爭英中機會二成（左丁山）

elbar

升學派位時間又到，今年逾五萬名小六學生參加中學派位，比去年增加三千餘人，自董先生推動母語教學以來，香港中學劃分為中文中學和EMI（英中）兩種，以香港家長喜好，必然盡力將子女送入英中，忽視中中，但英中數目只有百零間，學位數自然不足以應付需求，今年嘅數字（據4月13日星島日報A4版），各區英中有9890學額。小六升中生有50300人，除一除，即5.1人爭一個英中位，八成學生會失望。但分佈係不平均嘅，住在灣仔區小六生最有希望入英中，1740人爭789個，比率為2.2；中西區係2.7，九龍城係4.0，沙田葵青同是4.7，但荃灣就已經係7.1嘞，新結婚人士如果生兒育女，買樓有得揀，銀紙許可的話，自不然會心儀是中西區灣仔，唔怪得樓價特別貴過人，退而思其次，去沙田啦，沙田第一城係新界最佳大型屋苑，樓價節節上升，有道理嘅。


有家長問左丁山有乜選校策略，其實點會有妙計吖，講嚟講去還是老一套。左丁山讀中大時有修讀一科「明治時代日本經濟」，教授係來自慶應大學嘅訪問教授山本登，當時已近70歲，左丁山問佢在日本點樣先至可以入到慶應大學，山本教授話：「入慶應幼稚園。」應用於香港，學生想入港大中大或到外國入著名大學，似乎首先都係入咗著名幼稚園，再派位入著名英中，有錢更着數有大把選擇，英中除津中外，還分國際學校、英基學校、直資名校，全部無財莫進來！交得起學費，呢啲學校畢業生大都可以入到慶應嗰類大學。普通家庭又點呀，仍然係著名幼稚園、著名小學、著名英中。港島街坊都話，入到軒尼詩道官小，就好有機會入皇仁然後入港大。沙田街坊就知入到沙田圍呂明才小學，就好有機會入呂明才中學，然後入中大。


教育記者G就話畀左丁山聽，有啲家長恨仔女入英中，如派唔到位，又唔夠錢入IB狀元工廠Sha Tin College（都幾難考到㗎）之類，就把心一橫，送子女入啲便宜直資英中，隨時會後悔，搞到兩頭唔到岸。入中中唔得咩？唉，多謝標籤效果，揀入中中嘅多數唔係尖子學生，老師教得比較辛苦，有啲有歷史嘅中學為咗維持名聲，教中文特別加料，令學生怕怕，望中文而生畏懼之心，反而誤了學生成績，家長喊都無謂，記者G一位朋友兒子，自小喜愛中文，當年被派入皇仁都唔肯去，係要入一間皇牌中文中學，偏偏現在就畀中文科搞到冇心機囉！




左丁山                                                                                                    

cow

南區競爭最激烈，比率為11.8
其次為將軍澳，比率為9.3

elbar

cow 發表於 18-4-24 22:02
南區競爭最激烈，比率為11.8
其次為將軍澳，比率為9.3

快而錯；競爭最激烈為離島，比率為43.6