對德望的分享

dichiu

我嘅分享唔係從別人口中聽番來，而係親身經歷。。。我自己由n年前九龍塘德幼讀到中五畢業。我從不是尖子。學生時代，我並如一般GH學生咁 proud to be a hoper。傳統學校老師往往忽略咗我哋呢班喺中游嘅學生。因不受重視，我變得無乜自信。小學六年，全靠我媽媽跟功課，幫我溫書至保住中上成績。上到中學，媽媽已經冇能力幫。喺冇人管嘅情況，成績插水，更枉論自信。但中四那年我得到啟發，開始發憤，成績慢慢追上。校內英文只是合格的我，中五會考攞到C，第一次 TOEFL 攞到587分。嗰時我先知喺 GH 中下，已經係全港中上。父母為減低我考大學壓力，比我出國讀 high school。我可大膽講句：由我 Day 1 到加拿大，我已經原全聽得明講得通英語。但其他同學都有好大語言障礙。嗰陣我更肯定 GH 比我嘅英文基礎有幾扎實。一連 high school 順利完成，所申請嘅3間大學全取錄我，亦無須讀任何 ESL 課程。待續⋯

dichiu

大學畢業，回流返港，跟住結婚生女（2個女）。到面對自己個女選小學時，我冇同佢考 GH。首先因為大女從小就好「仔」，我驚佢讀女校會變 TB，而佢又唔鍾意同女仔玩。再者，我想自己個女從小建立自信，我怕傳統教學會沒殺咗佢嘅自信心。最後，選擇比佢喺原區嘅普通小學讀書。無錯，自信係有啦，仲好強添，甚至變得自我。但學校教學欠方向，又沒有聯繫中學。我一直覺得學校英文淺，但每次家長會總有家長投訴太深。好彩我由小一就要佢去上課外 Grammar班至叫做英文過得去。但隨住佢長大，成日同我鬥氣。另外，佢唔係精英班，五、六年級同班同學成績好極端，而且班內有d 情緒控制有問題嘅同學，成日搞事令到成班老師標纖為「麻煩、難搞」。阿女當時總算聽我話有考好呈分試。佢亦主動提出想考 GH。幸運地，GH 取錄咗佢！
大家以為我在唱好 GH？No, 呢個唔係我目的！我想大家知入到心儀中學並不是等於以後一帆風順。其實中學部家長送子女出國並非學校出問題。上次自殺嗰位學生同大女同級唔同班，佢並非因為成績壓力自殺，而係家庭問題。有d學生好勤力，讀得好大壓力，父母唔忍心，又對 DSE 冇信心，就及早送女兒出國。另有學生追唔上，父母又可能作出國嘅決定。坦白講，青春反叛期嘅小朋友唔到你控制。我大女成績一年比一年差，晚晚好夜瞓，唔係為溫習&做功課，而係用手機上網煲劇。我勸鬧都試過，情況卻繼續。其他同學做功課做到好夜，佢好輕鬆但又交得齊，當然質數欠奉啦！但慶幸同學個 mix 好好，冇喺其他方面學壞。我只可以等大女自己瞓醒。學校老師從冇比家長任何壓力。如果有一日佢要離開 GH，絕對唔關課程或老師事。大女到呢一刻都好鍾意間學校㗎！至於有專長嘅學生（如田徑、游泳等），DGS一定會來招攬，大部份家長都覺得 DG 比 GH 優秀，順利成章就會去咗 DG。真係無必要捉住呢點踩 GH！
老實講，家長為子女選擇出國升學或讀國際學校，並非對原校失去信心，而係對香港整個教育制度失去信心。每年不停嘅教改，香港各大學畢業出來嘅學生質素又每況愈下，情況令人擔心！較有經濟能力嘅家長當然會作出另類選擇。如果我大女重拾正軌，用心讀書，我都會考慮送他出國。
我同時亦係德小家長，待續⋯

dichiu

原本一心一意比細女入家姐間小學，但越來越睇清間學校嘅問題，再考慮細女嘅性格加上唔想再經歷升中嘅焦慮&不安，最後佢入咗 GH。佢今年讀小四。想講下自己感受⋯
一間傳統小學，但估唔到咁多年來佢身邊嘅老師對佢都關懷愛護。我細女自小一就有焦慮會成日肚痛同嘔。上至老師，下至校務處職員甚至清潔姐姐都好愛錫佢，好關心佢冇嫌佢煩。即使一d教咗好多年書嘅老師都唔係用成績來評價學生！細女成績一般，但今年班主任竟然話佢好乖好叻女，成績唔好只係技巧未成熟。冇諗過老牌老師會咁睇個女，真係好驚喜同意外。三年半來，細女都好鍾意間學校，仲有所有教過佢嘅老師同校長。我完全唔覺佢自信心受損。雖然一班差不多40人，但佢哋都好有紀律，好服從老師。
跟住講下課程⋯

dichiu

細女P1-P2，因為有大女學校（普通資助活動教學小學）作比較，更覺 GH 教學有系統。尤其英文，工作紙分成 Grammar, Tenses, Preposition, Comprehension, Vocab... 各類，教法循序漸進，由淺入深。教完嘅 materials 會不斷有練習重溫。英文基礎打得很好，即使讀深一年也不太難應付。中文亦一樣分成不同類型工作紙，不用書本作業。數就中英數同步教，但focus喺中數。GS只要明白課文內容，串熟生字，溫熟作業就ok。其實呢個就係一直以來 GH 嘅教學模式。我都好滿意個效果！唯一就係功課量大。細女P3那年梁校長退休，阮校長接棒。第二、三學期開始有輕微課程改革，GS嘅改變最明顯，從前嘅識串生字死記問題与答案已行唔通，要靈活地知個實驗點做，d工具點擺。忽然嘅轉變大家都應付不來。13年6月校長召開家長會講解全面推行課程改革。坦白講，我同一般家長一樣對原來嘅方法滿意，好怕變。但我好欣賞阮校長。佢可以舒舒服服維持原狀，但佢冒住比人鬧嘅險推出改革⋯

dichiu

改革內容已有家長之前提過內容，所唔多講喇！由九月到e家大考，功課量確實少咗，但大部份功課都要思考，多咗中英閱讀。我細女本來做功課已經慢，e家就更慢，晚晩都差不多11點至瞓。今年中丶英都冇乜工作紙，GS 冇咗作業但只得少量工作紙，數係唯一無大轉變嘅一科（不過冇咗英數書，改用英數作業）。中英常每科要考嘅範圍好闊（因為全學年得兩個考試），但可溫嘅材料唔多。英文& GS 冇咗試前小測，更令各家長都有d無從入手嘅感覺。坦白講，我都擔心分數影響升班及升中！甚至有家長建議我向校長投訴，但學校咁辛苦推改革，不會為d冇數據嘅投訴而剎停。雖然我目前的確見到細女喺 grammar方面退步咗（因疏於練習而淡忘），但佢其他方面有冇進步我暫未能評價。今次考試我同細女講我只要求佢用心溫熟考試範圍，結果我唔睇重。希望派卷返來可以見到佢靈活運用方面有進步 (但對分數期望唔高）。我好明白阮校長好錫班學生，小至裝飾佈置，大至課程對學生將來嘅影響都周詳考慮過。但個人認為基本嘅 grammar 操練係需要嘅！好懷念從前中、英文分門別類嘅工作紙。希望學校做改革同時可以保一d舊有嘅課程。矛盾地又好多謝校長改革著重閱讀，對平時有時間只會玩都唔睇書嘅細女來講，變相係局住佢睇！因為改革，打爛咗我逐步放手嘅計劃。呢幾個月我辛苦過以前，英文本 novel 我初時每個 chapter 睇，等佢知我會抽問，以防佢敷衍我。不過，近排佢有進步，覺得個故事好有趣，開始想追埋本 novel series 另外嗰幾本。順道一提，由小一至小四GH揀嘅 storybooks 真係好好睇，有幾本內容仲好好笑添！另外，值得一題係今年考試中英都要考寫作。我好贊成但不免擔心細女唔知考成點，心情真係好複雜！最後，今年 GS 加咗 Science 書代替其中兩本 GS 書，呢個學期教咗其中一本。本書冇乜嘢溫，以做實驗啓發思考為主。老師上當同佢哋一齊做實驗，好過以前睇 ETV 好多！估唔到佢少少年紀知點做 fair test！又有做實驗打爛 beaker 嘅趣事。
各位家長及準家長，校長和全校老師為今次改革做咗好多，好辛苦。開頭可能唔完美而家長學生會覺得無所適從，但校長嘅方向係正確嘅，我相信將來課程還會有微調，我都希望細女會續步適應，等我可以慢慢放手。同時，希望德小課程改革可以銜接到中一課程！我唔係成日上 BK，但唔想見到有人糊亂將冇關係嘅嘢放埋一齊講，如自私中學生&小學改革。大家要知道GH嘅改革剛開始，要相信學校有心比學生更好嘅！希望大家唔好為大抽獎買保險而霸住個位，好多一心一意選德小嘅人仍在等待中！將來有機再上來分享。。。完

parentslove

Personal speaking, the worksheets are quite helpful.
P5 Parents

QQMonkey

多謝分享，亦非常中肯。

課程改革，對小一至小三學生昰絕對好事，百利而無害。

對於小四以上學生可能真的要時間適應，不竟要從以往習慣了3至5年學習模式改變,又要擔心中學部對改革後分數的看法，這都是家長的憂慮。

我只希望老師們亦可與時並進，多些啓發，多些解釋，不要用往日千篇一律的方法教授，學生才獲益良多。例如那本S..R 是一本好書，老師可以將所提technique 套用就其他課本。

增加多些NET 亦是我希望的。

yau_yau

多謝你的分享！

ms.bead

原帖由 dichiu 於 14-01-08 發表
我嘅分享唔係從別人口中聽番來，而係親身經歷。。。我自己由n年前九龍塘德幼讀到中五畢業。我從不是尖子。 ...

十分多謝你的分享，你道出了不少我的心情：對改革既有期望又有些擔心、懷念以往有系統的工作紙等…你在GH的經歷很有說服力，讓對GH有興趣的家長作一個參考，選擇適合的學校!

NC9

想問下各位GH家長, 咁GH 轉左制, 相對其他傳統學校, 大家感覺係學術上的競爭力有否改變呢, 特別是現在P1,同P2 的學生？

ms.bead

原帖由 NC9 於 14-01-11 發表
想問下各位GH家長, 咁GH 轉左制, 相對其他傳統學校, 大家感覺係學術上的競爭力有否改變呢, 特別是現在P1,同 ...

請問你想知道的這個"競爭力"可以如何測量出來?

parentslove

I don't think the worksheets take a lot of times for the student to handle, actually less than 10 minutes per one, but that's good for their basic foundations, I suggest use both to have a protection net.
Parentslove

milkylok

Good sharing, could you share your elder daughter's school life in GHS?

A P6 parent

dichiu

My elder daughter is in GHS Secondary. I'm not a P6 parent.

grassmama

thanks for your sharing, it's very helpful !

Bon_Bon_Pa_Pa

本人很like dichiu的分享。我女兒都係讀緊德小四年級，這兩年小女和我都經過學校改革的洗禮。起初大家都有些擔心學校改革的步伐會否太快呢？但本人因工作上經常要面對改革，所以唔怕改變。亦明白學校點解想改革，出發點都係為咗班Good Hoper好，學校咁有heart，我們都應該支持。我諗GH希望由糼稚園至小學再上中學這15年可以有一套長遠和連貫的教學方針，令學生在這環境下在德育和學術方面都有所成。改革的開始必有不少困難，老師、學生和家長都要適應，希望大家可以共同渡過。而事實上學校都在調節中，所以有些人會感到年年都有變嘅而擔憂，但要明白改革未必能一步到位的，希望逾改逾好! 經過今年上學期，功課確實少咗，小女睇書亦多咗。比起以往小女幾乎每天做功課和温書都要做到十一、二點，第朝六點又起身番學，大家都辛苦，每年兩測兩考前的考試壓力又大，今年確實舒服小小，阿女上學期成續亦沒有退步，希望學校可以繼續好下去。
記得校長Sister Pauline對我們家長講過，你們女兒入德望係12年嘅教育，唔駛心急和擔心，放心交個女俾學校教啦。我相信Sister Pauline有能力帶領學校的改革。

synshu

Thx for your detail sharing

pt2555

Thanks for dichiu's sharing, very reasonable and helpful!!

ksvivian

小女有幸被德望收了明年p1, 想請教：
1. 除中英數外，仲有咩科目？
2. 中文是否普教？
3. 總共有幾多班？是否須要考分班試？只知每班約40人.
4. 有何課外活動可比小一參加？是否要老師選學生才可入，費用貴嗎？
5. 朋友說小一程度不深但小二就加深很多，是嗎？

Laimui827

小囡有幸明年入讀P1, 我想知英文有沒有net teacher教？有普通話堂嗎？
另, 如何準備上小一, 因擔心課程深希望早點預備。

謝謝！