- 在線時間
- 312 小時
- 最後登錄
- 23-7-19
- 國民生產力
- 3455
- 附加生產力
- 44848
- 貢獻生產力
- 0
- 註冊時間
- 07-11-25
- 閱讀權限
- 10
- 帖子
- 27193
- 主題
- 12557
- 精華
- 0
- 積分
- 75496
- UID
- 168291
|
七月十一日,升中派位放榜,考評局公佈DSE試成績,一時之間,一年一度,教育組記者大派用場,成為新聞報導主⻆,較早前IB試成績公佈,香港有26名IB狀元(考到45分滿分),其中15位來自英基學校,5位來自聖保羅男女,其餘來自男拔,保良局蔡繼有,加拿大國際等。左丁山嘅朋友營銷A係半個虎媽,話俾左丁山聽:「我個仔會報晒申請入讀男拔、蔡繼有、加拿大國際及英基嘅沙田書院。」點解係沙田書院呢?原來過往英基以KGV及Island School著名,現在就係Shatin College盛產IB狀元,益晒九龍塘區及沙田區嘅家長,譬如沙田駿景園就有不少沙田書院嘅學生!
不過你估咁易入咩!問清楚營銷A:「你個仔明年升中一呀?」佢答:「唔係,乖仔現在讀緊小一之嘛!」吓!五年後之事,咁快諗定?營銷A話:「輸在起跑線呀,現在就要籌劃!」咁緊張,佢只係算叫做半個虎媽啫噃,佢見到一位阿媽,自嘆不如,甘拜下風,因為嗰位真正虎媽(香港人持外國護照)入唔到某國際學校(與她的護照、兒子護照同國籍),直情返祖家要求佢所住地區嘅國會議員寫信俾嗰間國際學校關說也!
爭入名校爭得咁辛苦,名校教師亦覺辛苦,女教師B係左丁山世姪女,佢話:「我間學校有好多名人子女入讀,點解會入晒嚟,我唔知,我冇資格決定收生,但啲父母仲惡頂過啲學生,仔女在學校發生乜嘢事情就追電話嚟查問,當我地係法庭證人咁盤問,啲女律師媽咪最麻煩,如果由我話事,阿媽係律師嘅學生我就一定唔收!」女律師媽咪兼且係虎媽嘅話,何止子女難頂,子女嘅老師更想辭職逃亡。咁啱嘅,左丁山起碼有三四位世姪女係名校出身,在大型外國律師樓做律師嘅,佢地一有仔女之後,全部辭晒職返屋企湊仔女,左丁山問過一個世姪女:「你唔覺得浪費咗教育資源咩,讀咁多書,30歲後竟然唔做嘢!」世姪女答得妙:「我為社會培育下一代,更加有貢獻!」佢地除咗在家親自為子女補習(尤其是英文)之外,更會帶仔女出外學藝,等仔女多方面發展。譬如帶女兒去學整餅,一名國際學校嘅年青英國人男教師原來係甜品師傅,教書之餘,心生一計,在上環租咗一個寫字樓專教小學生整餅,世姪女上星期就帶五歲女兒去學整法式macaroon,學費600元一堂,有十幾名家長攜女參加,學生由三歲至六歲,識得幾多吖,真係好搵!不過,老師最好係洋人,講英文,用廣東話教,就唔夠吃香㗎嘞!香港堅尼指數夠晒高,兒童教育更加貧富不均!
左丁山
|
|