教育王國
標題: 点解我個囡咁蠢！ [打印本頁]
作者: Belle_Piano 時間: 19-1-28 20:23 標題: 点解我個囡咁蠢！
本帖最後由 Belle_Piano 於 19-1-28 20:25 編輯
D中文詞語教極唔識…講解左好多次作左好多條填冲都唔識做
數學呢两次test份卷真係冇難度…同之前學校功作纸可以講話係一樣…我亦之前作過同類形題目俾佢做⋯成绩都係唔掂
英文都叫佢最强，不過成日好多careless mistakes...好似問題用past tense問佢用present tense 答… 長問題可以答非所問，寫D唔關事嘅野落去
作者: Belle_Piano 時間: 19-1-28 20:23
本帖最後由 Belle_Piano 於 19-1-28 20:26 編輯
仲有好多其他野教佢好多次，教到我呕血。好似寫野叫佢左手要噤住本簿等本簿唔好走來走去，呢樣野呢幾年教左不下100次都唔識。每日我check功課時要佢所有功課同筆袋都擺哂响書台，又係都唔知教左幾多次都做唔到！另外，平時做野乜都慢，行路，冲涼，拾書包… 佢可以用40分鐘拾書包，聽日都有欠帶野。佢係一個好easily distracted嘅人,個把口一日享住歌，我成日話佢，做咩成日都唱住歌千方百計要自己分心呢？
呢排好幾樣要test,我用左好多時間同佢prepare，派返D卷都令我失望。比起上來，亜妹成績/吸收程度正常好多。点解個（大）囡個腦唔曉轉呢？
作者: Belle_Piano 時間: 19-1-28 20:24
我覺得每晚都要同佢地做功課，（由其同個大囡）晚晚攪到9:30-10，星期日都一樣（要温書凖備星期一丶二默書），真係好攰。我自己又要响屋企做工司D野，我真係好多時都好炆，唔知呢D日子幾時至完…
作者: Yanamami 時間: 19-1-28 20:53
再蠢都係你生成，佢都唔想……
作者: Jane1983 時間: 19-1-28 21:09 標題: 回覆樓主:
大女幾年級？忍耐和等待。如果佢無學障，你日日用心教佢，佢大大吓終于會開竅。
作者: Lu324 時間: 19-1-28 22:11 標題: 回覆樓主
雖然同一條腸出, 但唔同就係唔同. 天生既. 試下搵小朋友可愛既地方.
我細仔唔叻, 教佢幼稚園數已經嘔血, 但佢有可取之處.
作者: rulerL 時間: 19-1-28 22:13
Belle_Piano 發表於 19-1-28 20:23 
D中文詞語教極唔識…講解左好多次作左好多條填冲都唔識做
數學呢两次test份卷真係冇難度…同之前學校功作纸 ...
可能未必同個人聰明與否有關呢，可能係個人性格使然。
我細仔都係做事好滋油慢摸摸嗰種，你逼佢佢都係咁，反而搞到自己同佢都好大壓力。
試下放鬆啲去面對，可能效果會更好。
作者: gracelam 時間: 19-1-28 22:33
Belle_Piano 發表於 19-1-28 20:23
D中文詞語教極唔識…講解左好多次作左好多條填冲都唔識做
數學呢两次test份卷真係冇難度…同之前學校功作纸 ...
佢唔識自己都唔想, 仲要比媽媽話自己蠢。 
唔係個個小朋友讀書一點就明, 無讀書條筋就係咁, 能力有限, 盡左力咪算, 要求唔好太高, 又或者外判比人教, 唔好傷大家感情。
作者: Belle_Piano 時間: 19-1-28 23:23
本帖最後由 Belle_Piano 於 19-1-28 23:31 編輯
當然佢轉數唔高都係我生嘅
我都冇响佢面前話佢蠢
我只係覺得我好攰
日日講D同様嘅野
佢都有可取之處
畫畫叻同EQ高
Outgoing同D體能幾好
不過佢靠呢D就升唔倒自己小學嘅中學了
真怛心
我都試過搵補習老師
試過有一個好好嘅
做左一年左右話要專注讀書（醫科）唔補了
之後果D質素就麻麻地
End up 都係我自己睇返
作者: Jessy 時間: 19-1-28 23:33
佢唔係蠢, 係粗心大意, 好似我大仔咁, 係跟功課跟得好辛苦, 六年級都仲係甩甩漏漏咁, 我都無辦法.
你女性格OUTGOING體能又好, 咁或者比佢發展下第二樣野羅.
作者: lulumelody 時間: 19-1-28 23:41
Belle_Piano 發表於 19-1-28 23:23
當然佢轉數唔高都係我生嘅
我都冇响佢面前話佢蠢
我只係覺得我好攰
如果子女資質麻麻，除非好好彩，遇到有心的補習老師，否則就要自己嘔心咁教，重要预咗付出咗佢地成績都麻麻。(我自己經驗)
不過，作為父母連自己都放棄，就無人幫到佢地。唯有每日同自己講盡咗力就算，叫問心無慚，成績盡量唔諗。
有時會安慰自己係依個世界唔係人人都讀到書，反而好多讀唔到書將來都有唔錯的成就。只要佢唔好學壞就得。
樓主加油。我明你感受!
作者: kelly6688 時間: 19-1-29 01:18
Belle_Piano 發表於 19-1-28 20:24
我覺得每晚都要同佢地做功課，（由其同個大囡）晚晚攪到9:30-10，星期日都一樣（要温書凖備星期一丶二默書 ...
我們都係同道中人(emoji)，我個還一大聲她就哭，間學校係一線小學，功課量又多，她又做得慢或唔識，搞到每天根本沒時間娛樂！我又要怕她跟唔上又驚她情緒唔好.
我經常唸緊轉校，但係轉去邊度好呢？聽講二線現在也很谷，三線就要拍頭10才升中好. 啊女已經係三年級，成績排到很後.還有今年細路已經讀小學，他又跟到又快手.如轉就要2個一起轉，所以究竟轉還是堅持呢？？ 轉國際學校又怕她現在英文跟唔到，又怕她在原校越讀越沒自信. 真係好矛盾..唉.
作者: stitch~ 時間: 19-1-29 08:12
Belle_Piano 發表於 19-1-28 20:23
仲有好多其他野教佢好多次，教到我呕血。好似寫野叫佢左手要噤住本簿等本簿唔好走來走去，呢樣野呢幾年教左 ...
我女都係咁 做嘢慢個口又係成日亨歌
不過佢以家k3,希望大啲會有改善
作者: lulumelody 時間: 19-1-29 08:21
kelly6688 發表於 19-1-29 01:18
我們都係同道中人(emoji)，我個還一大聲她就哭，間學校係一線小學，功課量又多，她又做得慢或唔識，搞到每 ...
轉國際越细越好，小三還可以。去一D無咁出名的，等佢係入面浸下D英文，如果去到中學重難。
作者: b3410 時間: 19-1-29 08:57
感覺係媽媽自己壓力太大。小朋友幾年級？如果日日，時時對著小朋友，係睇唔到進步/改變的。如同播到泥土中的種子，時時刻刻監察，好似一世都唔識發芽。
不如試一下大家退後一步，暫時唔再困獸鬥功課，學習之類，每日只做一個最簡單的task，其他俾佢自己慢慢完成。欠功課俾老師鬧，俾佢自己知道後果。
媽媽自己都俾自己set時間限制，例如每日最多睇佢30-60分鐘，其他時間做自己事。
作者: GreenMaDad 時間: 19-1-29 09:01
我都好像樓主一樣，教小朋友有D野佢永遠改吾到，成績又不大好。我有時會直接話小朋友蠢，我小朋友既問題係佢唔知自己蠢，仲以為自己好醒.....佢响讀書以外既野（eg 人際關係、情緒控制、運動）係既醒，所以亦有很多人讚佢叻，但我有話佢知, 嗰D方面佢好叻，但佢要明白佢讀書吾夠好，係吾夠專心，吾夠用心。
現在小朋友高小，可幸的是佢比以前緊張成績多好多，所以也比以前努力左，我見佢開始緊張，我亦開始放鬆（亦大大減低自己預期）。
作者: little_yolky 時間: 19-1-29 09:30
Belle_Piano 發表於 19-1-28 23:23
當然佢轉數唔高都係我生嘅
我都冇响佢面前話佢蠢
我只係覺得我好攰
入唔到中學部, 咪去另一間, 世界咁大, 一定有一間啱佢既。係好攰架, 不過佢畫畫叻同EQ高, 到高小你會發現你死少好多細胞的, 因為好多JM都話, 視藝無天份就無得救, 視藝都要呈分架, 煩少一樣得一樣呀。而且, 到青春期, D細路成日又要生又要死, 又要刀仔拮大脾, EQ高好好呀。唯有自己放鬆下囉。
作者: Olympian 時間: 19-1-29 09:56
Belle_Piano 發表於 19-1-28 20:23
仲有好多其他野教佢好多次，教到我呕血。好似寫野叫佢左手要噤住本簿等本簿唔好走來走去，呢樣野呢幾年教左 ...
好似我仔啊！ 
我仔小4了，我已經放棄叫他左手㩒簿寫字。你check 功課個程序，我個仔都唔會做得到。就連食完野抹好個咀都未做到。做野慢，唔專心及甩漏多唔洗講。
我間唔中就會問下佢：今日放學你係咪又執書包執得最慢呀？笑下佢。我個仔成績都可以，但自理真係好嚇人。佢有日放學關不到書包，書又放不進去，乜皮乜骨咁放學。原來佢放左件校樓落書包，咁緊係放唔落書啦。果刻我真係覺得佢蠢到無人有。
Careless mistakes 其實都係無得救。精神好時表現會較好，如果唔夠精神仲差。所以要夠時間放鬆和休息，最緊要唔好病。
作者: 猴子爸 時間: 19-1-29 10:38
本帖最後由 猴子爸 於 19-1-29 10:43 編輯
Belle_Piano 發表於 19-1-28 20:23
仲有好多其他野教佢好多次，教到我呕血。好似寫野叫佢左手要噤住本簿等本簿唔好走來走去，呢樣野呢幾年教左 ...
有沒有認真了解過小朋友的內心世界？他們可能已經充滿恐懼，厭惡，擔憂等等，很多時“慢”，“分數低”，“不懂”只是結果，歸根究底，可能另有原因，有些小朋友會用“哼歌”，“無厘頭地笑”，“扭動身體”來掩飾自己的不安。要了解，並不是你問她：“你有沒有恐懼？”，她答：“沒有”，就完了。
小朋友不容易表達自己的內心世界，也有可能她已經怕了你，也不原意全講真話。
作者: Jane1983 時間: 19-1-29 11:29 標題: 回覆樓主:
講到教幾百次都唔聽，呢d亦好尋常。朋友教佢女洗手，佢話教咗10年，佢女都係一按洗手gel，唔搓就直接冲水。我教我女同人講嘢，全程要望住眼睛，一樣係以年計的提醒。
睇開d！
作者: lulumelody 時間: 19-1-29 11:43
Jane1983 發表於 19-1-29 11:29
講到教幾百次都唔聽，呢d亦好尋常。朋友教佢女洗手，佢話教咗10年，佢女都係一按洗手gel，唔搓就直接冲水。 ...
都係。有時父母對仔女成績要睇開D，無band1A中學讀就讀band1B或C，甚至band2。
如果只可讀band3,諗下佢有什麼專長再發展下。
作者: vpo0615 時間: 19-1-29 11:59
lulumelody 發表於 19-1-29 11:43
都係。有時父母對仔女成績要睇開D，無band1A中學讀就讀band1B或C，甚至band2。
如果只可讀band3,諗下佢有 ...
然後就只能入讀D唔係(家長)理想嘅學校, 再愁吓小朋友以後人生路點行.....
作者: little_yolky 時間: 19-1-29 12:21
vpo0615 發表於 19-1-29 11:59
但試問有幾多個家長可以跳出呢個心理關口?考過直私嘅, 都知道面試係用學術嚟定成敗, 假如小朋友強項不在學 ...
其實, 做機電維修技師, 隨時好搵過一般大學畢業生。
作者: Felix223 時間: 19-1-29 12:41
Belle_Piano 發表於 19-1-28 23:23
當然佢轉數唔高都係我生嘅
我都冇响佢面前話佢蠢
我只係覺得我好攰
你自己都好忟？其實你平日d情緒脾氣已經比你個大女看面色？小朋友點會感覺唔到？
相信冇人想自己蠢，醒唔醒或多或少有遺傳，做父母比d耐性去教，咁點都好，慢慢教，就算讀書唔夠叻，最重要唔好學壞，多d了解個女的內心世界，唔好成日話佢蠢，而家的小朋友已經比我哋個代叻咗好多。
作者: Jane1983 時間: 19-1-29 14:03
lulumelody 發表於 19-1-29 11:43
都係。有時父母對仔女成績要睇開D，無band1A中學讀就讀band1B或C，甚至band2。
如果只可讀band3,諗下佢有 ...
睇得開好緊要。
作者: haihaimom 時間: 19-1-29 15:02
回覆 Belle_Piano 的帖子
有啲似係專注力不足嘅問題,如果有懷疑可以去做個專業評估
作者: Belle_Piano 時間: 19-1-29 16:25
本帖最後由 Belle_Piano 於 19-1-29 16:33 編輯
多謝大家唔同嘅提點/意見
我呻完都會繼續教佢
只係我真係好攰
我有諗過同佢發展下所長
佢唱歌跳舞都得
不過真係冇時間學
以佢做功課丶讀書嘅速度
加上星期六會上補中丶數嘅堂同主日學
星期日要凖備下星期嘅測驗丶默書
佢真係冇時間再上其他
我都覺得好矛盾
一方面想佢發展吓唔係學術嘅野
（可能對佢大個謀生有用）
但如果要上呢D堂佢D功課就攪唔掂
我真係羡慕有D佢嘅同學同家長
D小朋友四年级學琴已學到五级
做功課又，唔洗亜媽理
冇法啦
唯有睇開D啦
作者: Belle_Piano 時間: 19-1-29 16:29
本帖最後由 Belle_Piano 於 19-1-29 16:34 編輯
haihaimom 發表於 19-1-29 15:02
回覆 Belle_Piano 的帖子
有啲似係專注力不足嘅問題,如果有懷疑可以去做個專業評估 ...
我之前同佢睇過家庭医生医生話我個囡D成績都唔係咁差
又未到有專注力不足喎
佢好似意思係如果成绩成日唔及格就可能有傾向係
作者: haihaimom 時間: 19-1-29 17:06
Belle_Piano 發表於 19-1-29 16:29
我之前同佢睇過家庭医生医生話我個囡D成績都唔係咁差
又未到有專注力不足喎
專注力不足係會影響成績，但有好多依然成績好好，因為噤所以學校排唔到評估，要去到中學（課程好需要專注力）先發現，我唔係話你小朋友係，只係想提一提你。我聽過森美個訪問，佢話自己大個咗先知自己有。佢會考成績都好好（理科），但佢就話自己記性唔好，一啲有邏輯嘅嘢就冇問題，背台詞就覺得幾困難。
作者: Belle_Piano 時間: 19-1-29 17:14
haihaimom 發表於 19-1-29 17:06
專注力不足係會影響成績，但有好多依然成績好好，因為噤所以學校排唔到評估，要去到中學（課程好需要專注 ...
作者: Belle_Piano 時間: 19-1-29 17:19
little_yolky 發表於 19-1-29 09:30
呻完就算了, 其實你把口無講, 對眼已經俾佢知道你話緊佢蠢了。我會安慰自己, 佢蠢係因為似老公囉。
...
我老公係成日有意冇意讚自己醒果D…
成日同個囡講埋D大道理…
作者: Olympian 時間: 19-1-29 17:22
Belle_Piano 發表於 19-1-29 16:25
多謝大家唔同嘅提點/意見
我呻完都會繼續教佢
只係我真係好攰
自己教係好勞氣。比上不足，比下有餘就算了。
作者: little_yolky 時間: 19-1-29 17:39
猴子爸 發表於 19-1-29 10:38
有沒有認真了解過小朋友的內心世界？他們可能已經充滿恐懼，厭惡，擔憂等等，很多時“慢”，“分數低”， ...
有一次, 我响度發呆, 散漫既視線不經意望住阿細個方向, 後來佢同我講返, 佢當時做緊功課, 以為我望住佢, 個樣好惡, 佢好驚, 即刻個腦係咁loop自己做錯乜呢? 
佢話嚇餐死。
C6都成日話我：好心你發呆個樣唔好好似諗嘢咁啦！
作者: little_yolky 時間: 19-1-29 17:59
Belle_Piano 發表於 19-1-29 16:25
多謝大家唔同嘅提點/意見
我呻完都會繼續教佢
只係我真係好攰
唔駛羡慕同學仔阿媽既, 靜靜雞話你知, 我大女都係你口中唔駛理做功課/溫書果隻, 仲要係一年班開學已經唔駛理。除咗主動溫習, 仲會主動預習, 係咪好完美啦。非也。佢除咗讀書好D之外, 其他真係成個港女咁架, 勁公主病, 佢同學&同學仔阿媽一D都睇唔出既, 呢D稱之為你見人好, 人見你好而已。所有仔女, 都緊有幾樣難頂嘢俾阿爸阿媽歎既。
如果真係攰, 去做下body massage + 通淋巴, 勁舒服, 出嚟又係一條好漢。
作者: GreenMaDad 時間: 19-1-29 19:53
回覆 Belle_Piano 的帖子
我會支持你俾囡囡繼續唱歌跳舞，學術方面，温左都吾好，不如索性吾好温.
成功感係人生好重要的一環，亦都關係到她的自我形象，到青春期時，唱歌跳舞好可能係令佢响朋輩中建立自信的項目，不要放棄呀！
作者: Jessy 時間: 19-1-29 19:54
Olympian 發表於 19-1-29 09:56
好似我仔啊！ 我仔小4了，我已經放棄叫他左手㩒簿寫字。你check 功課個程序，我個仔都唔會做得到 ...
佢交齊功課，考試前同佢溫下書，其他乜都唔理了。
作者: Jessy 時間: 19-1-29 20:00
GreenMaDad 發表於 19-1-29 19:53
回覆 Belle_Piano 的帖子
我會支持你俾囡囡繼續唱歌跳舞，學術方面，温左都吾好，不如索性吾好温.
不過做父母，真係好難放低呢一個堅持。
作者: Yanamami 時間: 19-1-29 20:16
本帖最後由 Yanamami 於 19-1-29 20:18 編輯
GreenMaDad 發表於 19-1-29 19:53
回覆 Belle_Piano 的帖子
我會支持你俾囡囡繼續唱歌跳舞，學術方面，温左都吾好，不如索性吾好温.
12分贊同。唔知楼主知唔知蘇樺偉既故事？
作者: little_kid 時間: 19-1-29 22:57
Belle_Piano 發表於 19-1-28 23:23
當然佢轉數唔高都係我生嘅
我都冇响佢面前話佢蠢
我只係覺得我好攰
你囡咁似我果個。我英文科搞了幾年也未搞好。頭一兩年默書要重覆温幾廿次都唔記得，只能將勤補綴，人哋温一兩小時，佢要温一星期。再讀上去，學深啲grammar, sentence structure, tense, 無得死記。課外練習做5,6 本，測考同無温一樣。past tense 問，全部present tense 答，結果成part 無分，真係嘔血。我現在外判出去俾人教。老師觀察佢一排，話佢做練習好正常，但一做卷就好緊張，無信心，可能我以前成日捉佢錯處喎。叫我要多啲讚賞佢(其實見到佢派嘅卷真係好難讚得落 )。補了半年，佢成績係好了少少少少，至少無再跌。多了讚佢，佢現在也免為其難看下英文書，雖然還是很薄很薄的英文書。
作者: Belle_Piano 時間: 19-1-29 23:27
我諗如果俾佢去上唱歌跳舞班
佢一定好開心
不過就一定响學術方面會再跌
做功課讀test會更加唔專心
佢而家D成绩成日都得六十幾分（六十分及格）
久唔久就唔及格一次
真係怕左佢呀
作者: Belle_Piano 時間: 19-1-29 23:28
Yanamami 發表於 19-1-29 20:16
12分贊同。唔知楼主知唔知蘇樺偉既故事？
作者: tkinwong 時間: 19-1-29 23:51 標題: 回覆樓主
樓主在本身工作都係繁重的情況下自己補阿女全科，真係好難兼顧，效果也未必好，甚至影響親子關係。
可能搵個私補，對阿女同樓主反為無咁大壓力。
作者: Yanamami 時間: 19-1-30 00:38
Belle_Piano 發表於 19-1-29 23:28
冇喎…
作者: shadeslayer 時間: 19-1-30 08:29
Belle_Piano 發表於 19-1-29 16:25
多謝大家唔同嘅提點/意見
我呻完都會繼續教佢
只係我真係好攰
係學生也要課外活動，係大人也要有工餘活動。讀得叻的要，讀得辛苦更加要。課外活動，不能太功利計算。
你羨慕別的孩子，你的孩子會不會羨慕別的家長？你恨鐵不成鋼，佢會不會恨你不是李加乘？
作者: jumphigh 時間: 19-1-30 08:52
提示: 作者被禁止或刪除 內容自動屏蔽
作者: S-Kwok 時間: 19-1-30 09:07
Olympian 發表於 19-1-29 09:56
好似我仔啊！ 我仔小4了，我已經放棄叫他左手㩒簿寫字。你check 功課個程序，我個仔都唔會做得到 ...
我仔都係咁。佢哋唔係唔識做/做唔到，但係就花好多時間，如果有timer提醒就好啲，但學校邊有timer。 有時喺屋企都會忍唔住囉唆兩句，噚晚就是。 不過，最後我都有平心靜氣同佢講，我唔係責罵，只係替佢唔抵，日日浪費呢啲時間，搞到自己無娛樂時間。
老師話佢返到學校，係會呆坐一論（仲要係坐得衰衰咁嗰隻）, 然後先突然醒覺自己要做咩。
喺屋企做功課，一張餐桌都唔夠用，日日都提佢只需攞將要做嗰份功課，做完即放功課袋。 每日都係提住同一樣嘢，亦有視覺提示，都係態度依舊。
作者: lcyesther 時間: 19-1-30 09:10
Belle_Piano 發表於 19-1-28 23:23
當然佢轉數唔高都係我生嘅
我都冇响佢面前話佢蠢
我只係覺得我好攰
看到好有共鳴
樓主個女仲有過人之處已好好。
我用左七年去發掘小朋友的專長，發現係無。
讀書、音樂、美術、體育、社交......連玩也無樣專長。
好怕聽到人地話：「讀書唔叻唔緊要，總有野叻過人。」
就係無樣野叻咁點？平庸唔可以做人？
我之前好執着，而家都只有看開了。我做媽媽努力教，做到好人我已心足。努力搵多D錢補貼佢將來生活lor.
作者: little_yolky 時間: 19-1-30 09:15
little_kid 發表於 19-1-29 22:57
你囡咁似我果個。我英文科搞了幾年也未搞好。頭一兩年默書要重覆温幾廿次都唔記得，只能將勤補綴，人哋温 ...
事例一：學校家教會主席分享
話說佢仔仔成績差到無人有, 一放學顧住睇電視。佢測考成日得1X分。有一次, 佢測驗有27分, 佢阿爸見到就話：哇, 你進步咗好多喎, 繼續努力啦。
事例二：我家C6教我家阿大
話說, 我家阿大小時笨笨呆呆的, 成績中中間間。因為我從小就係尖子, 所以成日覺得佢好鬼蠢。佢初小時測驗成日都得7X-80分。不過, 我家C6每次都會鼓勵佢：呢個成績幾好呀, 比上不足, 比下有餘。而且, 成日好似媽咪咁攞100分, 下次測考就會好大壓力, 驚自己攞唔到100分。你依家咁就好易有好大進步, 可以有20分既進步空間, 好過得2分既進步空間, 容易好多, 而且你又叻, 自己溫書.............(下刪讚美100字)。
當年, 我成日話C6教到個女不思進取。不過幾年落嚟, 似乎佢係啱既。
作者: little_yolky 時間: 19-1-30 09:18
lcyesther 發表於 19-1-30 09:10
看到好有共鳴
樓主個女仲有過人之處已好好。
我用左七年去發掘小朋友的專長，發現係無。
佢成績又唔係好過人, 文又唔得武又唔得, 今次真係等乞米。
作者: picamama 時間: 19-1-30 09:46
Belle_Piano 發表於 19-1-29 23:27
我諗如果俾佢去上唱歌跳舞班
佢一定好開心
不過就一定响學術方面會再跌
本帖最後由 picamama 於 19-4-17 08:14 編輯
作者: apple~y 時間: 19-1-30 09:59
本帖最後由 apple~y 於 19-1-30 09:59 編輯
jumphigh 發表於 19-1-30 08:52
其實你可以試下, 畀佢上佢鍾意嘅興趣班 ,但係要求佢平時學習溫書嘅時候要專心啲, 咁佢可能更加有動力做好 ...
認同,我女都係甘,小朋友有自己鐘意活動,有推動力
做功課溫習會更加爽手
作者: apple~y 時間: 19-1-30 10:02
本帖最後由 apple~y 於 19-1-30 10:03 編輯
little_yolky 發表於 19-1-30 09:15
見你留言, 又鈎起我既回憶。可能有D人係天生好識搵位讚人既。
事例一：學校家教會主席分享
話說佢仔仔成績 ...
你c6好鬼正
我c6主要負責呀女康樂活動即係玩
有時呀女小小失手,我c6都會即刻大條道理
作者: little_kid 時間: 19-1-30 10:34
little_yolky 發表於 19-1-30 09:15
見你留言, 又鈎起我既回憶。可能有D人係天生好識搵位讚人既。
事例一：學校家教會主席分享
話說佢仔仔成績 ...
我就是天生唔識讚人，現在也學習中。補習老師好識揾位讚佢，記得第一次老師叫佢作篇文嚟睇，落堂後我接放學，老師專登向佢面前同我講，其實佢好ok. 篇作文好過其實學校嘅級頭十生，老師還分享俾其他同學睇。( 我心諗有乜可能呀! )老師話唔理grammar 同生字，佢作文內容好豐富，好多高年級生都寫唔到。佢聽到會心微笑，我當然聽得明老師嘅說話用意同背後意思。我小朋友開始覺得自己唔係好差。至少可提返起對英文興趣。
作者: little_yolky 時間: 19-1-30 11:09
little_kid 發表於 19-1-30 10:34
我就是天生唔識讚人，現在也學習中。補習老師好識揾位讚佢，記得第一次老師叫佢作篇文嚟睇，落堂後我接放 ...
C6話, 其實做人好似我咁, 剩係睇到D缺點, 都幾辛苦...........
作者: little_kid 時間: 19-1-30 11:52
little_yolky 發表於 19-1-30 11:09
我同你既性格, 就正正聽到老師話佢grammar又錯得勁, 生字又唔識多個。
C6話, 其實做人好似我咁, 剩 ...
我同你接收嘅訊息係一樣，只聽到要改善嘅地方. 現在我要學習口不對心，或者叫在隙縫中找佢優點，wahaha!
作者: little_yolky 時間: 19-1-30 12:14
little_kid 發表於 19-1-30 11:52
我同你接收嘅訊息係一樣，只聽到要改善嘅地方. 現在我要學習口不對心，或者叫在隙縫中找佢優點，wahaha!
...
作者: little_kid 時間: 19-1-30 12:37
little_yolky 發表於 19-1-30 12:14
我同你都唔係好人嚟, 小朋友唔鐘意我哋。
你講道理嘅，我就做得唔好要加監，wahaha!
作者: shadeslayer 時間: 19-1-30 13:05
little_yolky 發表於 19-1-30 09:15
見你留言, 又鈎起我既回憶。可能有D人係天生好識搵位讚人既。
事例一：學校家教會主席分享
話說佢仔仔成績 ...
我幾時也認為你 c6啱。養育孩子，不是訂要求高高，孩子成就便高高，咁簡單。
作者: shadeslayer 時間: 19-1-30 13:07
little_yolky 發表於 19-1-30 09:18
咪係囉, 唱歌跳舞學得好都可以搵食。我阿細之前話想做廚師, 我鬼咁開心上網搵埋VTC資料。點知, 佢睇完套漫 ...
有D大人出來做野幾年也是不知想做乜。工程何況細路。
作者: Elenalan 時間: 19-1-30 13:14
little_kid 發表於 19-1-30 10:34
我就是天生唔識讚人，現在也學習中。補習老師好識揾位讚佢，記得第一次老師叫佢作篇文嚟睇，落堂後我接放 ...
你小朋友遇到個好老師
作者: shadeslayer 時間: 19-1-30 13:15
little_yolky 發表於 19-1-30 12:14
我同你都唔係好人嚟, 小朋友唔鐘意我哋。
不止孩子，試想下下屬做一千件好事不讚，做錯一件便摌上天花板，下下問點解下屬做不到如自己一樣。
作者: happyheart 時間: 19-1-30 13:36
本帖最後由 happyheart 於 19-1-30 14:05 編輯
回覆 Belle_Piano 的帖子
咁不如係運動發展例如游泳，第時仲可以做女私教練，好多學生比學費㗎！
作者: Belle_Piano 時間: 19-1-30 13:47
happyheart 發表於 19-1-30 13:36
回覆 Belle_Piano 的帖子
咁不如係運動發展例如游泳，第時仲可以女私教練，好多學生比學費㗎！ ...
我都有諗呢方面佢又真係游水都唔差嫁
作者: little_kid 時間: 19-1-30 13:51
Elenalan 發表於 19-1-30 13:14
你小朋友遇到個好老師
多謝! 我也覺得好好彩。
作者: Belle_Piano 時間: 19-1-30 13:52
本帖最後由 Belle_Piano 於 19-1-30 13:56 編輯
picamama 發表於 19-1-30 09:46
唱歌跳舞絕對揾到食，佢EQ高人際好，將來教人又得，表演又得。
我見D芭蕾舞學校，大把人學，攪下表演又大 ...
我個囡又確實唔怕表演嫁之前佢上過芭蕾舞同爵士舞
不過上小一就cut左
你講你啱
為持好嘅關係最重要
作者: little_yolky 時間: 19-1-30 14:00
shadeslayer 發表於 19-1-30 13:15
不止孩子，試想下下屬做一千件好事不讚，做錯一件便摌上天花板，下下問點解下屬做不到如自己一樣。
...
作者: mch411 時間: 19-1-30 14:27
建議樓主上網睇返套舊片"小孩不笨"
作者: picamama 時間: 19-1-30 14:53
Belle_Piano 發表於 19-1-30 13:52
我個囡又確實唔怕表演嫁之前佢上過芭蕾舞同爵士舞
不過上小一就cut左
本帖最後由 picamama 於 19-5-4 23:06 編輯
....
作者: Jane1983 時間: 19-1-30 15:09 標題: 回覆樓主：
本帖最後由 Jane1983 於 19-1-30 15:10 編輯
家長真係需要或者做得到，係學業上扶持小朋友，計到盡都係小一至中一二，拉到盡8年，一吓就過。
好多時，升咗中學，學校唔發電郵比家長，科目又深又多，你想幫佢温亦無能為力。
作者: shadeslayer 時間: 19-1-30 15:29
little_yolky 發表於 19-1-30 14:00
以前係咁喎, 所以我好難頂依家D 90後, 完全係兩個世界既人嚟。
唔好話90後，我幾十歳也頂不順呢種態度。
作者: little_yolky 時間: 19-1-30 15:36
shadeslayer 發表於 19-1-30 15:29
唔好話90後，我幾十歳也頂不順呢種態度。
作者: shadeslayer 時間: 19-1-30 16:33
little_yolky 發表於 19-1-30 15:36
有D咁既事.............我又覺得好正常喎...................
心理上難受唔在講，這種處事方式鼓勵「唔做唔錯」，壓抑創造力和自發性。更令員工諗自己係未搵錯工，自己做的事情公司不需要。
作者: October. 時間: 19-1-30 21:44
本帖最後由 October. 於 19-1-30 21:45 編輯
蠢唔蠢，唔係以學業成績來判斷呀。
見過有小朋友幼稚園時被校長講過，反應慢，言下之意小朋友唔醒目，令到人哋阿媽暗然神傷，但小朋友小學後，越讀越好，BAND1成績升中，中學成績更加卓越，一個被以為唔係聰明既人，但人哋讀書好得。
見過更多CASE係，明明為人話頭醒尾，牙尖嘴利反應快，但讀書讀極都讀唔好，咁呢類人蠢唔蠢呢？好多時人各有長短，善長既野唔一樣，真係同蠢唔蠢冇關。
作者: Jane1983 時間: 19-1-30 22:58
回覆 October. 的帖子
乜個幼稚園校長咁講嘢？一個4、5歲的小朋友可以幾醒扒？所謂反應慢亦可能係性格比較內斂，唔等於係鈍。
作者: sumheima 時間: 19-1-31 02:14
本帖最後由 sumheima 於 19-1-31 02:25 編輯
見到你哋嘅留言令我諗翻起我女細個讀書嘅情況，同你哋講嘅一模一樣。自行入了區內的Band 1小學，幼稚園是愉快學習那些，一升上小一成個世界唔同晒！成績中英數都好差，我發覺咁樣落去唔係辦法，唔係我逼死佢就佢激死我，日日同佢溫習都好辛苦。我想比時間佢慢慢成長，但學校唔會畀時間你去慢慢進步。而且我都唔想一個六歲嘅小朋友從此對學習失去興趣，所以一年班學期尾幫佢轉校轉左去一間好遠好遠嘅私立小學。呢間學校唔出名，但係屬於鼓勵學習，不互相比較嘅另類小學 。（不是國際學校，是不大強調個人成績的英文私小）
成個小學成績應該中等,因為成績表無分數等級,只有學習能力評估,所以我都唔知佢排幾多。
詳情我唔講啦，最主要想講就係佢轉左校之後，少了讀書壓力，變得自主地喜歡看書尤其是英文書故事書。中學我俾佢讀返傳統嘅英文中學。起初佢中文、數學程度比傳統小學的差一些，但因為佢英文相對好，升英中對比那些中文小學來的同學，佢會更易掌握學科，後來愈讀愈有進步。
小學、中5之前佢都無補過習，DSE前一年先開始上大型補習社的精讀班，今年她已是港大的二年級學生。
我想分享嘅係小朋友發展唔一樣，有啲早有啲遲，家長只能盡力營造一個好嘅學習環境和進步空間，之後讀唔讀到書要佢地自己努力。
作者: yovin 時間: 19-1-31 03:59
shadeslayer 發表於 19-1-30 13:15
不止孩子，試想下下屬做一千件好事不讚，做錯一件便摌上天花板，下下問點解下屬做不到如自己一樣。
...
下屬做到自己一樣， 就唔會做下屬啦！
若要人似我除非兩個我。
作者: yovin 時間: 19-1-31 04:16
Belle_Piano 發表於 19-1-30 13:47
你講得啱
我都有諗呢方面佢又真係游水都唔差嫁
其實囡囡條命機好呀， 有個咁緊張咁錫佢嘅媽媽。
蠢唔蠢唔好咁快下定論，十歲八歲人仔炸！ 哪怕真係蠢又如何？我细個住過分租房仔，幼稚園為了串錯orange俾阿媽打到 煎皮拆骨， 嗰種痛我到而家都仲記得， 包租婆沖埋尼攬住我，求我阿媽唔好打啦！然後小學考37/40……到現在老公都成日話我蠢。又如何？我入大学到開始到現在覺得好開心、好幸福咪得囉。
原來做人好簡單: 凡事睇好嗰邊去感恩， 衰嗰邊就當天將降大任於斯人也， 然後預留最壞打算，就ok㗎啦！
反正人人嘅結局都係一樣㗎啦， 總會他朝君體也相同。開心一秒就賺咗一秒， 而且家家有本難念的經，好攰時去想攰都係親子樂趣
作者: yovin 時間: 19-1-31 04:22
yovin 發表於 19-1-31 04:16
其實囡囡條命機好呀， 有個咁緊張咁錫佢嘅媽媽。
蠢唔蠢唔好咁快下定論，十歲八歲人仔炸！ 哪怕真係蠢又 ...
大咗就冇呢種樂趣㗎啦。 其實香港人好多都好攰㗎啦，我自己想着: 全家有手有腳健健康康 不用依賴別人生存 已經好幸福㗎喇。
你睇下 我而家凌晨四點 都做緊公司嘢 趕埋年， 個腦實曬 先上嚟EK 發噏風。 幾好呀！ 至少 做香港人 仍然可以上網 又有言論自由 城市又先進， 攰啲都抵呀。
加油！互勉之
作者: October. 時間: 19-1-31 09:16
Jane1983 發表於 19-1-30 22:58
回覆 October. 的帖子
乜個幼稚園校長咁講嘢？一個4、5歲的小朋友可以幾醒扒？所謂反應慢亦可能係性格比較 ...
作者: lulumelody 時間: 19-1-31 09:34
October. 發表於 19-1-31 09:16
我都係咁諗，好多時反應慢係内向性格、納言、怕醜、行為有自己既節奏，并不等于人蠢鈍，果位小朋友睇住佢整 ...
本帖最後由 lulumelody 於 19-1-31 09:36 編輯
其實樓主應該過唔到自己，驚囡囡上唔到中學部。
作者: Jane1983 時間: 19-1-31 09:42
October. 發表於 19-1-31 09:16
我都係咁諗，好多時反應慢係内向性格、納言、怕醜、行為有自己既節奏，并不等于人蠢鈍，果位小朋友睇住佢整 ...
每次見到呢d咁既教育工作者，真係心寒。
作者: Redbean88 時間: 19-1-31 17:53
想問樓主囡囡讀邊間小學，係咪勁谷既學校所以逼得咁緊? 嘗試欣賞小朋友既優點，轉換教既方法，認真考慮下間學校究竟啱唔啱個囡，總比話佢蠢來得實際有用。
作者: Belle_Piano 時間: 19-1-31 21:26
回覆 little_yolky 的帖子
我都好想做吓body massage但係又唔知邊間好
如你有好介绍（油尖旺区）
麻烦請推薦
作者: Belle_Piano 時間: 19-1-31 21:32
yovin 發表於 19-1-31 04:16
其實囡囡條命機好呀， 有個咁緊張咁錫佢嘅媽媽。
蠢唔蠢唔好咁快下定論，十歲八歲人仔炸！ 哪怕真係蠢又 ...
你講得啱，可能過多十年廿年，回想起目前會覺得做乜咁緊張都唔奇…
作者: Belle_Piano 時間: 19-1-31 21:36
yovin 發表於 19-1-31 04:22
大咗就冇呢種樂趣㗎啦。 其實香港人好多都好攰㗎啦，我自己想着: 全家有手有腳健健康康 不用依賴別人生存 ...
作者: Belle_Piano 時間: 19-1-31 21:46
本帖最後由 Belle_Piano 於 19-1-31 21:52 編輯
回覆 Redbean88 的帖子
佢係讀Band 1小學。比起其他同類形學校，佢呢間都唔算叫谷。因為係津校，可以講話係唔洗＄讀。
我有諗過同佢轉int’l sch但會好貴
如大囡離開而家讀緊嘅小學
咁亞妹（好痴家姐）都好可能想一齊走
要俾兩個讀int’l sch 唔係唔得
但好吃力
老公唔係好想
作者: nk88 時間: 19-2-1 04:11
回覆 Belle_Piano 的帖子
但係唔適合就係唔適合如果咁落去, 最大的問題係自信心, 冇自信, 成績好難好
作者: 1998Ruby1998 時間: 19-2-1 05:20
回覆 Belle_Piano 的帖子
冇估錯的話，你果間係有兩間小學部直屬？雖然間中學係好好，但女女跟唔上，畀佢勉強升上去，到高中你就知道係一個騎虎難下嘅無底洞。你個校網升中都有校風唔錯嘅 Band 2，都可以考慮下！
識人讀同一個會嘅學校，一樣都係姐妹，可惜姐姐讀書唔係特別叻，要畀人花更多時間，每次做練習都事倍功半，做 10 份都不及人地做 1 份。careless mistakes 多到，本來答案正確都因為 careless 扣到冇分。知道佢有努力，但永遠條路就好遙遠。妹妹就好正常，同其他小朋友一樣。個媽媽對姐姐期望只要求全部科目有 7 字，甚至只求合格。佢媽媽只要求佢讀書認真，性格態度要正確。姐姐真係又畀心機，知道自己唔夠人聰明，肯做多 d 練習，今次考試都有 d 進步。又識另一個同樣 case，讀另一間學校，姐姐讀書冇咁叻，妹妹讀書好好。同樣媽媽只要求態度認真，每次盡力。
既然同學業緣份淺，作為家長就唔可以要求咁嚴格，只求佢對任何事都態度認真盡力，問心無愧，發展下其他方面。上面例子其中一個姐姐跳芭蕾舞好叻亦有興趣，媽媽都鼓勵佢發展呢方面。你女女體育有發展空間好好啊，可以做下游水、羽毛球教練之類。小班私人教練都可以搵到錢架。
作者: little_yolky 時間: 19-2-1 08:13
yovin 發表於 19-1-31 04:16
其實囡囡條命機好呀， 有個咁緊張咁錫佢嘅媽媽。
蠢唔蠢唔好咁快下定論，十歲八歲人仔炸！ 哪怕真係蠢又 ...
作者: little_yolky 時間: 19-2-1 08:15
October. 發表於 19-1-31 09:16
我都係咁諗，好多時反應慢係内向性格、納言、怕醜、行為有自己既節奏，并不等于人蠢鈍，果位小朋友睇住佢整 ...
作者: yovin 時間: 19-2-1 08:43
Belle_Piano 發表於 19-1-31 21:26
回覆 little_yolky 的帖子
我都好想做吓body massage但係又唔知邊間好
massage 中要刮沙(中國式)， 成個背脊鬆曬， 你會感覺到， 之前咩住個好重無型背囊放咗落嚟 嘅感覺。
不過要去啲正正經經嘅塲， 唔好揼邪骨。
我住九龍城，去開九龍x廣塲， 福佬村道 有間 好出名嘅 德x魚旦粉， 隔離有一間，x足一世， 叫佢介紹啲 老師傅畀你， 第一次叫佢輕手啲。
唔好去美容院摸下摸下， 要用靚嘅淋巴油， 要清身體入面嘅濕毒， 慢慢你就會冇咁容易攰。
下圖是我脊背，佢哋溝笑問我 :係唔係做地盤？
圖片附件: Screenshot_20190201-083957_Gallery.JPEG (19-2-1 08:43, 31.88 KB) / 下載次數 58
/forum.php?mod=attachment&aid=Mjg0NjcyfDE1ODE5ODE4fDE3NTA1MjExMjd8MA%3D%3D
作者: comy 時間: 19-2-1 12:10
回覆 sumheima 的帖子
可以PM 是那一間學校嗎? Thanks
作者: joeyxlma 時間: 19-2-1 15:08
本帖最後由 joeyxlma 於 19-2-1 15:08 編輯
Belle_Piano 發表於 19-1-28 20:23
仲有好多其他野教佢好多次，教到我呕血。好似寫野叫佢左手要噤住本簿等本簿唔好走來走去，呢樣野呢幾年教左 ...
其實你女几大?如果好細(初小), 會不會是體力問題. 如WEEKEND一早起身的表現會不會時正常?
你女藝術好EQ好, 不會是"蠢"的.
小朋友好直接, 即係BB 喊, 其實唔會係扭計, 更大可能是餓/冷/熱/缺安全感.
又好似發燒本身不是病, 只是病徵. 所以慢/拖拉/唔識這些"病徵", 好多時有更直接的原因, 小朋友越細, physical 問題比 psycho 問題多. 好似我女, 一眼訓就亂來.
我覺得你女的一大堆問題, 你不要一次過處理. 一次點可以處理咁多問題?
不如你把問題分開兩方面, 一方面是自理, 一方面係學業.
自理方面放鬆一些, 例如那些執書包、拿筆袋、按簿寫字之類... 唔死得人就得啦. 咁你可以先當放下一些問題先,
學業方面, 建議你了解一下點解佢 " 唔識". 有時可能是體力問題, 有時是學的東西有沖突 (看你說你好像是學校教完你好像會再教一次), 有時會是想明白 (比如學英文 GRAMMER,小朋友都會想去明點解) 之類.
另外看你描述, 你每天都用相同的方法溫書/做功課. 可否改下形式? 玩配對、作故事、比賽、等等等等
其實有些人是天生用不同方法記憶, 有些人用視覺(看書), 有些人用聽覺(你講佢聽), 有些人用行動(做exercise), 你可以發掘下她是那一種記憶類別. 再加上有趣的方法幫助記憶.
作者: little_yolky 時間: 19-2-1 15:45
joeyxlma 發表於 19-2-1 15:08
其實你女几大?如果好細(初小), 會不會是體力問題. 如WEEKEND一早起身的表現會不會時正常?
你女藝術好EQ好, ...
好似我細女咁, 唔係話唔聰明, 仲要精過無尾蛇, EQ又高, 笑點又低, 成日都好開心, 不過係唔想溫書, 唔想練習, 鐘意享受生活, 咁你有乜辦法? 咪欣常下佢世界女既性格囉, 始終以後既人生, 識做人好過識寫字既。
作者: jone219 時間: 19-2-1 17:08
同樓主我個囡好似, 不過我個囡仲嚴重啲, 佢仲要極怕羞, 細膽....當然都有優點, 就係音樂天份高
之後我帶佢去做皮紋分析, 個報告就話佢係"聽覺型",
所以教我要用"語言"去教佢, 例如要好仔細咁"講"俾佢聽個做法流程.
咁我發現真係有用.
因為我係 "視覺型"人, 所以我以前教個囡時, 都係"做"俾佢睇,
而且我個人唔係好鐘意講嘢, 亦好怕人地太多嘢講,
所以變左之前教佢所用方法唔啱, 用啱方法效果就好好多
而慢活係一種個性, 老實好難改, 家長唯有自己睇開啲.
佢緊張既嘢佢自然就會著緊
作者: yovin 時間: 19-2-1 18:18
jone219 發表於 19-2-1 17:08
同樓主我個囡好似, 不過我個囡仲嚴重啲, 佢仲要極怕羞, 細膽....當然都有優點, 就係音樂天份高
之後我帶佢 ...
本帖最後由 yovin 於 19-2-1 18:19 編輯
呀！我以為 賣綽頭 呃錢野。
咁你pm介紹我啦！我轉頭帶個老公去測試。
呢個對一世嘅 緊要啲。
作者: yovin 時間: 19-2-1 18:27
yovin 發表於 19-2-1 18:18
本帖最後由 yovin 於 19-2-1 18:19 編輯
呀！我以為 賣綽頭 呃錢野。
本帖最後由 yovin 於 19-2-1 18:27 編輯
我啲數唔好( 計得慢 數手指) 老公讀理科 一般account啲嘢 叫佢搞掂 然後我簽票票之前我多數 random 抽一、兩個 落手落腳計一次。
呢兩個星期 我前後講咗三次 今年出花紅 係獎賞性花紅 唔係一般花紅， 因為 日後長期服務金計法係唔一樣嘅。
掂之頭先一check...... 我老公完全冇聽入耳.
圖片附件: 1549016834651.JPEG (19-2-1 18:27, 20.18 KB) / 下載次數 53
/forum.php?mod=attachment&aid=Mjg0ODE1fDBkNWRkZDNifDE3NTA1MjExMjd8MA%3D%3D
作者: jone219 時間: 19-2-1 18:58
回覆 yovin 的帖子
係咪呃人我唔能夠肯定 
, 始終有啲嘢要大個左先知, 指紋我同我個囡印完第一次之後, 我有啲唔肯定個結果, 所以我帶佢印多一次, 結果都係一樣, 而且第二次果間有package 大人都可以印一次, 所以我自己印左, 個分析都幾準.
我照pm 你, 不過我無好認真咁 search 過邊間好啲, 你可以再睇下
作者: joeyxlma 時間: 19-2-1 19:10
yovin 發表於 19-2-1 18:18
本帖最後由 yovin 於 19-2-1 18:19 編輯
呀！我以為 賣綽頭 呃錢野。
作者: jone219 時間: 19-2-1 19:35
回覆 joeyxlma 的帖子
我個囡3歲時去印, 因為我覺得佢"太特別", 特別難教, 我唔識教 
好似咩都唔識, 又唔肯學, ABC教極都唔記得, 所以就試下
| 歡迎光臨 教育王國 (/) |
Powered by Discuz! X1.5 |