等候評估, 而家同學校講定證實左先講?(終於講左了)

fishcowcow

我囝個CASE之前都巳經POST過, 9月尾排政府起碼等半年, 同時間排埋協康, 巳約1/11見醫生, 雖然貴但都諗住會去, 因為政府真係等太耐了, 我囝而家返緊N1的, 咁而家同唔同學校講?? 如果同學校講就順便可以問下老師阿囝在校情況, 評估個陣我可以同醫生講埋學校情況...但...講左唔知學校點諗, 定係評估完真係有事先講?

methy

其實阿仔情況係咩，係ｆｏｒｕｍ　太多ｐｏｓｔ，好難一下醒起大家既問題．你講返多小小，先易ｄ比意見你。

papajelly

見e生先啦! 就算唔同學校講住都可以同老師了解下小朋友在學的情況架, 費事如果e生話冇事, 你又一早已同學校講, 佢地已經對小朋友form咗個impression, 冇事都當有事. 而且宜家仲有半個月就11月了, 等下先啦.

fishcowcow

以下係我之前POST既阿囝情況

阿囝就黎26個月, 歲半時返健康院見醫生話唔似自閉, 叫我再觀察, 到岩岩星期五再返去見醫生, 咁岩因為一啲野, 我囝一入房就大發脾氣, 完全唔理醫生, 後來settle down後傾左一陣就話寫紙俾我排CAC, 其實我覺得我囝都好大機會係, 不過佢識講野(識講短句子例如我要飲水, 唔該媽咪抱...), 同埋佢同大人會有眼神同言語溝通, 佢最大問題係唔show同齡既小朋友, 同埋有自轉既問題(仲要係對眼側埋一邊), 脾氣就一時時, 可能我係ftm, 我知道咩情況佢會發脾氣, 我就盡量唔俾機會呢啲情況發生, 所以平日我單對單同佢一齊佢情緒尚算ok的...

fishcowcow

阿囝返左N班個幾月, 9月中左右開始返學無喊, 佢係返全日班, 老師話佢訓覺食飯都無問題, 亦無投拆, 我有時問老師阿囝坐唔坐得定, 老師都話OK喇, 只係老師有提及過話佢唔係好鍾意玩玩具, 問我平時阿囝向屋企鍾意咩玩具, 我話佢向屋企唔係太鍾意玩具, 最多玩下波, 碌下保齡球, 睇下圖書

kelvin_hmlau

既然學校無詐型，都無必要咁坦白。
調轉諗，講左有乜野好處?

fishcowcow

我諗講唔講係因為如果講既話, 我就可以詳細啲問下老師阿囝上堂情況, 同同學仔相處情況, 到時做評估可以同醫生講埋, 雖然我而家放學都有問老師, 但係唔會問得太詳細, 只係大概問下O唔OK, 有無發脾氣等等...不過又擔心同學校講左就會有少少標籤左阿囝, 所以心大心細, 不過我自己都傾向唔講住, 因為1/11就做評估, 既然學校無投拆, 到時證實左先算, 如果證實唔係, 又要解釋一大輪

methy

回復 fishcowcow 的帖子

學校本身係唔係有兼收位．包唔包容？．的確如果你既出發點係想了解多ｄ．直接同老師講你懷疑阿仔有某某情況，請佢地多ｄ觀察，詳細ｄ講解比你知課堂情況．係會幫助醫生準確ｄ診斷。

其實如果學校知．你覺得佢會點被標籤左？　如果學校係包容，有相關訓練既老師知道情況，可能仲可能會留意多ｄ．你問多ｄ．老師知你緊張，更加幫手，呢個係我個人經驗。

我都聽過學校唔係兼收位，又出名ｄ．佢地又真係可能知道左會用方法令你退學．不過如果小朋友係乖既，我又睇唔到佢地會咁做。

Ryanma925

請問你排左幾耐？我仔也在排

如果學校有兼收位，我主張講, 因此學校是融合學校, 不會標籤的

fishcowcow

methy,
我囝學校係有兼收位的, 老師有無愛心呢方面, 我暫時又唔係好睇到, 因為都係放學時講2,3句, 無嘜特別

fishcowcow

Ryanma925,
你問我協康排左幾耐? 定政府CAC?
政府我9月尾先排, 先左姑娘話起碼要等半年
協康都係9月尾SEND FORM過去, 姑娘俾左期我約1/11見心理醫生

Ryanma925

協康快好多喎!

Olympian

我覺得同學校講去做評估完全無問題。因為你小朋友完全適應到學校生活，學校有無投訴。個report 出左而又“中”你先諗話唔話佢知。

fishcowcow

今日係阿囝N1家長講座, 講座後終於同校長及班老師講左我囝問題及巳排評估, 原來老師都有留意到我囝某啲行為, 不過佢向學校適應OK, 同埋唔影响其他人, 所以老師同我講佢地都係觀察中, 老師最主要留意到我囝唔鍾意玩玩具, 玩具時間佢會周圍遊周圍睇, 同埋鍾意玩門...其他問題不大, 聽指令, 對老師會打招呼, 大致跟到課堂流程如做圖工, 唱歌等等, 語言認知都不算差, 所以叫我唔駛咁擔心, 叫我做完評估同佢地講番個情況, 而老師亦會向呢段時間盡量鼓勵佢同其他小朋友玩多啲

methy

好開心聽到你終於同間學校講左，相信你都輕鬆哂，間學校都好包容到你小朋友，亦肯配合幫手觀察。以後可以無壓力咁詳細問小朋友係學校既情況。

fishcowcow

methy,
係呀, 講左出黎真係輕鬆啲, 1/11就去做評估了, 始終有啲緊張, 不過我都會加油的~

crystal媽咪

有兼收位的學校, 講左會比較好, 因為學校比較包容一D. 而且知你自己都發現小朋友的問題, 會更加幫助你, 因為有時老師懷疑緊都唔會同家長講, 因為有D家長唔知或者唔接受小朋友的問題, 老師都唔講住.
講左就好啦, 大家努力面對.

fishcowcow

crystal媽咪,
係呀, 我同老師傾時, 佢地雖然有少少懷疑, 但因為我個囝情況唔算差, 適應無問題, 所以老師都話如果唔係我同佢地傾, 佢地都唔會同我講住, 因為仲觀察緊, 驚嚇親家長, 之前試過有家長真係完全接受唔到, 唔肯同小朋友去做評估...不過我話我接受到, 因為逃避係幫唔到小朋友, 既然上天俾左呢個囝俾我, 我就要去接受, 盡力去幫佢

methy

回復 fishcowcow 的帖子

包容既學校其實好開心聽到家長自己主動提出小朋友既特別需要，我識人教幼稚園．其實佢地日日見咁多小朋友．好易睇到邊個有特別需要．不過試過出聲，換來家長不滿，仲試過收律師書，攪到好煩，以後免得過都唔會主動出聲。