教育王國

標題: 個仔中文好差又比較貪玩，抗拒功課，仲揀唔揀喇沙好呢？ [打印本頁]

作者: Khw2765 時間: 昨天 15:11 標題: 個仔中文好差又比較貪玩，抗拒功課，仲揀唔揀喇沙好呢？

本帖最後由 Khw2765 於 26-8-10 20:45 編輯

我本身係喇沙小學 (90年代嘅)舊生，不過我個仔冇領洗，所以今年九月報小學雖然第一輪津校會報喇沙，都知道機會係有，不過遠遠唔係必入。

但係真正嘅煩惱在於我個仔係讀英文為主嘅幼稚園，雖然PN至K2每年雙老師其中一位班老師都係講普通話 (另一位就係西人)，又每星期上一，兩次中文認字班，但係佢始終都係鍾意講同聽英文多，對學中文抗拒。

大概六至七成我用廣東話同佢講嘅嘢佢都明，但係而家升K3，要睇最初階嘅中文故事書都係未睇得明。上堂學咗啲字（就算之後再同佢溫）全部過兩日就忘記晒。而家上興趣班面試班, 老師講中文佢都好多次同我講話佢唔明 (或者佢冇用心去嘗試理解)

而喇小應該係一半科目用中文教。

同埋佢個人都算貪玩難教，通常難少少嘅嘢佢都好快放棄。佢英文好(基本上係佢 1st language)，(英)數學幾好。平時最鍾意係畫畫、好鍾意睇英文繪本故事書，聽英文故事, 唱歌跳舞，搞吓笑、周圍跑, 砌Lego咁樣。基本上現時要逼佢做佢唔鍾意嘅面試班功課係極端痛苦（對佢同我）。

雖然我係三十幾年前畢業，但係相信喇沙作為傳統名校，而家唔會比以前輕鬆咗，好大機會再多咗啲功課，催谷再多咗。所以我係好覺得我個仔應該唔係咁適合呢種多操練多功課，（我估）教育方式比較傳統, 可能比較嚴厲（同埋用中文多）嘅模式。我都唔想第時要每一晚好痛苦咁逼佢做好多功課。

所以我自己偏向想同佢試(已經報咗) 崇真，播道，真道，王錦輝，St Margaret呢啲主要用英文、活動教學、似係happy少少，功課少啲，升中壓力細啲嘅直資學校。（係，知道真道頭三年係中文教學多, 不過見到真道啲家長講, 佢哋啲外籍同學入學時唔係好識中文都OK。）

不過當然身邊好多人話「唔係有喇沙都唔讀呀嘛？」

唔使交學費亦係一個好大嘅吸引。

而我太太就認為喇沙嘅名氣大、校園硬件好，同埋覺得「或者個仔入到去會訓練到佢受壓能力高啲，同埋中文好啲呢？」

當然我絕對明白喇沙定係我哋報咗嗰十幾間直資全部都好難有Offer啦，不過呢個煩惱都幾困擾，所以想聽吓其他家長嘅意見，尤其是有仔讀過類似喇沙類型嘅傳統學校, 請問有咩睇法呢？

作者: tummypooh 時間: 昨天 15:50

有分數唔好浪費，試左先，收左唔得跳出黎不難

小朋友咁細，唔好咁快話佢呢樣唔得個樣唔得，而家鍾意做的嘢唔代表幾年後都會鍾意

除非你唔係香港讀書或讀啲唔睇中文的國際學校，否則中文科去邊都一樣

作為一個中國／香港人，其實要諗下點幫個小朋友搞好啲中文﹐而唔係逃避，你前幾年用幾多時間, 用咩方法去教英文，趁而家仲細，用返黎教中文。

唔知幾時開始啲家長好緊張要小朋友學英文，中文完全無視，呢個做法真係錯得離普（我屋企位小朋友迫於無耐都係咁，我用左三年時間先叫做執返佢好少少）

作者: pccw2017 時間: 昨天 16:03

Khw2765 發表於 26-8-10 15:11
我本身係喇沙小學 (90年代嘅)舊生，不過我個仔冇領洗，所以今年九月報小學雖然第一輪津校會報喇沙，都知道 ...

我覺得應該報英文小學比較適合佢

作者: mcl233 時間: 昨天 22:25 標題: 回覆樓主:

係咪諗多左？既然係舊生，又想自行試報，咪試下囉。反正，舊生只係20分，似乎坊間傳說，係冇乜機會自行入到～

作者: Khw2765 時間: 8 小時前

本帖最後由 Khw2765 於 26-8-11 12:28 編輯

回覆 mcl233 的帖子

或者大家睇到嘅資訊唔同啦. 以我所知, 20分應該都有三至五成機會入到. 都係睇吓同一年有幾多舊生嘅仔又有領洗.

歡迎光臨教育王國 (/)