醫生,智力評估中心出錯,我小朋友是正常的(真實例子)

crabooo

件事已經過左2年,我係確定我個仔係完全無問題先上黎同大家分享.簡單講就係幾年前話我個仔係評估中心評有自閉症,唔係自閉傾向,個醫生仲100%話係自閉,但經過2年後, 證明我個仔完全正常.
我會慢慢打晒成個過程,時間出黎,盡量記得幾多得幾多.

同埋因為我有正職, 所以出文會慢D.

我出文既原因就係希望有D家長係可以靠自己教返好個小朋友, 當然有D小朋友係真係有自閉, 但我都相信好多係評錯, 政府醫生就求求其其,係唔係都話你有事先,唔想有責任,你醫好就話唔係評錯, 係因為及時發現, 要知道自閉其實係無得醫. 私營機構就係唔係都話你有事, 有錢賺.

我係一個爸爸, 個時由評估話有事之後, 我做左好多好多research, 因為本身係外國留學, 所以識D英文, 睇左好多醫學文獻, 自閉係無得醫, 但香港醫療對哩個病係完全唔熟悉,而D醫生對哩個病都係半桶水.

我相信評錯既比率係好多好多,當然都有D真係有哩個證, 只係希望評錯既家長唔好咁快放棄自己小朋友, 因為你如果真係當佢有自閉咁教,其實唔係一件好事, 你試想下如果將你自己放去精神病院, 時間耐左你都會有精神病.

我會一有時間就交代詳情, 我知道好多家長都會上黎求助.
我個時都係夜晚一邊睇FORUM一邊流眼淚.


如果有問題都可以私信我

rafaelbaba

多數都是踩界~

最了解及清楚小孩始終都是家長,
但有時最唔接受現實也是家長~

lobb2015

多謝分享。等你留言！

crabooo

rafaelbaba 發表於 17-6-7 13:44
多數都是踩界~

最了解及清楚小孩始終都是家長,

自閉症係無擲唔擲界的.如果有自閉症的就是有,沒有的就是沒有.
而所謂"擲界"的只是未能確定小朋友是否有自閉.因為其實香港好多所謂的醫生,機構都唔係專科, 所以多數都會講傾向, 因為佢地根本唔識, 我小朋友直程話係有自閉, 最後都係完全無問題. 我曾經去過評估中心想投訢醫生唔專業, 同埋想解釋比佢地聽,其實評錯對一個家庭其實好大影響, 但佢地一味講咁而家小朋友無事咪好囉, 又話無機制投訴

而假如小朋友真的是有自閉症,其實就做什麼都不會令佢由有到無.

rafaelbaba

首先我所說的踩界就是你所解釋一樣~

是按所謂的專業醫生進行評估,看小孩中多少point,
對答及行為,簡略作出評估.
假若當日小孩狀態不好,以有很大偏差.

始終最近學說都是提出6歲前係治療的黃金期.,
所以家長都是抱著這方向訓練或改善~

當然評估是自閉,對任何家長都有打擊,更可況錯判呢!

yuk1yuk

支持樓主！請你慢慢細說！
我地都好需要你的分享！

taptap83

先多謝樓主既分享。其實我希望我仔係被評錯，至少有一絲希望佢會變正常。
我仔自閉譜系，症狀唔係好嚴重，但足以影響我地日常生活。從帶佢早期訓練開始，我領悟到想佢同正常人一樣就要俾正常人既環境佢，用返正常人既基本準則教佢，過程只不過再加多好多體諒，只因我希望將佢好似一般人咁正常獨立生活。
但係佢越大奇怪既地方越來越多，縱使一直管教，佢會突然斷線。好似前幾日叫佢沖涼，佢突然提出話唔換底衫褲，我好詫異，因為佢由細建立既衛生習慣唔知點解可以突然冇左。我的確對佢將來非常憂心，更加唔好講佢眼裡心裡只有自己在意既野，唔理其他人、事和後果。每次佢有怪行為時我都忍唔住擔心佢將來，有時夜晚會喊、會瞓唔到。
唔好意思離題了，我今日同阿仔又有衝突，所以忍唔住呻下喊下... 如果可以，我都希望阿仔被誤評而唔係真係有自閉症，一個無得醫既病。

crabooo

其實我想寫出黎, 唔係叫大家唔好信醫生, 應該要相信自己同埋相信自己既小朋友. 我都唔會推薦任何產品及課程, 因為我知道哩度好多人係度搵食, 我都被呃唔少錢. 我對我個仔既教育同所謂既寶品其實係屈x氏都買到,而教佢既活動都係唔駛錢的. 當然可能有d唔係呃錢, 我唔敢講, 但我睇完外國既報告, 最有用都係父母陪伴同埋其他小朋友一齊玩. 所謂既訓練我個人覺得無用.

我個仔2013年4月出世,我同父母同我太太一家5口住.我地2公婆同家族都無任何類似問題.婚前檢查一齊都好正常, 出世都好正常,無早產, 總之所有野都正常.

我父親在小朋友出世前就確診cancer, 我媽媽要照顧父親, 所以無時間理我地, 我都因為工作關係,都好少陪伴小朋友,也要幫忙照顧父親, 而我太太身體唔差,而且年齡都細,唔識點樣照顧, 其實我地都比較少陪小朋友, 都只係每日餵跑佢, 但無乜教導, 都好少帶佢去公園, 多數都係我地行街, 帶埋佢去, 而唔係比佢去玩.

佢係10個月同歲幾都會嘗試發音, 但我地無理. 直至2歲去健康院檢查先知大獲, 包括言語同佢所有既奇怪行為, 完全match晒自閉小朋友.係好嚴重個隻, 都去埋精神科排期.

得閒再打

lobb2015

crabooo 發表於 17-6-8 14:01
其實我想寫出黎, 唔係叫大家唔好信醫生, 應該要相信自己同埋相信自己既小朋友. 我都唔會推薦任何產品及課程 ...

支持！等你！

Bloleung

Pm u.

SWSWSW

支持，等你

cookieman

樓主，我對囡囡細個的（0~2歲）的教養方式都同你一樣，只係餵飽佢，唔識同佢玩，無去公園，再加瘋狂睇YouTube english兒歌，我囡私家同政府都評咗自傾，支持你寫落去!好想知之後點

SWSWSW

我囝1歲10個月前都是同樓主情況好差，無去公園，無人同佢玩，明明囝8個月時有跟我地學講野 ，突然無灑聲，去到1歲幾有玩會發音，好想知跟住你囝囝發生咩事

Monstereasy

taptap83 發表於 17-6-8 00:24
先多謝樓主既分享。其實我希望我仔係被評錯，至少有一絲希望佢會變正常。
我仔自閉譜系，症狀唔係好嚴重， ...

其實對於我來講有無呢個label唔重要，最重要如果行為有問題就教。就算無自閉，行為有問題就唔教咩？
我小朋友主要係情緒太容易波動，咪主攻教情緒控制，自己有時教極都無效果咪揾臨床心理學家觀察下，比下不同方法同建議點可以教好d.
主要都係靠自己去幫佢。

sylvia0924

樓主，我都好想知，最終點樣發現自己小朋友原來唔係自閉？我之前2 公婆返工，比嫲嫲湊，都係平時餵飽佢，有野做就比you tube 佢睇。其實我覺得好多小朋友有自閉好大機會同成日睇平板電腦同英語DVD 有關，因為冇咗雙向溝通

DearBabie

請問樓主點樣肯定到你仔係冇事？做多1次評估？

DearBabie

回覆 Monstereasy 的帖子

如果冇呢個label,只會介定佢係曳，大個有機會變乖。而自閉係冇得醫，唔同的。

shuna

crabooo 發表於 17-6-8 14:01
其實我想寫出黎, 唔係叫大家唔好信醫生, 應該要相信自己同埋相信自己既小朋友. 我都唔會推薦任何產品及課程 ...

我同意有一d 醫生會評估時唔夠準確, 但都通常因為當時個小朋友年齡同能力唔及同齡而引致。 有一部分小朋友因為語言慢左, 就會出現發脾氣同社交差既問題, 呢類行為同自閉症好似，但通常訓練完語言能力追倒就變得好正常。所以最終6歲既評估才是最肯定既, 2歲那個評估只係按當時既表現比個名個小朋友, 好等佢可以有服務可以去排隊。而到6歲那個評估, 因為年齡同能力都好明顯, 所以6歲既評估通常都好準。

luckybaby2011

回覆 crabooo 的帖子

支持，請繼續寫。我都好疑或，但醫生好少推返結果，學校老師都話唔覺，但都係跟醫生封信的

Monstereasy

DearBabie 發表於 17-6-9 16:16
回覆 Monstereasy 的帖子

如果冇呢個label,只會介定佢係曳，大個有機會變乖。而自閉係冇得醫，唔同的。 ...

自閉係無得醫，但行為問題係可以改善，社交亦可以學。