本帖最後由 skIII 於 15-2-11 05:26 編輯
回覆 Sheep006 的帖子
倫敦買樓都唔易，特別近幾年保守黨上台，新樓數目減少，基本係個賣家市場，成交價往往比叫價高。
我地舊年中開始諗住買屋，跟住做左好多功課，例如考慮交通、治安、回報及負擔能力等，最後決定在倫敦外圍的小鎮買，定左地點後開始網上睇屋，但好多時只有最近一星期推出的二手屋先有可能買到，因為價錢合理的，好可能推出幾日就比人買走，餘下的一係就叫價高，或者係好爛的。
我地某星期三決定星期六去睇屋，但只係約到星期二或之後推出的屋，因為星期一推出的已經約滿人，唔再接受睇屋。到左星期六，去睇的幾間屋都類似openhouse，好熱鬧好多人睇。頭一間我地係第一個客，得我地可以慢慢睇，不過的跟住的好多人，一間屋可以同時有幾批客睇，於是有啲客睇廚房時，其他客就睇客廳或者樓上，幾乎仲旺過旺角。
我地睇中一間，要跟住星期一正午前比一個暗標價，仲要附上銀行月結單或者貸款批核信，証明有足夠錢去買，我地係cashbuyer，通常係好有利條件，亦比開價高幾千鎊，但最後都唔成功，我估成交價起碼比叫價高一萬鎊以上。
新屋方面我地亦關注左某些樓盤好耐，但佢地每次只推出幾個單位，好多當天早上就賣哂，睇新聞倫敦有啲新樓好似以前香港咁，有買家前一晚就去排隊。
我地知道某樓盤星期六會有新屋推出，我地仲諗好唔好學人地咁早一晚去排隊，但英國好凍，夜晚得零度，真係驚凍死都未到天光。於是決定當天早上五點先出發去排隊，但星期五遲遲都未見佢有網上公佈，就打電話去問，點知佢話都唔知有乜嘢買o架，因為由公司決定，佢地都係當天早上先知，聽佢咁講，我地當堂企o左係度，究竟第二朝去定唔去？因為唔同出旺角，我地來回要五六個鐘。(待續) | 
發表於 15-2-9 20:47
