家長們贊成小學全日制嗎?

rlkw64

我個仔小四, 三點半放學, 返到屋企約四點, 已經好累, 比佢食D野先做功課, 順利的話七點半做完, 已經食晚飯, 但如果第二日要默書測驗, 食完飯都仲要溫, 溫到十點都經常發生, 佢學校功課一般, 每日六七樣到, 我亦唔谷佢, 只係溫默書, 但都要搞到十點, 基本上一日十幾個鐘, 就係對住課本同作業, 有日照時間都唔會係室外做運動, 都可以話係不見天日, 仲慘過返工

其實點解小學要全日制? 你迫D小朋友留多幾個鐘係學校對住課本, 真係可以提高學習效率? 以前我地半日制, 放十二點半, 四點幾做完功課, 可以睇430, 可以去打波, 可以去圖書館, 有得約朋友仔玩, 有娱樂, 有運動, 個人健康正常好多, 又唔見我地呢一代學業特別差

其實家長們點睇全日制? 我覺得真係好差好差, 我唔明o既係, 宜家學生人數比起我地年代已經減少一半, 點解仲係30幾人一班, 點教? 有資源搞全日制, 點解唔搞半日制小班? 老師可以更加照顧到個別學生發展, 上堂亦可以多d互動, 學生亦有多d私人時間發掘其他興趣, 更加切合現今社會對創意同溝通能力須要

我覺我香港教肓, 根本冇與時並進, 而且係愈搞愈差, 只係操左一班剩係識做卷o既學生出黎, 日日死古古對住教科書同作業! 　   

babywoman

我係唔贊成取消全日制的。
只要學校有功課堂，下午課多數不教書，就可以了。

我仔學校每日有35分鐘功課堂，小一小二基本上冇帶過功課返家做，小三 有少量，所以，現在日日有卡通睇。高年級就唔知了，可能真係要谷

以前基本是全職媽，現在多數工人湊，半日在家，能否控制到佢唔打機？半日睇電視？去公園，即工人玩手機，個小朋友自己玩？
現在的小學生，你又放心佢自己去揾朋友仔玩？

Yanamami

babywoman 發表於 15-12-17 19:52
我係唔贊成取消全日制的。
只要學校有功課堂，下午課多數不教書，就可以了。

係~以前街童都多d. 睇番“小時候”就知~

babywoman

以前"天生天養"，我老公同妹兩個自己玩（當時沙田仲好偏），跌入水池差點浸死當時幸好有途人經過，救到，否則---我奶奶講述

所以佢地兩個至今都怕水。

奥脫福

支持小學全日制。

Doray

babywoman 發表於 15-12-17 19:52
我係唔贊成取消全日制的。
只要學校有功課堂，下午課多數不教書，就可以了。

agree 只要學校有功課堂，下午課多數不教書，就可以了.

Yanamami

我細个已係番全日，不过有長短周~中午係学校搭食、無功課堂、全曰教書、—班近四十人……不过放学係可以睇完430穿梭机先做功課，晚飯後仲可煲無線电視劇，睇埋欢樂今宵就俾阿媽捉上床瞓｡不过果時唔兴学乜学物、補習，而阿媽亦無乜要求，是是但但自己溫習做功課，年年升班就算~个生态环境同而家好唔同~

siden

痛恨全日制

akys

半日制好啲。我覺得晚上7－9應該是親子時間，一齊睇電視，玩遊戲，或者飯後散步，睇書等，依家全日制呢啲生活比較奢侈。返上午，下午回家後大把時間做功課，溫習，學嘢。7點後自由時間，諗起都覺得美滿。

siden

rlkw64 發表於 15-12-17 19:09
我個仔小四, 三點半放學, 返到屋企約四點, 已經好累, 比佢食D野先做功課, 順利的話七點半做完, 已經食晚飯, ...

當初點解全日制？美其名是全日點好點好，實則因為出生率下降，唔轉全日一大班老師失業！你估真為了學生？只是保住老師飯碗！

到今時今日，雙職家長佔大多數，番半日細路搵邊個揍？請工人或求親戚好過癮嗎？也不是每個家庭都能負擔。反對全日的聲音也會減少。

講真，若全個下午用來做功課或課外活動，係完全可以接受。可惜，大把學校用盡黎上堂教書。有部份有功課堂，不代表間間都有功課堂。

不是間間學校體諒小朋友。

小朋友學校番足7個半鐘。大人朝九晚五都係8個鐘。一個六丶七歲的小孩子，放學番去仲要做功課溫書，唔係慘過番工係乜？

Yanamami

可能我自己細時都番慣全日，而家阿女功課唔多又唔洗温默書，所以無乜所謂。

akys

siden 發表於 15-12-17 22:29
當初點解全日制？美其名是全日點好點好，實則因為出生率下降，唔轉全日一大班老師失業！你估真為了學生？ ...

全日係幾好嘅，大前提係下午不能授課，大部分功課要係校內完成，餘時校隊操練，自行閱讀，各適其式，又幾美滿喎。話時話，小學真係咁多嘢教？要教足咁多個鐘？

bbforever

贊成全日制，但有半日制供家長撰擇就最好…

jcaling

natalietyk 發表於 15-12-17 22:34
最好笑，某間小學全日制比半日制返多2個鐘，其中一個鐘是lunch time,另一個鐘頭上一堂課就放學。請問果一個 ...

我覺得好安排bor,請問係邊間小學？

Jane1983

也野制都好，真係吾好搞到小朋友一日勞動十幾個鐘，每日搵一個鐘hea玩都吾得，實在太吾人道。