狀元壓力（左丁山）

elbar

大學聯招放榜，52名狀元級學生之中，6位7科5**學生入讀港大醫科或商管／法律雙學位及牙醫，另有兩位狀元入讀中大醫學、環球商業及環球經濟金融，呢啲科目，叫做「神科」，係極高分學生，譬如DSE有34分以上先至夠膽報讀（按最佳六科計算，5**七分，5*六分，5五分，數吓手指，就知道最低限度要有兩科考到5**先至掂），考試咁叻嘅仔女，讀完神科畢業就收入有保證喎。


呢日午飯，聽到三位新亞校友嘅千金都考得好，巴士L千金入讀科大環球商業，公關C千金入讀港大商管與法律，編輯L千金入中大讀日本研究。左丁山問：「點解唔返晒中大讀？」公關C代回應：「哎吔，由女兒話事，自己揀啦，我完全冇畀到意見！」編輯L話：「編輯T個女亦係入到科大讀商管。」


根據中大港大科大宣佈嘅數字，中大總共取錄2886名學生，科大取錄1721名，港大不知，只知最高成績之DSE尖子鍾意入讀港大，但考到三四科5**之學生就大多數入中大。


究竟中學考試狀元入到大學，會否一定成為大學狀元──考到一級榮譽兼全系考第一──？以此問過一位資深教授，佢話：「唔一定，讀大學與讀中學完全唔同，做中學狀元可以靠補習，背模範答案，但大學生幾難搵到人同佢補習，考試亦無模範答案，寫paper更難亂咁作，在網上抄襲難逃軟件查證。要做大學狀元，真係要聰明與勤奮兼備，再加上天份，要全系考第一，冇咁易。」


於是想起DSE及IB狀元入到大學，心理壓力其實幾大，最弊人人都知你係狀元，對你期望甚高，教授亦對你特別尊重，如果讀得唔好，幾冇面呀？大學輔導處通常輔導情緒有問題嘅學生，其實對啲尖子狀元學生亦應追蹤輔導。有錢有資源嘅傳媒不妨搵有經驗記者追番十年前、二十年前嘅會考狀元，而今係博士教授吖、名醫吖還是成功iBanker、高官呢？呢類調查報導會好有啟發性，可推翻或證實「求學不是求分數」呢個假說。左丁山識人少，孤陋寡聞，只識得一位成為國際知名嘅大教授曾是會考狀元，就是劉遵義校長。今天8間大學校長之中，好似冇一位係會考狀元，或者去中建大廈、萬邦行、德成大廈、連卡佛大廈呢啲名醫大樓，可以搵到好多曾是會考狀元嘅名醫都未定，但一位醫生對左丁山講：「嗰四間大廈之中一位好有名氣、收入高到極嘅醫生，係我地班同學之中，逢考試就搵我地惡補嘅一個！」咪係，讀書與職業專業成就，未必一定有正相關㗎！




左丁山