教育王國
標題: 小一面試報幾多間？ [打印本頁]
作者: muimuihipper 時間: 21-2-10 16:54 標題: 小一面試報幾多間？
自問小女唔係好出眾又係細B, 應該要報多過10間，報15-20間會唔會太多？
謝謝
作者: bettyay 時間: 21-2-10 17:03
muimuihipper 發表於 21-2-10 16:54 
自問小女唔係好出眾又係細B, 應該要報多過10間，報15-20間會唔會太多？
謝謝
作者: bird06 時間: 21-2-10 17:06
比幾十蚊，報左可以唔去，我兩年前報左17、18間，去左13-4間。到你有一個offer喺手，就可以揀去定唔去。
作者: xubin2008 時間: 21-2-10 18:10
回覆 muimuihipper 的帖子
今年疫情，我報咗6間，如果冇疫情可能多報2間，我就唔喜歡報太多個一類家長但只代表我自己
作者: DengCK 時間: 21-2-10 18:12
bird06 發表於 21-2-10 17:06
比幾十蚊，報左可以唔去，我兩年前報左17、18間，去左13-4間。到你有一個offer喺手，就可以揀去定唔去。
...
agree. 報名都係辛苦阿媽，有offer就可以揀去唔去，以前當warm up係好好
作者: kisani 時間: 21-2-10 18:39
本帖最後由 kisani 於 21-2-10 18:40 編輯
muimuihipper 發表於 21-2-10 16:54
自問小女唔係好出眾又係細B, 應該要報多過10間，報15-20間會唔會太多？
謝謝
如一心非直私不可就盡報，但要諗埋實際考慮如果收你你係咪真係去讀(vs 大抽獎中寶校，直私學費，龍校直私小六可能冇呈分，交通距離係咪可接受範圍)，考慮晒應該唔會報到20間咁多，始終如果住九龍港島點都唔會報屯元天嘅直資(唔關學校質素事，只係純交通唔就腳)。
如一心讀一線官津，報直私只為backup offer/ 叩門嘅warm up, 就更加唔好報太多非心儀直資，到時大抽獎前比左offer你又要爭扎一輪....不過就算take次心儀直資offer唔抽獎，叩門階段都有機會100/000有offer, 睇你點部署
作者: 糯米米糍 時間: 21-2-10 20:08
我小朋友今年升小， 我自己一直都係aim直私，由佢k1開始慢慢做定功課，將所有直私list out分四類。
第一類最心儀，即學校定位同地點都理想。
第二類次心儀，即學校定位同地點其中一項較理想，而地點上即使唔近但交通都可以安排到或考慮搬屋都許可。
第三類可考慮，即未太清楚學校定位是否合適但地點同上。
第四類不考慮，即收左都唔會讀，包括學校定位，地點，學費等等。
加上考慮到小朋友有輕微speech delay，強項不在表達，預計在考直私上未必發揮理所，所以根據以上自己分類都大包圍報左20間。
唔同家長有唔同approach，始終因應每個家庭同小朋友要考慮嘅都唔一樣，不過參考有經驗家長意見，都會建議先按自己考慮因素將學校分類，再按小朋友特質決定報邊啲，多與少。
作者: xubin2008 時間: 21-2-10 21:49
回覆 糯米米糍 的帖子
可以冒昧問一句，你手中有幾個offer嗎？你真係一位思慮周到嘅家長
作者: Tang23 時間: 21-2-10 22:13
今年考小一，之前覺得報多過10間好過份，最後報咗16間今年改咗拍片，好多已經死亡，個一刻慶幸自己報多少少，一來死幾間都總有少少過到唔會全軍覆末，二來提升拍片經驗，起碼過唔到自己都知原來咁拍唔掂，幫到後面拍片個d.
個人支持大包圍，到時你可以唔去！
當然報多間都要付出少少嘅，不同學校填表不一樣，有d都幾煩
不過今年之後應該大部份學校已經有online 報名糸統，更加方便，應該唔會走番轉頭要親身吧！
作者: xubin2008 時間: 21-2-10 22:17
回覆 Tang23 的帖子
係咁啊，咁可唔可以講下依家你有幾個offer？
作者: 糯米米糍 時間: 21-2-10 22:38
xubin2008 發表於 21-2-10 21:49
回覆 糯米米糍 的帖子
可以冒昧問一句，你手中有幾個offer嗎？你真係一位思慮周到嘅家長 ...
值得一提嘅係，其實整個報考直私過程好多得著，我自己有報名而又有舉辦網上簡介會嘅學校，全部都有參加，加埋過程中體驗每一間學校喺疫情中嘅安排，其實係俾我哋一個好好嘅機會去了解學校，亦更了解邊類型學校適合小朋友。有啲學校以前未太了解，到小朋友意料之外入到2nd in會再多做功課深入了解學校，發現其實每間學校都有佢可取之處。回頭睇返的確學校真係經驗豐富會選到合適小朋友，作為父母都經過整個過程重新了解小朋友，好多學習。
作者: xubin2008 時間: 21-2-10 22:57
回覆 糯米米糍 的帖子
明白，明白，睇起上來，你好啱，好應該多D瞭解學校，咁才會選擇啱自己小朋友嘅學校！謝謝你嘅回覆
作者: EudyptulaMinor 時間: 21-2-11 00:03
muimuihipper 發表於 21-2-10 16:54
自問小女唔係好出眾又係細B, 應該要報多過10間，報15-20間會唔會太多？
謝謝
先list out心水學校（鍾意佢嘅教學模式），再按地點、學費或其他原因排除你考到都唔讀嘅，淨返我報咗7間，in咗6間，最後得兩個offer（非競爭大嘅學校）。
我女都係平凡細b，報幾多間要睇小朋友承受到幾多，要知道每一次面試都係壓力，你預頭兩間係warm up，唔好一味報哂神校，你報1間同10間都係一樣，叻女嘅就間間收，你都只可以讀一間，未有咁叻嘅就只會全軍覆沒，唔同level嘅學校各報兩三間我覺得就好夠啦。
作者: pokipoki 時間: 21-2-11 01:16
muimuihipper 發表於 21-2-10 16:54
自問小女唔係好出眾又係細B, 應該要報多過10間，報15-20間會唔會太多？
謝謝
我小朋友都係超細B今年升小，初初都覺得報10間好多，但聽下同學講完一齊報，有d二線就係報來當包底，有d明知唔會讀但只係為拎實戰經驗，所以最後都報左14間，我覺得報得多雖然係好麻煩，但今年太多變數，所以報左至算
作者: Tang23 時間: 21-2-11 09:04
回覆 xubin2008 的帖子
我4間有offer, 二間final in 完等result, 一間等緊final in, 一間final in 放棄了沒有去,另外二間好後先first In, 一改為拍片之後我就放棄，因為個時已經有offer 無咁心慌慌，又不是最心儀就算啦唔再迫阿仔拍片
其他失敗的全部都係video一開始已經死咗
中間個段時間不斷收reject, 個心好灰，所以好慶幸報多d死極都有d剩
拍video 都越拍越搵到多少少自己的best practice
而以我仔情況，有多d interview 經驗好有幫助，幫佢進入面試mode, 令後面個d越來越好
佢自己好知做咩，又唔會驚，仲會主動話咩咩幾點in 呀，我哋幾時練習
不過一開始拍片係極度痛苦，有好幾次/個我都想放棄
作者: Kitche 時間: 21-2-11 09:11
我覺得睇你自己係咪只想入直私，如是就要大包圍，會讀的都要報，博下邊間有offer，但如純粹用來back up, 就要策略性地揀D相對比較易入的私學，再博大抽獎！
作者: yiqiyihui 時間: 21-2-11 09:31
我其實冇數住幾多間咁報。見到啱嘅就報，back up 又報幾間。啱啱先數咗，冇數漏嘅話原來已經有15間。我仲以為自己報好少。我報呢個數當中係包括幾間國際學校，同埋諗住全軍覆沒嘅話會再報多啲國際學校。
報一定報哂先，至多到時唔去。撞時間係幾乎一定會，咁就已經冇咁幾間。
作者: Mrscatcatfung 時間: 21-2-11 09:47 標題: 回覆樓主：
本帖最後由 Mrscatcatfung 於 21-2-11 09:48 編輯
我報了12間，只得2間私立有offer. 另2間直資waiting. 好多間熱門都在第一round後rejected. 現在博大抽獎。我個小朋友7月b，唔叻講嘢。
作者: fadgare 時間: 21-2-11 12:44 標題: 回覆樓主:
照報，開頭有啲當warm up都要，撞期又少1/3，有offer有啲又唔去，報多啲冇壞，最多蝕報名費
作者: lambeanmama 時間: 21-2-11 13:04 標題: 回覆樓主：
本帖最後由 lambeanmama 於 21-2-11 13:05 編輯
我是去年考的（即今年已讀小一），一點分享供參考：
在報考前，我制訂了三個學校list: 1. 心儀學校，入到開香檳即收工停考的（我有三間）。呢三間是我心儀也覺得非常合適兒子；2. 心水學校，入到都好開心，也樂意俾錢交學費去讀（我有八間）。呢八間是在心儀度、合適度和位置三個考慮範疇各有擅場也各有隱憂的學校。3. Ok學校，是有名氣的私小，非心儀也覺得不適合兒子，但若無其他，樂意入讀好過裸抽津小（呢個list我有三間）。
做好個list後，我報晒以上咁多間，因為早段已有list2 其中一間直資取錄，所以最後好多都無再繼續參與了。
做list嘅好處是讓自己保持清醒。我不太認同預賽於操的。尤其我仔的性格是會「厭戰」個種（呢啲真係人人不同）。再者，當收到offer也可根據自己的心水，早作決定。讓等候中的家庭可早日收call。
僅供參考。祝考小順利。
作者: happygirl1284 時間: 21-2-11 13:36
我報左23間直私, 因為我好大決心選直私學校, 近同唔近屋企&港九新界都有報, 好多朋友都好驚訝我報咁多間, 但宜家依個遊戲差不多完結再回顧, 我無後悔報咁多間, 在我而言好處比壞處多.
有時家長覺得小朋友適合某間學校, 唔代表學校覺得小朋友適合, 我自己覺得我仔唔太適合的學校又會俾offer佢, 所以有時家長都未必最清楚某間學校適唔適合自己的小朋友, 反而交俾學校去決定仲準確, 學校見咁多小朋友, 好少收錯人
另外, 報得多, 手上點都會有d back up offer, 有得選擇好過無選擇, 手拿offer再去考感覺個心定好多
因為今年大部分學校都要求拍片, 小朋友拍得多越拍越自然, 一開始失敗的經驗也令我地可以作出檢討之後作出改善, 去到後期成功率大左, 仲誤打誤撞入到好幾間直私(包括spb)的2nd in (雖然仍然未有直資offer)
不過, 唔好處當然是小朋友會辛苦d, 我仔已拍過數唔到有幾多的片, 形形式式, 唔同topic的, 半身/全身, 廣東話英文普通話都拍過. 同埋有時就算一d學校我好清楚唔會搬屋去讀的, 報得自然就有期望, 但得waiting/reject時又會失望, 如果樓主不想經歷咁多次過山車心情, 就如上面一些家長所說, 可以先將學校分類, 排除某d就算有offer都一定唔會讀的學校, 再去決定
作者: xubin2008 時間: 21-2-11 14:07
回覆 happygirl1284 的帖子
你同小朋友今年其實收獲真的非常多，我要承認，我似乎有點不負責任，我報嘅太少了，希望其他家長冇好學我
作者: Tang23 時間: 21-2-11 14:09
happygirl1284 發表於 21-2-11 13:36
我報左23間直私, 因為我好大決心選直私學校, 近同唔近屋企&港九新界都有報, 好多朋友都好驚訝我報咁多間, ...
同時報多d仍有多個希望在明天
作者: xubin2008 時間: 21-2-11 14:16
回覆 Tang23 的帖子
講得啱，之前聽學校講座話報小學1間開始5間停止，冇需報太多，我相信咗仲以為我報6間已經唔少，依家遊戲差唔多結束，我才發現我嘅天真，唉
作者: happygirl1284 時間: 21-2-11 14:29
回覆 Tang23 的帖子
是的, 我一開始連收幾間reject/ waiting, 包括播道/真道, 真係信心大受打擊, 雖然話有offer咁遠都唔會讀, 但收waiting/reject始終會有hard feeling, 同埋會唸之後考其他直資都知成功率有幾多
作者: happygirl1284 時間: 21-2-11 14:38
回覆 Tang23 的帖子
係呀, 就算waiting都總算多一個機會
作者: Tang23 時間: 21-2-11 15:02
happygirl1284 發表於 21-2-11 14:29
回覆 Tang23 的帖子
是的, 我一開始連收幾間reject/ waiting, 包括播道/真道, 真係信心大受打擊, 雖然話有 ...
但係亦因此知道自己咁拍唔得，仲有機會改善俾後期個d
作者: lovelovebabe 時間: 21-2-11 16:37 標題: 回覆樓主:
之前有朋友話只報心儀嗰幾間，其他冇興趣，結果冇offer。我就buy盡量報多啲，收到offer先再去揀讀邊間學校。 面試期間入咗好多唔同討論gp, 知道學校嘅嘢多咗，就更深入了解間校啱唔啱自己小朋友，返而唔好一開始就幫小朋友刪走機會。
作者: apple1990 時間: 21-2-11 21:10
只報5間
作者: hkcsty 時間: 21-2-12 08:42
陳守仁 英華 聖若瑟英文 禮賢 優才 福小 聖瑪加利
以上幾間不用拍片 ， 又可以親身去學校面見。
作者: tracer 時間: 21-2-12 10:05
1）疫情因素，面試模式難掌握，報多一點，買個機會
2）一、二、三線各報一啲，有攻有守，容易拎到一個半個定心丸
3）交通要諗，除非你可以隨時孟母三遷
4）實際上in幾多間，觀察子女及父母心理質素/變化而定，再作調節
5）結果總是不似預期，waiting/reject 等閒事，搵多啲同路人圍爐，支持下去。
作者: xubin2008 時間: 21-2-12 11:23
回覆 hkcsty 的帖子
加上一間德雅！
作者: chicken9 時間: 21-2-13 12:46
happygirl1284 發表於 21-2-11 14:29
回覆 Tang23 的帖子
是的, 我一開始連收幾間reject/ waiting, 包括播道/真道, 真係信心大受打擊, 雖然話有 ...
一樣呀，一開始音小已失敗，然後播道/真道都無 offer，再黎 LMC 又唔得⋯⋯⋯
作者: Chan2015 時間: 21-2-14 12:43
我今年報左十幾間，感恩有幾間offer,當中已有本身最心儀的
我都贊成為小朋友報多d, 一線二線唔同類型都試下，無謂一早幫小朋友定型，你揀學校的同時，學校亦揀你，收左也可以再考慮讀唔讀
作者: Azzurro 時間: 21-2-14 13:38
前提：實際去考學校之前，其實家長對幼稚園，小學的了解很虛無飄渺
由於幼稚園只報名幾個名牌幼稚園，和幾個家附近的一般幼稚園
慘淡收場
所以決定小學大幅增加報名數量
就如網友所說
1. 要按自己標準分開三四個級別
2. 按級別分散投資
報多幾家，好處很明顯
對家長來說：
1. 通過拜訪，更了解學校環境和老師
2. 填了很多次問卷和準備簡歷，家長更了解學校對父母和小孩的期待
3. 父母更了解自己對小孩的期望與實際距離
對小朋友來說：
1. 小朋友更了解小學到底是什麼，估計更容易適應小學生活
2. 小朋友耐久力明顯提升
考最心儀小學之前，最好有幾個學校作為演習
讀小學之前，最好先更多了解小學
甚至完全無意讀收費小學，都應該藉此了解小學（請不要打我）
作者: xubin2008 時間: 21-2-14 13:56
回覆 Azzurro 的帖子
點會打你，你講得好啱，我就後悔自己當初報嘅太少啦，得6間，唉，後悔冇早D睇到大家嘅想法，依家我淨係想打自己！
作者: Kenji0105 時間: 21-2-14 14:08
報幾多間學校好講個人想法，唔需要受別人影響。因為孩子是自己的，無必要向其他人交代，唔需要因別人報得多定少而影響，忠於自己就可以了。
作者: ShunCheongBaBa 時間: 21-2-15 08:38
我們在小一報讀直/ 私學校也申請了 18 間，到現在差不多接近尾聲了，我也覺得申請學校數量比較多是正確的，尤其是今年疫情突然爆發，有很多直/私學校突然轉拍片而打亂了某部份家長們一直為小朋友的部署，我們便是其中一例子。在多方面為女兒的訓練如英語/普通話對答，20 內加減心算，日常生活題，處境題，禮義談吐等等，到後來全部也是用不著，更失望的是小女對拍片是極為抗拒，每次她聽到要拍片，第一個回覆是：[可唔可以簡單D]
,我每次聽到都是很心痛及無奈，但遊戲始終要繼續因為孩子的前途要緊。就這樣很辛苦及努力下拍了多段女兒不太投入的短片去呈報直/私學校均全部 reject , 連續收幾個 reject 下真的會有「收reject 收到懷疑自己的人生」！這時應該是 9-11 月份，疫情是第三波後而未到第四波，幸好還有幾間直/私堅持要面見考生，我們知道這是唯一女兒可以突圍的機會，所以我們更要認真地去準備，每次去到面試的小學我們所見到的考生人數之多是難以想像，小朋友要在短短 15-30 分鐘的面試而被選中，相信實力與運氣是缺一不可。
在此我建議來年的家長如果你不怕程序煩複要多報幾間直/私，因為有時「變數」如疫情是我們不能預計，真的有很多家長和考生也不喜歡拍片。多些面試的機會也可以給小朋友作為一個熱身，到心儀的小學時會更有把握。
作者: xubin2008 時間: 21-2-15 09:23
回覆 ShunCheongBaBa 的帖子
我百分百支持你嘅觀點！完全啱晒，非常客觀！
作者: pokipoki 時間: 21-2-15 09:54 標題: 回覆樓主：
本帖最後由 pokipoki 於 21-2-15 10:22 編輯
經過今年升小經歷，發覺報學校真係報多d無妨
有得面見就怕撞時間，無得見而改zoom或拍片，雖然係麻煩，但可以試下唔同面試模式
如果只報家長心儀的學校，又真係太搏，家長心儀唔代表小朋友一定會成功獲取錄
我之前報左好多二線作為練習或後補，當中都會睇到唔同學校行政上的作風，可以比家長feel下如果小朋友入讀後，學校係想家長點做或點配合佢地，你都可以知道自己到時係咪真係可以適應到呢間學校
相反，有d學校我係當後補，但通過面見或zoom，都可以對學校改觀。當中有3間我印象都好好，覺得如果取錄左，都會覺得入面既老師好有耐性同鼓勵小朋友
另外我小朋友係超細b，拍片又係極抗拒，不斷收rejected.。但拍拍下到之後，我同佢都開始搵到一d心得，睇下可以點就佢，拍片都smooth左好多，後來幾乎全部都有second in，所以都係經驗累積
作者: happygirl1284 時間: 21-2-15 10:03
好有同感，我們由k2開始就train小朋友學術，中英文認字，普通話，數學（已可以計三至四位及進位加數）。估不到好多轉曬拍片，我仔不嬲都唔係個d好多野講：表達能力好好個種小朋友。用英文交談ok的，但拍片自己講一分鐘完全係另一回事。完全無機會表現佢的優點，真係好沮喪
作者: Tang23 時間: 21-2-15 10:22
pokipoki 發表於 21-2-15 09:54
經過今年升小經歷，發覺報學校真係報多d無妨
有得面見就怕撞時間，無得見而改zoom或拍片，雖然係麻煩，但 ...
作者: happygirl1284 時間: 21-2-15 11:12
本帖最後由 happygirl1284 於 21-2-15 11:21 編輯
同意，福小我都係越了解越中意，特別欣賞徐校長...我心態都係有理無理報左先，真係有2nd in or offer先再唸，有得揀好過無得揀
作者: happygirl1284 時間: 21-2-15 11:23
回覆 xubin2008 的帖子
我地收waiting or reject 的收穫都好多，哈哈。
作者: xubin2008 時間: 21-2-15 11:38
回覆 happygirl1284 的帖子
咁好啊，有多D選擇同埋小朋友都會成長，所以我當時太幼稚啦！
作者: happygirl1284 時間: 21-2-15 11:46
個個情況唔同，只係我比較無安全感，報多d令我自己安心d
作者: DengCK 時間: 21-2-15 11:46
happygirl1284 發表於 21-2-15 10:03
好有同感，我們由k2開始就train小朋友學術，中英文認字，普通話，數學（已可以計三至四位及進位加數）。估 ...
其實到面試時先更加係重點睇小朋友應對同表達能力。學術只是基本門檻。好多學校second in已不再考學術
作者: pokipoki 時間: 21-2-15 11:55
DengCK 發表於 21-2-15 11:46
其實到面試時先更加係重點睇小朋友應對同表達能力。學術只是基本門檻。好多學校second in已不再考學術
...
Aps 2nd in就係無問學術，但我唔明1st in拍片讀中英文書又何來睇到學術程度？ 
作者: DengCK 時間: 21-2-15 11:57
pokipoki 發表於 21-2-15 11:55
Aps 2nd in就係無問學術，但我唔明1st in拍片讀中英文書又何來睇到學術程度？
...
操學術比操表達能力易。學校對自己操學術有信心。操學術你日日做練習就得啦。
作者: pokipoki 時間: 21-2-15 11:58
DengCK 發表於 21-2-15 11:57
操學術比操表達能力易。學校對自己操學術有信心。操學術你日日做練習就得啦。
...
咁朗讀圖書係睇發音同埋睇下小朋友讀到咩level既書？我諗來諗去都唔明係點樣收生
作者: DengCK 時間: 21-2-15 12:01
pokipoki 發表於 21-2-15 11:58
咁朗讀圖書係睇發音同埋睇下小朋友讀到咩level既書？我諗來諗去都唔明係點樣收生
...
睇記性、語氣、自信、情感表達、發音準確與否、姿勢、小動作等等等
作者: pokipoki 時間: 21-2-15 12:02
DengCK 發表於 21-2-15 12:01
睇記性、語氣、自信、情感表達、發音準確與否、姿勢、小動作等等等
原來係咁 
作者: happygirl1284 時間: 21-2-15 12:48
本帖最後由 happygirl1284 於 21-2-15 13:03 編輯
回覆 DengCK 的帖子
認同，學術唔夠第一round已被out，但能去到最後攞到offer soft skill更重要. 兩種訓練都需要，尤其是講故事，解難和情景題
作者: chicken9 時間: 21-2-15 13:07
pokipoki 發表於 21-2-15 11:58
咁朗讀圖書係睇發音同埋睇下小朋友讀到咩level既書？我諗來諗去都唔明係點樣收生
...
英華都係2次面見時都要求小朋友帶書去讀
其實小朋友讀書可以比單純考學術更能了解到家庭教育中家長做左幾多，小朋友能面試時自信攞住書分享比老師，唔一定照書直讀，呢個家庭需要從小就伴讀陪養小朋友閱讀既興趣，所花既係每個晚上10-30分鐘，幾年黎既積累，小朋友能不照書直讀，代表佢既表達能力同對書內容既了解，只係睇過一次兩次既書係做唔到既，小朋友亦好單純，本書佢唔鐘意，佢係唔會睇咁多次
作者: lushi201708 時間: 21-2-23 08:02 標題: 回覆樓主:
說一點小小的看法，我建議多報幾間學校。高中低都要有一些。第一，機會大。第二，小朋友面試同大人一樣，也需要練習 ，前幾個面試可以視為預熱 熟悉。有些學校你不會去，但有幾間學校offer在手，可以提升孩子的自信心，家長心情愉快，對孩子影響也非常大。
作者: ipki 時間: 21-2-24 10:38
lushi201708 發表於 21-2-23 08:02
說一點小小的看法，我建議多報幾間學校。高中低都要有一些。第一，機會大。第二，小朋友面試同大人一樣，也 ...
好過去上面試班
作者: fwstides 時間: 21-2-26 00:20
有龍5間
無龍10-15間
作者: cy372818 時間: 21-2-26 15:49 標題: 回覆樓主：
本帖最後由 cy372818 於 21-8-2 23:54 編輯
人生係好有趣，有時候...收你果間可能係你根本冇諗過，而好想入到果間就冇消息...所以我覺得報多兩間冇壞...
作者: happygirl1284 時間: 21-2-26 16:18
回覆 cy372818 的帖子
我的情況正正就係咁, 我完全唸都無唸只當back up的竟然收左, 但好想好想入的又收waiting, 有時係收左offer後先去了解下依間學校, 反而感覺好左, 慶幸自己有報到..就算真係waiting的學校, 都有call waiting的機會, 但無報就唔使唸了
作者: jennylady 時間: 21-2-27 02:03
我今年靠小一
我經驗話比我知要報多幾間
有時候撞期，有時候小朋友失準
有offer 的人間間有
無offer 的就一間都無
我主攻神校，死得
好彩都有一線直私打底
作者: Wistaria 時間: 21-3-3 16:40 標題: 回覆樓主:
家長有心機填表，可以報多幾間當練習。
但太過山長水遠，就唔好了。
作者: littlecat123 時間: 21-4-24 19:00
回覆 muimuihipper 的帖子
我都諗住報18間 預咗有d會撞期去唔到 。 亦有整一個學校list, 排左priority, 如有撞期就唔去邊間咁
作者: jennylady 時間: 21-4-24 20:11
我報了十間
全部大熱門
真係一額汗
幾年後到妹妹。我起碼十幾二十間
😆
作者: kc33 時間: 21-4-25 05:35
報左11-12間
如果比我簡多次 我會報夠20間
就算唔會讀 但考得早個d
可以當拎經驗 撞時間就簡心儀先去
報多好過到時開頭個幾間死哂
會心慌影響之後心情
同埋考得遲個d 可能已經有神校offer 唔去考你中既機會又大左
作者: DengCK 時間: 21-4-25 09:15
kc33 發表於 21-4-25 05:35
報左11-12間
如果比我簡多次 我會報夠20間
就算唔會讀 但考得早個d
講得好啱。今年最尾果幾間如港同都少左班有神校offer的人考，機會大好多
作者: rickdom6 時間: 21-4-25 15:25
我兩年前報左10間, 一間冇去。開始時本身PLAN了報多D, 不過一收到其中一間可抽獎私小OFFER之後就冇去最後果間IN~ 同埋冇再報多D
作者: Phyllis97 時間: 21-4-30 12:48
這一年不磪定因素太多，建議多報，因為間間學校今年做法同明年可以好唔同今年有d堅持面見，有d zoom, 有拍片定生死，乜都有
我報了20間，小b，9成有2 in, 6成有 offer/ waiting
唔經歷過，完全唔知會點玩同阿女當時狀態。雖然辛苦，但女兒也一直成長，越戰越勇，現在看來，值得的
作者: twinkle00 時間: 21-4-30 15:29
回覆 muimuihipper 的帖子
我都打算報至少15間.. 考試呢啲嘢好難講㗎嘛，有時狀態唔好，有時又未熱身，又驚佢突然傷風感冒，又驚佢撞期... 唔多啲，面試時間出咗再揀都唔遲!
作者: happypapa11 時間: 21-5-2 05:41
如果父母有時間填表，建議報15-20間
疫情下各校遊戲規則隨時改變，
做好心理準備最心儀學校收waiting、仲有機會揀次心儀去面試
作者: ms_bob 時間: 21-5-9 20:58
就算唔爆第五波，我諗有上年嘅經驗，有唔少學校會繼續拍片做第一輪面試
報十幾間即拍十幾次片，自己諗諗
上一年經驗真係好痛苦，之前都有 post 講
而家唔係前年咁人人有 first in ,送個小朋友入學校 in 就得，每拍一間片真係要付出唔少呢
作者: Jean1769 時間: 21-5-10 09:34
ms_bob 發表於 21-5-9 20:58
就算唔爆第五波，我諗有上年嘅經驗，有唔少學校會繼續拍片做第一輪面試
報十幾間即拍十幾次片，自己諗諗
但其實上年好多學校要拍的內容都一樣，只係執藥咁執返出嚟
作者: tummypooh 時間: 21-5-10 13:02
唔怕煩同花錢的話，多報其實冇所謂，報完先再諗去唔去考~~~
因為實會有好多不可預見的問題，報太少可能撞晒期，報六間可能得兩三間去到~~~
作者: Jean1769 時間: 21-5-10 13:54
tummypooh 發表於 21-5-10 13:02
唔怕煩同花錢的話，多報其實冇所謂，報完先再諗去唔去考~~~
因為實會有好多不可預見的問題，報太少可能撞晒 ...
exactly.更重要係你未玩過唔知自己小朋友在公海咩位置。就算報廿間都可唔無offer或有哂廿間offer
到有滿意offer在手先決定去唔去in埋其他
| 歡迎光臨 教育王國 (/) |
Powered by Discuz! X1.5 |