中一如何溫書

CCCK1234

小朋友小學係我幫佢溫，而家中一，就叫佢自己溫，要自己搵個讀書方法，第一次測驗，放晒手，佢自己响房溫，結果大部份50,60分，通識唔合格，跟住考試，聖誕假响屋企溫書，今次响廳溫，每日定左溫邊科，考之前佢已經每科溫左一次，我見佢係有睇書，不過就只係睇，有做past paper , 結果，大部份50分左右，中文和中史唔合格

我可以點幫佢，要幫佢搵補習嗎？其實中學生要點溫書呢？請大家幫幫忙，有一科唔合格就要留班，謝謝大家

持之以恆

我小朋友都係睇下課文及作業，無做past paper,成績都O K的。

natnatbaby

比D時間，還是S1。提醒佢，同他建議下不同方法，找出改善方案。今年雖然考得麻麻，考試後自我檢討一下，那些方面做得不足，是否太遲開始温習，做題目太少，應背的又無背，平日有沒做下筆記，要不要早些準備一些參考書及作業用，那一個時間温習最入腦……每個人都吾同，要知己知比，知道自己不足之處去改善。

bb鼠

我女睇作業同notes咋，無做past paper

CCCK1234

natnatbaby 發表於 19-1-22 09:35
比D時間，還是S1。提醒佢，同他建議下不同方法，找出改善方案。今年雖然考得麻麻，考試後自我檢討一下，那 ...

其實佢係未搵到一個有效方法去溫書，佢只係睇，我叫佢寫下字，佢又唔寫，問佢有冇背，佢話有背，例如中史，有部分係寫得唔夠多，得1,2分，有d 話課外題，又唔識，有d 係文言文，又唔明，中史都咁難

gracelam

CCCK1234 發表於 19-1-22 08:24
小朋友小學係我幫佢溫，而家中一，就叫佢自己溫，要自己搵個讀書方法，第一次測驗，放晒手，佢自己响房溫， ...

中一生完全放手自己温有咁嘅成績我會收貨。

中文炒是正常, 多看書是王道。 中史背重點, 有咩政改, 有咩核心人物, 有咩影響等, 多考幾次就摸索到, 其他科都一樣, 分数不要和小學時比較, 中學是另一層次, 高中亦是另一層次。

CCCK1234

gracelam 發表於 19-1-22 11:12
中一生完全放手自己温有咁嘅成績我會收貨。

中文炒是正常, 多看書是王道。 中史背重點, 有咩政改, 有咩核 ...

同意，合格我都收貨，但而家有2科唔合格，做家長點都要諗下咁幫佢，如果下學期都唔合格就要留班

妹妹頭

回覆 CCCK1234 的帖子

我女預先在聖誕節假期溫習全部科目, 到考前一日, 再重新溫, 寫, 背, 老師會比PAST PAPER (上年, 前年) 佢地考前一日做, 我見佢自己都搞得掂, 但未派卷, 唔知成效有幾大

gracelam

CCCK1234 發表於 19-1-22 11:14
同意，合格我都收貨，但而家有2科唔合格，做家長點都要諗下咁幫佢，如果下學期都唔合格就要留班
...

要看看今次成績全級排名, 可能中文全級有50%炒, 最高分也可能是6x分, 不至於唔合格就一定會留班。

CCCK1234

gracelam 發表於 19-1-22 11:19
要看看今次成績全級排名, 可能中文全級有50%炒, 最高分也可能是6x分, 不至於唔合格就一定會留班。 :fortun ...

等我睇下係咪拉curve 呢，唔該晒

草原

CCCK1234 發表於 19-1-22 11:14
同意，合格我都收貨，但而家有2科唔合格，做家長點都要諗下咁幫佢，如果下學期都唔合格就要留班
...

主科的話就要搞搞，針對失分位補救。

little_yolky

CCCK1234 發表於 19-1-22 11:14
同意，合格我都收貨，但而家有2科唔合格，做家長點都要諗下咁幫佢，如果下學期都唔合格就要留班
...

我自己當年老師係唔會跳課文教書, 所以, 我會知道下一堂教邊度, 我會先預習, 上堂時, 因為有預習, 所以知道老師講邊度書係無既, 就抄底, 返到屋企, 就用本筆記簿即日整理筆記同複習一下堂日教既嘢。中文因為文言文較陌生, 會背課文既詞語, 咁會易明D。中史就會記重點, 有D重要史料要背, 背咗有基礎, 至有得作。咁樣, 到考試時就真係睇下就得, 唔駛開通頂。

zitaeric

邊到跌低，就邊到起返身，查找不足，對症下藥。我地学校考試範圍多，－日考兩科，冇得考吓休息一兩日先考，所以要長假前温哂。由於太多野－吓－次塞哂入個腦到，所以第－次考試重點係查找不足，下次再改進，每次去進步。遇到分數不似預期，不要氣餒，要保持鬥心。
好好規劃時間，真係吾得找補習。
我地－早派哂卷，每科自已揾出改進之處，以我地，現在規劃即教即温、預習，整理各科字卡，有吾明即時解決，就算学校除時測驗都ok。
如果自已攪吾惦，小心找個合適補習老師未嘗不可。
互逸之

lojo11

唔好心急... 比時間佢搵方法... 上到中學有唔合格好平常, 可能未適應, 始終同小學大分別

Alice00

試下用整理筆記的方式溫嗎？科目多量又大，只是睇住溫好似難入腦.

happy105

little_yolky 發表於 19-1-22 12:37
我自己當年老師係唔會跳課文教書, 所以, 我會知道下一堂教邊度, 我會先預習, 上堂時, 因為有預習, 所以知道 ...

你成績係咪好好呀！好明顯你細個係乖學生XD
要比阿女睇下你既讀書方法先得

CCCK1234

little_yolky 發表於 19-1-22 12:37
我自己當年老師係唔會跳課文教書, 所以, 我會知道下一堂教邊度, 我會先預習, 上堂時, 因為有預習, 所以知道 ...

謝謝你，小朋友每日放學，只係做功課都做到好夜，唔好話備課和溫習

1998Ruby1998

自己溫，又讀中學，有 5X 分都算係咁。唔合格嘅科目，有冇睇下其他同學表現？中學中文唔合格係非常正常，基本上 6X 分已經係好高分，尤其越高年級，要睇下科排名。

但英文同數學按道理，應該有至少 70 分以上。呢兩科仔仔有冇問題？如果冇估錯，你仔仔升讀中學部？Band 1 校好多時候，只有英文同數學科嘅分數係可以一如以往，中文同其他科都唔洗旨意有靚仔分數。

根據我觀察成績好嘅同學（不論平日係有冇補習／貪玩懶訓）
1. 早 30 分鐘返到學校預習
2. 寧願返到屋企唔溫書都一定要早訓
3. 上堂一定要 100% 專心，想訓教一定大力刮醒／搣自己
4. 功課絕對唔抄人，最好留校做曬先返屋企
5. 做筆記，但未必需要額外整一本筆記，就咁課本上寫。
6. 一定要有時間娛樂，不論係打機、睇電視、追星、手工藝
7. 可以唔去補習，但有唔明嘅地方，落堂即刻問老師，唔好塞埋一邊等運到
8. 操卷、操卷、操卷，尤其數學（呢點我試過，的確好有用）

以上 8 點，令呢批同學成為中學生涯嘅長勝將軍，年年級 20 內（級人數 200 以上），DSE 每科（佢地修 8 科）都 5*。

little_yolky

CCCK1234 發表於 19-1-22 20:15
謝謝你，小朋友每日放學，只係做功課都做到好夜，唔好話備課和溫習

做功課做到好夜, 好多時除咗因為功課多, 係因為每樣功課要諗好耐。所以, 如果理解好, 做功課時間相對自然縮短, 事半功倍的。

我用小學生做例子, 剛好我家有兩個好例子, 一個B1, 一個B3。B1女女沿用我既學習模式, 所以佢功課基本好快做完, 咁佢就有空閑時間備課/溫習, B3女女就玩咗先算, 今朝有酒今朝醉性格, 所以佢上堂學習既嘢唔係明白晒, 做功課自己拖牛上樹, 每日就只夠做好功課, 沒時間溫書了, 所以日復一日, 惡性循環。

chanwendy

我覺得小學都仲可以睇一次就去考, 但係上到中學, 唔只要睇一次, 係要真係入到腦, 自己可以講返一次出嚟先得.  我都放手唔理亞女, 佢有唔明先問我, 但係我會教佢自己做筆記, 唔好單靠老師寫黑板嗰啲, 要自己睇完課文再加筆記, 最好用列表或腦圖形式做筆記就最易入腦. 英中就要加串熟生字, 結果統測全部合格, 考試就有兩科肥咗, 不過其實佢唔係用好多時間去溫書, 加上其中一科係佢最唔鍾意的一科. 但整體而言, 我覺得佢算掌握到, 當然有進步的空間.