子女的期望 vs 父母的期望

greentea000

想請教如何令小孩有上進心?
睇上文有感而發，唔想騎劫人家post，亦想講得全面Ｄ，自己開個post。

greentea000

唔知大家有無睇陸劇，《虎媽貓爸》、《小別離》，我家甚至家族都有8、9成相似內容。《親親我好媽》我未睇，有時間會追下。

greentea000

今日係莫壽增自行面試日，有兩位親戚仔女參加。一位自己去，父母要返工，無請假陪同。另一位，父放假，母請假，加埋個妹，全家去面試。

我安坐家中整食物，下午兩位考生會黎我屋企玩。

shadeslayer

greentea000 發表於 17-3-4 11:05
唔知大家有無睇陸劇，《虎媽貓爸》、《小別離》，我家甚至家族都有8、9成相似內容。《親親我好媽》我未睇， ...

有看你在之前之分亨。明白你的心情，亦不是要為你母親平反。

但有樣野唔知你有無諗過。為何你可以不費吹灰之力激死你母親？ 你的行為之所以能夠傷害父母，正因為父母愛你。

父母愛你越深，同一行為對他們的傷害越大。相反，他們越不愛你，就越不會著緊，你反叛你的事。

即係，你利用父母愛你之心來傷害他們。他們越愛你，你越容易成功傷害他們。

始終是一家人⋯

greentea000

回覆 shadeslayer 的帖子

諗過，諗過無數次，直到而家仲時不時諗下。母愛真可怕，「為你好」真係萬用理由，可以唯所欲為。

實在我咩都唔做阿媽都好勞氣架，佢要將自己架係高位，其他人係無辦法。 例如homeuser：我要求佢基本90分， 95分係好， 95以上係令人好開心。95以上homeuser先開心，咁佢係94%機會唔開心；我媽係我考第1先開心，咁我媽係99%唔開心。我考第3阿媽都可以鬧1個鐘，考第3部係hea、唔上進、無鬥心，阿媽咁樣貶低我就唔係傷害我？有一種愛係互相傷害。

小二時同老豆講阿媽成日話好愛我，但係我好驚阿媽啊！阿媽係低過80分打，低過90分鬧。小四時又問老豆母愛點解令我咁痛苦，老豆話 : 阿媽只供應豪華套餐，裏面咩都有，唯獨無選擇，你要俾個好貴既價錢食個全餐。如果你食唔起(能力低成績差)、唔想食咁多(有能力唔想咁搏)、有時想食有時唔想食(選擇性發力)，咁你可以同阿媽提議改餐單。小五同老豆反映無得改餐單呀，老豆話：咁呀，試下其他餐廳(老豆主理)囉！

同阿媽和平表達無效果之後，我唯有行動升級。當時鬼主意勁多，實際做既好少。又，分開講，我係幾鍾意老豆既，包括表達父愛既方式。睇在老豆份上我好克制啦，無隨便同阿媽過招。只要阿媽無發癲，我係唔會刺激佢，各自安好。

JJDBB

greentea000 發表於 17-3-4 14:54
回覆 shadeslayer 的帖子

諗過，諗過無數次，直到而家仲時不時諗下。母愛真可怕，「為你好」真係萬用理由 ...

其實，你爸爸有冇同你媽媽溝通了解。另外，你是獨女嗎？

Vanadium

「想子女入名校，做名人，發大財，其實跟買六合彩一樣，也是買個希望。問題是，父母的希望，不一定是子女的希望，但卻要由子女去努力達成。個性柔順的子女，為了不使父母失望，會勉強自己迎合父母的期望，失去了自我；個性剛烈的，就會對父母反感，以致家無寧日。歸根究柢，有問題的不是子女，而是把子女當作工具，強逼他們去達成自己願望的父母。」

http://master-insight.com/%E8%B2%B7%E5%80%8B%E5%B8%8C%E6%9C%9B/

Vanadium

香港父母大都眼光狹窄，總以為入讀名校、學術成績好、識英文就叫成功。 認同不少父母只是昔日自己想做到的做不了，昔日羡慕別人的自己擁有不了，就要求自己仔女為自己"報仇"。

越成功的人，大都對仔女越少要求，然而子女會從成功的父母身上學習到成功的素質，離成功亦不會遠。

世界那麼大，人生那麼長，成功機會那麼多，父母總要相自己子女的潛質與能力。

(註: 順豐王衛據資料沒有升讀大學。)

brother4

同樓主剛相反，父母要求低，小學只升班便可，但不能如愿，估放棄希望咗，好想知樓主中學如何及孩子等?

October.

樓主阿媽本身資優嗎？相信樓主係阿媽心目中是個天份好高既人，仔女考第三返來，正常父母開心都來唔切，又點會鬧呢？有一種本身能力超高既父母，接受唔到仔女無佢地當年咁好成績，只能理解為阿媽本身有一種怪脾氣。

greentea000

回覆 Vanadium 的帖子

《小別離》裏面有一種「笨鳥不飛，下個蛋替自己飛」型父母 ，真係好多父母有呢個心理，不過亦係向上流動改變家庭階層既主流方法，好難講好唔好。主流價值介定成功標準就係果幾個，到今時今日都唔係好多元化。
當年有兩個男仔追我其中一個表姐，表姐父母就明顯傾向大學畢業係大公司做果個，對另一個中五畢業有自己生意搵多好多錢既睇唔上眼。

homeuser

greentea000 發表於 17-3-4 14:54
回覆 shadeslayer 的帖子

諗過，諗過無數次，直到而家仲時不時諗下。母愛真可怕，「為你好」真係萬用理由 ...

有冇同佢睇過醫生，會唔會你媽咪有情緒病？

homeuser

October. 發表於 17-3-4 23:23
樓主阿媽本身資優嗎？相信樓主係阿媽心目中是個天份好高既人，仔女考第三返來，正常父母開心都來唔切，又點 ...

係啊， 如果我女考第三， 我真係會開心到飛起，一定唔會鬧

greentea000

homeuser 發表於 17-3-5 01:22
有冇同佢睇過醫生，會唔會你媽咪有情緒病？

問得好！
咁你認為自己有情緒病嗎？有睇醫生嗎？真心唔係串你，淨係EK呢度都有唔少打罵阿媽，唔見有人提佢地係咪需要睇醫生，你係我見到既第1個提出。大家普遍認為教育仔女就係咁勞氣，好似唔勞氣就無盡責任咁。心平氣和點解阿媽就係做唔到，明明老豆就和顏悅色。

小四我當阿媽係精神病，隨時會砍人，盡量唔駁咀刺激佢，阿媽鬧我時我就擔天望地分散自己既注意力減輕恐懼。小五又覺得可能俾阿媽發洩下對佢好Ｄ，起碼無咁壓抑，咁有時就特登刺激下佢。小五考左第3自己係放學時拎張成績表問低班同學仔父母有無人要補習，然後有兩個小二既咁岩住我樓下，就搵我補習。有時星期六、日佢地加鐘，佢地父母見到我媽又會讚下我媽教女有方，咁阿媽心情靚短暫有個蜜月期。小六因為同阿媽想報既中學唔同，日子又緊張返。

shadeslayer

greentea000 發表於 17-3-4 14:54
回覆 shadeslayer 的帖子

諗過，諗過無數次，直到而家仲時不時諗下。母愛真可怕，「為你好」真係萬用理由 ...

有種愛是互相傷害,… 好可怕。

wan_sosin

greentea000 發表於 17-3-5 02:30
問得好！
咁你認為自己有情緒病嗎？有睇醫生嗎？真心唔係串你，淨係EK呢度都有 ...

你講得都幾啱，有情緒問題嘅家長，就算唔搵心理學家，都可以搵下社工，家庭輔導尋求幫助。
事實現在發癲嘅家長比以前更多，EK都見唔少要求過高嘅家長，例如幼稚園要識心算。。。
遲早香港下一代會有很多心理唔平衡嘅人，因為無一個正常童年，好可怕。
我仔今年小三，上年小二佢讀精英班，佢試過有一次中文95，我返嚟當然讚佢啦，但佢竟然唔高興，佢反問，乜95分好高分咩?因為同學有唔少高分過佢，因為老師話90分才算合格，所以佢覺得佢只係中間。
其實早在小二下學期，我已同老師講，小三要讀返普通班。
我唔想個仔傻咗，所以決定離開，有人會奇怪我哋這個決定，幾多人想爭入去，但係，真係唔好傻啦，小學讀精英班就真係精英咩?小學生考高幾分唔通真係表示個小朋友好叻好有前途?為嗰幾分連關係都賠上，這幾分太貴了。

wan_sosin

IloveJJ 發表於 17-3-5 10:38
本帖最後由 IloveJJ 於 17-3-5 10:39 編輯

嘩，乜精英班咁勁架?90分都係合格喳!我哋學校無分精英班，而 ...

90分唔係普通，90分係精英班係低分。
高分嘅係98以上

wan_sosin

IloveJJ 發表於 17-3-5 10:51
咁你哋係咪淺啲呢？我哋中文只係最高分那一個9字頭

唔淺架，有插班入嚟讀，同插班去了其他學校嘅家長話，其實學校中文算深，但學生同家長真係好癲，老師無叫，但學生自己背晒詞語加造句等等。。。平時做練習唔在講啦!佢哋搵返跟學校題形較類似嘅練習去做。
不過今年小三，明顯平均學生分數下降，今年有9字頭算高分，比上年難高分咗幾多。
上面講嘅分數係小一小二。