自製幼兒Halloween六合一教材組合分享（多圖）

BK_Milk

作者：傑。斯與晴


中秋節話咁快就完咗，大家記得記得將月餅罐拎去回收呀！

小JM媽就留起咗兩個紙嘅餅盒要來整嘢，諗住用來儲物，又環保又唔會怕浪費呀嘛！
遲下有機會再同大家分享一下啦！


隨住中秋完結，十月又來咗，又係時候迎接下一個節日啦！
無錯啦！十月份亦係西方嘅鬼節 HALLOWEEN！
今年小JM已經大個女，唔駛怕出去見到啲哥哥姐姐扮鬼扮馬會喊啦！


為咗令小JM了解一下哈佬喂（HALLOWEEN）會見到啲咩，
今次我就以哈佬喂做主題，整咗一系列嘅教作連小手作，
希望小朋友們可以同家長一齊過一個開心快樂嘅哈佬喂啦！






宜家就等小JM媽同大家介紹一下呢六個部份嘅內容啦!
教材一如以往會保留Flash Cards及袖珍Matching Game嘅部份，
以幫助小朋友認識及學習。






一.)　哈佬喂Flash Cards
小JM媽揀咗九個較淺易嘅詞彙來做第一階段嘅Flash Cards，
可以俾小朋友慢慢從淺入深學習。
到出年夾埋第二階段一齊玩又會係另一種趣味！


二.)　袖珍配對遊戲卡
有留意小JM媽系列教材都應該唔陌生。
可以方便攜帶外出玩嘅遊戲卡，越儲越多更覺好玩！









三.) 連連看
以南瓜及蝙蝠作為主題，俾小朋友從簡單線條開始嘗試，
再慢慢試畫較難嘅蝙蝠圖案。
連連看以A5 Size設計，方便可攜帶出外。
剛好配合埋書展時買嘅「UFIXX SILICONE多用途插卡畫板 」一同使用就可以達到多次重畫效果，
不單節省紙張，而且亦易於清理。
「UFIXX SILICONE多用途插卡畫板 (A5)」：https://goo.gl/F8EVoM








四.)　數數樂
最近剛好教小JM學數數量，又適逢哈佬喂，就緊係唔少得數糖果啦！
夠晒活學活用！不過咁，糖食得多都唔係太好架咋，記得要適可而止喔！








五.)　迷宮遊
雖然小JM未必識玩，但其實家長係可以捉住小朋友手指仔一齊「行迷宮」。
又會係另一種樂趣來架！
從中小朋友亦會了解到原來有啲路係行唔到，要再重新揾路！






六.)　我的萬聖節小蝙蝠D.I.Y.


材料:
我的小蝙蝠教材 一份
紙巾筒 一個
膠水/漿糊筆 一枝
較剪 一把
顏色 隨意
創意 無限


做法:






1.) 將紙巾筒上色 或 以色紙包好
2.) 將紙巾筒頂底兩邊向內摺，
變成蝙蝠耳 及 蝙蝠尾
3.) 剪出左邊的蝙蝠翼 及 樣貌配件
4.) 小心地將蝙蝠翼貼上紙巾筒
5.) 再為蝙蝠貼上眼睛，鼻及口即完成
6.) 小朋友亦可以為蝙蝠畫上獨有圖案以作美化








即到親子語睇更多育兒／教育資訊。