課外補習壓力重 快樂童年邊度搵（太陽報太一叮）

elbar

港產潮語多籮籮，但講到最令小朋友聞之色變、不寒而慄嘅莫過於「贏在起跑線」。唔少家長奉之為金科玉律，不惜犧牲小朋友嘅睡眠及遊戲時間，爭相鬥早起步作填鴨式催谷，一心只為提高子女將來嘅贏面，可謂用心良苦咯。

呢，有調查發現，近七成高小學生有課外補習，每周平均花五個多小時，甚至比高中生補習嘅時間多近一小時，加上部分學校喺課後開設大量功課輔導課，小學生何止朝九晚五，好多時要由朝早八點直踩到六點先放學，咁細個就要捱到金睛火眼，睇到都閉翳。

大家有眼睇㗎，家陣香港百業不景，唯獨補習社一枝獨秀，開到成行成市，隨時多過米舖添。講到補習天王身價仲得人驚，年薪不單媲美歐洲體育明星，即使上市公司行政總裁都望塵莫及，可見家長為咗子女可以去到幾盡。

話時話，父母緊張子女嘅學業實在無可厚非，尤其現今社會競爭激烈，有邊個想落後於人呢。問題係喺全球化及互聯網急速發展下，靠狂操死背灌輸知識已不合時宜。外國有研究顯示，太早用傳統填鴨式教學，會令幼童變得缺乏好奇心，亦減低主動學習及探索環境嘅能力，證明揠苗助長不單止無助啟發兒童嘅發展潛能，更會弄巧反拙成為長遠學習嘅障礙添，問你驚未。

反觀德國人就唔係咁諗，佢哋認為幼童最重要係快快樂樂盡情玩，當地政府設置唔少森林幼稚園，小朋友日日接觸大自然，唔使死背連成年人都未必識嘅晦澀生字，唔學算術琴棋書畫都冇問題。事實證明，德國人攞諾貝爾獎攞到手軟，真係唔到你唔服。

當然啦，各處鄉村各處例，往往外國得，香港未必做得到。遠嘅唔講，淨係一個全港性系統評估（TSA）已經搞到滿城風雨、天怒人怨嘞。奇就奇在，其實外國都有類似嘅測試，但人哋就相安無事，香港一搞就變得荒腔走板，變質變味，淪為學校瘋狂催谷學生嘅工具，喺群情洶湧之下，教育局不得不跪低，出辣招禁止學校操練學生，想唔認無能都唔得啦。

之不過咁，咪以為取消TSA後孩子就可以快樂地學習，事關無咗呢個試，仲要應付千千萬萬個試。講到底，教育政策五時花六時變，教育局長有名你叫「唔得掂」，小朋友慘成白老鼠，想有快樂童年都幾難，叮！