K3學習進度

timzoeydon

其實識幾多真係視乎家長出幾多力去教
其實小朋友跟學校課程只係識最基本，你想要小朋友成績好，點樣都要家長攞少少心血。

就算未停課之前，我都係自細喺屋企教小朋友，儘量令到佢學過先至返學校再學會好啲。

父母自己教一定係非常攰，但係小朋友學得比人多，返學校有成功感，噉佢就會鍾意讀書多啲，因為如果你幼兒園階段學得比人哋少，上了小學跟得吃力，噉其實小朋友自小就認為讀書係唔開心，咁呢個長期戰爭就大人同小朋友都會好痛苦。

我小朋友今年k3, 佢中英數程度基本上大概小學二三年級左右，其實同佢讀邊間學校冇關係，基本上都係由細到大我自己教，數學及鋼琴仲拎好多國際比賽奬，但我都唔係為咗小朋友要考直私，只係為咗令小朋友覺得學校嘅嘢佢應付到，噉佢會享受返學。

還有我覺得樓主你而家係儘量抽時間教佢多啲，令佢上到小學嘅時候冇跟得咁吃力。
你唔知到自己應該教啲乜，你可以出邊買習作，用習作嘅課題你都去教佢，就可以。

呢一代嘅小朋友其實學嘅嘢會深過我哋以前好多，所以真係要家長付出心血幫手去教，因為如果你開頭小朋友都已經跟唔上，上到小學你將啲壓力俾曬個小朋友，想佢讀得好又要考得高分，其實小朋友就會好慘。

而家啲小朋友唔可以咁死板淨係寫字同抄書，或者日日做習作，都要配合好多遊戲，又要有時間比佢放電玩完再去學習，所以呢個年代做父母同埋小朋友都辛苦，大家要加油。

timzoeydon

我都好認同中文英文基本上都係閱讀多與少嘅問題，其實乜嘢書都可以學字，如果佢有時覺得悶，可以叫佢自己主動搵一啲佢有興趣嘅書陪佢睇。
中文我會將平時同佢接觸到嘅生活上既字去寫，但儘量諗到簡單，筆劃唔多，小朋友先會肯去慢慢寫，例如，我今天和哥哥去坐小巴，今天的花十分美，我回家要洗手，我玩車十分開心等等，筆墨唔算多，但係平日生活上同小朋友自己有關。

英文我會主張叫小朋友久唔久寫日記，順便學埋日期月份，就算佢內容得兩句都好都冇所謂，例如I go to park today, I am very happy. I stay at home and play some toys等等， 剛開始寫嘅最簡單嘅句子, 仲可以順便教埋佢過去式, 現在式等等，其實寫日期都幾好用，小朋友亦都可以今日去過嘅地方或做過既野寫出嚟。


而數學就真係比較家長視乎教學嘅功夫，我自己就自細無時無刻都係可以教佢數學，例如砌lego, 數公仔，將一啲佢玩嘅嘢分幾個一組，順便教埋佢乘數除數，出街買嘢畀錢可以叫小朋友主動將啲簡單嘅嘢加減，但係唔可以為難佢，一定最基本嘅5+5,10+10,20+20，跟住試下畀錢佢找錢，由淺入深，令佢生活上都可以慣咗計數，如果youtube, 我建議睇numberblocks學數學，一邊聽英文一邊學數學，佢係由最簡單每個數字教起。