懷疑專注力失調，中一仔仔，求意見

aliceme

呢個小朋友係我先生同前妻所生，已經係中一，同佢生活左幾年發現佢有以下幾個問題，成績差，經常欠交功課忘記做事情，表達與理解能力有些障礙，例如佢唔能夠清楚描述物件嘅位置，或者睇電視嘅時候理解與我們嘅想法唔一樣，經常分不清電視入邊嘅情節或人物是真抑或係假。至於學習上10分被動，冇能力完成所有功課或自己溫書，一定要家長從旁指導。溫書嘅時候不斷發問一些同書本上沒有關連嘅問題。

依家上咗中學依然會經常忘記帶功課帶書本，亦試過忘記聽日考試測驗。我們問過一些做心理醫生嘅朋友，他提議去做智力評估，過度活躍和專注力不中評估。想問一問add and ADHD 有什麼分別和評估上是否不一樣？

如果他家長唔想花錢去做評估，如果想排政府應該點樣做？

我眼見佢嘅家長好似唔覺得有問題，但無論點樣俾佢補習成績依然咁差，我好想幫下個小朋友，佢經常說覺得有壓力，我們只不過係提出一啲平常嘅要求例如睇佢一定要做好某一些事情，佢已經覺得我哋逼佢。六年班嘅時候有一段時間好像情緒失控，見完社工之後不了了之。

另外小朋友自理方面亦有一些問題，例如衣服已經極度不合身，佢依然會照着覺得冇問題，拖鞋細咗幾個碼，唔會主動提出要求。由朝早起身到出門口唔會照鏡，個人儀表上不整齊

bestwish

好大可能有ADHD (AD機會大D), 你應盡快搵精神科醫生/臨床心理學家去做評估。 排政府都先要有醫生信先可以排, 可以睇左普通家庭醫生叫佢寫轉介信。 不過都要排最少1-2年, 視乎地區。 我建議邊排邊睇住私家先。 我聽你講, 呢位小朋友太遲發現有問題, 已影響到佢正常生活及身心發展, 唔好再拖喇。 因為ADHD嚴重可引起抑鬱症。

aliceme

bestwish 發表於 17-2-7 16:28
好大可能有ADHD (AD機會大D), 你應盡快搵精神科醫生/臨床心理學家去做評估。 排政府都先要有醫生信先可以 ...

多謝你嘅回覆，上個禮拜佢媽媽話已經幫佢做咗測試，六分以上就係確診，佢係5.5即係冇事。但再仔細查問一下，發現佢媽媽講嘅測試只不過係媽媽自己填份問卷，小朋友完全冇參與在其中，請問你哋知唔知道呢類係乜嘢測試或者準唔准確？正式嘅測試是否必須有小朋友在場？

我感覺到佢嘅父母仲未肯面對現實，怕萬一確診會標籤左個細路仔為有問題嘅小朋友。但我覺得現在已經影響到佢嘅學習同埋生活， 10分擔心。

bestwish

aliceme 發表於 17-2-8 14:16
多謝你嘅回覆，上個禮拜佢媽媽話已經幫佢做咗測試，六分以上就係確診，佢係5.5即係冇事。但再仔細查問一下 ...

其實好多父母都接受唔到呢個事實，唔去接受治療，唔想理。其實係害左個小朋友。

應該搵專業人士去做評估，不過評估內容都係有問卷比家長填。

Tifftiff0115

有D家長係唔肯面對現實嘅。
有確診報告當然係重要，但同時都可以針對佢行為搵訓練呀我覺得？

tutik

aliceme 發表於 17-2-8 14:16
多謝你嘅回覆，上個禮拜佢媽媽話已經幫佢做咗測試，六分以上就係確診，佢係5.5即係冇事。但再仔細查問一下 ...

與其花時間去評估，倒不如針對番小朋友困難來幫助他，部份人確診為享用政府醫療資源包括我自己，因為啲藥真係貴。
如果家長還可以逃避不接受，即小朋友情况未至最惡逆，唔去到冇得揀，作為家長也不會選擇食藥，對嗎？

小余

tutik 發表於 17-2-9 21:45
與其花時間去評估，倒不如針對番小朋友困難來幫助他，部份人確診為享用政府醫療資源包括我自己，因為啲藥 ...

我都有排政府但仲未排到。除了藥費貴的問題仲有係我希望有專業人士的意見，上forum聽當事人意見係有用，但畢竟唔全面。

chowqv

有聯絡學校社工幫佢嘛？

aliceme

Tifftiff0115 發表於 17-2-8 14:46
有D家長係唔肯面對現實嘅。
有確診報告當然係重要，但同時都可以針對佢行為搵訓練呀我覺得？ ...

依家最大嘅問題就係如果冇正式嘅報告，小朋友嘅父母當佢完全冇問題係大家諗錯左

aliceme

tutik 發表於 17-2-9 21:45
與其花時間去評估，倒不如針對番小朋友困難來幫助他，部份人確診為享用政府醫療資源包括我自己，因為啲藥 ...

其實佢嘅情況唔算係10分嚴重到需要食藥，某程度上自從上咗中學之後我覺得佢學識左掩飾自己嘅問題，識得搵藉口，但咁樣並唔代表問題已經解決。而家最大嘅問題反而係佢父母唔積極去面對，包括除咗睇醫生以外嘅一些訓練父母亦都冇考慮去做，因為佢哋始終覺得佢冇問題。（其中一個父母屋企有自閉症嘅家族歷史）

aliceme

小余 發表於 17-2-13 23:52
我都有排政府但仲未排到。除了藥費貴的問題仲有係我希望有專業人士的意見，上forum聽當事人意見係有用，但 ...

據我所知，現階段父母都覺得唔需要再去做任何野，呢件事睇嚟會不了了之，父母着重嘅係成績，佢平時成績都係唔合格同合格之間，但而家可能有少少進步例如60幾分，父母覺得問題已經解決，佢哋忽略咗小朋友除咗學習以外生活上一些自理嘅問題或者一些邏輯思考嘅問題。佢哋嘅理論係既然佢可以改進咁就即係唔係有ADHD 或者其他問題只不過係學習懶惰。

aliceme

chowqv 發表於 17-2-17 08:15
有聯絡學校社工幫佢嘛？

六年班嘅時候其實已經好幾次情緒失控，好容易有一種被害或者被迫嘅感覺，試過幾次我哋只不過係提出意見佢就開始流眼淚，喊左超過20分鐘一個字都冇講過，最後胡亂作一啲藉口來打發我哋走。亦都有試過因為唔俾佢做某一件事，係街度扻頭埋牆。嗰個時候佢哋終於接受我提議去見社工，見完之後不了了之，沒有互相跟進，亦沒有接受轉介。

chowqv

唔係你自家小朋友，咁點都無辦法。
仔係人地既。

aliceme

chowqv 發表於 17-2-23 08:11
唔係你自家小朋友，咁點都無辦法。
仔係人地既。

佢同我一齊住左三年，個三年生活上好唔協調，有時講佢兩句佢又會情緒失控，而家佢跟咗媽咪其實一切已經好咗好多，不過畢竟我唔忍心睇住一個小朋友得唔到佢應有嘅治療

chowqv

aliceme 發表於 17-2-23 10:12
佢同我一齊住左三年，個三年生活上好唔協調，有時講佢兩句佢又會情緒失控，而家佢跟咗媽咪其實一切已經好 ...

幾唔忍心都無用。都係果句：仔女係人地。

cocoyang

我建議先排政府醫院,盡快找私家評估給藥,因為政府醫院可能要排1年以上.專注力不足的小孩一上中學要適應那麼多科目,沒有藥物協助.小孩會很辛苦,問題會更嚴重.記得順便可以請醫院社工協助.這種小孩很容易有"憂鬱症"

mama.olive

我都有類似既情況，朋友個仔有明顯有言語發展遲緩，3歲幾仲係講緊單字，同佢提議不如去做評估/ 訓練佢都好似唔CARE咁，我諗真係唔想接受現實，不過人地個人真係唔方便講太多呢