教育王國

標題: KCIS vs KIS year1 [打印本頁]

作者: 多多宝 時間: 22-6-16 02:45 標題: KCIS vs KIS year1

小女宜家k2，讀本地傳統幼稚園，屋企只有親子閱讀時間會講英文。學校英文語境唔好，每日20min英文堂但無NET，無外補，聽讀寫都算OK，但係oral較弱且有accent。

考慮緊k3申請轉kcis or kis year1（因呢兩間唔使levy同debenture且學費affordable），想利用呢一年時間主要幫助小女：
1. 改善英文發音同daily conversation的fluency；
2.想佢多d機會show and tell，可以大膽同自信d講野；
3.多吸收一些native speaker的表達方式；
4.體驗小學全日返學模式；

因一年後應該都會轉回local school升讀小學，所以無需在意兩間的中學成績同curriculum。

想請教kis 同kcis邊間更易達成以上目標？尤其係1同3。我女中意同小朋友玩但比較驚老師，playground language對佢語言學習應幫助更多。多謝。

作者: Mrscatcatfung 時間: 22-6-16 09:42 標題: 回覆樓主：

本帖最後由 Mrscatcatfung 於 22-6-16 10:08 編輯

其實都要小學中學讀local school, 為何要入IS 一年，又轉走？不可以找私補嗎？

現在local 小學疫情下，都是半日的。

如果要達目標1和3，投入資源是5年，10年計。否則今年入IS, 明年轉local school. proficieny 便會由小孩離開IS 那刻開始退步。

作者: kinki2130 時間: 22-6-16 09:51

多多宝發表於 22-6-16 02:45
小女宜家k2，讀本地傳統幼稚園，屋企只有親子閱讀時間會講英文。學校英文語境唔好，每日20min英文堂但無NET ...

有啲奇怪，讀一年轉返去local school…不如直接請net上門補習？

作者: bonbon1106 時間: 22-6-16 10:14

可能你會覺得呢個係一個好聰明嘅選擇，但係仲大可能兩頭唔到岸。一年後去返本地學校，再兩年後發現英文唔夠好，又走返去讀國際嗎？仲有，小朋友建立朋輩關係也很重要，每年都要走，每年都要識新朋友，冇歸屬感。到時就唔只學業問題，可能仲有交際問題。

作者: 多多宝 時間: 22-6-16 10:47

Mrscatcatfung 發表於 22-6-16 09:42
其實都要小學中學讀local school, 為何要入IS 一年，又轉走？不可以找私補嗎？

現在local 小學疫情下，都 ...

主要係從佢平時返興趣班（中文教授）情況睇，佢唔中意或者唔知點樣同老師（大人）溝通，只會follow老師嘅指令，同小朋友一起玩好多嘢講。私補效果可能同單向溝通差唔多。

作者: 多多宝 時間: 22-6-16 11:01

bonbon1106 發表於 22-6-16 10:14
可能你會覺得呢個係一個好聰明嘅選擇，但係仲大可能兩頭唔到岸。一年後去返本地學校，再兩年後發現英文唔夠 ...

我知一年唔會好到native咁樣，宜家佢都算英文初學，唔想佢開頭就學錯
朋友，想搵語境好的學校。同埋即使轉校，假期都可以繼續同宜家幼稚園的同學一起gathering，我唔係好擔心朋輩社交呢方面嘅問題。請問kcis平時係學校老師除左中文堂會唔會唔比講中文？完全聽唔明中文嘅小朋友多唔多？

作者: wg_ann 時間: 22-6-16 11:18 標題: 回覆樓主:

樓主如果因為學英文及準備升小而讀IS，建議搵net外補好過，IS同傳統幼稚園或小學學習模式（功課，測考默）分別很大，適應了讀IS再轉回傳統小學對小朋友來說應該得辛苦。

作者: PSKLAI 時間: 22-6-16 11:20

我覺得KIS好啲,因為少功課
不過一年後轉返LS可能都要自己加操

作者: 多多宝 時間: 22-6-16 11:54

PSKLAI 發表於 22-6-16 11:20
我覺得KIS好啲,因為少功課
不過一年後轉返LS可能都要自己加操

請問你小朋友轉去kis未？宜家oral有無進步？

作者: 多多宝 時間: 22-6-16 12:01

wg_ann 發表於 22-6-16 11:18
樓主如果因為學英文及準備升小而讀IS，建議搵net外補好過，IS同傳統幼稚園或小學學習模式（功課，測考默） ...

明白教學方式有所唔同，IS重視的溝通同探索能力正是小女宜家的弱點所在，佢宜家向同輩學習or模仿同輩嘅效果好過跟老師學。

作者: 西瓜姐姐 時間: 22-6-16 12:24

本帖最後由西瓜姐姐於 22-6-16 12:27 編輯

回覆多多宝的帖子

我明白媽媽你嘅決定呀，我覺得你做得好好呀，同埋KCIS同KIS都係用繁體，將來轉返入津小或繼續國際都可以比自己多個選擇，英文真係要靠語境。你可以考慮下以下方面：
-我覺得兩間學校嘅英文水平可以睇齊
-KIS有ESL（英文補底班）但KCIS無，如果你小朋友英文仲爭少少嘅話， KIS會特別開班教佢，但如果你小朋友嘅英文其實都OK，咁有冇ESL對你來講可能冇分別
-KIS返8-3，KCIS返9-3:30
-KCIS功課會多少少，將來轉出津小會追得無咁辛苦。雖然本身IS都唔多得去邊
-KCIS再平D
-KIS學校playground language 係英文，如果講其他語言老師一定會提，KCIS我唔知
-KIS校舍係咁多個year嘅學生共同，會有其他program由高年班哥哥姐姐帶領弟弟妹妹。但KCIS分兩個校舍，以你小朋友年齡，佢只會見到3-6嘅小朋友。
暫時諗到咁多，希望幫到你！

作者: mandy_ng207 時間: 22-6-16 12:32

多多宝發表於 22-6-16 02:45
小女宜家k2，讀本地傳統幼稚園，屋企只有親子閱讀時間會講英文。學校英文語境唔好，每日20min英文堂但無NET ...

好奇一問，樓主小朋友係咪有間25分嘅津小一定入硬？好多學校K3主要係幫小朋友準備考小，無論考直資私校定係叩門，幼稚園都會幫到手，去咗IS咪冇晒支援？

作者: 964000 時間: 22-6-16 13:02

多多宝發表於 22-6-16 02:45
小女宜家k2，讀本地傳統幼稚園，屋企只有親子閱讀時間會講英文。學校英文語境唔好，每日20min英文堂但無NET ...

如果打算之後LS, 當然揀KCIS起碼keep下中文，預備LS升小一。

作者: super_cat 時間: 22-6-16 13:13

多多宝發表於 22-6-16 02:45
小女宜家k2，讀本地傳統幼稚園，屋企只有親子閱讀時間會講英文。學校英文語境唔好，每日20min英文堂但無NET ...

如果你係target 直私小學嘅話，K3 開學已經要準備interview，英文未見進步已經要面試，可以話係用唔著

如果只係想入津小，咁就更加無聊，上到津小就無咁多機會要用到英文，好快就會打回原形講返港式英文

作者: Jane1983 時間: 22-6-16 13:25

除了折騰和花錢外，讀一年IS，真係幫唔到英文幾多。一讀小學，兩下就打回原形。

作者: PSKLAI 時間: 22-6-16 13:52

Jane1983 發表於 22-6-16 13:25
除了折騰和花錢外，讀一年IS，真係幫唔到英文幾多。一讀小學，兩下就打回原形。

同意, 識一個小朋友幼稚園英文oral可以, 一上了LS小學即係好似廢晒武功咁, 不過英文答題水平就好咗好多

作者: 多多宝 時間: 22-6-16 13:55

西瓜姐姐發表於 22-6-16 12:24
回覆多多宝的帖子

我明白媽媽你嘅決定呀，我覺得你做得好好呀，同埋KCIS同KIS都係用繁體，將來轉返入津 ...

十分感謝您的意見，很全面。之前確實沒考慮到校舍同返學時間的差別。請問你的小朋友是讀kis嗎？疫情期間的ECL活動如體育等是否都有實體堂可以參加？謝謝

作者: 多多宝 時間: 22-6-16 14:11

mandy_ng207 發表於 22-6-16 12:32
好奇一問，樓主小朋友係咪有間25分嘅津小一定入硬？好多學校K3主要係幫小朋友準備考小，無論考直資私校定 ...

15分呀都要考直資或者預備叩門。宜家幼稚園中文教嘅幾好且深，但就唔會有面試班果d支援比小朋友，考出面小一主要靠家長。其實呢個年紀小朋友主要都係學習一d群體相處，禮貌品德，生活常識，日常溝通，讀IS year 1應該都可以繼續學到呢d野，一日返6h的學習效果應該唔會差過local幼稚園3h（甚至隨時轉每日半個鐘zoom）吧？學術方面，數學方面幼稚園進度都唔夠直私面試用，中文識字主要靠平時閱讀習慣日積月累。其實有邊方面係本地幼稚園可以學到但係is學唔到的呢？

作者: 多多宝 時間: 22-6-16 14:28

964000 發表於 22-6-16 13:02
如果打算之後LS, 當然揀KCIS起碼keep下中文，預備LS升小一。

請問知唔知kcis會唔會同本地部共用playground？小息會唔會一起玩？

作者: mandy_ng207 時間: 22-6-16 14:34

多多宝發表於 22-6-16 14:11
15分呀都要考直資或者預備叩門。宜家幼稚園中文教嘅幾好且深，但就唔會有面試班果d支援比小朋友，考出面 ...

本帖最後由 mandy_ng207 於 22-6-16 14:37 編輯

唔好介意我坦白講， IS應該滿足唔到你。首先IS冇學術，如果你覺得幼稚園數學教得唔夠， IS將會教得更少；放學已經三點有多，小朋友亦好攰，再去補習上面試班簡直係虐待。
IS學習風氣與傳統學校截然不同，上堂冇固定座位，小息都係大家你追我逐又跑又跳，你小朋友適應到嗎？再者升上本地小學，學校要求小朋友坐定定，而你小朋友已經習慣可以在課室周圍走，他會適應嗎？
本地幼稚園K3可以俾你小朋友習慣上小學嘅模式，我知道有啲幼稚園甚至有測驗考試，抄家課冊等訓練，等佢哋上小一嘅時候更容易適應。
小學雜談嗰邊有個帖分享如何在非native環境培養小朋友英語能力，我倒覺得那個帖比較合你用。
對不起用詞較坦白，不喜勿插。
利申：我並不了解KCIS及KIS，只是以一般IS教學模式作為參考

作者: 多多宝 時間: 22-6-16 14:39

super_cat 發表於 22-6-16 13:13
如果你係target 直私小學嘅話，K3 開學已經要準備interview，英文未見進步已經要面試，可以話係用唔著

如 ...

我唔係為左佢考小一學英文，而是為了趁早學習正確的發音基礎同英文思考的方式（io translation）。至於習慣左正確的發音方式之後應該都唔會無啦啦轉。當然轉ls後都會繼續比佢聽多d睇多d原版卡通電影，參加多dNET教授興趣班，持續的input刺激。

作者: Jane1983 時間: 22-6-16 14:44

PSKLAI 發表於 22-6-16 13:52
同意, 識一個小朋友幼稚園英文oral可以, 一上了LS小學即係好似廢晒武功咁, 不過英文答題水平就好咗好多 ...

呢個係必然的發展。除非屋企有父或母講native英文，否則好難有足夠語境。

作者: super_cat 時間: 22-6-16 14:45

多多宝發表於 22-6-16 14:39
我唔係為左佢考小一學英文，而是為了趁早學習正確的發音基礎同英文思考的方式（io translation）。至於習 ...

你想得太簡單喇.....

我想講個例子係我媽媽舊同學嘅女同我差唔多大，佢8歲時移民去澳洲，講緊係8歲喎，已經係講緊native 廣東話，但去到之後我唔知佢嘅生活點過啦，但父母喺屋企都係講廣東話嘅

到我廿幾歲再見返佢嗰陣，佢啲廣東話仲差過啲ABC, 英文就變咗native

所以如果你諗住1年就執好咗發音，講到一個language, 之後就唔會再變呢個想法太天真

作者: puiyima 時間: 22-6-16 15:04

本帖最後由 puiyima 於 22-6-16 17:27 編輯

del.

作者: wg_ann 時間: 22-6-16 15:26

多多宝發表於 22-6-16 14:11
15分呀都要考直資或者預備叩門。宜家幼稚園中文教嘅幾好且深，但就唔會有面試班果d支援比小朋友，考出面 ...

我以為樓主有世襲分或sibling穩入本地學校，如果得15分仲想考埋直私同玩叩門，我會建議你留守私幼再外補。
IS番全日但好多IS的Y1學術程度比本地私幼淺好多，中文程度亦不能和本地課程相比，考直私或叩門對中文及學術有一定要求，呢方面IS好難滿足到，即使讀完一年IS英文進步左，入番LS後都好快打回原形。

作者: Max20080525 時間: 22-6-16 16:00

多多宝發表於 22-6-16 14:39
我唔係為左佢考小一學英文，而是為了趁早學習正確的發音基礎同英文思考的方式（io translation）。至於習 ...

如果你只係為左呢個原因我唔明點解你會想轉去IS
屋企真係無資源定係唔識點幫小朋友攪好英文口語？如果你自己都唔識去到IS 好大機會你都幫唔到小朋友提升英文

作者: Max20080525 時間: 22-6-16 16:03

super_cat 發表於 22-6-16 14:45
你想得太簡單喇.....

我想講個例子係我媽媽舊同學嘅女同我差唔多大，佢8歲時移民去澳洲，講緊係8歲喎，已 ...

附議我表哥表姐係9同10歲移民。佢地應該都學到好多中文至過去啦但大左佢地除左識寫自己名已經無中文字係識廣東話都唔叻
所以一年轉IS 係無助英文進步相反中文隨時幾何級數退步到時考直資中英都唔標青咁點算

作者: 多多宝 時間: 22-6-16 16:34

Max20080525 發表於 22-6-16 16:00
如果你只係為左呢個原因我唔明點解你會想轉去IS
屋企真係無資源定係唔識點幫小朋友攪好英文口語？如果 ...

係呀我自己oral一般所以唔係我幫佢係想佢自己返學校同老師小朋友自己學呀

作者: 多多宝 時間: 22-6-16 16:36

Max20080525 發表於 22-6-16 16:00
如果你只係為左呢個原因我唔明點解你會想轉去IS
屋企真係無資源定係唔識點幫小朋友攪好英文口語？如果 ...

宜家係學校一日20分鐘英文都可以學到港式口音，返is一日六個鐘應該都可以學到幾成似吧

作者: Max20080525 時間: 22-6-16 16:39

多多宝發表於 22-6-16 16:36
宜家係學校一日20分鐘英文都可以學到港式口音，返is一日六個鐘應該都可以學到幾成似吧
...

係只在意口音？其實一年後去番本地都會變左港式英文佢入IS 半年轉到出去本地讀六年一定係港式
如果你想要佢英文腦要用英文睇科學常識要有深度咁去一年IS 又唔夠

作者: 多多宝 時間: 22-6-16 16:47

Max20080525 發表於 22-6-16 16:39
係只在意口音？其實一年後去番本地都會變左港式英文佢入IS 半年轉到出去本地讀六年一定係港式
如果你 ...

宜家最基本係讀小學之前有時間解決口音同日常溝通問題，想試下先。同埋小朋友學校唔多show and tell機會，無機會認識其它國家文化，都想入is多些機會玩呢d。

作者: 多多宝 時間: 22-6-16 17:25

mandy_ng207 發表於 22-6-16 14:34
本帖最後由 mandy_ng207 於 22-6-16 14:37 編輯

唔好介意我坦白講， IS應該滿足唔到你。首先IS冇學術， ...

多謝你呀我搵返果個post睇下

作者: mandy_ng207 時間: 22-6-16 18:36

多多宝發表於 22-6-16 16:47
宜家最基本係讀小學之前有時間解決口音同日常溝通問題，想試下先。同埋小朋友學校唔多show and tell機會， ...

不如你認真考慮吓夠唔夠錢俾佢一直讀IS上，可能入咗IS之後你會唔捨得走

想小朋友接受有質素嘅教育，IS確實係唔錯嘅選擇。

作者: clairelau 時間: 22-6-16 19:52

樓主小兒響kcis讀過一年，口音係進步左好多。
不過一個小朋友嘅發展係唔局限於英文，仲有中文，數學同整體嘅學習態度
響kcis果一年我地外補中文，自教數學
學校係無乜功課放學日日都係玩同玩
如果你唔係一心要讀國際學校一路上，如單純係為左英文，我建議你外補。

作者: 多多宝 時間: 22-6-16 22:19

mandy_ng207 發表於 22-6-16 18:36
不如你認真考慮吓夠唔夠錢俾佢一直讀IS上，可能入咗IS之後你會唔捨得走
想小朋友接受有質素嘅教育 ...

咁一年後先考慮，如果阿女真係有好大得著，可以考慮繼續上。暫時睇佢記性好，吸收能力較好但唔識發散思維同自主探索，表達能力一般，應該適合考試多d。

作者: 多多宝 時間: 22-6-16 22:27

clairelau 發表於 22-6-16 19:52
樓主小兒響kcis讀過一年，口音係進步左好多。
不過一個小朋友嘅發展係唔局限於英文，仲有中文，數學同整體 ...

請問果時係y1嗎？後面都去local school所以需要補中文？

作者: clairelau 時間: 22-6-16 23:40

本帖最後由 clairelau 於 22-6-16 23:40 編輯

回覆多多宝的帖子

樓主，唔係呀，我地轉左去另一間國際。有教中文，所以要補🙈當時係k1

作者: Leira 時間: 22-6-17 02:02

樓主，唔好介意我直接，不喜勿插，如果我係你，我唔會轉IS, 原因：

1. 如果你目標要考直私，其實你而家呢幾個月就要預備小一面試、中文認字、數學加減、重組句子、英文starter, 又要預備叩門做卷，呢啲全部學術嘢, 任何一間IS都唔會幫到你小朋友, 而且仲有機會令小朋友幾個月內退步。

2. 考小學過五關斬六將，到最後都要小朋友面試見主任、校長，但IS 係唔會訓練小朋友坐定定，如果佢習慣咗呢個自由模式，佢去面試就難d定落嚟，有啲小學會俾一張有轆既櫈比小朋友坐，間接都係觀察佢可唔可以專心坐好，但係呢啲同IS嘅教學模式都係好唔同，如果小朋友習慣咗IS, 佢去到LS面試就未必可以收放自如。

除咗以上原因，我贊成你原因1-4轉校，你不過真係要諗清楚係唔係讀一年之後又轉出嚟，另外，如果你話小朋友而家口語弱，其實IS 嘅year one interview都有機會唔pass的。

或者你可以打電話問吓兩間admission, 係唔係有位先？

作者: 多多宝 時間: 22-6-17 08:58

Leira 發表於 22-6-17 02:02
樓主，唔好介意我直接，不喜勿插，如果我係你，我唔會轉IS, 原因：

1. 如果你目標要考直私，其實你而家呢 ...

申請左先，可能有位時，直私都已經考完。以上關於小一面試內容的分享真係好詳盡，將我即刻拉返現實

。

作者: melobi12 時間: 22-6-17 09:55

本帖最後由 melobi12 於 22-6-17 09:59 編輯

我覺得#1-3係可以達成o既，不過得短短一年，有幾大幫助就睇小朋友自己「造化」。

一位慢熱型o既朋友好多年前o係香港讀完K1後移民美加，返學當然全英，放學主要同都係剛移民香港o既小朋友玩 (即返學以外廣東話多啦)。

朋友話佢用左大概 2 年時間 (佢慢熱，又唔想錯，所以冇信心講啱佢寧願唔講)，先開始放學都講英文 (終於轉左用英文思考)。但一年後 (小二) 佢又舉家回流香港入讀普通津小，好快又變返中文諗嘢。

咁回流後屋企冇刻意幫佢keep英文，但佢口音係好聽o既，完全唔港式；phonics 亦學得好好，對o係香港學英文係好有幫助 (當年香港唔流行學phonics)；對英文好有sense，好多嘢佢唔識解對錯 (grammar)，但佢會「直覺」o個樣啱 (又真係啱)，所以佢由小二到中學都係一個英文成綪好好o既學生。但要記住香港學校教英文係as a second language 咁教，所以無論成績幾好，都係second language。後嚟佢中學又返返美加讀書，佢話o係英文上係有struggle過 (o個邊中學已好多essay 要寫、要用英文思考同討論好多嘢)。

留意返呢位朋友係o係外國浸左 3 年幾時間，除左返學、出街周圍都係寫英文、電視全英文。

你只係打算讀一年IS，小朋友性格如何? 會唔會怕錯寜願唔講? 如果係o既話，一年未必夠呢，可能佢啱啱想轉channel，你就要佢離開IS 了。

你放左學打算全力輔助谷英文? 上興趣班、約playdate 全英文? 但你又係咪要顧返住準備考本地小學? 如果係，小朋友又必然要上好多中文o既課堂 (中文、普通話? 面試班? 我都唔係好識，只係見身邊朋友啲小朋友要上呢啲)，約朋友要約返講中文o個啲朋友? 如果係，咁你英文o既進度又會大打折扣。

小朋友習慣左IS模式，係咪符合你target 小學鍾意o既小朋友類型? 小朋友返左一年 IS 咁開心，到時你又推返佢去 LS 模式，佢接唔接受到?

只於#4，我覺得係無意思o既，無咩好提前適應 / 體驗? 時候到左去做就冇問題。有啲人話小朋友返N 班會喊，所以要上o係上N班前上「分離預備班」。早啲喊左先等到N班時人地喴、自己小朋友唔喊覺得佢「叻叻」?? 其實只係你要佢提早左喊咋.... 可能本身你俾足安全感佢，佢N班開學時根本唔會喊

其實讀LS而英文口音好 (呢個始乎係你最大 concern)、什至用英文諗嘢o既小朋友我遇過不少，用啱方法你唔使刻意轉去IS又轉返LS咁煩。

如果你覺得小朋友對住「老師」學嘢冇咁好，或者試下揾啲講 native English o既中學生、大學生，用大哥哥大姐姐身份咁同小朋友「玩」，加強oral；參加用英文教o既興趣班 / 活動 (最好多啲IS 學生參加o個啲)；多啲去多expats / IS 學生o既地區玩，playground language 自然係英文；去下啲drama class 呢啲多機會講嘢o既課外活動。愛上睇英文書 (所以要學 phonics，就可以自主閱讀)，都好重要。

作者: KIMLIFEINUK 時間: 22-6-20 00:17

我小朋友係 reception 入IS，我記得佢 year 1 時開始陪養閱讀興趣，我記得佢好多野講，同埋睇好多書，我記得因為要買好多，好貴，最後上網買平D。

另外同學之間都有好多互動。

不過我同意其他人既意見，係要 build 上去，到 year 2,3 見佢不停有唔同既進展，英文能力係好高，但中文能力係超低，實在唔係最理想

作者: hlmami 時間: 22-6-20 09:17

KIMLIFEINUK 發表於 22-6-20 00:17
我小朋友係 reception 入IS，我記得佢 year 1 時開始陪養閱讀興趣，我記得佢好多野講，同埋睇好多書，我記 ...

書無得學校借？要買好多？

作者: KIMLIFEINUK 時間: 22-6-24 22:39

hlmami 發表於 22-6-20 09:17
書無得學校借？要買好多？

大多數書得一個copy, 俾人借走左，要等好耐，買容易D
不過有次佢借到本最新、最搶手既書，係學校被人從 drawer 偷走左，才幾日時間，最後要陪錢

作者: LEY705 時間: 22-7-1 00:30

有冇人知插班容易嗎？waitlist 會唔會好長？

作者: Mrscatcatfung 時間: 22-7-1 09:50

LEY705 發表於 22-7-1 00:30
有冇人知插班容易嗎？waitlist 會唔會好長？

插幾年班？有passport?

作者: LEY705 時間: 22-7-1 13:05

2年班，無passport

作者: LEY705 時間: 22-7-1 13:05

Kcis 有passport 可以快啲？聽人講佢哋唔計？

作者: piglover 時間: 22-7-19 07:41

多多宝發表於 22-6-16 14:39
我唔係為左佢考小一學英文，而是為了趁早學習正確的發音基礎同英文思考的方式（io translation）。至於習 ...

其實，轉一年IS英文唔會有大進步，朋友嘅小朋友就係K3轉KIS。坦白講，她小朋友英文比Local雙語私幼嘅小朋友差九條街。

作者: piglover 時間: 22-7-19 07:45

多多宝發表於 22-6-16 16:36
宜家係學校一日20分鐘英文都可以學到港式口音，返is一日六個鐘應該都可以學到幾成似吧
...

點解唔PN入Local雙語私幼，再加外補。

作者: 多多宝 時間: 22-7-19 08:35

piglover 發表於 22-7-19 07:45
點解唔PN入Local雙語私幼，再加外補。

本身PN讀local 雙語私幼，k1見人地話有龍讀龍又揀左龍幼。但宜家最後一年K又真係想趁得閒improve一下小女口音同語感問題。

作者: piglover 時間: 22-7-19 13:18

多多宝發表於 22-7-19 08:35
本身PN讀local 雙語私幼，k1見人地話有龍讀龍又揀左龍幼。但宜家最後一年K又真係想趁得閒improve一下小女 ...

本帖最後由 piglover 於 22-7-19 14:18 編輯

其實，口音嘅嘢，外補更有用。
你不如思考一下，你係要入直資，津小，定係行IS。

基本上完全不同玩法。如果要考直資，好多小學而家已經要報名8-10月就會interview 啦，你就算9月入IS，都唔會幫到你嘅。
都
如果打算津小叩門，你就留在原本幼稚園，而家開始補習，操卷，預備叩門。

至於口音問題，其實考小唔太care，反而英文流利，閱讀能力更重要。考小，叩門，人地會直接比英文句子小朋友，小朋友不能靠phonics blend，要流利讀出來。

作者: nervousmichelle 時間: 22-7-19 13:37

piglover 發表於 22-7-19 07:41
其實，轉一年IS英文唔會有大進步，朋友嘅小朋友就係K3轉KIS。坦白講，她小朋友英文比Local雙語私幼嘅小朋 ...

我個細女小一入DSC，從幾乎零英文基礎，到一年班讀完，已經可以寫作同讀較多句子嘅英文故事書，亦可以自然地用英文思考同對答，進步係非常之大。IS嘅語境同教學方法對學習英文係事半功倍。而我個仔係Local幼稚園，學英文真係差好多。語言學習其實同時間都成正比，補習係冇可能超過IS內咁多小時嘅沉浸式學習。

歡迎光臨教育王國 (/)