教育王國
標題: 面試班的感受 [打印本頁]
作者: aiko_0428 時間: 21-8-23 17:29 標題: 面試班的感受
上面試班上到作為媽媽既我真係好沮喪，大家媽媽有無同感？初初原意諗住可以比小朋友熟悉下面試既應對，但無諗過最後連作為家長既我都對自己小朋友失去信心，咁到底曬咁多錢同時間為左乜？最後我最後一堂都唔想比小朋友上，我覺得我自己都好無力😔
作者: zebrama 時間: 21-8-23 17:42
點解？老師同你反映？
作者: ipki 時間: 21-8-23 17:45
發生咩事?
正常老師會堂堂話返你知小朋友情況
作者: aiko_0428 時間: 21-8-23 17:49
初初都上得唔錯，但越上就越差，我指小朋友表現，每次拋個問題比我，我聽完又唔識點處理，越聽越唔開心，攪到我好沮喪，初初都好比心機同小朋友學習下，到依家覺得連自己都無晒信心，我點比信心叫佢加油
作者: jessicasaisai 時間: 21-8-23 17:56
你意思係個老師把問題拋番給你？
作者: zebrama 時間: 21-8-23 17:59
唔好唔開心，面試班只係教一d基本模式丶程序，練習都係交俾家長，俾d耐性，慢慢來
作者: aiko_0428 時間: 21-8-23 18:08
係，話佢坐得唔好，要我訓練佢耐性要坐得耐d,本身我小朋友無問題，佢只係好動d,所以面試呢個遊戲唔岩佢玩
作者: aiko_0428 時間: 21-8-23 18:10
老師都表明佢初初表現好好，但依家有倒退情況，聽完我只係啞左，咁我究竟做緊咩，好似上面試班害左佢，到頭來我得到d咩野
作者: jessicasaisai 時間: 21-8-23 18:10
面試班唔代表面試結果，繼續努力(emoji)(emoji)
作者: aiko_0428 時間: 21-8-23 18:14
多謝大家安慰😞
作者: aiko_0428 時間: 21-8-23 18:17
回覆 ipki 的帖子
有呀，好同唔好都會講，但到後期接收到既就係佢表現唔好，我真係越聽越唔想聽，我都好無奈，聽完真係好抑鬱，試過放學情緒崩潰到我一手撕碎張評分紙
作者: bbellchung 時間: 21-8-23 18:25
aiko_0428 發表於 21-8-23 17:29 
上面試班上到作為媽媽既我真係好沮喪，大家媽媽有無同感？初初原意諗住可以比小朋友熟悉下面試既應對，但無 ...
本帖最後由 bbellchung 於 21-8-23 18:26 編輯
唔講差啲，點嚇到你怕繼續課金。萬一考唔上，佢又可戴定頭盔～(拿，我話咗啦，你唔同小朋友練，咪考唔上囉！)考到，榮耀又歸於面試班。
每個人都有優缺點，何況一個4、5歲嘅小朋友？畀啲信心自己小朋友。考小係緣份遊戲。考唔到，亦唔代表小朋友唔好。加油啊！
作者: lflxl 時間: 21-8-23 18:27
唔值得為咗呢啲唔開心呀！家長比啲信心自己同小朋友。可能只係內容悶同氣氛太嚴肅，小朋友無耐性好正常。我仔上完面試班都係比老師話學術欠缺，我對最後結果都好平常心嘅。十項全能都要睇臨場發揮。所以唔需要介懷。唔好因為外人而否定你小朋友。
作者: aiko_0428 時間: 21-8-23 18:53
回覆 bbellchung 的帖子
多謝你，所以我決定唔上面試班，比小朋友多d時間玩下
作者: aiko_0428 時間: 21-8-23 18:55
回覆 lflxl 的帖子
你講得好岩，多謝你，無比較無傷害，我應該多d欣賞小朋友好既地方
作者: lovelovebabe 時間: 21-8-23 19:25 標題: 回覆樓主:
我小朋友都有去面試班，結論覺得唔上好過。
作者: bkin1025 時間: 21-8-23 19:27
aiko_0428 發表於 21-8-23 17:29
上面試班上到作為媽媽既我真係好沮喪，大家媽媽有無同感？初初原意諗住可以比小朋友熟悉下面試既應對，但無 ...
我個仔嗰陣就遇到個好嚴既, 話唔鐘意上堂, 我地即刻換左個冇嚴格有愛心既, 上得好開心.
唔係話嚴格既老師唔好, 有D小朋友谷得, 有D小朋友唔谷得, 要用其他方法教, 最重要係搵適合既老師俾你個仔/女.
作者: sheepmeimei 時間: 21-8-23 19:30
我覺得上中英數or講故事班都已經足夠，直私同叩門大致上都係考學術傾下計。
千祈唔好比呢件事影響到自己同小朋友關係呢！
小朋友好快唔記得件事，唔好再責怪自己
作者: Orhome 時間: 21-8-23 19:56
媽媽懸崖勒馬做得好！考小一，小朋友自信心同父母情緒都好關鍵，比啲信心自己小朋友，祝妳地成功。
作者: aiko_0428 時間: 21-8-23 20:00
回覆 lovelovebabe 的帖子
無錯，上完都唔知得到d咩，情願多d時間陪佢出去玩好過
作者: aiko_0428 時間: 21-8-23 20:02
回覆 bkin1025 的帖子
我覺得好多老師有時會向錢看，當佢仲係你學生都會理下你，到唔比錢唔上佢堂就bye bye 你條尾
作者: aiko_0428 時間: 21-8-23 20:04
回覆 sheepmeimei 的帖子
無錯，我覺得上完令我更加燥底，有時質疑小朋友既能力
作者: Nicole-hui88 時間: 21-8-23 20:05
我小朋友都有上面試班，但最後係靠學術考上直私，個人認為學術重要啲，自己教好基本禮貌就ok
作者: aiko_0428 時間: 21-8-23 20:06
回覆 Orhome 的帖子
多謝你，無錯，親子關係係最緊要，考唔到都唔係重要
作者: aiko_0428 時間: 21-8-23 20:09
回覆 Nicole-hui88 的帖子
多謝你，呢d野都係要父母教，身教都好緊要
作者: yeeling0101 時間: 21-8-23 20:37
其實揾一間夾嘅唔易我去過九龍塘個間，上左1,2個月，好彩轉左online,先知個老師咁唔掂，轉數好慢，有小朋友係車上緊，影響到舉手，正常人做法，應該變輪住答，再提下家長下次唔好係車上就ok,佢竟然叫人停車上堂，好啦，個家長又真係泊埋一邊，但佢到落堂都無再叫小朋友舉手答問題，總之好多呢啲奇怪野。
之後我又去另一間，疫情見佢上zoom堂都ok,但到復課，多客佢做唔切，覆得好慢，comment好虛，我又轉了。
然後，又去另一間，上上下zoom，佢轉面授上唔到，又轉
最後，二月開始上朋友介紹呢間，小朋友夾到，上得開心。
遇到夾ge係緣份，我覺得最重要係覺得唔適合就即走，唔好浪費時間
作者: aiko_0428 時間: 21-8-23 21:52
回覆 yeeling0101 的帖子
無錯，夾到就好，夾唔到都係趁早走
作者: 大波大 時間: 21-8-23 22:15
其實小朋友仲好細架咋，佢哋有唔同階段嘅領悟同埋行為表現，比啲耐性去調教，可能當中家長要嘔好多血，但你會有一日感覺到佢哋有改變，佢哋係會時好時差，有恆心一定教得好，加油！
作者: laigillian 時間: 21-8-24 00:08
上年我仔上面試班，我既情緒都係大起大落，老師comments 大過天，上zoom時要超安靜，要求阿仔超專心，如果阿仔唔答問題我又會勁嬲。上返實體時，見到張分紙面都黑晒，辛苦到不得了。
如果小朋友聽教，家長可以自己教面試技巧，再係ek搵返以前既posts，睇下每間學校考d咩。
俾心機～～
作者: Mrscatcatfung 時間: 21-8-24 07:47 標題: 回覆樓主:
首要選愛心的学校，照顧了小人兒的情绪發展先。
我小時候入了一間地區一線，課堂規舉嚴格，老師很惡。好大心理壓力，常害怕坐不好，做不好捱罵。總希望老師留意不到我，我那天便平安了。
作者: pwhr 時間: 21-8-24 09:00
放鬆點, 已進入直路, 捱埋佢, 如果小朋友真係唔願意上面試班, 轉第二間, 未必好之餘小朋友又需要時間適應,倒不如考慮呢兩個月辛苦啲自己同佢操
作者: hermionexxxx 時間: 21-8-24 09:05
本來還想報名試下，看完留言我都決定不上面試班了。。。
作者: aiko_0428 時間: 21-8-24 11:01
回覆 大波大 的帖子
講真，真係自己教無咁嬲，出去教，好與壞都係單憑老師既評語，聽完真係影響心情
作者: HK-CR7 時間: 21-8-24 11:06
回覆 aiko_0428 的帖子
介唔介意講邊間面試班？ ＰＭ我都可以， 我地宜家搵緊面試班， 最怕碰到呢類學校同老師， 謝謝
不過我覺得搵到間夾既好重要， 同埋唔好將老師講既野太上心， 加油！
作者: KWLW 時間: 21-8-24 11:06
出去上面試班其實都係想下有乜技巧，放鬆D
都明白上完堂大家都想小朋友俾老師讚，增強下佢地的信心
不過家長都真係不用對老師的評語太上心
作者: TY168 時間: 21-8-24 11:13
朋友上年上過九龍塘有啲名氣面試班，基本上俾老師踩到一定冇學校收，我朋友重喊左好多次，
但結果都有幾個不錯既offer (不是神校)。
今年到我，我覺得盡咗力就算，大家加油
作者: aiko_0428 時間: 21-8-24 11:43
回覆 laigillian 的帖子
好有同感，老師評語大過天，依家唔再上，比時間同仔仔玩多d仲開心
作者: aiko_0428 時間: 21-8-24 11:46
回覆 Mrscatcatfung 的帖子
原來咁大壓力，其實我都已經唔係簡神校，我簡間比教活動教學，但坊間面試班一定要要求你坐定定，我仔仔根本做唔到佢要求
作者: aiko_0428 時間: 21-8-24 11:51
回覆 HK-CR7 的帖子
其實我簡個間已經係比一般出面開心架啦，初初覺得都幾好，堂堂都開心，但一到模擬面試就，我仔仔咁活躍根本做唔到佢要求，評語越黎越差，我都唔知繼續上黎做咩，或者咁講，面試班根本唔適合一d比教活躍小朋友，佢哋要求就係要坐到好似公仔咁靚，答問題要完整句子，所以邊間都係一間
作者: aiko_0428 時間: 21-8-24 11:53
回覆 hermionexxxx 的帖子
自己教好過，真係浪費金錢同時間，仲要即使上左唔代表一定入面直資/私校
作者: jazzcf 時間: 21-8-24 11:55
回覆 aiko_0428 的帖子
面試班所教授的知識, 有機會是小一小二的課程內容, 升K3的小朋友不懂, 就被批評為沒有常識/common sense...
在經歷完所有小一面試後, 發覺大部分的面試班課程內容是不需要的, 所以也不需太介意面試班老師的 comments 啊!
作者: aiko_0428 時間: 21-8-24 11:55
回覆 TY168 的帖子
無錯，到頭來自信心無左，仲要浪費金錢時間，分分鐘影響埋親子關係
作者: TY168 時間: 21-8-24 11:56
aiko_0428 發表於 21-8-24 11:51
回覆 HK-CR7 的帖子
其實我簡個間已經係比一般出面開心架啦，初初覺得都幾好，堂堂都開心，但一到模擬面試 ...
作者: aiko_0428 時間: 21-8-24 11:58
回覆 jazzcf 的帖子
無錯，老師就話佢常識唔係咁好，我唔明佢點定義，成日拋d問題比我叫我教佢，又叫我教佢講故事，大佬呀，我識教就唔洗上堂，我自己返學教佢啦🥲
作者: WongSiuYee 時間: 21-8-24 14:19
bbellchung 發表於 21-8-23 18:25
本帖最後由 bbellchung 於 21-8-23 18:26 編輯
唔講差啲，點嚇到你怕繼續課金。萬一考唔上，佢又可戴定 ...
個人認為 K3 升P1 打好學術基礎是必然, 應對禮貌跟日常生活便可以了 ~ 隨緣.
要上面試班 都等到 P6 升 S1 啦.
作者: rsx 時間: 21-8-24 14:39
本帖最後由 rsx 於 21-8-24 14:40 編輯
aiko_0428 發表於 21-8-24 11:58
回覆 jazzcf 的帖子
無錯，老師就話佢常識唔係咁好，我唔明佢點定義，成日拋d問題比我叫我教佢，又叫我教 ...
其實面試班又點可能教曬面試所有野丫, 老師幾時都會拋返個波比你架喎, 一個星期老師見佢幾耐你又見佢幾耐?
可惜太多人見到有成功例子就去報, 以為可以令小朋友脫胎換骨, 但其實面試班極其量可以教到小朋友一般禮儀, 技巧, 同埋佢地比較知道行情貼市(主要問題類別),
加上最後老師既評語(找出問題當然係負面的吧!), 積極點對症下藥, 才是上面試班的真正目的, 加油吧!!!!
作者: ipki 時間: 21-8-24 14:51
補習/面試班
點都要自已返去跟,佢只係幫你找出問題所在
你要對症下藥
記得唔好把所有責任推哂比老師
不 過你問我,我就覺得如其去面試班,不如睇下自已小朋友差D咩
去學習好過
反正大把人係無參加,但大把OFFER
總知記住,要跟進
作者: yancb 時間: 21-8-24 14:53
我好明白樓主你的感受，我小朋友都上面試班一段時間，到左依家，莫講話小朋友頂唔順，我自己都頂唔順了，受制於課程時間問題一星期一堂每堂得一個鐘，老師真係唯有將個波拋番比我，面試班就變左測驗班咁，每次去測下小朋友何進度，然後咪又係靠家長去跟進，好GE老師會O係課後將每一項的表現詳細講，試過有差GE老師只係講我小朋友做得唔好的地方，聽左幾堂之後我開始懷疑佢係咪講緊白痴定廢柴…只有錯冇做對的? 再者就係，面試班成日考埋小朋友一D佢地呢個年紀冇可能識的知識，個範圍之大同深，當我終於教識佢呢樣，老師又開始話佢第樣差要我跟，好似永遠冇得停永遠冇盡頭咁.....得果幾歲人仔每日操練.......依家臨要面試了，我都考慮緊唔想再上面試班了......同路人 加油!
作者: kpc2015 時間: 21-8-24 15:02
面試班唯一作用是比機會小朋友知道什麼是面試. 上得多我覺得是浪費金錢及時間. 其實面試都是睇小朋友的日常. 為何要比錢同一大班等老師輪流教, 唔自己教或比小朋友玩中學習. 如果小朋友性格未定未READY, 面試班不會幫到你, 老師只會比壓力要求家長處理好! 更加不要以為某面試班有同學入到名校, 就以為自己有份. 最後絕對可能是美麗的誤會!
作者: yeeling0101 時間: 21-8-24 16:09
本帖最後由 yeeling0101 於 21-8-24 16:10 編輯
我自己係buy面試班，但我認同一星期一日一小時，唔好淨係靠佢，所以我定位面試班老師要做到教練，第一教到小朋友熟悉面試題目，第二揾到小朋友有咩強弱，第三小朋友有弱嘅部分，教我係屋企點跟，暫時我個位做到
作者: yeeling0101 時間: 21-8-24 16:13
本帖最後由 yeeling0101 於 21-8-24 16:28 編輯
回覆 aiko_0428 的帖子
咁你有無問返老師可以點係屋企教？好似常識，話佢弱，咁即係佢有範圍問小朋友，咁你有無問返錯邊到，或者屋企有咩範圍可以温？
如果老師咁都唔答，就真係hea你，唔值得再上了
作者: aiko_0428 時間: 21-8-24 18:21
回覆 yeeling0101 的帖子
其實常識好廣泛，有好多野都可以學，正如解難能力都有幾百樣要解，唔通就要識晒就100就叫做達標？我就算學晒就100樣常識，佢又話你科學弱，普通話，英文，中文，等等，我已經比佢上英文堂1-5，佢都話佢英文麻麻，又或者可以講，我仔未能達到考神校既標準，我知叻既人大有人在，所以如果要同其他小朋友比較既話，我覺得呢個面試班我唔值得再上，因為我根本只係睇到小朋友既缺點，長期咁樣，唔好話小朋友無晒自信，就連我作媽咪本身好有動力，都唔想再努力
作者: aiko_0428 時間: 21-8-24 18:27
回覆 yeeling0101 的帖子
我小朋友弱既點就係坐唔定，佢要我每日訓練佢有耐性咁坐得定，我覺得好似訓練緊狗咁，要佢坐就坐要佢企就企，我自問唔係怪獸家長，想入一間活動教學既直資，因小朋友好動，但係面試班要求佢坐定定，咁同我最初期望佢入間活動教學既學校背道而馳，我覺得每個小朋友都有唔同既性格，但面試要求只有一種，坐定定你就達到佢要求
作者: aiko_0428 時間: 21-8-24 18:31
回覆 yeeling0101 的帖子
再者，佢越上越差，作為家長，我就點努力都無用，因為佢要佢坐定，我點訓練呢？我每日都同佢學晒中英數，我既時間就係比晒佢，我再努力換來佢既評語，我個刻覺得我同小朋友既努力都無人睇到，只係只有負評，每一堂聽完佢評語就心情勁差，所以我只好選擇唔再上，再上影響我情緒
作者: lambeanmama 時間: 21-8-24 18:35
身為過來人，我覺得面試班的作用是：
1. 俾小朋友大概知甚麼是面試；對慢熱內向小朋友尤其重要。當然有好多人覺得「安排多幾次面試warm up都可以」；但我家犬兒是不行。不想嚇怕佢。所以寧願俾錢「買經驗值」。
2. 俾家長大概知道坊間水平及程度。不是考不考神校的問題。旨在神校的一樣去考二三四五六七線直私。自己知道一個大概。不存在過份期望；做好期望管理是有幫助父母在考小期的情緒的（子女資質特優類不在此限）
3. 了解小朋友強弱項。同意面試班老師較mean 較harsh 較demanding; 唔講得誇張點叫家長繼續俾錢呢。但正常來說，再誇大，也未至於無中生有。多聽意見，有則改之，無則加勉。做家長要學識自己判斷需要。難道佢叫你教小朋友時事，要了解阿富汗局勢你又去教咩？！不要高估或低估自己小朋友，聽取意見。最後做定唔做都係睇家長自己。
面試才開始，不要給自己太大壓力。我絕對認同的是家長才是最重要的面試班老師。面試班本身，是一個「安心錢」。
加油。祝考小順利。
作者: lambeanmama 時間: 21-8-24 18:42
aiko_0428 發表於 21-8-24 18:27
回覆 yeeling0101 的帖子
我小朋友弱既點就係坐唔定，佢要我每日訓練佢有耐性咁坐得定，我覺得好似訓練緊 ...
家長，你要了解殘酷現實的真相是再活動教學的直私，都係想收一批能做到收放自如，該活時活，要靜時靜的小朋友。活動教學，是以不同形式去學習，不是為收活潑好動小孩而設。
讓孩子明白在適當的時候做適當的事；是考小第一要點。
作者: yeeling0101 時間: 21-8-24 19:00
回覆 aiko_0428 的帖子
明白了，你以往面試班老師風格係只有彈無讚對吧？確係唔好受，搞到大家都有壓力。所以有機會再上的話，揾一個會讚會彈亦教你點執的吧。
感謝你令我有反思，我上緊呢位老師成日都讚完一大輪先講有乜要改，可以點改，有時我諗會唔會讚賞嘅部分無乜用，依加我明白，其實小一面試係長跑，確係要有讚賞去幫小朋友同家長有力跑落去。
希望大家順利
作者: yeeling0101 時間: 21-8-24 19:02
回覆 lambeanmama 的帖子
認同。講到再活動，都係要坐定上堂的。
作者: Kumi33 時間: 21-8-24 19:27
面試班我上。只係比佢適應下面試模式。所以我我5月先上。。學術根本係家長教。。面試班只係比個大綱你家長曾經出過d乜。
到故事個part 我仔都弱，我都5g 點教好。因為我都5係講得好好。。老師不斷叫我要去train，話佢弱。日日都有故事時間，講下書ga故事，已經好誇張去表達。。到佢哋翻講就，唉。不過算la 我都無去train 講故事只係由細到大ga 親子活動。。
我有2個小朋友，哥哥有上面試班。得一間私立收。讀緊津校。
細佬今年都有上面試班。。結果5知。而家先開始in
作者: yeeling0101 時間: 21-8-24 19:46
回覆 Kumi33 的帖子
先教連接詞，故事個大框通順流暢先，再深造教形容詞
作者: haleyz 時間: 21-8-24 20:07
lambeanmama 發表於 21-8-24 18:35
身為過來人，我覺得面試班的作用是：
1. 俾小朋友大概知甚麼是面試；對慢熱內向小朋友尤其重要。當然有好多 ...
寫得好好呀，好認同你嘅講法！
作者: haleyz 時間: 21-8-24 20:13
aiko_0428 發表於 21-8-24 18:27
回覆 yeeling0101 的帖子
我小朋友弱既點就係坐唔定，佢要我每日訓練佢有耐性咁坐得定，我覺得好似訓練緊 ...
其實就算係所謂活動教學嘅直私，都唔expect 個小朋友咁坐唔定，只係教學模式上可能無咁傳統，少啲抄寫。
我自己小朋友都係比較活潑，以前坐喺度時較多小動作，但日子有功，係可以控制到，比佢知道面試時坐好係一種禮貌，一種尊重。
作者: TY168 時間: 21-8-24 20:25
lambeanmama 發表於 21-8-24 18:35
身為過來人，我覺得面試班的作用是：
1. 俾小朋友大概知甚麼是面試；對慢熱內向小朋友尤其重要。當然有好多 ...
作者: daijuju 時間: 21-8-24 20:55 標題: 回覆樓主:
個人經驗不要揀啲會嫌棄小朋友嘅老師，不只一次，有些老師要小朋友面試通過才能上面試班，或者上緊又話不適合，各種勸退。真正好的老師能改變小朋友，陪小朋友一起進步，而不是覺得小朋友「唔得」就放棄。小朋友自信很重要，齋批評誰不懂，性格很多時係天生但可改善，不要讓不好的老師打擊小朋友和家長的自信，充滿負面能量的面試班早日bye吧。
作者: aiko_0428 時間: 21-8-24 22:53
回覆 lambeanmama 的帖子
我覺得如果以咁多小朋友比較，我小朋友相對係坐得無咁定，呢個係真實，但我相信會隨住年紀去變好，因我小朋友係細b,佢地大b,所以如果係要咁比既，我地一定輸左,我唔係話所有細b都係咁，但大部分細b係呢個年紀發展都無大b咁成熟
作者: aiko_0428 時間: 21-8-24 23:05
回覆 daijuju 的帖子
無錯，仲要口講話要小朋友開心，我自己聽完成既評語真係由初初開心變到唔想再聽，好唔鍾意佢地滿口虛假說話，我黎上堂學野唔係同其他人去比較
作者: aiko_0428 時間: 21-8-24 23:14
本帖最後由 aiko_0428 於 21-8-24 23:15 編輯
其實總結我自己覺得大家家長決定要上面試班的話要諗一諗，如果上上下發覺自己感覺唔太好就唔好再繼續，好似我自己好介意老師既評語，最後影響到親子關係就唔值得，因為我都忍左好耐先發覺自己情緒越來越唔好，好大壓力，有時聽完都老師既評語放學就會喊，最後先決定唔上，心情得到釋放，睇開d自己教，最後希望大家小朋友考到心儀既學校，加油
作者: Chankai 時間: 21-8-25 09:20
如果唔train定個小朋友，到面試現場，無講答題，見到連坐都坐唔到，係相當尷尬痛苦
作者: ipki 時間: 21-8-25 09:46
回覆 lambeanmama 的帖子
認同你講左個重點來
D人成日話自已小朋友坐唔定,比較合活動教學
我就O咀......連咩係活動教學都未搞清楚......
作者: beetle910 時間: 21-8-25 09:56
我同樓主經歷一樣, 小朋友今年9月升小一, 當初想試試上面試理, 睇下小朋友有咩需要改善地方, 但可惜只著重學術方面, 當然呢方面對直私而言係好重要, 不過每次老師評語都差到令我懷疑人生, 當然老師唔係惡意, 只係講出我小朋友同要求距離好遠好遠, 當時小朋友K2, 我承認學術上有不足, 但在不停批判之下, 我作為家長壓力好大...小朋友亦唔開心...所以冇再上面試班, 我自己改善佢弱項...
幸好到最後, 我地可以考到諗都冇諗過會收既學校, 分別有一線直私官津offer, 倒返轉頭諗, 學校唔一定只重視學術, soft skills都好重要, 但又諗...如果唔係面試班老師既評語鞭策, 我都未必會有方向幫小朋友改善...
所以唔好灰心...
作者: Wendy_tang 時間: 21-8-25 10:06
lambeanmama 發表於 21-8-24 18:35
身為過來人，我覺得面試班的作用是：
1. 俾小朋友大概知甚麼是面試；對慢熱內向小朋友尤其重要。當然有好多 ...
對於老師的建議, 真的不要太上心, 小朋友性格同能力各異, 只要明白係咩地方可以盡量幫下佢, 盡了力, 無悔了.
大家努力!
作者: darkgard 時間: 21-8-25 10:15 標題: 回覆樓主
恕我孤陋寡聞，我未見過好嘅小一班。
大部分嘅小一班，只係俾一個模擬環境小朋友，等小朋友適應一下，又俾家長預早知道小朋友有咩隱藏行為問題。佢地係唔會抖正問題架。又咁講，一星期一堂，每堂一小時，真係做唔得咁多。
我女內向，都係上左成年面試班。因為佢太怕羞，面試時面都青，手又震，得一間waiting 中。
我得出個結論：小朋友得就得，唔得的話，就好難變到得。因為佢地仲好細，性格主導左表現。
我好明你感受。我當年都經歷過。小一過程好漫長，無忘初心，要相信佢嘅能力。人人都只係用十分鐘去考你小朋友，而你先係最了解佢嘅媽媽，唔好灰心。
作者: rsx 時間: 21-8-25 12:19
我依家先知面試會早一年不斷咁上，唔怪之得咁多家長懷疑人生！
我覺得面試班唔適宜上太多，最多十堂八堂，糾正吓惡習、了解一下一般問題、適應一下面試個mood就夠吧！長期訓練面試我估真係會弄巧反絕！
作者: kytso 時間: 21-8-25 19:06
yeeling0101 發表於 21-8-24 16:09
我自己係buy面試班，但我認同一星期一日一小時，唔好淨係靠佢，所以我定位面試班老師要做到教練，第一教到 ...
作者: Jean1769 時間: 21-8-25 19:28
面試班唔係包生仔，我小朋友無上面試班都好多offer. 自己俾人機訓練小朋友表達能力好過
作者: yukili1111 時間: 21-8-26 00:30
其實我真係完全理解你嘅感受，既然穩唔到一個好而且岩自己嘅老師不如換第二個啦，後尾我發覺請私人老師1對1學得更快
作者: yukili1111 時間: 21-8-26 00:33
kytso 發表於 21-8-25 19:06
可以介紹是哪一間嗎?自己都搵緊面試班, 謝謝.
作者: mumumma 時間: 21-8-26 00:38
回覆 beetle910 的帖子
睇完就諗到我個女既狀況，之前又係join左好岀名既面試班，本身好活潑，但係俾老師踩到佢唔敢講嘢，之後仲唔肯去上堂。好彩我即刻幫佢轉老師，而家先上到開心，仲成日話掛住老師😂
作者: Dybala 時間: 21-8-26 10:33
本帖最後由 Dybala 於 21-8-26 10:34 編輯
要睇間面試班好唔好係咪有心教
我個女上年去咗間都幾出名嘅, 但每堂完咗連見老師嘅機會都冇, 淨係喺手冊寫低有咩做得好做得唔好, 同埋最初有份野叫我地填幾間小朋友target學校, 諗住都會比啲意見我地, 分析吓啱唔啱小朋友讀/小朋友表現足唔足夠攞offer, 但一直乜feedback都冇, 而到咗最後有個mock interview, 因為疫情關係係用zoom做, 個mock interview考果啲野係深到我之後真正in小學都冇遇過, 而mock interview嘅成績出咗佢係排到尾十咁上下, 果吓真係有絕望嘅感覺
不過到之後真係in小學, 當然完全係兩回事, 心儀嘅都順利攞到direct offer, 係幾間熱門嘅先reject
所以去著間唔好嘅interview class, 一味單向不斷打沉你嚇你, 只會製造不必要嘅恐慌!
作者: Dybala 時間: 21-8-26 10:44
bkin1025 發表於 21-8-23 19:27
面試班D老師好多都好嚴格, assume 你係要報神校咁勁操你個仔/女, 但係太嚴好多時反而有反效果, 特別係對嗰D ...
作者: HK-CR7 時間: 21-8-26 11:25
lambeanmama 發表於 21-8-24 18:35
身為過來人，我覺得面試班的作用是：
1. 俾小朋友大概知甚麼是面試；對慢熱內向小朋友尤其重要。當然有好多 ...
作者: honeybunny8 時間: 21-8-26 12:11
回覆 lambeanmama 的帖子
好同意你講法。其實各貨應各客，又唔係全部人須要用面試班幫助自己嘅小朋友，但面試班亦都有佢哋嘅價值，亦有好老師同冇咁好嘅老師，家長要自己決定。
以我個人嘅經驗，大嗰個考 K 時幾乎全軍覆沒。結果我俾佢入咗間 Happy School，快快樂樂咁到K2。K2 時幼稚園老師話佢太慢熱，從來唔舉手參與課堂活動，好擔心佢，所以 K2 下學期開始我俾佢去九龍塘某出名面試班。對於我呢個在職媽媽來講，實在無時間上網搜尋資料同 keep track 各學校報名日期，係靠面試班老師提供。面試班老師又能夠話俾我知小朋友有啲咩地方需要大力加強，又提供埋中英文認字表（e.g. 我絕對唔會諗都要教小朋友18區嘅名），大概嘅學術要求範圍，上堂時好有耐性咁鼓勵我嘅小朋友參與，令到佢慢慢會開始舉手，大膽喺其他小朋友面前發言。又有教係坐姿、衣著、儀表、自我介紹各方面嘅基本要求，我都係照做，有備無患。
最有用嘅真係老師每堂課下課之後，都會同我詳細解釋我小朋友嘅表現，同埋我返屋企可以點樣幫佢，有幫我睇 portfolio 比意見。我見有好多家長冇問得仔細，又有啲係長輩/工人姐姐帶嘅完全唔問老師問題，咁雖然大家一樣俾咗咁多堂費，獲得嘅益處就一定會少咗啦。我肯虛心請教、不恥下問，老師就會關照我多啲，我俾錢都俾得開心。
老師就一定會集中講小朋友有啲咩不足嘅地方，唔通你淨係想佢話俾你知好好咩？如果我個老師係咁乜都話俾我知好，我會覺得佢冇乜幫助。但係佢話唔好嘅地方，又唔係如果改唔到就一定全軍覆沒，只不過係想你進步得幾多得幾多，盡量喺個面試遊戲之中佔一啲優勢。
我個小朋友喺模擬面試排名度唔係咁好，所以我都有心理準備。出乎意料之外嘅係佢兩間所謂嘅神校都以 N 無身份有 direct offer，其他一線直私嘅都收，全中，絕對係面試班嘅功勞。真係，我哋連家長面試嗰part都上面試班，因為我先生完全 hands off，佢都需要 training。
到細嗰個，因為佢有 siblings priority ，我淨係俾佢係屋企附近一間面試班係上一個暑假，等佢都適應下面試模式。對比起上嚟，面試班嘅老師成日讚佢，冇咩建設性嘅 feedback，反而因為我經歷咗大嘅，所以自己識得執返細嘅 performance。如果淨係靠呢個成日讚嘅老師，細嘅都未必入得返。
面對老師嘅 feedback，要用正面嘅心態去睇件事，知道老師都係盡人事姐，並唔係personal嘅。我哋幫小朋友，都係盡力而為，到咗嗰日都係靠佢哋自己嘅表現。得唔得都冇咩好埋怨，
有啲小朋友上咗小學先真正發力，插班去插得好。放輕鬆啲，就唔會影響到親子關係啦 ❤️
作者: HK-CR7 時間: 21-8-26 12:20
honeybunny8 發表於 21-8-26 12:11
回覆 lambeanmama 的帖子
好同意你講法。其實各貨應各客，又唔係全部人須要用面試班幫助自己嘅小朋友，但 ...
作者: chanchancat 時間: 21-8-26 12:57
作為家長當然明白 你的心情, interview class 有時不如你所想地鼓勵 小朋友, 但是老土都要講一句, 其實真正嘅面試係仲殘酷, 基本上唔會有人好有耐性地 慢慢發掘 小朋友的特質, 就算對住傳媒講到有幾好聽，幾日裏 見幾千人, 真係唔會有太大嘅期望佢哋會好有耐性, 遊戲既然係咁樣，就只有玩或者唔玩, 或者, 呢個都係一個讓小朋友成長嘅機會. dont know which interview class you are attending...but if a teacher can indicate which part the students need improvment to me, i am okay. 不過我是明白那個心情的。
作者: mumumma 時間: 21-8-26 13:42
我本身都好緊張個女，晚晚放工就谷個女練故事、練對答，老豆又幫唔到手，最後要個老師見到我個女表現同之前唔同左先話俾我聽，叫我留意下，而家完全交俾老師，我就負責帶個女去玩
作者: celinechan117 時間: 21-8-27 01:26
lambeanmama 發表於 21-8-24 18:42
家長，你要了解殘酷現實的真相是再活動教學的直私，都係想收一批能做到收放自如，該活時活，要靜時靜的小 ...
只要睇吓某熱門活動教學幼稚園收生的criteria 便知一二
嗰D學生先係直私中意
離不開大B，聽指令/定的學生
作者: 蚊蚊mosquito 時間: 21-8-27 06:23
yukili1111 發表於 21-8-26 00:33
我覺得坊間面試班嘅模式和類型林林總總，不如穩一個私人老師針對某一個學校去訓練好過啦，我以前上面試班都 ...
同意
如果上出面d班唔岩小朋友
我覺得搵私人補習老師上門仲好
但前題都係要家長跟，除非請到好老師每星期3天以上
作者: wansfamily 時間: 21-8-27 07:18
aiko_0428 發表於 21-8-24 18:21
回覆 yeeling0101 的帖子
其實常識好廣泛，有好多野都可以學，正如解難能力都有幾百樣要解，唔通就要識晒 ...
大約自行閱讀什麼程度的書？有冇考Cambridge ？
老師話小朋友英文邊方面弱？
作者: fairycatcher 時間: 21-8-27 07:37
本帖最後由 fairycatcher 於 21-8-27 07:43 編輯
我成日都話，面試班真係人夾人。我自己小朋友有上面試班，好慶幸遇到一個又好又有要求嘅老師，我係真係睇住小朋友一直咁進步。但係我可以話，我有朋友上同一個老師，結果佢就同樓主一樣，越上越沮喪，仲開始懷疑人生，結果佢幫小朋友轉左去令一間面試班。
我同意上面咁多位家長嘅忠告，面試班唔係萬能，家長返到屋企一定要跟進，咁樣先至可以事半功倍。我朋友就係太忙，平時冇時間，所以小朋友根本一直原地踏步，冇進步過. 對於第一次面對小一面試遊戲嘅家長，面試班嘅作用，係話俾我知道而家小學會考D咩題目，平日自己可以點樣train , 同埋睇吓其他小朋友嘅水平。
我相信樓主係一個盡責嘅媽媽，所以小朋友一定唔會差得去邊。既然已經嚟到考小直路，希望你可以忘記面試班嘅經歷，盡力裝備小朋友，放鬆面對結果
作者: jennifertam20 時間: 21-8-27 09:18
今年啱啱遇上疫情，牙仔根本冇機會上面試班，我自己教佢，一樣都考得唔錯。當然我曾經都懷疑過人生，你而家只係啱啱開始，唔好俾咁大壓力自己。加油啊。
作者: em141199 時間: 21-8-27 14:35
提示: 該帖被管理員或版主屏蔽
作者: jennylady 時間: 21-8-27 18:41
本帖最後由 jennylady 於 21-8-27 18:54 編輯
回覆 aiko_0428 的帖子
我仔上過幾堂面試班但因為我開始遲
和疫情關係我只上了幾堂就停了
老師評語就真係好差
講到個仔好唔掂
但最後我仔有好好的offers
老師一定講到你小朋友好差
否則點叫你繼續讀
要比信心小朋友
加油
作者: kpc2015 時間: 21-8-27 20:48
最慘有家長信哂依的學店！以為小朋友曳不努力！重責怪！ 影響子女感情同家庭關係！睇下楊局長學唔學到中國加強監管下？
作者: beckycwm 時間: 21-8-30 14:44
提示: 該帖被管理員或版主屏蔽
作者: miriam 時間: 21-8-30 18:05
版主按：含有PM回文，請看基本版規第一項
作者: Cckhsw 時間: 21-9-3 15:12
aiko_0428 發表於 21-8-23 18:17
回覆 ipki 的帖子
有呀，好同唔好都會講，但到後期接收到既就係佢表現唔好，我真係越聽越唔想聽，我都好無 ...
媽媽要明白，唔能夠將個人期望放大，亦唔能夠將個人期望放落小朋友身上。都係果句，你盡佐力做好你本份就夠。你要學習調節心態，至於情緒方面，更深層次嚟講，一切都只係出於你嘅恐懼。你係獨立既人，小朋友亦一樣係獨立，無論日後係點，都會有最好最適合既安排比小朋友，小朋友會有自己條路，學習長大嘅路好漫長，做好媽媽本份就好啦。關注自己情緒源頭比較重要
作者: JlIl 時間: 21-9-7 16:31
你自己同小朋友對答吓好過啦
同埋執番d禮貌 出入同人講早晨唔該 多謝bye
k3教埋加減數 寫字寫靚d
已經好好
作者: ojoj18 時間: 21-9-9 14:32
bbellchung 發表於 21-8-23 18:25
本帖最後由 bbellchung 於 21-8-23 18:26 編輯
唔講差啲，點嚇到你怕繼續課金。萬一考唔上，佢又可戴定 ...
作者: piglover 時間: 21-12-28 19:19
aiko_0428 發表於 21-8-24 18:21
回覆 yeeling0101 的帖子
其實常識好廣泛，有好多野都可以學，正如解難能力都有幾百樣要解，唔通就要識晒 ...
係唔係佐敦果間樂X，呢間出名踩學生㗎啦。
作者: honeybibibibi 時間: 22-1-1 13:06
aiko_0428 發表於 21-8-23 17:29
上面試班上到作為媽媽既我真係好沮喪，大家媽媽有無同感？初初原意諗住可以比小朋友熟悉下面試既應對，但無 ...
我明。
不過當時呀囡唔係上緊面試班，而係寫作班。
每堂都話囡囡寫野唔夠creative，又唔夠主動呢樣果樣，又叫我同佢轉班，可能上返reading班會適合d。
上到連作為家長既真係對小朋友都無曬信心，仲好唔開心。
結果唔再學，再從新出發，效果更好。
| 歡迎光臨 教育王國 (/) |
Powered by Discuz! X1.5 |