訴說亞氏初小社交煩惱

pizzaheidi

小二生，一路有去社交班，渴望有 fd , 在學校不被同學接納，經常出事! 煩惱中....有無同路人，過來人傾下？分享下？好擔心大個左唔知點！

wolf_woo

我個仔都係。。。佢經常over react 同過份要求公平，令到其他小朋友有啲怕左佢

pizzaheidi

wolf_woo 發表於 19-11-5 13:39
我個仔都係。。。佢經常over react 同過份要求公平，令到其他小朋友有啲怕左佢
...

係，不過我仔對自己比較寛鬆，對人地就唔放過，又煩，成日不停講自己野，隨和派會怕左佢，勇武派會攻擊佢，四面楚歌！老師諒解，可惜實際幫助不大！

我真係好想知，究竟佢地通過社交訓練，會否改善到？！但上左兩年左右，我覺得有個大人提住，佢地改到 dd , 訓練班落堂咪又係打回原形

Mikibk0505

嗯！我仔都係小二，同你仔仔同一情況，我都係煩惱中

pizzaheidi

佢日日都因為同學對佢唔好而感到失落，自我形象跌到谷底！我叫佢睇開 d , 自己也可活得精彩，佢又拒絕放下！我都唔知點幫佢！我自己都快崩潰了！日日都負能無力感

wolf_woo

pizzaheidi 發表於 19-11-7 08:51
佢日日都因為同學對佢唔好而感到失落，自我形象跌到谷底！我叫佢睇開 d , 自己也可活得精彩，佢又拒絕放下 ...

或者幫佢報下其他興趣班，等佢圈子大少少，唔駛限死一個圈子，同埋最緊要發掘到長處同同興趣的朋友

小曳人

"好擔心大個左唔知點！"

我地細個唔知係咪無乜呢d問題，定係大家認知上未接觸過呢d名稱，我到近年工作上終於遇上一個疑似亞氏嘅男仔
佢應該大約35歲，明明有practicing cert. 但ask for assistant 人工，之前離職嘅原因係對公司做法睇唔過眼，但最後一份工個上司覺得佢做得野，所以refer俾我，面試都仲ok (講野好直，唔該講嗰句都講埋) 但到返工... 就開始得罪同事，開始無人願教佢野，佢連最好脾氣嗰位都頂唔住

佢可能以為呢類工作唔需要對人，但其實我地公司要teamwork... 要溝通

當然，我無confirm 佢係咪亞氏，但因為我仔有阿氏傾向，所以單純係個人感覺
作為上司，我樂意湊佢，理解佢嘅行為，但咁樣對其他同事好唔公平，大家做得唔開心就會一個一個走...



記得有次聽講座，EP講者提到: 我地有時會個心諗野 (批評嘅說話) 但阿氏無此功能，有乜就用口講，所以得罪人多，好多人無諗過，佢地唔係唔知，係無能力唔開口 (用心諗就算)
社會上能夠理解嘅人唔多，而且就算我理解，唔等於我鍾意聽批評說話，時間耐咗... 一樣會遠離

所以，呢d細路大個選擇職業真係要好小心...

YanKanMom

小曳人 發表於 19-11-30 10:45
"好擔心大個左唔知點！"

我地細個唔知係咪無乜呢d問題，定係大家認知上未接觸過呢d名稱，我到近年工作上終 ...

上一代父母唔會或唔識關注孩子情緒精神學習等狀況，身體無病無痛便算的了。出來工作，也遇過疑似亞氏患者同事，他們社交上的確很吃虧，好一點的同事最多少與他們接觸，壞一點的會作弄及排斥他們。看過一些關於高功能自閉的documentaries，如果自閉得來是較聰明的，他們為了融入社會，長大了一定程度會自我修正表現，雖然內心可能仍是嘰哩咕嚕的。

pizzaheidi

wolf_woo 發表於 19-11-28 22:49
或者幫佢報下其他興趣班，等佢圈子大少少，唔駛限死一個圈子，同埋最緊要發掘到長處同同興趣的朋友
...

有咖！但佢去到邊都比人敵視！好煩！

pizzaheidi

YanKanMom 發表於 19-11-30 11:25
上一代父母唔會或唔識關注孩子情緒精神學習等狀況，身體無病無痛便算的了。出來工作，也遇過疑似亞氏患者同 ...

佢知自己難有 fd , 所以提佢佢會調整自己嘅，不過我不是24小時可以跟緊佢，所以佢好易出事

pizzaheidi

小曳人 發表於 19-11-30 10:45
"好擔心大個左唔知點！"

我地細個唔知係咪無乜呢d問題，定係大家認知上未接觸過呢d名稱，我到近年工作上終 ...

甘你覺得有無得搞？如果直接同佢講，你待人接物唔得，佢明唔明？知唔知自己有問題？

小曳人

pizzaheidi 發表於 20-1-4 23:28
甘你覺得有無得搞？如果直接同佢講，你待人接物唔得，佢明唔明？知唔知自己有問題？
...

佢就算明白都好，佢自己能夠控制/改變嘅唔多



另外，有朋友用drama 去解決部份問題，似乎效果唔錯 (起碼升中入到名校)

mytambb

pizzaheidi 發表於 19-11-5 10:37
小二生，一路有去社交班，渴望有 fd , 在學校不被同學接納，經常出事! 煩惱中....有無同路人，過來人傾 ...

找專業職業治療師，試吓感統、社交訓練小組等。

pizzaheidi

mytambb 發表於 20-1-6 16:37
找專業職業治療師，試吓感統、社交訓練小組等。

有社交班上緊，想試下言語治療，雖然佢講野能力上正常，但成日易激嬲人！

mytambb

pizzaheidi 發表於 20-1-6 21:49
有社交班上緊，想試下言語治療，雖然佢講野能力上正常，但成日易激嬲人！
...

其實社交班比較有用，而且治本要靠職業治療感統。言語治療比較多訓練發聲練習，一般來講，Asperger 沒什麼需要。反而教育心理學家可試一下。

另外，教會等團體可以提供一個機會給他們進行練習。而且宗教一般也是教人兼愛包容，也有幫助。

S-Kwok

YanKanMom 發表於 19-11-30 11:25
上一代父母唔會或唔識關注孩子情緒精神學習等狀況，身體無病無痛便算的了。出來工作，也遇過疑似亞氏患者同 ...

呢樣真。
聽兩個班主任講，仔今年六年級喺社交方面比去年進步咗好多，亦少咗發脾氣。
人長大咗，懂得點樣生存，但係佢依然諸多不滿，只係返嚟對住阿媽講，講住對同一個同學嘅不是，當然佢其實亦有好多仍要改善嘅地方。而可能喺學校忍咗好耐，喺屋企脾氣亦大咗好多。
個人覺得 密集式嘅社交訓練 多啲情境訓練 多啲唔同嘅人/專業人士同佢哋傾計係會好啲。雖然其他人教嘅意思都一樣，但每個人表達方式不一樣，對佢哋嚟講係唔同嘅刺激，同埋佢哋會漸漸發覺，點解每個人教嘅都係一樣，就會漸漸發現這不是你強加於他嘅教育，而係一個人人都遵守嘅社交禮儀。

pizzaheidi

mytambb 發表於 20-1-7 09:22
其實社交班比較有用，而且治本要靠職業治療感統。言語治療比較多訓練發聲練習，一般來講，Asperger 沒什麼 ...

返左教會一個月囉！佢感覺良好，但我就好唔開心，好似乜都要因為佢而改變我自己，就係比佢搞到頭都大埋，無計可施先走去求上帝，但根本我無信仰，所以個心好爭扎

mytambb

pizzaheidi 發表於 20-1-7 17:18
返左教會一個月囉！佢感覺良好，但我就好唔開心，好似乜都要因為佢而改變我自己，就係比佢搞到頭都大埋， ...

放鬆一點，你唔ok可以唔去。其實你同佢係獨立個體。「兒孫自有兒孫福」，不須要強迫自己也去，可以交給有信仰的老師朋輩。

子女的路不是你的路，更不必背着他們行的。