終於考完了呈分試!

MMChan

請問幾時會知道呈上教肓局的名次同埋幾時派選校表?
會係21號升中講座前知道嗎?
今次數學科考試係咪較難, 好似有很多人唔合格?成績好啲同學都是~170/200

Lovely媽咪

冇記錯班主任派填選校資料時應該有張表左上角已經會寫低經調整後既級名次.
另有小小填表心得提吓你地丫,我上年我填表時係先將一定唔會想入既先打個X,跟住最想入到頭2間mark 低,我係保守,第2間已選男校,跟住3-4都係填葵青,因希望博一博荃灣冇人敢選,都叫有個機會,5/6/7就填番荃灣區,第8間我已選一間band3頭作為保險線,因我仔是band 2生,最衰都只會趺落呢一間,跟住就由第30間開始填番上去,詰樣會比較容易填滿30間
我知你地今年會更加難填,因學位比我地呢年更加唔夠,所以你地可能要比我填的更保守,因舊年叩門的成功機會已經好低,今件會更加難
但有一點大家要留意,經過上年減班後,好多學校都會收到比自己banding高的學生,換言之好多學校都會升咗,例如林百欣舊年都收到唔小band2生,所以今年可能會升做band 2尾都唔定,我最近聽講連胡漢輝都話自己係band2尾學校,希望幫到你地.

kiukiuleung

另外我想問吓p.5下學期測驗計唔計入呈分試?因老師同學生講計20％....

delicious

Lovely 媽咪,請問band 3頭是否指林百欣,
上年老師有冇提議把林百欣放第幾志願,
我女是band 2,學校提議第三志願揀李賢堯
／顏超文／梁植偉,請問你知不知校風如何？
請指教

Lovely媽咪

delicious 發表於 12-4-23 21:57
Lovely 媽咪,請問band 3頭是否指林百欣,
上年老師有冇提議把林百欣放第幾志願,
我女是band 2,學校提議第三 ...

頭1、2你選邊間?老師既建議同我一樣第3開始博葵青....李賢堯ok架,係校舍舊啲 梁植偉係青衣,好多活動,唔算好谷學生,另顏超文冇聽過,係咪顧超文?呢間既評語好極端,有人話好好,但亦有人話好差,你可以係lunch time時間去葵涌廣場睇吓,好多呢間學校既學生係到食飯,你可以睇吓佢地啲行為.但你諗清楚如果去青衣返學會唔會唔方便,如果係就唔好選梁植偉.
上年我地band2既保險線係林百欣同姚連生,所以好多都入咗呢2間.有人話林百欣個banding高過姚連生,但我選姚連生前過林百欣,因好多時見到林百欣啲學生都唔係有太好既印象,相反姚連生啲學生都比較乖.
另外上年都有幾個入咗胡漢輝(即李城壁對面),個個都基本上係冇選,可能係填表既問而最後被派到呢間,所以一開始都唔開心,但最近聽到佢地講因為個校長見上年中一收咗好多band2既學生,所以佢想將學校既banding提高,由中一開始執番嚴啲,不論紀律同成績都希望提高番,呢點大家可以作為參考,如果係band2尾入到去有好大機會入到精英班.
仲有比多一間大家參考,就係葵青既荔景天主教,佢地已經係用全英教學,同埋啲老師都幾好,如果覺得英文好過中文既呢間都諗得過,聽講佢地自行都收到4百幾份表.

delicious

未想好,好亂,廖寶珊放第二又話冇機會,
你說上年冇揀胡漢輝而派入,是否因為冇
填晒三十個志願？保險線應放第幾位,老師
提議姚連生第五位,我覺得林百欣是保險
線,問她應放第幾位,她說

Lovely媽咪

delicious 發表於 12-4-24 21:01
未想好,好亂,廖寶珊放第二又話冇機會,
你說上年冇揀胡漢輝而派入,是否因為冇
填晒三十個志願？保險線應放第 ...

冇咗最尾個句,唔知老師點講林百欣呢?
正路,李城壁同廖寶珊都係最多人選既,個個都一定放第一,你可以想放第二仲會唔會有機會,除非你係band1生.
聽入咗胡漢輝既朋友講佢地都係冇選呢間,有冇填哂30間就冇問,但正常老師一定要我地填哂30間架.
校風姚連生係好過林百欣.

delicious

Iovely 媽咪.please check PM

MMChan

今年Band 1生很少位,聽說上年1-60名係Band 1, 今年跌到1-50名。阿仔都係Band 2, 唔知點揀,好驚佢會入左Band 3學校!
第一選廖寶珊, 第二選聖芳濟唔知入唔入到呢?

Lovely媽咪

MMChan 發表於 12-4-26 10:12
今年Band 1生很少位,聽說上年1-60名係Band 1, 今年跌到1-50名。阿仔都係Band 2, 唔知點揀,好驚佢會入左Band ...

唔好意思,相信你已經交咗表你咁填係好正常,我都係教人咁填....我識得有個考全級5x,老師都同佢講係band 2,我聽到都有啲錯愕,因咁多年就算6x都有機會入band 1,今年趺到咁低所以我第一句問佢入唔到官中會唔會唔甘心,會既話就官中第一,因5x有機會係邊緣人,如果真係要博唔係話冇機會,但若真的想保守啲就選李城壁or廖寶珊第一,第二都係聖芳濟,跟住再選2間葵青band2既學校......

由依家到出結果大家已經冇咩可以做,盡量放鬆,唔好太緊張呀希望到時個個都收到好消息.
仲有唯一可以做既就係整理一下之前去報自行時交既profile,如有需要叩門都有哂準備,因有啲中學有限派表時間,上年有個媽咪就係遲咗去王少清,去到時已派哂申請表.

MMChan

回復 Lovely媽咪 的帖子

多謝Lovely 媽咪的分享!
我想問廖寶珊係咪有開英文班, 是否每科都用英文教?
聖芳濟係咪冇英文班?
唐乃勤係咪冇乜家長揀?

Lovely媽咪

MMChan 發表於 12-5-5 00:14
回復 Lovely媽咪 的帖子

多謝Lovely 媽咪的分享!

「我想問廖寶珊係咪有開英文班, 是否每科都用英文教」-----有英文班,但唔肯定係一班定二班,英文班係全英文教.所以上年有人入咗英文班,因佢英文底唔係太好,所以佢話讀得好辛苦.呢間暑假會好早就要補課,所以如果選咗呢間就盡量唔好安排活動,上年好似差唔多成個暑假都補課,係全日,仲辛苦過我返工

「聖芳濟係咪冇英文班?」----呢樣好奇怪,我都要搵人問清楚,因我去聽講座時冇講係全英文教,只係數學同另一個科(唔記得係咩)連高form啲學生都話唔係,但剛剛上年入咗去讀既學生話全部都係用英文教,所以好多科都唔係好跟得上.

「唐乃勤係咪冇乜家長揀」-------唔係呀,因佢高中係接莊啟程,呢間好出名,所以上2年開始多人選呢間.