教育王國

標題: 勝在夠深（左丁山） [打印本頁]

作者: elbar 時間: 18-10-29 13:56 標題: 勝在夠深（左丁山）

德望學校網站圖片(互聯網)

前幾日本欄偶然提及一位相熟媽咪C講「聖心聖心，勝在夠深」，估唔到引起女性朋友追問。媽咪C又幾輕鬆咁喎，一啲都唔擔心女兒功課，佢話：「起初我都晚晚督住佢做功課嘅，一年級讀二年級課程內容噃，但過咗個幾月，見佢又應付得到，一樣有時間睇電視卡通，我咪又出番中環做freelance囉。」

算佢好彩咯，有一位聰慧女兒靠自己搞得掂。想起來，上一次有人提及女兒在聖心，已經係三十幾年前，有一次與校友賓架L在歷山大廈北京樓吃晚飯，佢話太太埋怨佢唔理女兒功課，晚晚在外應酬，於是佢每星期抽一晚提早放工，不應酬，返屋企陪在聖心就讀嘅女兒做功課。可見幾十年來聖心傳統就是「勝在夠深」，故此左丁山見到大賓架梁高美懿及李慧敏，都對呢兩位聖心知名校友，肅然起敬㗎。

虎媽A就話左丁山大驚小怪，未見過大蛇，「德望」夠深啦。點深法，MCC，不過在會所碰到宴會經理T，佢通知話回家休息喎，即將拜拜會所，一份薪高糧準但時間長嘅好工，點解捨得唔做呀？宴會經理T話：「大家識咁耐，唔怕話你知，我個女入咗德望，有好多功課，我睇到都驚，思前想後，決定返屋企陪佢溫書做功課。」香港媽咪真偉大，為咗女兒，情願放棄自己事業，故此一啲女強人上到CEO嘅位，一定係好有辦法嘅聰明勤奮女子，別人羨慕不來。

肥仔K讀啟思幼稚園時，好似極少有功課嘅，入咗電腦派位小學之後，大抵因為係非名校，應付功課冇乜困難，但時代不同了，如教育局長楊潤雄先生話齋，香港教育制度很複雜，佢懶，索性送兒女入國際學校算了。但如果冇局長的人工，送兒女入國際學校都幾惡頂，交咗咁多稅，不如從十二年免費教育制度攞番啲着數好過。讀國際學校十二年，二百萬元花費應該少不了。讀津貼學校省回二百萬元加利息足夠送兒子去英美讀四年大學有餘。但或者在本地學校讀得辛苦喎，一間幼稚園嘅K2班學生要答老師問題，以完整句子作答：（一）香港行政長官是誰，（二）購物膠袋須繳費多少？（三）說出一位議員的名字，（四）奧林匹克運動會有甚麼體操項目？左丁山見到，大嘆香港教育真複雜，但老師話K2還未操練嘅話，升上小學好難追得上功課喎，因為小一生要讀小二課程㗎。

左丁山

作者: shadeslayer 時間: 18-10-29 19:45

elbar 發表於 18-10-29 13:56
德望學校網站圖片(互聯網)

聖心頂龍在同系學校中第二深。大家只要找出同系學校名，便知邊間。

作者: Homesze 時間: 18-10-30 00:24

shadeslayer 發表於 18-10-29 19:45
聖心頂龍在同系學校中第二深。大家只要找出同系學校名，便知邊間。

smcc

作者: sweetyhome 時間: 18-10-30 11:46

shadeslayer 發表於 18-10-29 19:45
聖心頂龍在同系學校中第二深。大家只要找出同系學校名，便知邊間。

左丁山講果間係嘉諾撒聖心定聖母無玷聖心呀

作者: shadeslayer 時間: 18-10-30 13:10

sweetyhome 發表於 18-10-30 11:46
左丁山講果間係嘉諾撒聖心定聖母無玷聖心呀

梁高美懿為校友，你話呢？

作者: ilyrd 時間: 18-10-30 13:39

陳四萬都係呢間學校讀中學,話時話沙田個陣係咪重耕緊田呢.

作者: Cheeselover 時間: 18-11-1 08:58 標題: 回覆樓主

有些小學教授的內容很＂離地＂，完全不合適齡兒童智商程度，錯誤以為教會深就懂小道理，另一誤解是答對問題就是識，忘了學以致用，花氣力教得多敎得深不如鼓勵孩子多用小道理，實踐是驗證理論的最佳方法，很多深奧知識始於小道理，亦終於簡單，萬物回歸。

歡迎光臨教育王國 (/)