教育王國

標題: 由名校到屋村幼稚園「老屍」：見盡家長百態　 [打印本頁]

作者: 孟母3000 時間: 17-11-22 15:31 標題: 由名校到屋村幼稚園「老屍」：見盡家長百態　

名牌幼稚園那五年時光……
放工後的幼稚園老師，好像「屍體」：我是班主任，上午有三十多位小朋友，他們瀨屎瀨尿都關你事，你要跟家長解釋，甚麼時候瀨，瀨了幾多次；打交，你又要防止他們受傷，到他們真的受傷，又要敷冰、檢查……我真的目擊過「爆鼻」噴血要送入急症室──如果返工唔打醒十二分精神，真係好易出事。放工後，真的像條「屍」，很累。

在名校幼稚園教了五年。啲小朋友好叻，來自中產，家長很俾心機教，學校計到盡，只會收一至七月（出生）的小朋友，生日會都係得一至七月有，因為無「細 B」。面試兩歲班，小朋友已經識十種顏色、A至 Z。

家長很有禮貌，就算有何不滿，也會有禮貌同你理論：老師，他識計數，點解你唔教佢計數？我講：媽媽，兩歲班不用紙筆計數……媽媽真係會講：佢識計，點解唔俾佢計？他們永遠覺得功課唔夠深，其實，我當時做那間名校已經「超深」。

「我小朋友咩樂器都識，點解你唔俾佢做主角？」畢業禮有媽媽對我說──哪有咁多主角，一定揀又叻又乖那位，你俾他很多英文對白，一晚可以背晒那種，我不用煩……如果你的小B只是中游，他甚麼也做不了，老師也很辛苦吧！人人都覺得自己子女可以做主角，可以攞獎，事實真係咁？

學校評估，四分滿分，小朋友有三分，他的媽媽要我改成績表：改分、改 Comments：我說他「文靜」，媽媽說：「你叫他怎樣去 interview？老師咪唔鍾意佢囉？」媽媽打電話去校長處投訴。我寫「好學」可以，幾時「文靜」變成負面評語？你安慰媽媽：是否小朋友也像媽媽一樣文靜？那媽媽真的說：我文靜跟他無關，他很好動的！

可以點俾 Comments？我連「正在進步」「穩健上揚」都不可以寫……有「進步空間」，媽媽會講，即係小朋友表現強差人意？我會收信，媽媽會上網「唱」學校，不專業，無愛心。

作者: 孟母3000 時間: 17-11-22 15:32 標題: 回覆樓主

我跟校長理論過，覺得不可以做「假案」……如果小朋友能力只有一、兩分也可以有三分，那麼，攞四分的沒有公信力。人家小學會覺得我們沒有QC。最後，我會跟家長說自己俾這個分，有些家長沒問題。

最後，算罷啦，我只可以跟家長口述小朋友需要改善的地方，評估，一定要寫好。

要Happy　返學前俾足夠知識
其實，間學校都 happy，是用很多遊戲令小朋友學得深，不過，如果媽咪想小朋友真係 happy，自己返學前先俾足夠知識：學校，學的英文是考古學家、歷史學校，K2學哺乳類、爬蟲類動物……真心的，我讀中中，連自己每年都唔記得，是我要學英文；而小朋友操數操到，加減數望到馬上識做。周記、作文，閱讀理解，完全無問題。 N班，學晒 A至Z Phonics，還有流利英文對答。

學校有面試班，而現在的小學面試很多閱讀理解，很多家長都要小朋友狂做，睇很多書，我們學校會有很多 Show & Tell、新聞分享──我認同，很多小朋友都可以逼到，不過，在那名校，真的見過逼到痴線的小朋友：返學會發癲、尖叫、傻笑……那是 K2小朋友，開始上面試班，功課開始多。有些家長會轉校，然後說你「逼死」佢小朋友……其實，很多時候，是家長自己做成。

有些小朋友就算上完學校面試班甚麼都不識，在我們學校「墊底」，升上小學可以考頭十名，所以，我明白為甚麼名校這樣多人報。

真的「墊底」那些小朋友，我會拿走他們的功課，俾他們多玩，攬多啲佢哋，俾安全感；我一定跟媽媽講，做少啲功課，有時候，媽媽會接受，有些不，會講：「點解人哋小朋友可以，我個不可以？你哋點教書？」甚至報警，覺得小朋友情緒有問題，小朋友做功課時，會咬自己，打小朋友，而媽媽覺得我哋搞佢，不是因為功課問題，她要睇閉路電視。最後，她退學。

在名校，你見到人人都得，自己的不可以，便覺得有問題。

作者: 孟母3000 時間: 17-11-22 15:34 標題: 回覆樓主

我有試過勸退一位媽媽：你的小朋友真係不適合這種功課多學校……最小朋友讀得Happy 返學前俾足夠知識。

基層幼稚園　如泥的小孩　
其他同齡？可以甚麼都唔識，你做爸爸媽媽，放工會唔會俾更多嘢佢哋？名校的小朋友見識很多，我實習，加上現在教屋村幼稚園，都有六年，可以見到跟名校同齡的屋村小朋友甚麼都不識。

小朋友會講粗口，書包有煙，成陣煙味，因為爸媽食煙；很多爸爸年紀很大，老夫少妻的中港婚姻，他們生出來的，很多是 SEN，我覺得是基因問題……相反，很多好細個做了爸爸媽媽，他們的小朋友很聰明，不過，用在做古惑嘢，好像偷你枱上的物件，整蠱其他小朋友；亦因為大多數俾老人家湊，無人理，所以要很努力爭取很多東西，所以，你會覺得他們的小朋友鍾意認叻，把口好識氹人；來自中產的小朋友，屋企甚麼都有，可以不屑跟你傾偈：你有貼紙好巴閉咩？他們屋企大把玩具，根本就唔希罕──所以，你引他們學習動力，很難。

我有遇過很好的大陸家長：她小朋友 K2插班只識鄉下話，半年後識聽廣東話，媽媽很感謝我……沒錯，媽媽沒有知識，但她識尊重老師。

十幾年前，我的師傅已經叫我不要做這行……第一次實習見到小朋友覺得：嗯，原來很可愛……既然讀咗書，點解唔做？（幼師）很快已經見到自己有小朋友緣，啲仔好鍾意我，卻又會怕我。

我係有氣餒，卻未至於做到化。不過，你問我，如果生小朋友，想他們怎樣？我會想：畢業表演，有最叻小朋友可以個人講十分鐘英文；有些很「嘟」，真的捧花在台上數秒……如果我有小朋友，會希望他是那種：起碼在台上有些少對白，在台有幾分鐘表現，可以嗎？

作者: keikolau 時間: 17-11-22 20:14 標題: 回覆樓主:

樓主，主角係你定係引述文章？？十分引人入勝啊

作者: Ashleydear 時間: 17-11-22 20:14

So sad.....

作者: 孟母3000 時間: 17-11-22 20:19

keikolau 發表於 17-11-22 20:14
樓主，主角係你定係引述文章？？十分引人入勝啊

轉載

http://www.####.com/242249/

作者: ylylylyl 時間: 17-11-23 13:03

孟母3000 發表於 17-11-22 20:19
轉載

http://www.####.com/242249/

謝謝樓主分享！

作者: sweetbride119 時間: 17-11-28 00:17

提示: 作者被禁止或刪除內容自動屏蔽

作者: Zeta_Sea 時間: 17-11-28 11:11

有沒有續集?

歡迎光臨教育王國 (/)