九龍民生、觀塘Rainbow World同觀塘Bubbles Playgroup有何評價？

littlebibi

本人乃新手媽媽，囡囡就快13m,想搵間學習氣氛同環境好的playgroup俾囡囡寓學習於遊戲，唔知有冇上過呢3間playgroup嘅媽媽可分享一下意見，又或者有冇其他推介，謝謝！

underline

民生排左先，無位

LT1116

本人係bubbles 用家, 我覺得cindy 老師好好, d 小朋友都好鐘意佢, 不過如果係target 名幼playgroup 或者英文playgroup, 就唔係你杯茶

littlebibi

原來民生要5月初先再接受申請，要去到暑期先開班，所以為咗唔想空等，今日已上Rainbow同Bubbles實地參觀，亦接觸過Cindy老師，佢俾我嘅印象亦相當唔錯，都值得考慮試試。多謝2位嘅意見呀😊

dirtybb2000

我係bubbles試過堂
咁岩果堂D小朋友麻麻..尖叫暴走, 又掉玩具
課堂秩序麻麻

tigerchaichai

rainbow world 係未幃幃姐姐那間? 呢間我上左好幾年 (大仔之後到細仔), 我覺得好好的

littlebibi

回覆 tigerchaichai 的帖子

應該係，我響Rainbow World個web site好似見介紹過呢位老師，但上去參觀嗰日就冇接觸過佢，因為全程都係由一位男職員負責，佢冇介紹過呢位老師，反而有講過下另外2位負責英文playgroup 的外籍老師（英文要18m先可以上）

blueaqua

我有朋友上過九龍民生playgroup, comment都幾差，衛生唔好，設施玩具又舊，老師愛心一般

tigerchaichai

littlebibi 發表於 18-3-29 08:12
回覆 tigerchaichai 的帖子

應該係，我響Rainbow World個web site好似見介紹過呢位老師，但上去參觀嗰日就 ...

rainbow 英文playgroup未上過
但瑋瑋姐姐教的班我上過
好好
瑋瑋姐姐係一個好有經驗的導師
我專登由新界區到來上堂
而且我上時見好多人係之前的哥哥姐姐上開, 細佬妹之後跟住上
所以如果上, 要指明上瑋瑋姐姐堂

MON1119

我剛剛上完BUBBLES, CINDY老師好好, 姐姐都好好, 一班得4-5個小朋友, 地方清潔, 整體不錯~

hkkh

blueaqua 發表於 18-3-29 10:29
我有朋友上過九龍民生playgroup, comment都幾差，衛生唔好，設施玩具又舊，老師愛心一般
...

朋友系用家，感覺MS Playgroup 比較求其。佢好似話兩歲B 教顏色時，其中一種顏色系 blueish purple 。咁細嘅小朋友應該未需要識囉

holokhang

blueaqua 發表於 18-3-29 10:29
我有朋友上過九龍民生playgroup, comment都幾差，衛生唔好，設施玩具又舊，老師愛心一般
...

原來唔係得我一個覺得民生差！

上星期六第一堂，課室環境一般，因為就係平時幼稚園小朋友的課室，周圍擺滿教具、玩具等等，非常凌亂，圖書角D書蓉蓉爛爛，想跌想跌咁，我仔都識得行埋去擺翻好落書架。仲有咩環保音樂角、飛機離境模擬示範（應該係教小朋友睇時間、同埋出境入境掛我估），其中一個道具竟然係尖的就咁擺地下，同班有小朋友行過就俾佢界損左，佢阿爸即刻黑面，因為都應該幾深，我見到地下滴左幾滴血，個老師係不慌不忙咁上前慰問，係啊，慰問咋，無話去攞膠布或者其他措施，連個地下都係其他媽媽幫手抹，個老師慰問完，即刻又去翻幫同學影相，因為第一堂的新同學要影張相整咩手冊之類。當個老師行翻埋嚟幫我仔影相的時候我都好尷尬同愕然，影相竟然重要過小朋友流血？
好啦，可能呢個係個別事件，繼續講翻pg，一開始老師叫大家玩玩具，D玩具真係好舊，我見果盒木火車完全掉色，黑曬！我仔手上的lego濕立立滴曬水，證明有清潔洗過啦！之後就圍圈，小朋友坐前面，家長坐後面，呢堂教生果，叫小朋友出去配對貼下生果，一班10-12人，有d小朋友走嚟走去，有企上凳，有喊有尖叫，混亂到一個點。老師完全當睇唔到，我仔後來都加入亂跑行列。之後洗手食茶點，洗手的地方勁烏遭，未見過幼稚園的廁所可以有異味，雖然味道不大，行到埋去洗手池就會聞到，廁所同洗手的地方就係課室入面，完全無門隔開，仲要係2個課室共同一個廁所，真係乜菌都困住曬！去廁所的途中，就會經過老師的辦公檯，旁邊就係垃圾桶，即係老師就坐係垃圾桶隔離或者後面。我掉抹手紙的時候搵垃圾桶都覺得呢個擺位匪夷所思，另外，老師的辦公檯又係凌亂不堪，D紙、文件、小朋友功課薄打仗咁亂，我小朋友依家未夠2歲我都唔容許佢咁做。之後食茶點，老師切麵包分俾每位小朋友，塊包好大，其實我覺得茶點應該自備，唔係每個小朋友都可以食包（食物敏感）或者鍾意食包，因為第一堂我唔知之後的茶點食乜，但我覺得真係好奇怪。

holokhang

（原來我打左咁長超左字數，因為真係講開就好多嘢想講）
我望左個包裝好耐，都唔知邊間包店的出品，希望只係我多心啦！之後做手工，貼下貼紙係個木盒度，木盒可以帶翻屋企，咁呢part中文就完啦！轉去隔離課室英文堂，一開始老師叫每個小朋友的名，唱hello song，之後俾2部玩具車小朋友互相推下傳閱一下，兩round之後就4個小朋友一組貼下車碌。之後每人攞個圓圈扮司機，唱下歌，重複3次就落堂。
我同小朋友上過little habs，迦南，abc pathway，仲有cpda，民生真係最差的！無論課程內容、環境、老師愛心、課堂秩序等等，都可以話無樣好！唔知係咪我好彩，佢開始接受報名，我就交表，好快就有通知，完全唔似其他名幼的pg等餐死！
我上完呢期應該唔會再上，一個月先得3堂，小朋友學唔到D乜！純粹為佢個名考K1的就可以去讀下！

hkkh

holokhang 發表於 18-4-16 22:08
（原來我打左咁長超左字數，因為真係講開就好多嘢想講）
我望左個包裝好耐，都唔知邊間包店的出品，希望只 ...

我個朋友都系話唔recommend. 可唔可以路過問下你對你上過嘅其他pg 嘅評價? 有興趣知邊個pg 真系幫到小朋友。曾經聽過 Pario OK 唔知你有無聽過?

holokhang

hkkh 發表於 18-4-16 23:45
我個朋友都系話唔recommend. 可唔可以路過問下你對你上過嘅其他pg 嘅評價? 有興趣知邊個pg 真系幫到小朋友 ...

呢個我無聽過啊！
我個仔依家23個月，由12個月開始翻pg
1.第一個翻的係cpda，因為好近屋企，同埋artplus、pebbles未排到，我上果間campus校舍好細，得兩個課室，bb班係較細的課室，可以兩位家長陪同，6-8個bb，有d爸爸媽媽一齊上就會變得好逼，一個導師一個助手，150呎課室入面有成20人，環境一般，不過我果班的導師非常好，我個人幾鍾意，因為佢會講解每個訓練的動機，分析每個小朋友的行為，對於新手媽媽的我真係好有用。我有聽講其他校舍會比較大同新。平均150蚊一堂，我覺得上下無妨。
2.之後搬屋，所以無繼續上cpda，去左迦南，讀到依家，無論環境、教學內容、清潔度，老師愛心，我都好滿意。分三part，有體操時間、唱遊、做手工、storytime、茶點時間，一段時間就有唔同主題，好funny。主要係老師好有愛心，我仔每次返學都好開心，放學好似唔捨得走咁。有時病左請假多於2堂，老師都會主動打電話嚟關心小朋友情況，定期有相upload fb，有手冊報告等等。平均250-280一堂。
3.little habs，係佢新開的時候，我join左一期。本來時間唔啱，我reject左，但好多媽媽都話對入LH有幫助，我就去讀啦！每堂一開始就係玩玩具15分鐘左右，有唱遊有體操時間等等，最後10分鐘又係唔知做乜，無storytime，淨係叫bb自己睇書，我覺得平時係屋企我自己睇都得啦。令到我quit的係佢行政極度混亂，可能新開，堂堂都會問家長交左學費未，呢堂問A下堂問B，搞到有幾個家長都鼓譟，包括我！仲有，D老師同行政可能又未夾到，成日入左呢個班房兩分鐘又話隔離果個班房先啱，幾乎頭4堂都係咁樣成日錯。

holokhang

（接上）
D net又無咩愛心，好似嚟打份暑期工咁。circle time小朋友可能坐得唔夠埋，居然推個bb，人地14個月咋，果個媽媽即刻黑面，我地全部家長見到真係O嘴，呢D行為點做幼兒教育？所以我一期之後就無上啦，路途遙遠，交通唔方便，因為果個位我覺得有d偏，我屋企又無mtr或者巴士到，次次都係的士，放學每次都等好耐先有車或者行一段路。平均400一堂。

4.ABC pathway，全英環境、NET，不過我上左3堂，暫時滿意，都係唱遊、手工勞作、storytime，過程幾輕鬆，環境OK、每月都有唔同主題。不過2歲就要求上獨立班，我仔仲未識講嘢，我自己反而有D擔心。一星期一堂，平均250一堂。

hkkh

holokhang 發表於 18-4-17 00:27
（接上）
D net又無咩愛心，好似嚟打份暑期工咁。circle time小朋友可能坐得唔夠埋，居然推個bb，人地14個 ...

高質回覆  

Janiesy

holokhang 發表於 18-4-17 00:27
（接上）
D net又無咩愛心，好似嚟打份暑期工咁。circle time小朋友可能坐得唔夠埋，居然推個bb，人地14個 ...

好詳細，謝謝分享

Queenie1028

身邊有讀過little hats 和民生playgroup 的都係negative comments, 佢地報的原因係因為 target Kindergarten.  我自己上過CDPA, 都覺得幾好，課程設計適合小朋友，老師也有愛心，唯一不是太滿意係center 細，玩具舊，同埋允許2個家長陪住上，太多人。 art plus 係我讀過最滿意的，環境乾淨，衛生做得很好，玩具新（定期更換玩具），每次上堂都有不同玩具玩，課程內容丰富，主題教學，老師（尤其是中文）有經驗。不過大家要有心理準備，不一定入到Victoria.

LT1116

其實唔好話民生playgroup, 就算民幼我都聽唔少negative comment, 總之小朋友跟唔上(佢學術偏深), 唔係外向型小朋友, 基本上都係唔受老師歡迎, 老師亦會俾壓力家長