考試及測驗先至發燒, 真心求教平日應點樣保持身心健康?

小時了了

事情是這樣, 小女:

1) 去年小三上學期考試 (2014年1月)發燒 照返學考試
2) 下學期測驗 (2014年3月?定4月?唔記得啦)發燒, 照返學測驗
3) 下學期考試 (2014年6月),發燒 照返學考試  
4) 今日小四上學期考試 (2015年1月7日)發燒, 今日無返學, 阿女話有老師係門口"嘟"額頭量體溫會被發現發燒, 唔俾返學及考試, 故今次會第一次補考了.

唉!全部考試及測驗先至發燒. 今日零晨 3:30阿女醒咗同我講話好熱, 我心感不妙話妳係咪發燒呀, 用手量額頭好熱, 拿拿臨俾幸福醫藥俾佢食, 但都難逃請假補考.

第一次考試發燒, 我同自己及阿女講可能無游幾星期水, 抵抗能力差咗啫, 游返水抵抗能力好返就無事喇

第二次測驗發燒, 阿女話已經游返水喎, 都發燒嘅. 我話啲菌好惡毒啊, 身體緊要呀. 但我心感不妙了, 已經諗可能關壓力或情緒健康.

第三次考試發燒, 我直接問醫生阿女連續三次都係考試測驗發燒喎, 老醫生笑笑口同我及阿女講, 平日勤力啲溫書, 唔好臨考試時先至谷呀麻.

今次考試, 我真係無以前咁谷了, 以前聖誕節公眾假期係朝10晚8咁溫書, 今次係一家三口去教會親子露營三日兩夜. 而臨考試嘅星期六及日, 又係全天候朝10晚8咁溫書, 今次卻每日只溫得 3 個鐘左右, 其餘時間同小女 book 場打乒乓球, 踏單車, 睇老子動畫電視, 又俾佢睇金庸射鵰咁, 我以為已經好輕鬆咁去應付考試, 點知咁樣小女都發燒.

今朝同 C6 傾阿女惰況, 佢話下次試下臨考試測驗時唔好食熱氣野 (因為 C6 無啦啦星期日買 Pizza 同燒雞返屋企大家食), 唔知有無效呢?

其實, 今日零晨時阿女發燒, 阿女好純真問我係咪 "因為長高發燒", 我心諗好大機會係 "壓力燒", 但我無講出口. 佢瞓時我係咁望住佢, 我瞓唔返, 睇到佢咁, 依家阿女比起我細個時真係好悽涼.

P.S. 其實阿女成績只係一般, 唔係全級 top 10, 只係全級 50/120名以內,  而我希望佢只需要係維持 band 1尾, 最差的話是 band 2頭成績咋, 我希望係咪好強小女所難呢? 思考中!

longlokma

係，好可能是壓力導致。我都識有同學仔每次測考前会頭痛加呕吐……冇辦法，试下儘量同佢減壓，早d上床休息瞓覺

wan_sosin

有能力的話，去搵遊戲治療，壓力可能已經唔係因為父母，係你囡囡本身都唔覺地比自己壓力。遊戲治療係幾好釋放壓力嘅方法！如果屋企許可，玩下free play, 即除了唔傷到別人，自己，物件下，玩乜都得，掉嘢，亂畫都得，點玩由小朋友作主，唔需要有規矩，但屋企要設定範圍，保護好牆同四周先得，呢樣玩法對小朋友心理健康好有幫助！但記住要提醒小朋友幾時要返去現實世界！

MASAYA

可能壓力, 可能用功過度overheat, 不過你已經調節得好好, 似係佢畀自己壓力多d

200709

我覺得係壓力, 我女小一時都會咁. 而家小二, 好了很多. 小朋友感到壓力也不自知, 但身體會反映出來. 我女有些同學也會這樣. 唯有教她們放鬆, 多休息, 慢慢學會處理壓力.

仔仔錫錫你

我覺得係壓力問題。你話今次已經無咁谷，其實“零晨 3:30”知道發燒，翌日都重要佢去考試就知小朋友要承受壓力唔少。

我唔講我無比壓力細路，但每次考試都係3日前開始温，每次15-30分鐘，因為我清楚知道佢地上堂已明白，温習只係 refresh 佢記憶！更重要一點係我能接受細路成為band 3生，只要佢品行好，唔好學壞，將來學門手藝一樣有飯開。之前試過手術後第2 天去考試，細路話無問題“唔得就下次考好d"，我要小朋友積極面對困難，唔好咩都驚/擔心，做個豁達的人才會開心，病痛都小d。

happy_lavender

小時了了 發表於 15-1-7 10:06
事情是這樣, 小女:

1) 去年小三上學期考試 (2014年1月)發燒 照返學考試

我唔係醫生，唔知係咪壓力導致，但我讀初小時逢星期六都發燒，一年有廿幾個星期六都要請假，上唔到學校的興趣班！所以可以分享一下經驗，讓你參考。現在阿仔得到我的遺傳，也經常發燒，幸好沒有我的情況嚴重。他靠游水已有改善，仍偶有發燒，但次數大減。

據我媽媽的回憶，當年我每次發燒都是因為扁桃腺發炎，都是高燒！當時醫生曾建議我做手術切走扁桃腺但我無做。不過我的外甥切了，之後真的少了發燒。而我經常發燒的另一因由，阿媽說是西藥太散，服後令身體虛，便更易被其他細菌侵襲！當時阿媽帶我睇一個老中醫，吃中藥調理了近一年，身體確實好了些。

小時了了

wan_sosin 發表於 15-1-7 10:29
有能力的話，去搵遊戲治療，壓力可能已經唔係因為父母，係你囡囡本身都唔覺地比自己壓力。遊戲治療係幾好釋 ...

多謝您. 遊戲治療阿女幼稚園時我有上呢啲坊間幼兒心理學課程, 阿女係出面玩過一次 (課程免費送一次), 阿女整個幼稚園階段係屋企真係有"特別遊戲時間"俾佢, 亦買了一大堆兒童心理學玩具什麼屋,樹, 人, 面具, 手槍之類, 屋企細, 無沙玩. 依家佢10歲, 純個人覺得, 遊戲治療幼稚園及初小會適合啲

小時了了

仔仔錫錫你 發表於 15-1-7 10:37
我覺得係壓力問題。你話今次已經無咁谷，其實“零晨 3:30”知道發燒，翌日都重要佢去考試就知小朋友要承受 ...

唔好意思, 我唔係對 band 3生有偏見，只係我覺得小女天資尚可, 自己認為 band 1 或 band 2 對小女學業及更重要係朋輩影響會比較好啲, 以及小女亦應該應付到, 所以要我依家急降低要求去到 band 3, 咁我暫時呢一刻真係未接受到. 如果小女真係有情緒X咁又唔同睇法, 我都係度思考及調節中, 多謝您意見

Anniemun

小時了了 發表於 15-1-7 10:06
事情是這樣, 小女:

1) 去年小三上學期考試 (2014年1月)發燒 照返學考試

齋發燒? 有冇其他病徵?

happy_lavender

小時了了 發表於 15-1-7 13:22
多謝您. 遊戲治療阿女幼稚園時我有上呢啲坊間幼兒心理學課程, 阿女係出面玩過一次 (課程免費送一次), 阿女 ...

畀大個D玩o既咪係歷奇輔導囉。

slamai

回覆 小時了了 的帖子

運動對舒緩壓力最有效

小時了了

happy_lavender 發表於 15-1-7 10:58
我唔係醫生，唔知係咪壓力導致，但我讀初小時逢星期六都發燒，一年有廿幾個星期六都要請假，上唔到學校的 ...

中醫調理身體我無想起過, 您提起, 今次好咗之後我會捉阿女去睇下中醫試下, 但中醫調理診金+執藥都唔平, 又要洗 $$$$$

另外, 係另一討論帖小學生早餐吃什麼 http://www.edu-kingdom.com/forum.php?mod=viewthread&tid=2976208&extra=page%3D1, 我真係睇到自己汗顏, 覺得自己唔識做人阿媽, 無好好咁整有營養早餐俾女食, 今次之後我都要學其他媽咪學習煮什麼嘉美少爺雞煲3個鐘湯底, 做豬骨湯底了

小時了了

slamai 發表於 15-1-7 13:33
回覆 小時了了 的帖子

運動對舒緩壓力最有效

我都想問下大家意見, 阿女小一開始一星期有一個鐘頭一堂學游水, 學咗都 3年, 我學游水目的係求生及學晒4式就完喇. 原本打算學埋下個月2月就完, 因為見佢學咁耐只學到 3 式, 個游會拖長教, 今年都唔會教蝶式, 唔想浪費金錢

咁, 好唔好繼續俾佢學呢?

MASAYA

小時了了 發表於 15-1-7 13:44
我都想問下大家意見, 阿女小一開始一星期有一個鐘頭一堂學游水, 學咗都 3年, 我學游水目的係求生及學晒4式 ...

阿女意願係點？
如果唔係為比賽，其實而家差唔多完成原定目標，可以檢視學最後一式係咪需要/想要？如果話定左目標希望完成佢咪完成埋佢，如果覺得冇所謂，咁唔學蝶式都冇損失

小時了了

happy_lavender 發表於 15-1-7 13:28
畀大個D玩o既咪係歷奇輔導囉。

"歷奇輔導" 邊度有呢? 可否介紹下呢?

小女今年已有參加學校基督少年軍, 舊年暑假又有參加 Outward Bond 了 (又上山又下河, 成身濕晒仲幾日唔沖涼, 佢超鍾意), 佢好鍾意玩呢

MASAYA

已經識游水，唔上堂都可以游，彈性仲大

happy_lavender

小時了了 發表於 15-1-7 13:52
"歷奇輔導" 邊度有呢? 可否介紹下呢?

小女今年已有參加學校基督少年軍, 舊年暑假又有參加 Outward Bond  ...

我正正就係基督少年軍導師，我知道有D導師在相關機構工作，可以幫你留意一下。

wan_sosin

原帖由 happy_lavender 於 15-01-07 發表
畀大個D玩o既咪係歷奇輔導囉。

歷奇輔導好喎！小朋友會好鍾意！
我亦試過藝術同園藝治療，總之有機會我都試下！
依家其實有好多唔同方法幫助小朋友！相信總搵到啱小朋友嘅方法！