用戶登入
用戶名稱:
密      碼:
搜索
教育王國 討論區 自閉寶寶 不經不覺, 條路行左三年
查看: 3434|回覆: 20
go

不經不覺, 條路行左三年

Rank: 4


669
發表於 12-6-3 07:59 |顯示全部帖子
由一歲七評估到依家, 已經三年。近來在屯醫被安排了個別訓練, 首三堂有評估, 之後有八堂訓練, 最後又有三堂評估。一向都不太擔心仔仔的認知, 因為佢係abc和數字迷, 已計緊加減數, 背緊乘數表。但語言表達和理解是比較擔心, 因為細細個佢好似聽唔到我地講野咁, 直到做左聽樂治療先有些少改善。溝通力好弱, 好少表達自己, 想像力亦好弱。

結果做完出黎個結果, 係語言表達和理解, 由原來未夠三歲(一月份結果), 到超過左佢真實年齡(五月份結果)我都好驚訝。當然, 姑娘有講係因為一開始同佢唔熟, 好多題目做唔到。但, 亦有部份係因為佢進步左而有咁既成績。雖然我一方面好明白佢既問題仍在, 但呢個進步都令我好開心。

前一年仔係讀特殊學校, 讀左一年, 發覺對佢最弱項係無幫助而反而有損: 同人溝通的興趣和主動性, 對群體的觀察和自己應點回應, 語言理解和溝通。所以轉左e位, 明知佢能力未得, 但決定等佢讀下午班, 再加e位和私人訓練, 重點係 rdi, 再加幼兒導師, 感統運動等等。其中, rdi 係最重點。

至於呢段一月到五月既時間, 就開始教輪候。仔一向都無輪候概念, 不懂玩table game, 別人在玩, 他就坐埋一邊。表面上是冷漠, 其實原來佢係唔識玩, 又無信心, 所以逃避。依家, 雖然唔係一定同人玩, 但有佢識玩既玩具, 佢都會行埋佢睇下, 想參與下, 對我來說已經有好大進步。

點教輪候呢

我發現, 用一般導師的教法係唔work, 好在我遇到的都是肯俾我地父母參與的導師(e位的pst和醫院的姑娘), 於是我就用rdi教既方法, 包括commenting, spotlight, 等佢反應, 加入一些error令佢覺得好玩之類。而導師就預備材料, 佢地又值得一讚, 因為佢地會投其所好, 用abc, 音樂鐘呢d我仔最鍾意既活動, 而又合適佢做到既能力。所以只在教左4,5次左右,佢就學識左輪候, 而當下既集中力仲好強, 亦會主動望住我地等我地, 或我地特登輪錯時, 改正返我地。

當仔仔明左輪候之後, 佢語言都有進步。以前佢唔識問問題, 只係機械式咁自己問哂答哂, 又或, 教佢問時, 佢就答左個題目。依家佢開始有少少概念, 知道咩叫問問題, 同埋要等對方回應咁。當然仲係好初步, 但由零到一, 係一個突破點。

另外, 佢又主動找我地玩。當然, 都係玩佢玩開那些, 但比起以前佢自己一個完全可以唔理人, 依家主動左, 好玩左, 搞笑個, 個人都開心左好多。

自己都有點反省。rdi 有提及, 自閉症徵狀其實亦係一種逃避, 當孩子有能力有興趣去回應, 某些徵狀就會消失。但自己只在認知上知道, 原來個心一直唔相信。咁樣無形中自己限制左孩子既發展, 成日不自覺負面地想:佢自閉咪唔鍾意同人玩, 對仔和自己沒幫助。依家我都要提自己, 唔係佢唔鍾意同人玩, 係佢唔識同人玩, 而要教佢識係比教一般小朋友仔細好多, 辛苦好多, 但, 有信心佢係會學識既, 而呢段時間亦證明, 佢係得既!

希望可以繼續進步啦! 共勉之!


2049
發表於 12-6-3 08:28 |顯示全部帖子
提示: 作者被禁止或刪除 內容自動屏蔽

Rank: 5Rank: 5


4461
發表於 12-6-3 12:39 |顯示全部帖子
三年又三年...三年又三年.......

我都過左一個三年, 已進入第二個三年, 相比第一個係輕鬆些, 舒服些,相信進入小學後, 又係另一個挑戰, 唔知幾多個 ( ? X3) = 美好結果

Rank: 4


564
發表於 12-6-3 14:46 |顯示全部帖子

anan3388 的帖子

Rdi係咪黎架?



Rank: 4


708
發表於 12-6-3 23:27 |顯示全部帖子
anan3388,請問你是從書上還是上堂學rdi的知識?可否告之詳情?萬分感謝!

Rank: 3Rank: 3


149
發表於 12-6-4 00:29 |顯示全部帖子

引用:由一歲七評估到依家,+已經三年。近來在屯醫

原帖由 anan3388 於 12-06-03 發表
由一歲七評估到依家, 已經三年。近來在屯醫被安排了個別訓練, 首三堂有評估, 之後有八堂訓練, 最後又有三堂 ...
你好,可否多分享怎樣敎輪候的方法,因我囝囝永遠要第一及勝利,否則就唔開心喊,我不知怎樣教他,及請問怎樣敎他加減數?期待你的分享。



Rank: 4


518
發表於 12-6-4 00:57 |顯示全部帖子
點樣可以喺四個月內令言語進步神速?追到成一年多的差距?
有d唔明係, 小朋友才剛開始學識發問,但姑娘話佢言語超越同齡,咁會唔會係因醫院想cut你service 呀?但如果阿仔真係已達標,就認真恭喜哂!同埋分享下d招數!

Rank: 5Rank: 5


2379
發表於 12-6-4 08:00 |顯示全部帖子
反而我好興趣知道評估內容,咁嘅年紀要講到同做到咩先叫達標?
可否分享吓測試左d 咩野?
謝謝你

Rank: 5Rank: 5


2379
發表於 12-6-4 08:02 |顯示全部帖子
又可否分享吓點在日常生活同遊戲上用rdi 方法? 有無有關好書介紹

Rank: 4


669
發表於 12-6-4 08:10 |顯示全部帖子
rdi 的舊post
原來rdi真係咁少人識
想識多些做緊 RDI 既家長

Rank: 4


669
發表於 12-6-4 08:31 |顯示全部帖子
本帖最後由 anan3388 於 12-6-4 08:45 編輯

其實唔係一個好正式既評估, 只係姑娘用左協康會既pep-3評估功具同佢做, 同埋一開始佢原來超唔睬人, 但最後同姑娘好熟好玩咩都應, 所以個result差咁遠

當然佢仲係有好多自閉特徵既問題。好多時實踐上既溝通問題, 同評估既要求相比, 係評估簡單好多既, 所以我只係當係自己睇黎開心下, 唔會好認真以為佢語言溝通真係超過同齡

我無入去評估, 所以唔知佢問左乜既。但個評估工具係協康會既pep-3. 個評估係非正式同埋係訓練一部份, 同有無service係無關的

仔仔係幾typical a仔, 背野叻, 講野可以好長, 成句成段咁講, 但係背出黎咁, 運用就比較弱, 創造力亦好弱。所以在熟悉既人同環境, 表面睇佢好似無乜野, 咁佢都仲算細個麻; 但若改左個環境, 佢就轉唔到彎勒。

所以其實佢仲有大大段路要行, 不過有少少成績就開心下者

其實rdi用在生活中係非常好, 因為rdi係一套心法/教法, 學識左, 就做咩都可以用呢套方法黎教仔仔。書就舊post 有講, 另, 有本叫: 讓孩子開口說話, 雖然無講係rdi方法, 但係個宗旨好一致, 值得參考

輪候時, 老師用既方法係, 好機械式咁 "到你", "跟住到方個呀?", "到媽媽", "跟住呢", "到姑娘", 係完全order哂我個仔點做。同埋個氣氛係"做野", 唔係玩

我就首先解釋左咩叫輪候, 然後demo一次, 當中, 一定要我個仔connect到先講野, connect即係佢有望有留心, 之前rdi 中train左好耐呢方面, 但, 實行時都要成日記得佢望住先同佢講野, 佢遊左魂就可以大聲咳下, 拍下佢肩, 等佢"返黎"先繼續。係要等, 唔好一輪咀自有自講(姑娘就慣左會咁, 或好唔耐煩咁叫佢, 話佢)

跟住做一次, 若佢唔明, 可以觸手提示, 做到勁讚(其實呢部份幾aba :) 基本上,我學到既技巧係mix黎用, rdi主軸, 其他係副)

輪左三幾次, 佢明勒, 就加入一些特登做錯的, 等佢改正返我地, 當然個氣氛都係好好玩, 好開心咁, 佢改正到我地時, 好開心, 好有滿足感

大致就係咁。都幾難就咁講, 所以, 若你地既小朋友似我仔咁, 我都推薦大家上堂去學rdi, 對我仔係好work, 佢係文靜型, 但係被動, 遊魂, 認知ok, 溝通好弱。

Rank: 5Rank: 5


1263
發表於 12-6-4 11:44 |顯示全部帖子
我都走左3年, 已經十分疲倦. 上到小學真係有d 驚. 希望走多3年, 孩子可以係個自閉框架度走出來.

Rank: 5Rank: 5


1193
發表於 12-6-4 13:38 |顯示全部帖子
ANAN3388
"前一年仔係讀特殊學校, 讀左一年, 發覺對佢最弱項係無幫助而反而有損: 同人溝通的興趣和主動性, 對群體的觀察和自己應點回應, 語言理解和溝通。"

請問你兒在入讀S位主要是TRAIN 什麼?入讀前是否都甚少表達需要?
另外是否入讀S位K1一年再出主流讀K2呢?SORRY 這麼多問題…

Rank: 5Rank: 5


2347
發表於 12-6-4 18:05 |顯示全部帖子
本帖最後由 Capricorn2521 於 12-6-4 18:14 編輯

我都係行咗3年..... 沿途有你地同我一齊行,令我充滿力量。

ANAN3388/其他家長,
我都想問吓....因為我上星期同仔仔約見了I 位老師,老師說S位1對6,主流1對15,說孩子讀K2比讀K3適合,我當然認為冇問題也答應了。不過我都想問吓,其實你們從S位出來的孩子,有沒有遇到什麼適應的困難呢?

Rank: 5Rank: 5


4461
發表於 12-6-4 22:48 |顯示全部帖子
最大困難?? 對我亞仔就是, 專注,粗心大意,,頭兩個月老師話佢跟大班跟得一般, 約兩個月後漸漸跟得上, 但專注方面, 仍然係差, 多口,唔留心,上堂傾計.......不見文具,不見功課,......等等.

不過, 我這間學校是沒有I位的幼稚園, 所以大部分老師對我兒這些小朋友是沒有經驗, 我也沒有同學校講是S位轉出來, 所以, 用左兩個月時間已可跟上, 我已好開心

點評

Capricorn2521  thanks !  發表於 12-6-5 09:48

Rank: 5Rank: 5


2379
發表於 12-6-5 06:57 |顯示全部帖子
請問各位點同校方講以前讀邊間kg ,如校方發現有異,會點做?

Rank: 4


669
發表於 12-6-5 08:18 |顯示全部帖子
回復 BKVIP 的帖子

我仔情況係特別(其實個個a仔都唔同, 所以大家聽時要分析返係咪同你地仔一樣先好聽啦), 佢係差異好大好大, 認知去到s位最叻那班, 但溝通動機係最差都不如, 同埋佢早排隊早入到s位, 年紀又細。最終入左最叻a仔班, 但係因為細個, 就樣樣都慢人十拍, 佢本身大小肌已經好弱。所以在班中一直建立唔到信心。老師個 style 又係教那些超主動, 曳得黎其實醒的那些(惡到仔驚那種)。所以結果係錯配哂, 老師教佢好多認知野, 三歲人仔學數數量數到20, 我多次同佢地提都無用, 因為我仔好乖, 佢地唔覺咁有咩問題。

咁當然唔係樣樣都唔好, 起碼自理上, 解難上係有進步。但係溝通和主動性上係無進步, 仲倒退, 仲怕左人。

最後我仔係唔再願返學, 所以就算佢仍然係未出得s位, 我都要走, 因為再落去我見唔到有咩幫助。

Rank: 4


669
發表於 12-6-5 08:24 |顯示全部帖子
仔既學校係好重寫字學習那些傳統學校, 所以佢既強項發揮到, 同埋佢都算乖, 所以就算佢唔理人, 有時行開唔坐定, 無用人交流, 學校都接受佢。但係我就無期望過佢真係融入到, 因為佢溝通力實在係差好遠, 所以我只係當佢返下去, 見下人, 有少少群體生活, 佢只返半日。我既計劃係希望佢先在其他訓練有左溝通基礎先, 到再下年時若ok就最後一年幼稚園轉間 i 位, 等佢真係有人協助同同學仔互動。

點評

Capricorn2521  thanks !  發表於 12-6-5 09:48

Rank: 5Rank: 5


1193
發表於 12-6-5 08:32 |顯示全部帖子

回覆:不經不覺, 條路行左三年

Anan多謝你詳細的解說。其實小兒將入讀s位,到此該我心還是1516, 我怕做錯決定。因為讀一年s位後應入k2,而我想找的幼稚園並非I位,我該如何開口講他是由s位出來?



Rank: 2


62
發表於 12-6-6 23:29 |顯示全部帖子
大家都要加油....