文憑試白老鼠家長心得分享 - 修訂版(已更新 #57)

ANChan59

[在EK，Khmama 多年的黙黙耕耘，任勞任怨，經常作出細心的分析，給眾網友家長提供中肯意見。在2012年，她在愛女入到中大神級科目後，已經急不及待將自身第一手（白老鼠）經驗跟大家分享。我會借助她的資料作基礎，不用再整個車轆，只是順水推舟，加多些枝葉，讓家長們多些其他參考！

較早前跟 Khmama 商量，我會引用她的 "第一屆DSE白老鼠" 資料，作JUPAS升學分享，她十支持，二話不說電郵她的相關檔案給我，並提醒裡面部份資料需要更新。

EK有此慷慨大方前輩，是大家之福，我們絕對值得學習。大家一同發揮正能量，守望相助。

為方便文責，Khmama的資料是黑色顯示，我補充則以藍色顯示，如有錯漏，請包容及多多指正及補充，發揮正面集體力量。

還有不少修定及增加資料，但有見部份資料有時間性，對中三學生選科較重要，所以先貼出最初幾篇。] ANChan59

************************

文憑試白老鼠家長心得分享 – 修訂版

第一年其實都係摸住石頭過河, 最緊要好好去計劃, 機會只係留比有準備既人. 下面有少少心得可以參考下:

1) 中四選科

中四選科通常都係成績好既優先選科, 除咗睇興趣, 亦要先瞭解所選科目是否可以切合將來大學課程既要求, 所以最好小朋友已經有打算將來大學選咩課程. 如果小朋友未有概念, 可以試下做下面既測驗, 睇睇自己適合讀邊個範疇.

http://student.hk/appraisal/appi/list.php?lang=c

http://cscc.edu/docs/PACS/assessment.htm#Featured

http://www.pnc.edu/discover/holland.html

http://career.missouri.edu/resou... %20Code%20S2010.pdf

http://www.vcu.edu/uc/documents/Discovery_Worksheet_4_page.pdf

http://www.hollandcoderesources.com/

ANChan59

[2. 高中選科策略 1

在EK家長中，高中選科各有不同目的及策略，以孩子興趣、學科成績、性向及就業前途作考量為主。就自己及幫朋友子女作選科的經驗，以上 4 項都可以作參考，考慮多一些，始終都會好些。在 3 年前我曾經分享過有那些策略，可以幫助孩子升大學熱門科目，我會以此作參考，並加入 khmama 及我從新整合的資料。今次我會加入多些資料有關不同程度學生，及不同家庭狀況的考量，會加入一些案例作討論及參考。

就以往多年經驗，孩子們大多數沒有目標，只看初中當時學科成績高低，作取捨，所以部份組合是不倫不類，例如：歷史、物理、經濟；英國文學、生物，延伸數學，好難作建議及決擇。

http://student.hk/appraisal/appi/list.php?lang=c
http://www.careerpath.com/  )

如果茫無頭緒，我會作以下建議：

最遲中三開學開始：

1。到幾個大學網站，看看各大學的基本要求及了解不同學科的收生要求及差異，例如三大多數要求是 4C + 2X，中大神科4C + 3X.... 科大M1M2當一科及以最佳五科計算。

有關資料有以下途徑作參考：

智能手機Apps。   e-Navigator
Apple    https://itunes.apple.com/hk/app/e-navigator/id521031147?mt=8
Android  https://play.google.com/store/apps/details?id=app.eNavigator

JUPAS 網上各院校收生資料。
http://catalogue.jupas.edu.hk/ca ... nt_Institutions.htm

2。到聯招網站打印過往兩年 (2012, 2013) 的收生成績，聯招非聯招比例，
HKU LLB
http://catalogue.jupas.edu.hk/ca ... ion.php?code=JS6406

First Year Intake 100 Application Statistics (after Modification of Programme Choices)

Year     Band A   Band B   Band C   Band D   Band E   Total
2012    239         68           104        135         286         832

Offer Statistics (as at the Announcement of the Main Round Offer Results)

Year     Band A   Band B   Band C   Band D   Band E   Total
2012     65              -             -              -             -           65

JUPAS : Non-JUPAS       65 : 35

Band A , Band B 是學生 JUPAS 申請優先排序，第一個表只表示從不同 Banding 申請人數，第二個表反映以法律系來看，法律系只考慮 Band A 優先的申請者。從 JUPAS Band A 獲取錄是65人，當年總共錄取100人，餘額是 NJ 所以比例就此計算出來。

舉例 Nursing 只是其中一個選擇，如果你考慮三個 Band A 選擇都是 Nursing ，要求是一個理科，你選一科會勉強Ok，因為假設不會失手及每間大學都只需要一科理科，如果兩間大學要一科，另一間要兩科，你到時可能少了一個選擇。如果有其他非Nursing選擇的機會，你可能要考慮兩科理科，增加選擇學科機會及一科不幸失手都有保險。

3。通常科大最早，由9月底開始八大院校有收生簡介會，鼓勵孩子去兩三間，看看校院，感受氣氛，聽聽教授及學生的介紹及分享，孩子會有初步感覺

4。回來再一家人討論，看看孩子是否特別鍾意某些學科，或者特別唔喜歡，我所見後者較多較易辦

5。若果孩子收窄到對某幾科有興趣，

     5.1  就要深入那幾科的選科要求，例如工程對延伸數學，物理或綜合科目有物理又或 ICT等等，

     5.2. 然後了解那大學學科的收生分數，包括 4C+1，4C+2，或最佳5科的平均分數及中位數

     5.3. 向相關老師或班主任查詢，就自己校內成績跟 DSE的對比，例如過往校內 B 等於 5*，或等於 5，對選科進取或保守有明顯影響

     5.4. 若果大學幾科都有興趣，收生分數差異不大，我建議透過家長找業內或相關人士了解 -收生情況，DSE的選修，大學課程，畢業率，就業情況及前景，工資，晉升途徑，專業資格，再進修的機會等等。例如小兒最初有興趣藥劑，但問完藥劑師，醫生或其他輔助醫療專業人士，跟醫生比較完，他理性地轉為醫科。又或者選工程，但了解到好大機會要回國內長駐工作，或者經常出差國內，自己是否接受得到。

    5.5. 選大學學科要考慮1至2科進取，2科正常發揮，1至2科要穩陣作保險之用，但要留意85%被取錄是 Band A 選擇

    5.6. 到此時，撇除4個核心課目，選修的情況及選擇會好清楚，但要考慮自己能力是選 2X或 3X，又能否應付 M1 或 M2，不要勉強，如果中中等等或以下，何以避 M1 / M2，只選2X，我個人不贊成 1X，除非入大學真的好勉強，目標已經轉為副學士，高級文憑或海外基礎文憑先修班。] ANChan59

leeleelumlum

Thanks for compiling n sharing

ANChan59

[2. 高中選科策略 2
當初找DSE選科資料，主要靠Khmama的材料，她主要集中她女兒的選擇及選修的特別要求。我詳細做了中大，港大及理大，形式跟Khmama 差不多，已化了我幾晚時間。我希望以此作參考，讓孩子自己做一份作分析及部處。

暫時沒有，我及Khmama 嘗試做了一些功夫，但大學之間有很大差異。我會嘗試以1-2間大學作示範，加上Khmama就她女兒的情況作示範，家長及學生自己要做功課。

由於4C+1x 或4C+2X, 跟國際的三個選修科有明顯出入，所以都不知如何表達。加上不少大學為了收生，都不敢硬性規定指定選修。大學這樣做，在神科沒有問題，因為多數學生選3X或者加上M1/M2，但較次的學生會面對很大問題。

我列出這表希望幫到到英國升學的家長，從而幫助家長及學生明白，在海外大學是有學科要求，而不是4C+1x 或4C+2X。

http://www.edu-kingdom.com/home. ... 25&do=blog&id=11878

大學收生只係計四個主科(中, 英, 數, 通識) 再加一至兩科選修科, 所以除非為咗做八科狀元, 基本上讀三科選修科已經好盡, 實在冇必要去讀四個選修科, 倒不如讀好其餘科目仲實際. 數學延伸課程(M1/M2)係某o的大學課程既要求, 而且外國大學只當數學係半科, 要計埋數學延伸課程先當一科, 如果應付得到, 選修數學延伸課程係好事, 而M1主要讀statistics + calculus,  M2主要讀algebra + calculus, M1會比M2易讀同實用. 而文憑試數學科既grade會以數學或數學延伸課程既grade, 以較高grade者為準.

向來大學既水泡科都係工程同科學, 而呢兩個課程都要求有一科選修science (phy/chem./bio/combined science), CU更要加埋M1/M2. 所以中四選科有能力的話可以選物理/化學. 如果選combined science, 倒不如選全科既phy/ chem./ bio更實際, 坊間既練習都多o的. 如果唔讀全科既chem, CU既Pharmacy就冇得報. 所以最好既選擇應該係Phy + Chem + M1, 有能力先選多一科有信心既科目.

最近整理大學收生資料, 發現八大共有15,000個 Degree學額, 如果完全唔讀science subjects, ICT同M1/M2, 已經少咗6,840個可申請既學額, 佔45.6%. 所以如果能力應付到, 最好都要讀一科science subject.


今年好多人係衰o係中英文手上, 因為得一半人可以攞到’3’級. 中文困難既地方係理解, 加上文言文都唔係個個掂, 所以最好集中火力做多o的練習. 英文有兩份卷比考生揀, 一份難, 一份易. 易o個份比你最叻只可以攞’4’級, 考試要選適合自己份卷做, 總之要量力而為,. 通識科今年預咗唔會大屠殺, 考既只係根據數據既分析能力, 相信唔太離譜都應該可以合格.

ANChan59

[2. 高中選科策略 3

我想以實戰作參考，例如小朋友有興趣讀醫療保健類學科，可以將所有UGC Funded 課程詳列如下，當然又可以列表BBA，工程，科學，文科等等，約略知道那些大學有那些課程，加上收生人數最好。

我再列一個表，將各大學學科會考慮的選修科詳細列出，已經知那些是百搭，那些可有可無。遺憾是各大學沒有詳細列明，為方便只用Selective 1,2,3...。我建議大家用ATUHK的原始數據作參考，會約莫知道每個選修科的成績範圍。按能力及興趣作取捨，如果真的困難，我建議興趣行先。

到中四中五約莫知道成績，跟師兄師姐成績作比對，再打折（我會建議打八折），大學選科時都幾穩陣！

http://www.edu-kingdom.com/home.php?mod=space&uid=107125&do=blog&id=12120

ANChan59]

ANChan59

中四選科基本資料 - HKU

跟以前一樣，我先提供表格及數據，讓大家先有全局觀，然後再細緻分析。

我先用港大作例子，然後是理大及科大，因為工程浩大，我不會全部八間大學都詳細分析，但我會引用khmama一些資料，當然我會更新。大家要留意khmama都是集中她女兒的選科及興趣，大家要做功課，不能照單全收。

JUPAS Subject Requirements - 2013
                                
http://www.edu-kingdom.com/home. ... 125&do=blog&id=8580                 
                                

我一開始用港大作分析，一來是神校也特別多神科，還有科目較多及闊。

港大一定要兩科選修科以上，再加M1/M2。同時對指定科目要求較清晰。

所謂神科都是收生分數最高，頭四科都是30-35，就算醫學院及法律學院人數較多但分數依然堅實。緊隨其後的多數是人數少，所以分數都算高。

收生人數最多的竟然是排中間，雖然分數的差異較闊，而並不是排最後，有點出乎意料之外。收生偏低者一來科目較冷門，二來收生數目亦偏少，值搏率偏低，自己衡量是否值得。裡面有些不錯的科目，例如中醫，保育及教育。我不會做教院，家長或孩子如果有興趣教書，應該自己做個表格作比較，比較埋中大，可能有開心大發現！

運動相關科目，收生成績偏低，如果有體育底及有興趣，港大值得考慮，點都是港大。

ANChan59

中四選科基本資料 - HKUST

http://www.edu-kingdom.com/home. ... 125&do=blog&id=8586

在科大的資料顯示，除了 BBA 收生分數輕微高些，其他學院十分接近，所以理學院及工學院是否"大水泡"，真是好難講。可能第一屆，同學們較保守，都是穩穩陣陣，但求一學位。

有趣的是科大較重視 M1/M2，除了GBus 例外，如果有選 M1/M2 而且成績中等，科大值得搏，其次是理大。

綜觀整體，讀理科始終有優勢，幾個學院都可以申請。而且三大傾向收2科以上選修科，一科選修科，3大機會微乎其微。

ANChan59

中四選科基本資料 - PolyU Board Base and BBA, with HD

http://www.edu-kingdom.com/home. ... do=blog&id=8592

由於理大將5**當"6"計算，所以我將 5 科每科加 1 ，為了方便參考，我整體列出，歷年來，分數計算最麻煩是理大，完全令家長，學生及老師混亂。

理大跟科大一樣，幾睇重 M1/M2，就算考得不是十分高分，都有著數。理大今年都是計一個選修科或 Applied Learning, Other Languages 等等，由於考評局昨日公布會出最佳 5 科的結果，理大會否調整收生計算方法，大家要留意，我個人相信明年才會改。

中四選科基本資料 - PolyU BSc & HD

http://www.edu-kingdom.com/home. ... do=blog&id=8596

理大自己的神科全在 BSc ，特別是 Healthcare Professions，例如物理治療、職業治療、視光學，放射學，酒店管理.......收生成績都算高。

不過大家要留意，理大是有講明那些科目會有權重，所以不要單看重分，權重科目分數低都會入不到心儀科目。

大家亦要留意 HD 底平均分比 BSc還要高，除了酒店管理，3,3,2,2 還是要重點出擊。如果今年中文成績有改善，BSc的平均分會 >> HD，今天選科要切記這點。

中四選科基本資料 - PolyU BEng & HD

http://www.edu-kingdom.com/home. ... do=blog&id=8599

ANChan59

3) 何去何從

面對新學制, 身邊既親友都有唔同既取向. 有朋友仔仔選擇讀完中五跳船, 去外國讀foundation再入大學. 因為讀傳統名校, 所以校內成績都得到外國唔算top既大學承認, 名校有時就係有呢方面既好處. 亦有朋友女兒名校中四升中五去外國讀, 因為GCE A-LEVEL淺o的, 要攞A*較容易, 入top既大學較海外生易得多. 有時都幾諷刺, 升中時家長搏命入名校, 但到緊急關頭, 放棄名校原來係咁容易, 唔怪得人地話SPCC考插班係易過升中考入去.

有o的係外國考完GCE A-LEVEL既香港學生, 會透過非聯招(NON-JUPAS)申請香港既大學, 唔少都有幾好既offer (連HKU醫科都有), 都係比番本地既學費, 呢個係另一個進可攻, 退可守既升學途徑, 如果本地冇offer, 考生仍可以繼續係外地入大學.

亦有親友以IGCSE既成績去美國讀社區學院, 讀完兩年可以銜接美國既大學讀第3年, o的大學排名都唔錯o架, 讀兩年就大學畢業. 不過要留意揀社區學院要小心, 要選o的有口碑既. 至於大學就要留意究竟有冇足夠既學分比學生讀. 有o的大學係唔夠學分既, 如果學生唔夠人搶學科, 唔夠學分就唔可以讀兩年畢業, 分分鐘要比多一年學費.
[近年多了不少本地學校提供 IB 課程，可能幾年內 GCE 會改變，以 GCE AL 循 Non-JUPAS 入學本地大學既機會會受到影響，要小心考慮清楚，要有最終在英國升學的打算。]

4) 知己知彼

如果要選既大學課程唔會太偏離現實, 家長可以參考上屆考生成績再比較小朋友既校內名次. 如果名次係入大學率以內, 就要好好把握機會. F.5最後一次考試既成績相當重要, 因為無論你要報海外既大學或者F.6開學各大學既拔尖面試, 都會睇呢個成績. 所以記得考好呢個升班試. 如果新學制家長想瞭解多o的, 可以去下面條link睇下.

http://334.edb.hkedcity.net/


[最近期，大學在取錄申請人方面開始有變化，今年 (2013) 整體成績較有代表性，大學亦因應過往兩年收生的結果及實際就讀情況，微調收生準則。所以要靈活分析，要同時考慮 4C+2X, 4C+3X, Best of 5......，了解加權的影響。一兩年後會更有代表性。]

ANChan59

5) 海外升學

如果能力可以負擔, 可以考慮報海外大學degree或foundation做保險, IELTS最好F.5升F.6既暑假考定, 只需要上British Council報名就可以 (https://ielts.britishcouncil.org.hk/iorps/html/content/index.jsp). IELTS滿分係9.0, foundation一般只要求overall 5.5或以上, 普通大學要求overall 6.5或以上, 出名既大學要求overall 7.5 或以上, 最top既大學好似Oxbridge (Oxford, Cambridge) 同LSE 要求 IELTS 每個細項(reading, writing, speaking, listening) 都要7.0 或以上. 坊間有o的課程同練習, 甚至手機app都會標榜攞到幾多分, 有冇用都好, 建議先操練好先去應考. 雖然IELTS既考試日期係好密既, 一次唔得可以再考, 考到好為止, 但張IELTS certificate有列名第幾次考, 如果係第一次已經有唔錯既成績可能比人感覺會好o的, 會唔會令人睇高一線就不得而知. 有時間亦可以考TOEFL. 如果有意讀CU既Global Business或International Business and Chinese Enterprise, 更加要求TOEFL 600 (Paper)/250 (Computer)/100 (Internet)或 IELTS 7.0起碼. 假如IELTS攞到7.5或以上而每個細項都有7.0或以上, CU可以exempt 4個credit既英文科.

Oxbridge係比較早截止(十月中), 九月中已經要去UCAS報名. Cambridge更加要去Cambridge Online Preliminary Application (COPA) 報名. (www.cam.ac.hk/admissions/undergraduate/apply/copa.html)
Oxbridge只可以二選一, 不過我識既人都好似Oxford成功率高o的. 某o的科目設有筆試, 例如數學, 法律同醫科. 而想讀Architecture既考生必須要有Visual Art既底子, 因為面試要準備portfolio of artwork. 大學會有專人為考生面試(大約十二月初), 面試前IELTS既speaking必須已達6.0或以上. 由於Oxbridge唔會經agent招生, 所以要自己上UCAS報. 最緊要諗定讀邊科, 小朋友要自己寫份personal statement, 唔好假手於人, 呢份statement對考大學係幾重要既. 如果係其他較次一級既大學, 可以搵agent幫手, 但係agent有咁多客, 家長要自己跟貼o的. UCAS我係自己報當然可以跟得貼, 但係我搵個agent同我報一間foundation咁多都冇晒聲氣, 最後不了了之. 報UCAS有部份文件要學校提供, 最好早o的問定學校個程序, 我就搞咗好耐先同學校溝通到個predicted grade點提交, 仲差o的寄漏咗份testimonial去英國, 因為以為COPA咩都係網上報, 點知原來要寄hardcopy, 好彩寄快郵剛剛趕得切. 因為十月中都幾趕急. 如果報其他大學就一月中先截止, 冇咁趕. 報Oxbridge可以申請Jardine Foundation既獎學金 (www.jardine-foundation.org/), 如果成功, 3年學費全免兼包每年來回機票, 我當然好身痕咁去試啦, 唔得又唔使死, 結果搞到更加唔得閒, 因為除咗填表, 阿女又要寫一份personal statement, 又要問學校攞testimonial, 仲要面試, 真係搵o黎搞.

UCAS最多可以報5間大學(http://www.ucas.com/), 通常5間大學選既課程最好一樣或者相關, 如果唔係份personal statement會好難寫, 因為一份statement會比晒5間大學睇, 如果o的課程天南地北, 點去說服大學你好有興趣讀o個科?大約三月尾, UCAS報既5間大學會陸續出結果, 一般都係conditional offer同decline. 好叻先會有unconditional offer. 係幾個conditional offer中, 只可以選擇一間作firm choice, 另一間作insurance choice. 通常都係根據自己意願同估計成功機會去決定個firm choice, 要求最低o個間做insurance choice. 有o的大學本身有foundation, 所以有好多位可能要留番比自己, 相對就冇位比海外生, 選擇時要留意, 好似Lancaster咁, accounting & finance都算排名高, 但係大學既學位都留咗比foundation同本土學生申請, 海外生反而報唔到. 有o的foundation只要讀完分數達標, 就保証可以升上聯繫既大學, Lancaster係其中一間, 而Bath都有96%考生可以由foundation升上大學. 但係有o的foundation course夠分都唔一定可以升上你想報o個間大學, 不過你可以選擇升其他大學, 例如Warwick就唔係保証你夠分實有位, 選擇時就要考慮清楚.

除咗英國, 去美國同澳洲升學都係香港人既熱門選擇. 學費方面, 其實最平係英國, 澳洲一o的都唔平, 而且澳洲讀完3年, 有o的課程只係學士學位而唔係榮譽學士學位. 其次要留意依家新學制下, o的小朋友係細咗一年畢業, 而澳洲既大學有規定如果唔夠18歲, 就要家長留o係澳洲陪同先可以入學. 有朋友仔仔就係唔夠18歲, 要等多半年先可以自行入學, 因為父母都要留港工作. 近年都新興去台灣同內地升學, 不妨問下agent, 多個選擇都係好事.

ANChan59

6) 拔尖面試

由於末代會考已經o係2010年完咗, 所以冇咗拔尖呢回事. 為咗搶尖子, 今年三大各出奇招, 要求學校提供尖子既名單等佢地可以早o的面試. 各大學亦有舉辦一o的暑期課程甚至全年既課程比o的中五學生參加, 比o的中學生可以提早去大學上堂, 感受下o的氣氛同瞭解下有興趣既科目內容, 亦可以比o的大學提早揀蟀, 課程所得到既分, 甚至將來入o個間大學可以照計credit. 成績好既就會被挑選參加拔尖面試. 可以參考下面條link.
http://www.cuhk.edu.hk/osp/si/intro1_si.html
http://www.als.hku.hk/talented/index2.php
www.bm.ust.hk/ug/summercamp
http://summer.ust.hk/program.html

大學都係以email既形式, 要求學生register填報2-3個志願, 然後約面試. o個陣幫阿女搞UCAS都已經煩到想死, 忽然間又要應付突如其來既面試, 有o的措手不及. 平時阿女都係T-shirt加短褲或運動褲, 個衣櫃搵件飲衫都冇, 臨急臨忙去G2x00買咗件裇衫西裙, 幾乎連高跟鞋都唔係好想去買. 點知去到科大面試, 個個女仔都formal dressing (唔知有冇化行裝), 結果比阿女埋怨我冇買多件外套比佢, 搞到佢好突出. 我唯有同佢講, 如果間大學因為佢冇著外套而唔收佢, 就唔讀都罷啦. 不過我都即刻買咗件外套下次去港大面試用, 點知港大要求著smart casual, 真係暈低, 都唔知點著先叫smart casual, 朋友叫我去UNIQLx同ZARx睇下, o的款適合後生女, 不過我最後都係去G2x00是但買咗o的casual裇衫西褲算數. 想唔到連面試著衫都咁多麻煩.

不過有呢個面試機會都係好既, 雖然講明冇unconditional offer, 但會有bonus point, 將來聯招著數o的. 但係open day都未開始, 已經要選定志願, 只會面試第一個志願, 所得既bonus point係跟科既, 所以某程度上都冇時間比你深思熟慮, 如果最後聯招冇選呢科就浪費咗o的bonus, 阿女就係浪費咗港大既bonus啦, 慶幸既係港大唔係佢柸茶, 佢鍾意中大既campus多o的.

家長要經常提醒小朋友留意個mailbox, 有人就試過錯過咗港大既面試. 所以我要阿女將所有關於大學既資訊無論email 定sms都轉發比我, 起碼唔會漏咗o的重要既o野. 面試既形式係小組討論. 唔係問時事問題, 目的主要係brainstorming. 例如問你假如中環依家有個計時炸彈, 只有考官手上個remote按鈕方能解決, 但係就會有某o的人要死, 現在有5小時, 你會點做. o的考生就要諗下點答. 聽番個科大做大使既朋友講, 有o的去科大面試既學生攞住第二間大學既folder, 有個考生直頭問佢要見幾耐, 佢要趕住去中大見. 家長真係要叫小朋友留意下呢o的小節.

[由於自身經驗是 NJ ，很多 Fast Track, Early Admission 的本港面試經驗未必適合在這裡分享，將會在日誌分享！]

ANChan59

7) 開放日

密集式既open day, 亦係最攞你命既地方, 時間都係十月至十一月, 不過都要叫小朋友自己去, 瞭解下各個課程讀o的咩, 自己有興趣報邊個課程. 呢o的場合可以留番比小朋友自己去, 我自己就冇參與, 懶得就懶. 其實開放日咁多人, 要預早訂位, 唔係就聽唔到想聽既talk. 要有目標咁去參觀會有效率o的. 家長雖然唔去, 事前可以先同小朋友分析下想讀既課程.

記得阿女去完中大既open day, 返o黎我順口問佢有冇邊o的課程有興趣, 佢答我sports science. 我同佢講我唔反對你報呢科, 只不過唔想你咁快去決定, 應該比時間自己都瞭解下其他課程, 再選擇自己認為最有興趣o個個, 反正去到六月先係最後deadline, 諗下先都唔遲, 到時無論佢選邊科我都支持. 為人父母千祈唔可以迫小朋友跟自己意願去選擇, 始終讀o個個係佢. 結果佢自己考慮完所有人既意見後, 為自己揀咗科有興趣既課程, 我當然唔會反對. 其實一個有能力既人無論放o係咩位置都一樣會成功, 加上正確既處事態度, 何愁發展? 所以讀邊科都冇所謂.

ANChan59

8) 另類申請途徑

除咗海外升學, 家長可以申請中大/港大/城大既運動員獎學金計劃, 只要係港隊/港青/香港紀錄保持者, 如果運動成績獲大學賞識, 可以有offer(唔肯定係咪unconditional). 不過都係放榜前一日先公佈. 只須要搵總教練寫信, 然後將申請表連resume同獎項既副本寄去大學就可以. 中大既計劃十二月初截止, 所以十一月份就要提交. 港大四月先截止, 但要經學校填寫部份資料, 所以要預多o的時間. 今年兩大共有27個運動員(文憑試)經呢個途徑成功取錄入學. 印象中港大既offer比較好, 即使係醫科同法律都肯offer. 中大就似乎報Physical Education, Exercise Science and Health (即以前既Sports Science)入既機會大o的. 詳情可以參考下面條link.
http://www.peu.cuhk.edu.hk/scholarship/scholar_c.htm
http://www.cityu.edu.hk/sds/sch/Entrance_SchC3.htm
http://www.ihp.hku.hk/programmes/admissions/sport-scholar.php

如果小朋友o係運動, 音樂, 其他文化活動, 領導才能或社會服務等有出色表現, 可以透過校長推薦計劃報大學. 一般每間中學有3個名額, 如果自問有才能不妨同學校申請, 等學校提名. 通常o係五月尾截止報名, 學生要準備一份唔超過5MB既profile經學校提交. 稍後大學會跟據六月頭deadline既3個band A志願約面試. 面試表現優異可以有機會獲conditional offer, 只要放榜達標即會被取錄. 如果表現普通, 可能都會有bonus point, 聯招時會有o的著數. 如果表現唔好就咩都冇. 領導才能一般係推薦Head Prefect, 社長,學生會會長之類, 所以小朋友做下prefect同學生會其實幾好, 中四同中五既小朋友可以考慮下.
http://www.jupas.edu.hk/tc/j4/ap ... tion-procedures/spn

自薦計劃只限於高考生, 有一系列指定既條件/獎項, 同校長推薦計劃類似, 但係由學生於jupas自行申請. 今年文憑試並冇呢個計劃, 實在唔明白, 至於明年會唔會有就拭目以待. 下面條link係高考既自薦計劃.
http://www.jupas.edu.hk/tc/j3/applications/the-scheme/srs

ANChan59

9) 聯招選科

選科其實要睇自己既興趣, 大學既要求同成績, 各大學收生要求可以參考下面條link.

http://334.edb.hkedcity.net/pathways-01.php
http://catalogue.jupas.edu.hk/ca ... nt_Institutions.htm

因為今年係第一屆文憑試, 只可以參考上年高考收生既成績作為估計, 決定是否報讀, 成功機會大唔大.
(http://catalogue.jupas.edu.hk/ca ... nt_Institutions.htm)

考生要填寫20個志願, 分為band A (3個志願), band B (3個志願), band C (4個志願), band D(5個志願)及band E(5個志願). 根據以往既統計, 超過七成既考生都係獲派band A志願, 好少係其餘志願, 所以要小心選擇band A既志願, 如果太進取, 一跌出band A志願成功率已經低好多. 大學只會知你選擇既係band幾既志願, 唔會知道你將佢排第幾, 但係排既次序都會影響你成功既機會, 所以你要先了解下遊戲規則, 可以參考下面條link了解甄選程序.
http://www.jupas.edu.hk/tc/j4/useful-material

例一:
假設考生甲第一志願選咗A課程, 而A課程有100個位, 考生甲o係條隊(跟成績高低排)係排100或以內, 咁考生甲就即時搞掂.

例二:
假設考生乙第一志願都係選咗A課程, 考生乙o係條隊有100個考生排佢前面都係第一志願既, 咁考生乙既第一志願就即時落空, 要睇第二志願夠唔夠人爭.

例三:
假設考生丙第一志願都係選咗A課程, 考生丙o係條隊排120, 但當中有20人係第二志願, 佢好好彩係第100個第一志願既考生, 咁考生丙就叫緊糊, 只要o個20個第二志願既考生能全部入到第一志願, 唔同課程A既考生爭, 咁考生丙就有機會入到, 但係如果呢20個人入面有考生丁入唔到第一志願, 咁考生丁就會以第二志願成功入課程A, 考生丙就唔好彩, 要睇第二志願夠唔夠人爭.

知道以上既遊戲規則, 第一二個志願可以選擇比較接近收生成績既課程, 第三個志願就要保守o的, 保障一定頭三志願入到. 要留意科大同城大今年轉咗school base admission. 變成學院制收生, 選擇少咗但每個學院就會有好多學額. 學院制收生就要小心, 因為要讀完一至兩年再睇校內成績選主科, 如果hea住讀, 分分鐘兩年後讀既主科唔係你原本想讀o個科. 唔好諗住入咗學就honey moon year.

選科時, 成績最好係o個科以往收生既中位數, 機會就較大. 留意每間大學計分方法同邊o的科目有高o的weighting, 真係要睇餸食飯. 個人覺得考好四科主科比考好選修科更重要, 因為佔大約七至八成既比重. 大學收生通常都係band A 三個選擇, 所以唔可以一味進取, 適當時要止蝕, 唔係就八大皆空.

一月頭已經要交20個志願, 早o的同小朋友商量定, 唔好咁遲交, 須知有網絡濟塞呢樣o野, 到時改唔到就無謂, 不過都唔使驚, 到二月至六月仍可以俾錢改志願. 放咗榜會編排24小時比你最後一次去改, 可以加入最多5個新既課程取代原先既志願, 所以比較有彈性. 放榜後要記得check下小朋友係邊段時間可以改, 只准改一次, 冇第二次機會, 要小心o的入, 得24小時真係唔到你想太多, 要一早想定.

仲記得入去個jupas網改志願, 一按選學院個製, 失驚無神彈個版面問我係咪要儲存, 嚇到我即刻走番出個網頁, 走去刨下份user manual先, 點知原來真係要按’是’, 先會繼續. 都唔知邊個設計既網頁, 唔可以寫清楚o的問我是否要改志願咩? 無啦啦未改o野點解問我儲唔儲存? 真係九唔搭八, 好驚按’是’之後當我改完, 到時就死火.

heiheihaha2009

dailam

Great work! Thanks a lot!

Shootastar

ANChan59 and khmama, excellent work!

Norwood

Very informative! Thanks for the sharing!

vvff82

ANChan59 and khmama, THANKS a lot!!