【超細B面試記】滑鐵盧是命中注定？小朋友感受最重要

BK_Milk

作者：鯊魚太與寶


幼稚園面試開始放榜，已經食咗幾封Waiting信嘅鯊魚太心情真係好低落。反反覆覆咁喺度諗係咪自己功課做得唔夠，係咪當中安排唔夠周詳，愈諗就諗down。其實只得23個月嘅鯊寶面試表現已經好好，絕對係做足佢嘅120分，但無奈超細B能力確實係有差異。再講學前人話齋，即使考得再好，天外有天，人外有人，考幼稚園都係緣份也。



道理係知，道理係明，但道理諗得再通，都實在係會唔開心，12月超細B想讀神幼、名校？家長心臟一定要夠強，面對一封又一封嘅Waiting信，彷彿呢場滑鐵盧係必然要遇上，從中學習調節挫敗感，同時認清方向，真係作為家長一堂好深刻嘅課堂。


然而鯊魚太覺得即使再唔開心都好，都應該時刻提醒自己，鯊寶嘅心情先係最重要。千祈唔好因為小朋友面試表現唔好，又或者結果唔理想，就覺得世界末日咁！小朋友得嗰幾歲人仔，唔識分咩係神幼、名校，但都一定知道自己父母唔開心。如果單單只係因為小朋友入唔到家長自己心儀嘅學校，就搞到成家都愁雲慘霧，確係本末倒置。


講到底，做父母想幫小朋友揀間好學校，最終都係想佢好，想佢開心啫。希望各位（包括我自己）都可以提起精神！路係好漫長，但只要盡咗力，你嘅用心，佢一定會明白嘅，唔好因為一刻嘅唔如意，而白白浪費咗同寶寶相處嘅每一分、每一秒！要記住，小朋友先係最根本！


即到親子語睇更多育兒／教育資訊。