轉貼：Retake JUPAS 的考慮

www

[轉貼文章]

你要考慮Retake，首先要知道兩件事：(一) 未來一年既自修生活係點過 (二) 你既得分能力同時間。

(一) 未來一年既自修生活

兩行字加一張相講晒：
冇假期、冇節日、冇娛樂、冇朋友、冇社交、冇自信、冇自尊；
要補習、要溫書、要操卷、要補習、要溫書、要操卷、有壓力。

以上兩行唔係嚇你，第二行更加係精萃，自修真係不停重覆做呢幾樣野，痛苦程度係每日見到本書就想撞頭埋牆，唔係講笑，每日對住同一大堆Notes和Past Paper，見到都想嘔xx( 有時壓力大起上黎連訓教都會發個操卷既夢，訓醒就好似冇訓過咁，然後你又要開始第二日既溫習，無限輪迴) 就係咁樣度過左生命其中既200幾日。不過，重覆去溫書在於考試黎講都只係基本野，請各位睇埋下邊幾個POINT，睇下自己頂唔頂得順。

1. 自修，冇人會督促自己

自修麻煩位，係好DSE相關既事都親力親為去處理，比起讀中六額外多左唔少野。由報考DSE同JUPAS，去到搵筆記Mock Paper、Past Paper，都要自己去攪掂，唔會有人代你去做。而且，唔會好似以前返學咁，有測驗、考試、功課去督促自己溫書，Keep住進度，Sorry，係完全冇既；有野唔明唔會隨時有老師同學答自己，有補習既話可以問補習導師，冇既話就要上網問人，但你會發現唔同人有唔同答案，最後又係要自己搵翻邊個先係真正答案。想自修，怕唔怕麻煩先？

2. 覺得自己係零

冇左學校既測驗、考試、功課，係好難知道自己有冇進步，百分之一千既自修生去到10-11月既時候就會開始懷疑自己溫書究竟有冇用，溫完都唔知自己溫左D乜，做PP又冇明顯進步，越溫越迷茫，唔敢肯定自己所花既時間係咪值得。有一朝訓醒，更加開始覺得自己無所事事，不事生產，坐食山崩，做左屋企既負擔。久而久之，你會當左自己係一個廢青，連自己都開始討厭自己，夜晚越諗越多開始失眠。btw，其實自修都係讀緊書，辛苦在於不斷要同自己既意志鬥爭，說服自己做緊既野係有意義既。想自修的話，擋唔擋得住呢D負面感覺？

3. 煉成摺毒性格

去到8月尾9月，你會開始見到以前既中學同學上左大專/大學，去ocamp，識新朋友，諗上莊，開始左新生活，你會發現大家已經行遠左，傾既話題再唔一樣，有自信的話還ok，冇自信既話就會自己摺埋，有聚會都唔去。即使你會去聚會，你會發現佢地突然好關心你溫書溫成點，不過你聽到佢地既關心可能會自卑感作怪，會覺得好唔自在；又或者你會聽到好多人撥冷水，覺得你唔掂，直接間接叫你收皮。另外，過時過節諗住比自己放監，點知出去玩完返屋企有會有好大罪惡感，最後都係同D筆記同PP過聖誕算。孤獨既生活，頂得順嗎？   
(二) 你既得分能力同時間

要視乎兩個因素：
1. 本身分數：分數距離cut off越遠，溫習的時間便要更多；retake科目越多，溫習的時間更分散。
2. 能力因素：手上既分數係咪出盡力先拎到？未盡力即係仲有進步空間 。

Case 1：18-20分 未盡力 (假設no offer)
未盡力既話，而你性格又係打死都唔讀HD/ASSO，Retake係最fit你既選擇既。不過你要確定之後你有足夠自律性由8月開始溫書溫到下年4月，上面已經講左過程係幾咁痛苦。9個月要換1-4分返黎，計數計上黎好似好理想，但升分唔係想像中咁易。Retake中英文係難上加難，見到有巴絲打其他科升左分，但語文科仍然維持2，1分都冇升過。問題在於語言科目既溫書方向好虛無，唔夠自律既人就會比俾數通或其他elective吸引左。呢D科目溫書時既2方向感同成功感會大D，不過就會令人忽略左語文科冇3既致命傷。

Case 2：18-20分 盡晒力 (假設no offer)
如果盡晒力咁就打死無怨啦，過去一年應該做既你都做左。出晒奶力都考唔好下年又要去Retake的話，你會唔知點樣去改善自己個讀書方式。不過，18-20代表你讀書上有一定既底子, 上到ASSO/HD會有競爭力。如果揀到一個在自己興趣同能力範圍內既programme，應該係容易過DSE既。ASSO/HD既考試範圍只係過去一個sem既課堂內容，唔似DSE一個考試要溫晒。

Case 3：16-17 未盡力
你要諗下自己究竟對學科內容是否掌握，即係有冇底。如果係掌握但只係你自己hea左一年又或者冇溫書, 咁都可以試下Retake，冇溫書都16-17你係讀書上有潛質。 不過，自己hea左一年，你點樣確保自己唔會再hea? 離開左學校會唔會仲hea過之前? 有冇一D人/事幫手鞭策你?

Case 4：16-17 盡晒力
如果你係唔掌握學科內容但又盡左力, 自修對你既難度好大。其實肯努力但又追唔上學科內容既朋友都係好值得欣賞 #good# 不妨試下HD/ASSO, 開拓新領域和出路。HD/ASSO同DSE既讀書方法係兩回事，起碼死記硬背既時間少左

Case 5：16-17 盡晒力
如果你掌握學科內容又盡晒力, 但又唔知點解成績差過平時好多, 咁可能係運氣同狀態問題啦！係的話可以試下Retake。但你要記得你個成績要有躍進先入到U，唔似18-20既巴絲打combined cert 成績升少少就OK。同埋, 你要肯定係運氣問題先好去...... 你既任務係升多4-6分，係要升好多好多分，要用極多時間去溫。我估升到6分既人, 全港50個都未必有...

Case 6：15
見過有一個巴打tritake, 由15左右爆到上2x分；另一個就第一年11分彈到去上去第三年23分，但真係萬中無一 。同時見到好多巴打retake完由15分去到18-20分(都係唔夠分)，即係學科平均黎講要由3升到4，某D科要去到5，任務艱鉅。你要有齊高度既信心、能力、自律性先好做呢個決定。

Case 7：12-15
試下ASSO/HD啦！在新領域發掘自己所長，唔好再被DSE綁住了！

[轉貼文章]

betty_18

要分享比阿女睇

hkpapa852

www 發表於 18-8-13 14:50
[轉貼文章]

仲有一個問題:

千祈唔好諗住combine cert, 8大中部份講明, combine cert成績有機會打折去計

brother4

吾retake ..有什麼介紹？

ilyrd

hkpapa852 發表於 18-8-16 11:32
仲有一個問題:

千祈唔好諗住combine cert, 8大中部份講明, combine cert成績有機會打折去計

要有自信,有信心,要repeat,就要去盡,强者心態 use new results totally, no need to use combine cert.

hksarhksar

hkpapa852 發表於 18-8-16 11:32
仲有一個問題:

千祈唔好諗住combine cert, 8大中部份講明, combine cert成績有機會打折去計

Combined cert 絕少扣分
我仔重考2科，因數找到好老師，靠佢自己吾得

nanadog

hkpapa852 發表於 18-8-16 11:32
仲有一個問題:

千祈唔好諗住combine cert, 8大中部份講明, combine cert成績有機會打折去計

通常神科(多人爭嘅科目) 先至會有 penalty