送給新手家長 (特別送給SEN家長請看POST #2 LINK)

Charlotte_mom

想寫一篇俾新手家長睇既野好耐
(其實都係抄抄寫寫以前D野)

歡迎各位家長指點補充, 俾D時間我慢慢寫.........



對咩頭緒都無既家長, 建議先從了解呢篇開始 (花d時間睇, 睇完你會明白申請小一究竟係咩一回事):

首先攪清楚小學分兩大類:
津校/官校一類, 跟政府派位; 計分, 計校網, 公平起計全部無得考無面試 (派位完成後仲有dd叩門位, 果時至可以面試/考)
直資/私校第二類, 簡單講似考幼稚園, 學校鐘意點收就點收, 咩分咩校網都唔關事, 家長自己留意日期報名
(其實仲有國際學校, 特殊學校等, 不過唔太認識, 呢度唔講了)

直資/私校申請由k2下學期開始, 想申請就自己留意, 蘇州過後無艇搭, 可不時到學校情報留意行情:
http://www.edu-kingdom.com/forum.php?mod=forumdisplay&fid=538
如果連咩學校係咩類型都唔知, 睇呢度 (續區睇或者用校名search):
http://www.chsc.hk/psp2014/chi/index.php

直資私校貴唔貴架?
豐儉由人, 有D唔貴架:
http://www.edu-kingdom.com/forum.php?mod=viewthread&tid=2587976&extra=&page=1

如果你根本無打算考, 咁就簡單, 只需了解政府派位資料:
http://www.edb.gov.hk/tc/student-parents/spa-systems/overview/index.html
http://www.edb.gov.hk/tc/edu-system/primary-secondary/spa-systems/primary-1-admission/index.html


自行果round分又點計？
家長升k3就會拎到小一派位表, 9月交果輪叫自行分配學位(2013年係9月23-27交去心儀小學), 只交一間, 不限校網, 鬥高分, 計分方法如下:
http://www.chsc.hk/psp2013/chi/primary-one-admission-system.php

我咁低分, 咁即係點呀?? 咪輸梗? 我仔無書讀?
都唔緊要, 自行either得, or唔得, 得就恭喜, 唔駛玩大抽獎了
如果自行唔中, 仲有下一輪, 會在1月18/19又交表, 今次叫統一派位, 即所謂大抽獎, 咩分都唔再計, 由頭黎過, 今次玩random number

大抽獎係點抽法？
每個學生有一個random number (家長永遠唔會知), 在估估下情況下, 家長就按意願選校, 留意甲部唔限校網, 佔統一派位10%, 即小一100個位, 50個自行派左(除非唔夠人報), 50個for統一, 50個入面只有5個for甲部供全港去爭, 而45個就係乙部for自己網, 所以咁多人借地址就係咁解
o係呢一輪, 無論結果係喜係悲, 記住政府總會派一間俾小朋友(按意願, 如果揀左既咁多選擇都派唔到, 會執個籮底橙)

可以去邊度check自己屬邊個校網？
在查看校網前, 懇請家長明白, 校網係跟屋企地址, 唔係跟幼稚園, 更唔係跟親戚地址, 擁有一個單位但非自住, 並唔算住址, 請各位先了解咩叫"住址"
如果各位了解完仍有疑問, 可致電教育局學位分配組（小一入學）查詢電話：2832 7700 / 2832 7740
如果有關借地址問題, 為免不愉快事件重演, 請勿在此提出, 多謝合作

"現行的小一入學統籌辦法基本上以「就近入學」為原則，根據廣義的地理區域及官立與資助小學的分布情況，全港共劃分為三十多個小一學校網。家長在申請參加小一入學統籌辦法時，須根據申請兒童唯一或主要居住的地址，填寫小一學校網。有關各小一學校網的範圍，請瀏覽教育局學位分配組網頁"
http://www.edb.gov.hk/tc/edu-system/primary-secondary/spa-systems/primary-1-admission/school-lists/index.html

聽到有家長講, 1+1+1又係乜野？？
1+1+1, 即自行揀果間學校, 統一甲部乙部都係揀佢咁解
至於叩門資料(邊間一定要111), 今年有家長報料, 可以參考下:
http://www.edu-kingdom.com/forum.php?mod=viewthread&tid=2575944

嘩, 個派位制度原來係咁, 又無面試, 我又無分又覺得抽獎好危險, 我寧願俾錢, 想揀間好學校, 可唔可以一邊考私校直資, 一邊參加政府派位?
考/派小學時間表大概係咁:
k2下學期-小學簡介會開始, 跟手就報名
k2暑假前後-簡介會/面試高峰期, 部分會好早出結果 (選擇註唔註冊下面講)
k3開學9月尾-申請政府自行派位
k3既9/10月-直資私校interview繼續如火如荼及出結果 (選擇註唔註冊下面講)
k3既11月尾-自行公佈結果, 大部分直資私校結果亦公佈左(仲有繼續面試的不過唔多)
k3既1月中-自行未有offer的, 申請政府統一派位
k3既6月頭-公佈統一結果派位, 官津校叩門階段開始

記住一個rule, 直資考到而決定註冊就要簽undertaking 放棄政府派位, 已經派到手的都要放返出黎
咁私校呢, 有d係唔介意, 家長可以繼續hold住私校位大抽獎, 有d就唔可以, 講明會取消學位/擺入waitlist, 名單可睇下面, 記住今年情況唔等於以後都係
http://www.edu-kingdom.com/forum.php?mod=viewthread&tid=2804009&extra=page%3D1
所以考到就要決定註唔註冊, 中間係有d取捨, 家長要唸清楚


又另一個rule, 去到6月公佈收生結果後, 官津校可以自由收生(即叩門階段), 在呢段時間, 任何人都可叩, 無論係已有直資私校收左, 有玩派位無玩派位, 派左咩學校, 住邊一區, 都無限制, 家長可以好好準備了

Charlotte_mom

點知一間學校好唔好

教育局有小學概覽, 係認識學校既第一步:
http://chsc.hk/main.php?lang_id=2
(右手邊中學概覽, 小學概覽, 幼稚園概覽齊晒)

咁睇完, 又點知岩唔岩自己?
As a general rule, 一間學校點解多人揀, 一定有得解, 父母鐘意一間學校多數都係學術水平高, 老師質數好, 校園設施好, 等等, 亦有可能係活動教學, 小朋友培養到創意, 或者宗教因素, 又或者音樂好, 體育好 (最好就樣樣好又免費又近屋企, 不過邊有咁理想, 難得咁好彩果d, 咪派彩開心到又笑又喊果d lor)

家長經常問究竟有無排行榜, 睇完以上果段, 相信大家明白每位家長選校都有自己把”尺”, 又點會有一個客觀標準去排呢? 所以好多人話好的, 未必岩自己, 好多人話唔好, 可能就係心中最想要既, 揀學校無絕對對或錯, 學校亦無完美的, 只有適合與唔適合; 最適合既意思, 係最配合自己小朋友需要, 小朋友咩性格? 父母期望子女過咩校園生活? 讀完書後成為一個點樣既人? 在了解完各校"硬件"之時, 軟件亦唔能忽略的

舉個例, 我夠知女拔好, 不過我女係一個對自己無要求既人, 開開心心又一日, 俾佢符碌入到去, 都唔岩咀型, 都遲早喊住走, 何必呢, 所以我無考, 唔係佢唔好, 亦唔係我個女唔夠好, 只係唔適合姐, 以前D學校話考之前"先了解學校辦學理念", 我心唸傻架咩, 考邊間就認同邊間架啦, 多年後回顧返, 原來真係有分別的

講返客觀標準, 最有認受性, 不如睇睇中學派位吧, 多得有熱心會員報料, 至可以集合成一個報料區
2013:
http://www.edu-kingdom.com/forum.php?mod=viewthread&tid=2623345&extra=page%3D1
2014:
http://www.edu-kingdom.com/forum.php?mod=viewthread&tid=2845555&extra=page%3D1


有家長會問, 係咪「一條龍」、直屬及聯繫學校會影響升中, 或者iantsang呢個post可以幫到大家
http://www.edu-kingdom.com/forum.php?mod=viewthread&tid=2340047&extra=page%3D3

睇完小學概覽, 好似無睇過? 唔夠了解? 除左最直接把握機會去心儀小學open day/info session外, 總有辦法

我教你, 去每間學校網頁, 睇校務報告/週年報告, 做過至會寫出黎, 無得呃, 唔會好似d門面介紹, 講咩都得! 講自己著重品德關愛校園有咩用? 間間都係咁講架啦, 睇下report, 睇下實際做左d咩, 自然心中有數,又或者換個方法, 睇下學校sell自己d咩, 一年發生咁多事, 揀咩寫落report度, 已經知學校”賣”緊咩。學校係靠人去運作, 唔同既人就有唔同運作方式, 即所謂culture/教學理念, a校培養小淑女, b校培養兩文三語國際公民, c校合唱團音樂比賽年年贏, d校學生行出黎個個話醒目, 有絕對輸贏嗎? 去刨下學校網頁, 睇下佢擺D咩落去, 會不停講自己學生得獎得獎得獎? 會大大條BANNER講自己"全港系統性評估中英數水平較全港高"? D學生活動相係活潑佻皮, 定文靜乖巧? 定SELL學校行ISO? (唔好笑呀, 我知有幼稚園SELL呢樣架), 家長教師會參與度高某程度反映到家庭投入度, 睇多D, 比較下, 咁咩學校提供咩"服務"自然心中有數

校務報告都好多野睇，睇下多吾多人轉校，老師turnover，中英數點教，校外比賽成績，其他其他。選校不要太懶，識上親子王國聽人意見，吾爭在行多步，自己了解下。怕咩打手吾打手？靠自己感覺總無錯, 至於有特殊學習需要(“sen”)小朋友, 亦可以睇睇校務報告有無寫, 前排搵左幾間東區小學俾一位家長參考, 你可以睇睇人地做左d咩, 有個期望, 就知點去expect一間學校幫sen小朋友:

培僑, http://www.pkps.edu.hk/newhtml/login/gs/pdf/1112yp.pdf
p30開始

嘉諾撒
http://www.canossahk.edu.hk/
學校資料->計劃及報告書->睇s5.2

港同
http://www.hkugaps.edu.hk/img/p/aboutus/file/plan_Annual_Report_2012-13.pdf
P17-18

佛教黃焯菴
http://www.bwcups.edu.hk/website/singlepage/index?channel_id=4303
http://www.bwcups.edu.hk/website/article/index?channel_id=4296


另一方面, 雖然未必間間學校都有open day, 但家長一樣可以o係學校返學前/放學後, 自己去心儀學校了解下, 學生係點, 家長係點, 學生返到學校開唔開心, 會唔會一早老師已經開咪鬧人, 高年班學生自己放學, 行為檢唔檢點
更加可以小息時間去學校出面打聽下, D細路玩咩, 見到老師開心嗎? 定老師惡惡死死咁呢樣唔得果樣唔得? 定D老師唔見晒? 定係仲慘, 學生仲惡過d老師?

每人睇既野唔同, 有個學生par o係地下睇蟲蟲, a家長睇黎班細路好烏糟無教養, b家長可能睇到覺得d學生好有研究精神, a家長覺得校風要嚴謹, b家長覺得唔俾跑好專制….呢d無標準, 真係要靠自己去感受, 人地講既”好”, 等唔等於自己想既”好”? 好多時錯配就係咁發生, 所以有開放日簡介會, 抽到時間的話點都要去, 唔一定係聽d漂亮既presentation, 更重要係睇下師生間互動, 學校揀咩學生出黎見人, 企o係後排d老師有無唔耐煩的樣子, 遇著有小朋友嘈/唔合作, 老師點處理? 播出黎條片, 除左前面幾個, 後面果d做緊咩(我認我衰, 我真係會留意後面果d係咪口up up或兩頭望)

夠膽的話, 返學放學時, 可以問下家長意見, 一般問兩句人地都樂意答的

最後, 當然係安坐家中, 睇教育王國討論區啦:
http://www.edu-kingdom.com/plugin.php?id=school_search:star&type=school

了解多D, 自己選校都放心啦

之後仲有POST的: 可以花時間了解下:

POST#35: 自行及統一填表政策略

POST#40: 2013年6月各區統一派位資料(續)

POST#66: 直資/私立/津貼/官校, 究竟有咩分別?

POST#83: 又一個熱門問題: 咁究竟讀邊間幼稚園, 同升邊間小學有無關係?

POST#152: 直資/私校有呈分/無呈分, 對升中有咩影響?

寫給SEN家長 (Special education needs) 搬左新屋:
http://www.edu-kingdom.com/forum.php?mod=viewthread&tid=2688898&extra=page%3D4
補充資料: http://www.edu-kingdom.com/forum.php?mod=viewthread&tid=2559226&extra

小小山

A precise summary !  Thanks !

ndmama

感謝您的付出，資料非常實用！

artaemama

講解得非常好..仲好有心整理資料

smselmawong

, Very precise summary and very useful. Thanks!

mandyk105

好有heart...

huba

這帖子惠及所有新手媽媽，請將此帖子置頂（如還未的話）。

cherrybeepbeep

立按收藏

sukitelfold

好心、好人、好事、好版主!

audrey420

happy_lavender

Thanks!!

Josephineso1116

Thank you very much!

bckwong

Charlotte_mom

多謝各位唔嫌我長氣, 其實係因為我自己親細妹話: 我有去小一選校, 不過我睇唔明, 我都唔知點開始, 有感而發summarize一下, 希望各位新手家長有用

小一選校既野, 越睇就越多疑問, 我都明, 有d野我到而家都蒙查查, 大家一齊學習吧!

Pekkle_bon

Thanks you so much !

nicksonma

THANK YOU!

嫣爸爸

我已收藏好了.極有用.謝謝!

ac917

沙律媽，一向都對我地咁好，真抵錫，多謝你

Rickyccp

Thanks!!