【細說如何解讀中學發佈的DSE成績和畢業生去向等資料】

hkpapa852

近年, 香港中學對學生公開試成績, 以及畢業生去向料發佈, 都越來越花心思, 所以家長亦要花心思, 去理解一下相關訊息, 以免被資料中既［語言偽術］或［統計偽術］所誤導。

2015年時有會員曾出過一個類似既帖，但當時大家資料還不夠多，今日我又嚟多事，收集一下自己所認識既資料俾大家睇吓，希望大家日後去睇學校公佈資料時，能更清晰瞭解內容，減低被誤導既機會。

學校報告上既［語言偽術］:

1. 科目［合格率］:
    DSE科目係 2級就當合格，但要符合升讀資助大學學士學位要求，中文和英文科必須要同達 3級，所以 2級/合格率，對學術水平高既學校嚟講，無乜太大意義

2. 入讀［大學課程］/［大學學位］人數/比例
    咩先算係［大學學位］/［大學學位］，中文版既演譯，可謂花樣百出。部份學校，只會計學士學位課程，但有更多學校，會把副學士，高級文憑等也納入大學課程。英文版會好一點，只少如果係用
undergraduate 呢個詞，會明確好多。
    另外，如果只係話入讀［大學課程］，沒有額外說明，好大機會係把入讀本地與入讀海外既一併計算。

3. 關於海外升學
    海外升學，可能係升讀學士學位，亦有可能只入銜接學位，部份學校，甚至把留港升讀遙距海外課程，也列作海外升學。所以海外升學，可以有好高水份。

4. "3322率" 和 4主科各自達 3, 3, 2, 2 的分別
    升讀大學最低要求, 係4大主科同時要達到3322. 不過, 個別學校係公佈成績時, 可能只會列出 4主科各自達 3級或 2級既百份比, 但是否可知道該校既 3322率呢? 答案是"唔可以"
    點解呢? 又舉個例子:

    假設某中學, 4主科成績如下:

    中文3+: 80%, 英文3+: 95%, 數學2+: 100%, 通識2+: 99%
   
    咁3322率會是多少? 答案是：沒法確定。

    因為以上各科成績，並非同時出現而計算，所以，可能出現中英數達標的學生，通識不達標，或中文達標但英文唔達標，所以如果只有呢D資料，只可以對 3322率作以下估計：

    最佳的 3322率: 80% (中文, 英文和通識不達標全屬同一批學生)
    最差的 3322率: 80% - (100 - 95%) - (100% - 99%) = 74% (中文, 英文和通識不達標的學生, 沒有重複)

    即該校既3322率, 應在: 74% - 80% 之間



成績/畢業生去向等資料的［統計偽術］:

第一類: 最易發現, 只要自己將資料再新計一次, 就知道問題係邊

以 香港真光中學(坑真) 係2017-2018年中一簡介會上介紹學校2015-2016年中六畢業生入U情況為例 (請看 #4 備注 1)

顯示共有97人入U, 佔80.8%, 另外顯示有 45.4% 入3大

有咩問題呢?

大家計計數:
97人入U, 佔80.8%, 即全級人數: 97/80.8% = 120人
3大入讀人數, 15+19+10=44人, 以全級人數計出嚟既比例: 44/120 =36.67%
點解3大比例會係 45.4%?

將44/45.4% = 97, 咁大家應該明白了! 原來佢係用”取得大學學位人數” 去做份母嚟計算.

點解要咁做? 大家自己諗吓吧!


第二類: 以非一般方式發佈的"偽術"

有部份學校, 喜歡以"非一般"的統計方式, 去顯示自己既成績, TKO既GT係其中一間, 可以參考吓佢 2014-2015年既DSE成績 (請看 #4 備注 2)

整體4+平均有72.2%, 幾好喎! 有咩問題?

問題在於: 如何計算整體4+平均

GT既整體4+平均, 係將各科目以同一權重再 Average去計, 咁係咪正確呢?

4大主科, 以同一權重去計基本上無問題, 因為所有學生一定要考 (除NCS可不考中文, 但通常比例不高, 影響很低); 但其它選修科, 如當作和主科一樣同一權重, 就不太恰當, 亦唔係EDB既標準計算方式.

好似部份非熱門科目, 如音樂和地理, 報考既人會較主科少好多, 如以同一權重, 根本反映唔到真正既成績.

EDB標準計算方式如下: (如果還是不明白，請看看 #3 說明 1)
(1) 先計算計算每一科目既成績, 如某科目取得4+人數
(2) 將各科目以步驟(1)的方式計算出4+人數, 然後相加
(3) 將步驟(2)點既結果, 除 (各科目應考人數既總和)

假設一級有165人, 共考取1130個科次, 各科合共取得 675個4+既成績, 咁整體平均, 應該係 675/1130 = 59.73%

以下例子說明, 以GT計算方式, 同EDB計算方式, 可能出現既”誤差”:

中文: 50人考, 30人取得4+
音樂: 5人考, 4人取得4+
地理: 10人考, 7人取得4+

如以GT方式計: 3科4+平均係: average (30/50, 4/5, 7/10) = 70%
以EDB標準既統計方式去計, 3科4+平均: (30+4+7)/(50+5+10)=63.1%


第三類: 需要對各類資料有基本認識才能明白"偽術"何在

以高主教書院為例, 高主教書院2015-2016年既DSE成績  (請看 #4 備注 3)
http://www.raimondi.edu.hk/new/document/dse2016_updated.pdf

呢份PDF P.3, 有升讀 UGC-Funded degree 分佈. 驟眼睇落, 有42%入3大喎! 但事實呢?
UGC-Funded degree 只係 local degree 既一部份, 如果你唔知佢有幾多學生升讀 local degree, 你根本唔知佢呢42%實際係畢業生既幾多%.

不過高主教都好, 仲有另一樣資料俾大家, 係佢同年份校務報告(PDF P.4)   (請看 #4 備注 4)
http://www.raimondi.edu.hk/new/document/School_Report_2015-2016.pdf
有顯示當年有~38% 學生升讀 local degree, 所以實際入3大比例, 只有不多於: 38% x 42% = 15.96%


第四類: 除非有齊資料, 否則根本沒法分辨的 (則係無人會知)

銀禧係2015-2016年度中一入學簡介會中, 展示咗一幅上年畢業生升讀 local degree既分佈圖  (請看 #4 備注 5)

按照圖中升讀3大既人數比例, 同校務報告中升讀人數比例 (請看 #4 備注 5), 有明顯差距.

經過憫父, greenapple1093和本人一齊分析, 發現問題係:

銀禧校務報告中升讀3大既人數統計, 應該係連附屬院校開辦既副學位都計埋入去.

分析內容請看呢個帖:
何明華會督銀禧中學於2014-2015年校務報告中入U率和簡介會上資料不一致的分析

校務報告雖然好似已將各院校 breakdown 晒出嚟, 但原來, 當中仍然有"統計偽術" (如連港大附屬院校開辦既副學位都計埋入去港大個%)


其它"統計偽術"既例子:

A. 真道書院入U率統計問題

    參考真道書院2014-2015年校務報告 (PDF P.62,63)   (請看 #4 備注 7) , 節錄如下:

68 (52.7%) out of 139 graduates were accepted by local bachelor’s degree programs. More than last year, 17 (13.2%) students had offer from overseas bachelor’s degree programs. The total percentage of studying bachelor’s degree programs was 65.9%. Another 27 graduates (21%) were admitted to local were admitted to local associate’s degree/higher diploma/foundation programs. 13 students (10.1%) had offer from overseas associate’s degree/higher diploma/foundation programs. The total percentage of studying a total percentage of studying atotal percentage of studying associate’s degree/higher diploma/foundation programs was 31.1%.

    有咩問題呢?

    其實問題類似"統計偽術"第一類, 大家計一計, 68/139 = ?
   
    點解"全部"百份比, 個份母都係用 139計都唔啱, 而且合部其實係用 129 計呢? 係打錯了嗎, 但點解係 139, 唔係 140 呢? (以P.62 DSE 考生 + IBDP考生人數去計, 應該有 97+43 = 140人喎!)
    再睇番DSE成績, 話只有8個人取得25分或以上(沒有說明只計5科, 是否全部科目合計? 不過就算計5科, 都同本港日校平均~12%差一截), 証明DSE學生既成績明顯較遜色, 能夠以DSE成績入U讀degree既比例應該唔好會高.
   當年考IBDP個43個學生平均成績較佳, 應能全部升讀degree, 再加上DSE攞25分個8人, 咁肯定有資格升讀degree, 暫時計算只有41人, 其餘個D人(44人, 應該係DSE成績不足25分個班)係入到咩大學讀咩degree course呢?
    不過真道係2015-2016年既校務報告已刪去人數, 等大家無得計 (只要信, 不要問). 咁到底佢係2015-2016年時有冇用統計偽術呢? 我不知道了
    睇番真道2015-2016年DSE成績, 取得25分或以上人數/比例和2014-2015年相差不遠 (只差4人), 加上IBDP平均分亦較上年下跌, 所以入U率應該和上年差不多.




*******************************

暫時講住咁多, 如再有發現, 日後再補充.

其實講咁多, 都係希望大家小心解讀訊息, 不過記住, 成績唔係學校既全部, 對學校有興趣, 除睇校務報告, DSE成績, 入U率等資料, 更應多加留意和參與學校既活動, 如開放日, 簡介會.

hkpapa852

講完D關於睇校務報告, 公開試成績要注意既地方, 又講下一D睇資料時常見既用詞同知識:

1) 3322率 / 入讀大學課程要求

    相信不少家長都會知, 3322率就係指中文,英文,數學同通識4科, 係 DSE 時要同時達 3,3,2,2 呢個級別. 呢個係學生申請 JUPAS degree 既基本要求.
    如學生為 NCS (非華裔學生),可以一科 NSS 丙類課程既外語, 取代中文. 只要外語成績達標, 加上英, 數, 通識符合 322 要求, 一樣可以申請 JUPAS degree.

2) 22222率 /入讀大專課程要求

    呢個指標,係坊間所謂B1中學中較少見到, 因為係可申請 JUPAS 副學位 (副學士和高級文憑)既最低要求, 即係需要有5科同時取得2級, 當中必需包括中文和英文兩科.


3) JUPAS offer / 取得既聯招學位
    JUPAS 係透過 DSE 成績取得本地大學資助學位既主要途徑,方式亦類似升小/升中既安排, 要學生排志願, 最後只會分派一個學位. 不過, 好多家長都以為 JUPAS 學位就等於學士位 (Degree), 呢點係唔啱, 所以我又講解一下目前其實 JUPAS 學位包括D乜.
截止2017年9月1日, 透過 JUPAS 方式可取得既學位課程包括以下幾類:

    - UGC Funded Degree course (資助學士學位課程, 由8大提供)
    - UGC Funded Associated Degree course (資助副學士課程, 由城大提供)
    - UGC Funded High Diploma course (資助高級文憑課程, 由理大和教大提供)
    - Self-financing Degree Course (自助學士學位課程, 由OUHK提供)
    - SSSDP Degree Course (指定專業/界別資助學士學位課程, 由OUHK, 珠海, IVE, 恒管, 明愛, 東華提供)


4) 本地大學學士學位 / Local degree
    本地大學學士學位,包括透過 JUPAS 取得既學士學位, 以及需要學生去自行考取既自資學士學位.一般嚟講,8大既資助學士學位 (UGC degree), 認受性較高,所以需要較好成績才成必讀. OUHK 既自資學士學位, SSSDP 既學士學位,以致其它自資學士學位(如明德,港專,樹仁等),除個別科目, 一般都不太受歡迎, 所以成績達標(符合3322)都有機會入讀.
    所以如果兩間學校,一間公佈 Local degree, 一間公佈 UGC degree, 後者含金量會較高
    簡單一點再說一下:

    Local degree = JUPAS degree + Non JUPAS degree
    Local degree = UGC degree + SSSDP degree + OUHK degree + Non JUPAS degree

5) 升讀"3大"學位既比例

    3大：不少家長都知,係指香港大學,中文大學同香港科技大學.呢3間係香港被公認水平較高既大學,佢地當中有不少著名科目,收生要求亦頗高,所以被不少人列入一個中學水平既參考指標.
    另一個共通點,3大 (其實浸大同嶺大一樣)只有開辦資助學士學位課程, 所以透過 JUPAS 入得去既, 一定係讀 Degree.
    我認同入3大率係一個可以肯定學校學生能力既指標,但始終各大學都有熱門同冷門科目,入3大既冷門科目, 相信比入城大/浸大等既熱門科目易得多. 而且, 學生無論幾叻, 都唔代表佢一定要讀某大學, 所以入某/某些大學既比例, 只可以參考.

6) Non-JUPAS / NJ / 非聯招

    如果唔係以 DSE 成績 (如 IBDP, GCE-AL 等) 去報讀本地資助既大學學位, 就需要經非聯招(Non-JUPAS). 以 Non-JUPAS 成績去考大學, 一樣可以考資助學士學位 (UGC Degree), 同埋自資學士學位, 但要自己一間一間去報(類似考小一/中一時自己報考直資).
    目前香港既 UGC Degree, 政府只要求 8大盡量提供俾 JUPAS, 但沒有規定比例多少. 近年比例, JUPAS 同 Non-JUPAS 係太約 8:2 (3大個別科目達1:1).

7) 點解要睇學校 "整體4+/5+平均比例" 呢?
    近年DSE考生, 要較大機會取得 UGC degree, 起碼要最佳5科(Best 5) 達20分或6科達24分.目前DSE考生都係考6科為主, 如果要計 Best 5 得 20分或 Best 6得24分, 即係每科平均要達4級.
    如果要入3大(或較熱門科目), 要求更高, 基本上起碼 Best 5 有 25分或 Best 6 有 30分, 即係
每科平均要達5級. 所以睇整體4+/5+比例, 可大約估計到, 該校有多少學生達到取得UGC degree/入讀3大既門檻.
    不過記住, 係香港升讀大學, 攞幾多 4 同 5 係唔足夠, 因為還是達基本要求: 3322
    如果唔達基本要求, 如中文只有 2, 就算其餘科目全部 5**, 都係無法升讀 UGC degree

    *** 雖然有大學曾經試過俾個別科目不達標既學生入讀, 但一來個案不多, 二來通常係有條件 - 如下年必須再應考該不達標既科目, 但如再考後成績還未能達標, 大學就會要你退學


8) 學校 "整體2+/3+/5*+/5**+平均比例"如何解讀呢?:
    個人認為, 學校 "整體2+/3+, 其實只係合適用作對非B1中學能力既參考. 對B1中學嚟講, 呢2個指標無乜大價值
    至於5*+/5**+平均比例參考, 其實主要只係可睇到學校既尖子比例 (即平均全科攞A既學生). 呢個數字, 最多只能分辦學校是否有一批尖子, 對分辦學校水平 (如B1A/B/C), 幫忙不大, 因為B1B和B1A學校, 尖子比例未必會差太遠.


9) 對DSE成績解讀既個人建議:
    個人認為, 參考DSE成績, 可以從以下幾個角度去諗:

    3322率: 學校既補底效果如何

    整體4+平均: 可反映大圍學生既能力 (學校大約有幾多學生可入讀UGC degree)

    整體5+平均: 可反映學校較優秀學生既比例 (學校有能力入讀3大既學生比例)

    舉個例子:

    如果某中學, 整體4+平均同整體5+平均相若, 但同時唔係太高 (加上3322率亦唔太高), 好大機會係學校著重拔尖.

    其餘一些個人統計用既參考:

    A. 升讀本地學士課程(Local degree)比例計算方式:

        升讀本地學士課程人數 (包括JUPAS和Non-JUPAS degree) / 當屆畢業生人數


    B. 升讀3大比例計算方式:

        升讀3大學士課程人數 (不包括附屬院校既自資課程) / 當屆畢業生人數

hkpapa852

說明:
1. 整體4+/5+平均計算參考
    上面提出過優才整體4+/5+平均計法有問題，可能大家都仲係唔太清要點計/問題係邊。咁又係呢度解釋吓。先參考吓沙田官立中學既2015-2016年DSE成績統計:

參考以上資料，沙田官立中學既成績如下：

整體5+平均：237 / 1117 = 21.22%
整體4+平均：583 / 1117 = 52.19%

整體5+平均（以優才既方法計算）：
Average (17.06%, 12.35%, 25.88%, 52.00%, 7.06%, 35.85%, 10.81%, 55.56%, 16.67%, 29.41%, 13.04%, 26.32%, 16.67%, 0.00%, 28.57%, 11.11%, 27.78%) = 24.13%

整體4+平均（以優才既方法計算）：
Average (51.18%, 34.12%, 65.88%, 76.00%, 42.35%, 66.04%, 37.84%, 73.02%, 30.00%, 70.59%, 39.13%, 68.42%, 41.67%, 100.00%, 58.93%, 44.44%, 50.00%) = 53.10%

兩者都係"以優才既方法計算"既數字較為高

hkpapa852

備注:
1. 香港真光中學(坑真) 係2017-2018年中一簡介會上介紹學校2015-2016年中六畢業生入U情況



2. GT 2014-2015 年DSE成績公佈截圖參考:


3. 高主教書院 2015-2016 年升讀 UGC-Funded Degree分佈截圖參考:

4. 高主教書院 2015-2016 年校務報告P.4中入U分佈截圖參考:




5. 何明華會督銀禧中學於2015年中一簡介會中展示2014-2015年畢業生升讀Local degree分佈截圖參考 (資料由瑩希媽媽提供):




6. 何明華會督銀禧中學2014-2015年校務報告入U率描述的佈截圖參考:



7. 真道書院2014-2015年校務報告入U率描述的佈截圖參考:

hkpapa852

留位........

cf1511

回覆 hkpapa852 的帖子

我覺得你分享得太透徹了👍🏻👍🏻👏🏻👏🏻

oiyau2005

留位.

b3410

如果唔留意，真係睇唔出。
其實，如果學校出D唔出D，資料不齊，都好難分辨。感覺就算同一間學校，每年show 出來的數據都有可能唔同，傾向於揀靚數據比大家睇。

Soundervolt

坑真，優才、高主教、何明華....多得您唔少

hkpapa852

Soundervolt 發表於 17-9-19 18:17
坑真，優才、高主教、何明華....多得您唔少

要開名，仲有大把可以開

mcl203

hkpapa852 發表於 17-9-19 18:20
要開名，仲有大把可以開

搞到池D中學都唔肯公開資料 ~~~

仲要關注埋D鋼粉既感情呀 ~~~

王家爸爸

mcl203 發表於 17-9-19 18:32
搞到池D中學都唔肯公開資料 ~~~

仲要關注埋D鋼粉既感情呀 ~~~

玻璃心鋼粉先最可怕。

hkpapa852

王家爸爸 發表於 17-9-19 18:44
玻璃心鋼粉先最可怕。

係咪要驚佢地用洪荒之力攪到我油盡燈枯？

cosyfook

請教hkpapa852, 港同的DSE成績和入U率有沒有這種偽術呢？請賜教

王家爸爸

hkpapa852 發表於 17-9-19 18:52
係咪要驚佢地用洪荒之力攪到我油盡燈枯？

驚佢地用盡宇宙洪荒之力，用千字文轟炸你。

Oscar1038

或者掉轉問下，那一所中學公布的是最可信呢？

plastic

謝謝分享。大家要明白真理是殘酷的

Ktfk

  此舉乃造福EK大眾....

Charlotte_mom

cosyfook 發表於 17-9-19 19:10
請教hkpapa852, 港同的DSE成績和入U率有沒有這種偽術呢？請賜教

今年港同第一次公佈DSE，無公佈視藝5以上係零。之後新version有寫0（5）、0、（5*）、0（5**）（算隱瞞吧）

Charlotte_mom

順帶一問，以上隱惡揚善情況又多唔多，算唔算偽術呢（唔駛俾面我，唔岩就抵俾人批評）。之前我都問過呢個問題：會唔會有學校做假做到「全部科目4以上/5以上」係揀有利科目黎做數呢？