MITI神話不再 (左丁山)

elbar

日本經濟在1980年代盛極一時，哈佛著名教授傅高義曾出版一本書，就叫做「日本第一」，暢銷一時，當時全世界工商業都爭相學習、研究日本模式，日本的通產省（Ministry of International Trade and Industry）簡稱MITI權傾朝野，俾外國人、日本人一個印象，MITI係日本經濟策劃之神，高官一出聲，所有大財閥全部聽命合作，唔駛政治上由執政黨在國會推出監管法規，於是美國學人、日本學者都出版咗唔少關於通產省研究嘅書（左丁山書架上還有兩三本）。

點知市場大潮流一到，甚麼精英天才、神級官員都全被狂潮沖走，1990年日本經濟泡沫爆破，至今25年仲係一沉不起，日經指數至今只及1989年12月高𥧌嘅四成幾，京都樓（呎價）便宜過沙田第一城，叱吒一時嘅新力SONY曾係日本新力量，新潮流電子科技嘅表表者，消費電子產品暢銷全球，依家俾Apple、三星打到變成地上泥（索尼）。喂喂，通產省何在呀？日本政府干預力何在呀？點解「神級官員」不能帶領日本產業追上美國無人駕駛嘅矽谷？

南韓學習日本模式，政府大力扶持津貼財閥集團（三星、現代、大宇）與日本株式會社競爭，今日有三星電子威風一時，為韓國爭光，但呢啲赤裸裸官商配合、輸送利益，喺好多國家都行不通，過唔到議會呢一關嘅，雖然貌似成功，三星手機今日已自高𥧌回落，與Apple競爭，全無贏在終點線嘅把握。台灣想話學日本，學唔成，因為國民黨政府始終唔敢全方位扶持台灣人商業集團。偏偏梁振英竟然以為佢可以扶持香港科技產業，要成立一個創新科技局，仲講到可以幫助香港青年人㖭。咁都有人信，都幾好笑。左丁山呢類市場派一早講過，認定香港政府/特區政府由1842年開始至今，全以不干預市場運作為假設（唔順氣可大罵英殖尤其是郭伯偉），所有全體政府官員腦袋裏都冇干預/指導市場運作嘅DNA，相反，全部官員只會緊跟「程序為本，目標為次，效能第三」嘅心態，千祈唔好踩界，為商界說話，以免招來廉署立案調查或受立法會傳召質詢，他日即使有創新科技局成立，局長副局長斷斷不敢斗膽違反「程序為本」呢個大原則嘅，一講程序，就連喬布斯來港創業都會被玩死！日本通產省已不再威風，指導不了產業，香港還要成立一個以過時觀念為基礎嘅創科局，何其落後於形勢也。


左丁山