乾隆珍藏印度玉器 中大免費睇

elbar

■中大展出乾隆年間所收藏嘅印度玉器。


中大文物館、北京故宮博物院聯合舉辦「仙工奇製：故宮博物院藏痕都斯坦玉器精品展」，展出40件印度莫卧兒王朝玉器，件件都幾百年歷史，好多係首次展出。好似有件叫「痕都斯坦玉器」，即「伊斯蘭玉器」，器物上刻有嘅花葉動物，好似孔雀呀、大象呀，都充滿印度或中亞風情。


文物館副館長許曉東話，北京故宮係世上藏有最多印度玉器嘅博物館，事關乾隆勁鍾意，覺得手藝超凡，蘇州玉工都比唔上；而印度曾係英國殖民地，好多工藝品都被帶到西方，印度本土藏品所剩無幾。


乾隆有幾鍾意伊斯蘭玉器呢？原來佢唔單止大量收藏，仲下令本地工匠仿製。而某啲乾隆一直以為嘅舶來品，經現代鑑定發現雕工及花紋竟唔係完全印度style，判定係清朝境內生產，唔通當年有人欺君？展覽至明年2月底，免費參觀。




李八方