教育王國

標題: 皇仁校慶羅永聰買校褸做司儀周六賀創校155年料逾千人出席 [打印本頁]

作者: elbar 時間: 17-11-22 09:45 標題: 皇仁校慶羅永聰買校褸做司儀周六賀創校155年料逾千人出席

前財政司長政治助理羅永聰（後排右二）噚日同一班皇仁舊生介紹母校校慶晚宴安排，呢班舊生來自各行各業，羅永聰話自己希望向公眾表達信息，皇仁舊生係好多元化嘅。

【明報專訊】皇仁書院為慶祝今年創校155周年，今個星期六（25日）喺亞洲博覽館舉行晚宴，預計有1550名師生同校友出席。皇仁畢業嘅前財政司長政治助理羅永聰（肥仔聰），到時會同前助理廣播處長陳耀華、醫學會會董鄭志文同總裁判官李慶年，一齊玩懷舊著校服做司儀，身形有番咁上下分量嘅肥仔聰話，自己為晚宴專登買番件校褸，但估唔到中學生尺碼已經啱著，唔使度身訂做。

嘉賓有黃仁龍沈祖堯陳德霖等

肥仔聰噚日帶埋一班皇仁舊生，喺佢間公關公司「蘇杭街一號」位於上環嘅辦公室開記招，簡介晚宴安排。今年晚宴主題係「Wonders Asunder」，意指遍佈社會各界嘅校友喺晚宴聚首一堂，千多名師生校友中，有250人會參與表演，主要係音樂環節。出席嘉賓名單星光熠熠，包括被稱為「皇仁之龍」嘅前律政司長黃仁龍、中大校長沈祖堯、金管局總裁陳德霖，同食衛局前局長周一嶽等。

肥仔聰形容，同其他3名司儀「度稿」相當好玩，大家分享唔同年代嘅趣事，但就難以透露詳情，因為呢啲都係外人唔明嘅圍內笑話。肥仔聰話，好多皇仁舊生嘅伴侶都係來自毗鄰嘅庇理羅士女子中學，因為大家都係官校，背景相近。有經營手工啤酒生意嘅舊生，話自己喺皇仁附近開咗間啤酒店，有記者就問佢哋以前讀中學時有無飲酒呢？舊生相視笑咗一陣，然後就齊聲話無喇。

作者: ChocoMilk33 時間: 17-11-23 11:14

好多舊同學都係皇仁仔，即使發展不是TOP的一班，人生事業也能站穩陣腳，有板有眼。

歡迎光臨教育王國 (/)