保良局百周年李兆忠紀念中學 交流區

miklcct

因為舊文已被鎖，我只好開一篇新文。我想了解下大家呢間中學嘅同學或者家長對間中學嘅感覺，因為我讀完真係好自卑，覺得自己7年來除咗幾個好老師之外無嘢值得回憶同留念。

我以前係呢間中學嘅同學，其實我由form 4開始一直都好唔妥呢間學校，請大家慎重考慮。我讀完7年嘅感覺係，呢間中學除咗個公開考試成績之外乜都唔重視，以前我細個唔識嘢，阿媽又唔識嘢，只係貪離屋企夠近又係英中（我中文成績唔好）至報。直到我form 4以後見識到何謂名校，就好唔妥呢間學校。
先講下運動方面啦，有實力嘅基本上只係得泳隊，重要只係喺屯門區，去到大啲範圍已經無得鬥。你可能話係個別例子，但係唔單只運動，其它方面都唔好得去邊。我由form 2開始參加童軍，但係唔係參加學校嘅屯東第9旅，而係大興邨某個團體公開旅。當然我有啲同學係學校旅嘅，從佢哋打聽到，學校個童軍旅直情係無乜搞嘅，最重要嘅outing都唔多見，得嗰一兩個交流團，同我出面參加嘅差太遠啦，又上山又下海，好彩我無參加到啫。唔知係唔係因為咁，而家第9旅摺剩scout支部，連venture都無埋啦。返而隔籬中學嘅53旅就好得多啦，間唔中都係啲course到遇到佢哋，重要佢哋逢星期五集會，一到星期五下午就會見到佢地着制服返學啦。

我除咗參加童軍之外，亦都有打橋牌。中學橋牌學會嘅集會嘅規模由我form 2嗰陣嘅兩間班房，到我form 7嗰陣得返兩枱。可能係因為以前我哋出咗個Charlie Lee入咗港隊先至有當年嘅陣容。

最令我不滿嘅係，我係中二嗰年見到有師兄整個編程興趣班，我學嘢之後參加HKOI編程比賽隨即攞牌入培訓隊，我對名校嘅認識就係呢個時候開始啦。人哋培正之所以咁勁係因為佢哋有嗰種為學校爭光嘅culture，呢個咪就係名校同非名校嘅分別囉。佢哋programming team高form嘅師兄每星期放學後都會指導師弟，同佢哋一齊解題，重有埋自己internal contest，有自己online judge，但係我哋呢？乜都無呀！我之後都嘗試整返個programming team出來，但都係只得一個師弟。我同電腦科老師分享下我嘅經歷，老師解釋係因為我哋根本就無名校嗰種culture，可能甚至家長都無呢個意識，淨係顧住理學業都無乜留意呢樣嘢。

我讀中學嘅年代，一日8堂，3:30pm落場，5:00pm趕人，其實本來都唔多時間課後活動嘅啦。隨着新學制推行，數學M2經常唔夠時間教，不過校方嘅回應係一星期部分日子對高中加第9堂，而唔係最理想嘅，M班唔畀讀3X，唔單只搞到本來已經唔算多嘅課後活動時間更少，更因為高中初中放學時間唔同，割裂高中同初中嘅聯繫，不利校園文化透過課後活動傳承。

我將我間中學形容為「除咗公開考試成績之外無嘢可以用來晒命」。好啦，到今日我喺Facebook到睇到，本來話陸運會，不過點知就話太凍取消。OK，Fine，佢重衰到竟然要叫人返學校上堂？！有無諗過運動員、啦啦隊、學社嘅感受㗎？唔通返學校唔凍得過落場跑？！唔怪得話我哋無名校嗰種culture啦，根本就係咁樣被學校搞壞嘅。總之如果想仔女有個均衡發展，報呢間之前要諗定後路啦。

tttina

屯門區係咁上下.......

QQBBLO

SamLee01

依家17:00就趕人走? 係林校長年代，D人玩到18:00校工都鬼唔理你

Jobrena

原帖由 miklcct 於 16-01-25 發表
因為舊文已被鎖，我只好開一篇新文。我想了解下大家呢間中學嘅同學或者家長對間中學嘅感覺，因為我讀完真係 ...

唔滿意點解唔轉校？