有無人幫到我？返學後情緒

maggie_fan

囝囝2歲，8月中返n班，到今日仍然一起身就喊話唔返學，喊到入學校，係學校都係斷斷續續咁喊，老師話佢情緒都好唔穩定。放學完全無野既，因為係婆婆湊放學，而家經常會大喊要搵婆婆，要走（我諗係想婆婆婆快啲接佢放學咁解），半夜喊醒幾次都係搵婆婆，要走。一話返學就大喊話唔返學。其實咁既情況我應該繼續堅持比佢返，等佢成長，定停n班？因為11月又要面試k1..我驚唔比佢適應又會無學校收，但而家好似返到佢心理有問題，晚晚發惡夢，我都好心痛，但又唔知點做

Fatina

當然唔好逃避 ,始終要比機會短暫獨立咖 ,因為未試過要同家人分開,唔適應環境者。
其實家長同小孩都有, 是分離焦慮症, ,多發生初上學既幼童 ,
有人幾日就冇事,有人會超過兩星期, 不須太擔心。
如果太嚴重既話,最好與學校溝通下,有D學校會比家人陪上堂一陣,慢慢減少陪伴。

叫婆婆最好做到,唔好包尾接放學,因為小孩更加害怕咖 !

其實應該學前做預防功夫 ,會減低大哭,不過而家做都有幫助。

遲D就會好鍾意返學 !

在家同佢多D玩下...學校遊戲,例如用兩個毛公仔或動物 ,互相扮演返學故事之類。

不妨上網睇下幼童返學焦慮症常識 ,有詳細資料參考 ,希望可以幫到你個小寶寶渡過。

methy

原帖由 maggie_fan 於 15-09-01 發表
囝囝2歲，8月中返n班，到今日仍然一起身就喊話唔返學，喊到入學校，係學校都係斷斷續續咁喊，老師話佢情緒 ...

我兩個小朋友都係2歲返N,大既斷斷續續喊了兩星期到，入學校喊，入到課室就無事，晚上都會喊醒。一個月後返學完全無哂事。

細既返頭一星期完全無喊，第二星期先開始喊，喊了兩日後完全適應哂。但同班有個女仔返了3個月後，仍然喊，但入到課室又無哂事。

喊係正常，始終新環境，學校又多規矩，由世界只得媽媽爸爸家人，變成好多同學，新老師，樣樣都係適應。
送返學校時，話比佢聽，開心上學，放學就湊返你，唔好拉扯，等佢以為喊就可以走。
呢個係必經階段，開左學要努力適應，唔通到K1又係咁，又唔讀？放心喇，你問所有過來人，都係一樣，喊喊下就唔喊，慢慢頭都唔回就直入課室架喇。

maggie_fan

原帖由 methy 於 15-09-01 發表
我兩個小朋友都係2歲返N,大既斷斷續續喊了兩星期到，入學校喊，入到課室就無事，晚上都會喊醒。一個月後返 ...

但佢係由起身一刻已喊，喊到上完早會仲喊，3個鐘斷斷續續喊，我覺得佢好慘好大壓力，返屋企又喊又發惡夢，老公又鬧佢話佢有問題，話帶佢睇心理醫生，搞到我好驚好無助。又好驚返學影響佢心理，搞到傻埋聽日約左學校老師傾，老師都話佢情緒好唔穩定，我都好驚學校唔要佢。全校真係得佢一個到而家仲喊，個個都適應晒

fishcowcow

最緊要你間學校老師點睇, 如果佢地接納, 會比時間同耐性你小朋友, 我覺得應該要俾佢繼續返

fishchow

找專業心理醫師幫忙是上策，評估一下，不要再等了。孩子日又喊、夜又喊，大家都不好受。

maggie_fan

原帖由 fishchow 於 15-09-03 發表
找專業心理醫師幫忙是上策，評估一下，不要再等了。孩子日又喊、夜又喊，大家都不好受。



  ...

同學校傾完，佢話小朋友發惡夢唔一定係關返學影響，有時玩得顛都會。學校話佢比較慢熱，但唔等於有問題，無影響日常生活就ok..其實我都對學校有信心。佢地話我更加要對自己個囝有信心，如果我都信佢唔得，佢就真係唔得，佢地話喊半年都會有人試過，叫我再睇耐啲。希望1個月內可以唔喊啦

EMS

你要留意小朋友情緒係咪好差，我個小朋友係大仔，2月一足2歲就讀n班，所以同一間幼稚園讀咗2年n班(因9月只係2歲7個月)，第1年無喊，好快適應返學，老師一直話佢好乖好聽話。第2年換第2個老師，唔知點解勁喊，喊咗2，3星期，連喺屋企情緒都差埋。打電話問老師，話佢好曳要罰佢，同埋佢太被動，唱歌細聲唔做動作，所以老師要迫佢做迫到佢做為止，講到佢好差。果時我都信老師講，因佢教咁多年，我信佢專業嘛！加上佢喺家長面前好像好有愛心咁。
後來，我有好朋友曾做呢間幼稚園，細問之下，佢同過呢位老師一齊做事，佢話呢位老師係全校最惡，成日鬧仔。
聽完之後，我同老公就親身去幼稚園，同老師，同副校長傾過問題，唔係投訴，只係想幫我小朋友解決情緒不穩，傾完第2日，唔知老師係咪見我哋2公婆咁正視問題，我個小朋友立即無再喊，把口仲話鍾意老師添，但學期尾最後1日佢依然話唔鍾意返學。
到K1轉咗第2間，返第1日我第1次聽到佢話好鍾意返學，講足3年。雖然呢3年每個老師好有愛心，但佢一直都好怕老師唔敢喺老師面前表達自己，怕比老師罰。
轉校後想番，可能曾經遇到惡老師，影响老師喺佢心目中形象，小朋友又細，就算講嘢幾叻都唔係好識表達自己意見出嚟。我係過來人，希望你留意一下

ms.wincy

人生第一次返學，對2歲人仔同媽媽都係一個大挑戰。新環境新朋友新事物，有小朋友興奮亦有小朋友擔憂。其實好多小朋友都會喊一星期至一個月，最誇都真係會喊３個月。不過通常都唔會全程在學校喊既，但通常會返學時同就黎放學時就喊。所以樓主唔須要太擔心。

當然，返學之前做多ｄ準備功夫可以令小朋友更快適應同接受返學既生活。但而家，依然有好多野可以做既。

1.晚上盡量陪伴囝囝玩，可以同佢講故事<<我想念你>> <<上學去>> 之類既情緖管理故事。
2.可以預備一條有 “家” 氣味既小手巾比囝囝拎住或袋住返學。(事先同老師溝通左先) (因為帶一樣屋企野，可以令小朋友產生安全感。
3.早上返學時講比囝囝聽媽咪當日既行程(例如要返工或買送)，提醒佢響學校搵一件最好玩既玩具，放學分享下係咩黎既。(比小任務可以分散注意力) 另外講埋今日邊個會接佢放學。
4.送到校門，交手比老師後要講完bye bye要即轉身走。(最好每日同一個位置放手，唔好比佢有機會攬住你唔放)
5.接放學一定要準時到達。因為小朋友見到同學一個個走晒，會以為自己被遺棄。(唔使爭第一，不過最好頭幾個啦)
6.接左之後一定要同老師講 “byebye,_老師, 聽日見” 等小朋友知道聽日會返黎。路上讚佢好叻，如果小朋友有作品帶走，就請佢介紹下，再讚下 “好靚wo!學校有得整咁靚既野架!?你就好啦” 之類既說話。 亦可以問 “今日有咩開心既事啊?” “有咩好玩既玩具啊?” “有咩好食既茶點?”之類既話題 (一定要係正面感覺)　可以引伸講下聽日返學玩咩玩具好呢？之類既問題。盡量比小朋友知道返學係每日既事情。

當然啦，個別情況激烈既話，需要其他方法再幫多ｄ。
好多時小朋友喊都係想發洩當下既情緒ｇａ~所以好正常=]
建議盡量將每日作息同起床時間都統一，因為對於年紀細既小朋友黎講，重覆既日程係可以產生安全感。

最後，加強同老師既溝通都好重要。
同埋要堅持每日都要送佢返學，因為如果喊就可以唔返，會令小朋友習慣喊去表示拒絕架。要小心處理～

加油啊！！！！！！！！！！媽媽同囝囝！

maggie_fan

原帖由 ms.wincy 於 15-09-04 發表
本帖最後由 ms.wincy 於 15-9-4 02:28 編輯

人生第一次返學，對2歲人仔同媽媽都係一個大挑戰。新環境新 ...

好多謝你，新手媽媽，真係唔太識教佢，令到我兩公婆關係又差，壓力又大。好驚自己個囝有問題，係咁喊，但老師都話喊係佢表達方式，唔駛太担心。我都要比時間佢，相信佢

ms.wincy

回覆 maggie_fan 的帖子

小朋友好容易感覺到身邊人既感受，如果佢感覺到你既壓力，佢都會擔心埋一份架～　=]