周遊列國上癮 克儉真係唔掂（太一叮）

elbar

教育局局長吳克儉有個花名叫「吳得掂」，其實佢唔係樣樣都唔掂，至少有一樣表現出色，就係周遊列國最叻嘞﹗
                                       
唔係冤枉佢o架。教育局向立法會提交嘅文件顯示，吳得掂上任短短一年半，外訪十三次咁多，使咗成二百六十幾萬元公帑，外訪開支又好，次數又好，都比前任局長孫明揚五年任期總和多一大截。據講吳得掂一上任櫈都未坐暖，就指示下屬幫佢製造多啲外訪機會，最好「每月一外訪」添。有人計過數，扣除所有年假、補假、公眾假期後，佢離港夾夾埋埋超過一個月，難怪被人叫做「旅遊局長」啦。
                                       
當然啦，身為政府高官，如果外訪真係有需要，只要以節約為原則，公帑用得其所，無人會反對。之但係咁，睇吓吳得掂周遊列國，似遊山玩水多過似做正經嘢囉。再講吖，即使需要頻頻外訪，使唔使用成二百六十幾萬元咁多呀？話晒你個名都有「克儉」兩個字吖，為納稅人着想吓都好啩！
                                       
呢，有知情人士踢爆，吳得掂外訪逢請必到唔在講，就算同佢大纜扯唔埋嘅活動都搶住去。好似早前有辦學團體率領學生去印尼考察交流咁吖，講到明係學生研習分享會，吳得掂居然厚住面皮要求預埋佢一份，簡直九唔搭八，主辦單位最後焗住「邀請」埋佢。佢究竟係公幹定遊埠，大家心照喇。
                                       
可能就係因為掛住遊埠啩，吳得掂上任以來烏龍百出，頻頻出醜，推行國民教育不力搞到滿城風雨，錯估跨境學童人數導致小學及幼稚園爭崩頭……瓣瓣都搞到一鑊泡，「吳得掂」之名不脛而走。嗱，既然佢咁有閒情逸致飛去印尼同學生「研習分享」，不如留喺香港做好自己分內事好過啦！
                                       
正所謂，前車可鑑，人哋就話見過鬼怕黑啫，點知吳得掂一啲都唔驚。前朝特首曾蔭權爵士同前廉政專員湯顯明出名貪威識食，一個歎盡海陸空，一個瘋狂外訪瘋狂送禮，被稱為「絕代雙貪」，成為過街老鼠，吳得掂咁都唔識吸取教訓，知所收斂，唔通真係嫌未夠衰咩！
                                       
話時話，吳得掂可能真係唔知「前車可鑑」點解。記得舊年開學日吳得掂去一間學校了解跨境學童返學安排，居然話已經同副局長「分道揚鑣地分工」。唉，佢連「分道揚鑣」同「分工合作」都唔識分，唔知「前車可鑑」又有咩出奇吖，唔怪得佢學足絕代雙貪，周遊列國喇。
                                       
不如咁啦，既然吳得掂咁鍾意遊埠，留喺香港又做唔好份工，下次索性長住外國啦，叮！
                                       
                                

MrBeast

又多一花名:吳慳儉