黃錦星為DSE生打氣 30秒畫出大嘥鬼

elbar

黃錦星畫大嘥鬼為考生打氣。

今年度嘅中學文憑試（DSE）核心科目筆試仍未開考，但打頭陣嘅口試已經展開咗，相信考生正埋首作最後努力，而環境局局長黃錦星尋日就拍片為考生集氣。黃以三十秒畫出大嘥鬼，畫得非常快手，但似唔似大嘥鬼就見仁見智喇。

改編名言夠盞鬼


黃錦星就話，兩名上年擔任其「工作影子」嘅學生係今屆考生，希望佢哋考試順利，佢更將大嘥鬼嘅名言「揼少啲，慳多啲」改為「驚少啲，識多啲」去為一眾考生打氣，叫班考生定啲嚟，盡力而為咪嘥嘢，認真搞鬼。

至於片段背景音樂，就用上考評局沿用多年嘅聆聽考試背景音樂、英國民謠《綠袖子》，唔知考生聽到會唔會反而更加驚，搞到打氣唔成反被嚇呢？不過，其他網民就話首歌令到回憶返晒嚟，證明呢首歌陪住唔少港人成長。