佛系湧現（左丁山）

elbar

本月20日本欄講本地大學科研經費，順帶一提話香港大學生與內地留港學生比較之下，進取性差好遠。上文之MIT博士，現在嘅大學教授/系主任其實都講埋本港學生一筆，左丁山冇寫到，點知畀一位朋友捉住，「你點解話本港學生不進取？」唯有講埋出嚟。話說上述教授見完內地生之後，留下深刻印象，後來問過教授導師關於嗰位內地新鮮人嘅功課，聽到個個讚好，於是心中有個譜。一日在學系走廊碰到一位本地四年級生，即將畢業，自己教過佢，知道此學生係可造之材，於是問佢：「卜比，有乜打算呀？」卜比答：「呀，教授，有同學叫我去MIT讀博士，你幫我寫推薦信得唔得呀？」教授話OK之至，但問多一聲：「你GRE考成點呀，托福考咗嗱？」卜比竟然答：「GRE係乜嘢呀？申請MIT要考嘅咩？我仲未申請喎。」教授為之氣結，當時已經係四月，過晒美國大學嘅大學申請時間，而呢位卜比居然連乜嘢係GRE都唔知，唯有慳番啖氣，索性拜拜而去。


那已是四年前之事，左丁山問教授：「呢兩個學生依家點？」教授答：「內地生真係得到MIT取錄做博士生，有獎學金㖭，我同佢寫推薦信，有啲光彩，卜比嘛，之後未搵過我，唔知佢現況，大概係佛系。」咦，科技大教授都知道佛系呢個潮語，幾in噃，邊度學番嚟㗎，教授大笑：「一班學生，分內地本港兩類，本地生顯然唔夠主動，內地生就乜都申請，一於博一博，就好似我地在70年代拚命搵機會去美國留學一樣。有一位社會系同事話畀我聽，呢類千禧代，特別係千禧年之後出生嘅香港青年，有不少係凡事隨緣，等運到，統稱佛系喎！」做「佛系」都要有一個條件，就係基本上有瓦遮頭，有起碼溫飽生活，唔駛搏命都可以。即係話佛系青年嘅父母叻過佛系青年嘅祖父母先至得，或者直情就係富三代；呢位MIT博士教授年青時知道唔讀好書就冇前途，屋企又窮，父母唔會幫到佢，於是周圍鑽營，爭取到助學金到美國半工讀，到餐廳洗碗碟搵學費直至讀完MIT博士學位，其堅毅精神與佛系完全相反，佢在大學內碰到內地生都有佢嘅70年代影子，本地生就安於逸樂多啲咯。唔只我地有代溝，80後與90後都有代溝；肥仔K做兼職嘅初創公司，現於科學園，招聘一位IT工程師，有兩位25歲以下嘅申請人，竟然在面試時冇出現，又無來電解釋，肥仔K都嘆息：「乜啲90後咁㗎！」




左丁山