「英普」子女唔識「奄尖」「論盡」

elbar

Celine（左）近期才開始學習廣東話， Steve坦言英、普比較重要。

作為國際金融中心，英語及普通話均被視作港人的「生存之道」，孕育了一批「英普行先」的家長。有小五女生表示就讀的英文小學「非英即普」，廣東話已非同學間的日常溝通語言；有家長則以英、普作家庭語言，六歲半女兒不懂得簡單的廣東話俚語。記者訪問三十名家長，當中有逾六成人甘願「犧牲」廣東話，提高子女英、普水平。學者及文化界人士坦言，家長「棄粵」成為大趨勢，擔心粵語文化終會凋零殆盡。



Herbert（左）指欣欣在學校主要以英語及普通話溝通，或影響其廣東話。





謝家浩指語言在失去使用動機、欠缺適當語境下，會逐漸被遺忘。





小朋友的語言學習，對其發展影響深遠。





「知唔知『奄尖』、『論盡』、『濕碎』、『核突』同『詐諦』點解？」面對記者的提問，就讀國際學校小學三年級的Celine能解釋『核突』的意思，惟對其餘四個廣東話常用字眼卻不明白。Celine在日常生活中，往往會廣東話、普通話、英語夾雜。Celine父親Steve坦言英、普比廣東話重要，自嬰孩時期已用全英語與女兒溝通，近期才學習廣東話。

逾七成家長看重普通話

就讀英文小學五年級的欣欣，在校接受「普教中」的訓練，同學之間均以英語或普通話作溝通，在家則與父母說廣東話，惟其父Herbert不諱言，她不明白部分廣東話含意。Herbert直言會以子女前途「行先」，「咁都好無奈，係要有啲犧牲。」

記者日前在九龍塘及黃大仙的小學外，訪問三十名家長，大部分家長均認為英語最重要，逾七成家長指普通話比廣東話重要。而六成多的受訪家長表示願意以子女廣東話水平下降為代價，換取更高的英、普水平。

「識得口頭上嘅對答係語音方面嘅掌握，同文化傳承唔係同等嘅事。」香港教育學院中國語言學系副主任謝家浩擔心真正的粵語文化終會隨時間消失。香港教育學院語言學及現代語言系助理教授錢志安指，近年發現部分廣東話口語有被書面語取代的趨勢，相信與粵語及普通話碰撞有關。他坦言，本港未來的語言政策，對廣東話的發展很重要。註冊言語治療師黃美燕則提醒父母說話時中英夾雜，可能會影響子女學習語言的句式及語法等。

Yanamami

禁點解星加坡人可以英、普同自己家鄉話（客家、福建、廣東話。。。）都掂既？

Jane1983

回覆 Yanamami 的帖子

同意，有心學，係香港長大話學吾到廣東話，搵嚟講。

ANChan59

原帖由 Jane1983 於 14-09-13 發表
回覆 Yanamami 的帖子

同意，有心學，係香港長大話學吾到廣東話，搵嚟講。

現在可能不識廣東話，只識英普是高等人 ..........

akys

ANChan59 發表於 14-9-13 21:05
現在可能不識廣東話，只識英普是高等人 ..........

講英文好啲。朋友是台灣人，話呢幾年係火車上講普通話會收到不友善目光。

steppenwolf

當父母非英文人,當train左子女成為真正的英普人。。。
子女日漸長大,和父母也以英普來溝通,父母的英文程度真能和子女溝通到嗎？
當子女想和父母傾心事而溝通不良時,父母還覺得還值得嗎？

shadeslayer

原帖由 steppenwolf 於 14-09-14 發表
當父母非英文人,當train左子女成為真正的英普人。。。
子女日漸長大,和父母也以英普來溝通,父母的英文程度 ...

父母與子女沒有一種共同的，說得很好的語言，是自我制造溝通障礙。兩代不能好好溝通，任何 perceived 競爭力也是抵不上的。

Yanamami

steppenwolf 發表於 14-9-14 02:16
當父母非英文人,當train左子女成為真正的英普人。。。
子女日漸長大,和父母也以英普來溝通,父母的英文程度 ...

有時喺圖書館，見好多媽咪daddy都用流利英文同仔女溝通，又唔擔心大左溝通唔到既~~只不過識多幾個語言唔喺仲好d咩，點解要自費武功？可能認為專注d會學得好d，唔洗樣樣半桶水？

elbar

英普行先勢所趨　最怕粵語漸沒落（東方功夫茶）

常識題︰「奄尖」、「論盡」、「濕碎」、「核突」點解？你可能會話，咁簡單嘅問題，小學生都知啦。嗱，咁你就錯啦。

今時今日，英語同普通話地位愈來愈重要，家長「英普行先」成為大趨勢，搞到粵語愈來愈冇地位，好多學生連簡單嘅詞匯都唔識。所謂「英普行先」，即係小朋友以學好英語、普通話為優先目標，粵語行埋一邊，有家長甚至徹底「棄粵」，喺屋企全程用英語及普通話溝通添。呢嗱，記者問過一個小學三年級學生，佢對上述詞匯一頭霧水。難怪有學者擔心，再咁落去，廣東話遲早沒落嘅咋。

即係咁，香港係國際城市，英文嘅重要性唔使多講，加上香港同內地交流愈來愈密切，普通話亦愈來愈重要，學好英文及普通話係應有之義。好簡單，依家請個售貨員都要求識講英語同普通話喇，所以話啫，家長「英普行先」一啲都唔出奇。

但無論點都好，香港人絕對冇理由冷落粵語啫。粵語歷史悠久，保留咗唔少古音特點同古詞語，好有傳承價值。就講「核突」呢個詞吖，正寫其實係「鶻突」，南宋《朱子語類》已經有，非常之咁古雅。一句講晒，學好英文同普通話，唔表示要犧牲粵語。正如有言語治療師話齋，喺正常情況下，小朋友可以同時學習兩到三種語言，家長唔使擔心喺屋企用廣東話同仔女溝通，會影響佢哋學習其他語言。

冇錯嘞，魚與熊掌就話好難兼得啫，學習語言咯喎，真係相輔相成，多多益善。只要睇吓內地嘅廣東人就知，佢哋細細個就學普通話，可以同全國人民溝通之餘，亦冇冷落粵語，證明語言係可以兼學兼得嘅。

不過話又講番轉頭，家長喺屋企狂谷仔女講英文及普通話，係可以理解嘅。香港教育政策失敗，語文教學政策五時花六時變，一時母語教學，一時語言微調，搞到家長學生無所適從。最離譜嘅係，教師基準試結果慘不忍睹，肥佬嘅大有人在，為人師表者語文水平低落，教出嚟嘅學生係點，可想而知喇。本報早前邀請中港台三地中學生參與古文測試，結果港生成為包尾大幡，你話幾失禮呢。

一句到尾，家長「重英普，輕粵語」，都係教育政策失敗造成嘅惡果，與其「英普行先」，不如「廢官行開」好過喇！

steppenwolf

原帖由 Yanamami 於 14-09-14 發表
有時喺圖書館，見好多媽咪daddy都用流利英文同仔女溝通，又唔擔心大左溝通唔到既~~只不過識多幾個語言唔喺 ...

如果父母本身都是一口流利英文的當然無問題,但有更多自己也只是半桶水,小時勉強能溝通,大了則有聽沒有懂

qwe2132007

原帖由 ANChan59 於 14-09-13 發表
現在可能不識廣東話，只識英普是高等人 ..........

身邊很多父母有此傾向

qwe2132007

原帖由 shadeslayer 於 14-09-14 發表
父母與子女沒有一種共同的，說得很好的語言，是自我制造溝通障礙。兩代不能好好溝通，任何 perceived 競爭 ...

説得好！
今日所以為的競爭力，二十年後是否要求同一條件都存疑。

ANChan59

原帖由 qwe2132007 於 14-09-14 發表
身邊很多父母有此傾向

跟以前識英文，唔識中文一樣。


兩文三語最穩當！

shadeslayer

原帖由 ANChan59 於 14-09-14 發表
跟以前識英文，唔識中文一樣。

三樣齊學，仲有優次，有一樣學得不好，非戰之罪。如果主動放棄，Myfairlady 話齋，愚不可及。

akys

awah112 發表於 14-9-14 12:02
睇多d 香港電影。

鄧寄塵之歌或風塵3俠可以幫到。重要係5，60年代用語添。 (改番啲錯字)

ANChan59

回覆 shadeslayer 的帖子

初小集中英粵，高小加入普通話口語，優次早定！
孩子學普通話發音最好十歳以前！