBaby

唔值得為咗班主任而轉校，依個班主任只教一年，下年又會再轉班主任，再加上宜家疫情而唔使返學住，未必需要面對面對住班主任，反而，教阿女如何處理班主任無理要求啦!

manionb

Jane1983 發表於 20-12-12 13:33
同你女傾吓，睇吓佢想唔想轉，轉亦需要時間，亦唔係一定轉到心儀的。問吓當事人想法。

如果中文、數學和音 ...

你講出左重點 中途轉校真係唔係咁易 一來有愛心既好學校多人揀呢2年又遇到疫情未必收新插班生住

同時亦想顧及小朋友感受 真係兩難
會搵機會同女傾下 睇吓佢頂唔頂到

manionb

Jane1983 發表於 20-12-12 13:48
老師有春風化雨，亦有敗類。我讀書的時候，亦親眼見過一個成績唔係差，個人唔係壞，只係唔識死駁老師嘴的同 ...

你同學當年轉左去另一間學校 舊校老師又會知新校係邊間？
仲要舊老師既影響力可以去到新校？

manionb

sheepmeimei 發表於 20-12-12 14:40
好老師同好老闆一樣唔係咁易遇到，轉到新學校亦可能遇到同樣情況，教小朋友做好自己，唔好太在意別人眼光， ...

遇到好老師當然好 不過真係唔太多 普普通通既老師都好滿足了
只求唔好再遇到咁伏既

多謝你意見 英文方面會盡力幫下女 首要係想辦法令佢唔好因為老師而產生抗拒

manionb

b3410 發表於 20-12-12 15:16
如果只是你初初提到的一位老師，我可能會再觀察下，再教小朋友自己如何學識處理。不過見到你再舉多幾條例子 ...

搵機會睇吓佢點諗 始終對住宜家班主任難受既係小朋友Zoom都做到咁 如果開番學唔知又會點

你好細心 有啲細微位我都無諗到 感覺到你對小朋友好有愛

manionb

hkmm888 發表於 20-12-12 19:49
其實女兒有冇講吾開心，似乎只係個別老師有問題，可以提出調班?

上youtube學下點綁鬢辮，我覺得爸爸吾識 ...

女有同我講今年班主班唔鍾意佢 覺得好唔開心
有同校長反映過想調班 初時校長認為要睇一段時間及同班主任傾
點知校長同班主任傾完令情況更差越發咬住小朋友
校長始終相信班主任 亦可能因為學校立場令老師更惡
亦有同社工傾過 以佢所知學校未有先例
可能轉班行政上比較麻煩？
況且感覺上學校向來不太關顧小朋友感受 只係看重成績

至於賓辮方面 學校留長頭髮女生中佔半數都沒有賓辮
不理解為何對不同學生尺度不同

manionb

HappyCheerBaby 發表於 20-12-12 20:09
唔值得為咗班主任而轉校，依個班主任只教一年，下年又會再轉班主任，再加上宜家疫情而唔使返學住，未必需要 ...

如果可以處理到我亦想嘗試下 唔太識處理 請問可以分享下？

Jane1983

回覆 manionb 的帖子

我地聽果個女仔哭訴，話新校班主任同佢講，話佢係舊校點點點，對老師不敬，品行唔得，都係無得救。唔係有人講佢壞話，邊得咁詳細！？
我同果個唔算熟，但個女仔無大問題，只係縱壞，不知天高地厚頂老師嘴，罪不至此。

hkmm888

回覆 manionb 的帖子

今個學期面授左兩個月，甘短時間都令到你地甘困擾，我覺得你對學校都不滿，既然你地都吾開心，不如的起心肝轉校啦，同級津校都難搵，吾介意就問下次一級津校插班，留意下附近出名關愛直資私校，不彷打電話問下再決定，轉校都好平常，吾使考慮太多野，你講到校長都針對你地甘，如果寫花左操行，就未必有學校收啦。轉班吾難，睇下學校肯吾肯搞。
都吾好諗咩吾同尺度啦，比人針對就做好自己先囉，頭髮而啲基本校規就做足啲。
同小朋友傾多啲，吾好比太多負能量比佢，留意多啲佢既感受。